പ്രതീകാത്മക ചിത്രം
ടെക് കമ്പനികൾ തമ്മിലുള്ള ആർട്ടിഫിഷ്യൽ ഇന്റലിജൻസ് മത്സരം മറുകുന്ന സാഹചര്യത്തിൽ ശതകോടീശ്വരൻ ഇലോൺ മസ്കിന്റെ ഉടമസ്ഥതയിലുള്ള എക്സ്എഐ തങ്ങളുടെ ഏറ്റവും പുതിയ ലാർജ് ലാംഗ്വേജ് മോഡലായ 'ഗ്രോക്ക് 4.5' ഉടൻ പുറത്തിറക്കുമെന്ന് പ്രഖ്യാപിച്ചു. എഐ മോഡലായ ആന്ത്രോപിക്കിന്റെ 'ക്ലോഡ് ഓപ്പസിനോട്' കടുത്ത മത്സരം കാഴ്ചവെക്കാൻ പോന്ന രീതിയിലാണ് ഗ്രോക്ക് 4.5 രൂപകൽപ്പന ചെയ്തിരിക്കുന്നത്. നിലവിൽ സ്പേസ് എക്സ് , ടെസ്ല എന്നീ കമ്പനികളിൽ മോഡലിന്റെ സ്വകാര്യ ബീറ്റാ ടെസ്റ്റിംഗ് ആരംഭിച്ചതായി മസ്ക് എക്സിലൂടെ വ്യക്തമാക്കി.
എക്സ്എഐയുടെ പുതുതായി വികസിപ്പിച്ച 1.5 ട്രില്യൺ പാരാമീറ്ററുകളുള്ള 'V9 ഫൗണ്ടേഷൻ മോഡലിനെ' അടിസ്ഥാനമാക്കിയാണ് ഇത് നിർമിച്ചിരിക്കുന്നത്. എഐ കോഡിംഗ് പ്ലാറ്റ്ഫോമായ 'കഴ്സറിൽ' നിന്നുള്ള ഡാറ്റ ഉപയോഗിച്ച് ഈ മോഡലിന് പ്രത്യേക പരിശീലനം നൽകിയിട്ടുണ്ട്. ട്രെയിനിംഗ്, ഇൻഫറൻസ് സിസ്റ്റങ്ങൾ പൂർണമായും സി, സി++ ഭാഷകളിലേക്ക് മാറ്റുന്നതിലൂടെ അടുത്ത മൂന്ന് മാസത്തിനുള്ളിൽ സിസ്റ്റത്തിന്റെ വേഗതയിലും കാര്യക്ഷമതയിലും വൻ മുന്നേറ്റം കമ്പനി പ്രതീക്ഷിക്കുന്നുണ്ട്. കൂടാതെ എൻവിഡിയയുടെ GB300 എഐ പ്ലാറ്റ്ഫോമിന് അനുയോജ്യമായ രീതിയിലാണ് ഇതിന്റെ പ്രവർത്തനം ക്രമീകരിക്കുന്നത്.
ഗ്രോക്ക് 4.5 വിപണിയിൽ വിപ്ലവകരമായ മാറ്റങ്ങൾ വരുത്തുമെന്ന അവകാശവാദങ്ങളൊന്നും മസ്ക് നടത്തുന്നില്ല, എങ്കിലും നിലവിലെ മുൻനിര മോഡലുകൾക്ക് ഒപ്പത്തിനൊപ്പം നിൽക്കുന്ന ശക്തമായ ഒരു 'വർക്ക്ഹോഴ്സ്' ആയിരിക്കും ഇതെന്നാണ് അദ്ദേഹം നൽകുന്ന സൂചന. മുൻപതിപ്പായ ഗ്രോക്ക് 4.3ന്റെ പോരായ്മകൾ പരിഹരിച്ചാണ് പുതിയ മോഡൽ വരുന്നത്. വരും മാസങ്ങളിൽ എല്ലാ മാസവും പുത്തൻ എഐ മോഡലുകൾ പുറത്തിറക്കാനാണ് സ്പേസ് എക്സിന്റെയും എക്സ് എഐയുടെയും പദ്ധതിയെന്നും അദ്ദേഹം കൂട്ടിച്ചേർത്തു.
Tags :