കോഴിക്കോട്: വിലക്കയറ്റത്തിന്‍റെ കാലത്ത് സ്‌കൂള്‍ വിപണിയില്‍ ആശ്വാസമേകുന്ന കണ്‍സ്യൂമര്‍ഫെഡിന്‍റെ മെഗാ ത്രിവേണി സ്റ്റുഡന്‍റ്സ് മാര്‍ക്കറ്റ് മുതലക്കുളത്ത് ആരംഭിച്ചു.
വിദ്യാര്‍ഥികള്‍ക്ക് വേണ്ടതെല്ലാം കണ്‍സ്യൂമര്‍ഫെഡ് ഒരു കൂടക്കീഴില്‍ അണിനിരത്തുകയാണ് ലക്ഷ്യം. എല്ലാവിധ പഠനോപകരണങ്ങളും വിലക്കുറവിലും ഗുണമേന്മയിലും ഇവിടെ ലഭിക്കും. കണ്‍സ്യൂമര്‍ഫെഡ് ചെയര്‍മാന്‍ എം. മെഹബൂബ് മാര്‍ക്കറ്റ് ഉദ്ഘാടനം ചെയ്തു. മെച്ചപ്പെട്ട പഠനത്തിന് മികച്ച പഠനോപകരണങ്ങള്‍ എന്ന ലക്ഷ്യം മുന്‍നിര്‍ത്തിയാണ് സ്റ്റുഡന്‍റ്സ് മാര്‍ക്കറ്റ് പ്രവര്‍ത്തിക്കുന്നത്. ത്രിവേണി നോട്ട് ബുക്കുകള്‍ വിലക്കുറവില്‍ ലഭ്യമാകുന്ന ത്രിവേണി നോട്ട്ബുക്ക് ഗ്യാലറി ഇവിടെയുണ്ട്.
സ്‌കൂള്‍ ബാഗ് രംഗത്തെ പ്രമുഖ ബ്രാന്‍റുകളായ സ്‌കൂബീഡേ , ഒഡീസിയ, വൈല്‍ഡ് ക്രാഫ്റ്റ്, വിക്കി , അമേരിക്കന്‍ ടൂറിസ്റ്റ് തുടങ്ങിയവയോടോപ്പം സാധാരണ ബ്രാന്‍റിലുള്ള ആകര്‍ഷകങ്ങളായ സ്‌കൂള്‍ ബാഗുകളും വിലക്കുറവില്‍ ലഭിക്കും.
സ്‌കൂള്‍ വിദ്യാര്‍ഥികള്‍ക്കാവശ്യമായ ഷൂകള്‍ വിലക്കുറവില്‍ ലഭിക്കുന്ന ഷൂമാര്‍ട്ടും ഒതരുക്കിയിട്ടുണ്ട്, ജോണ്‍സ്, പോപ്പി , ദിനേശ്, മാരാരി തുടങ്ങിയ പ്രമുഖ കമ്പനികളുടെ ഏറ്റവും പുതിയ മോഡലുകളിലുള്ള വിവിധ തരം കുടകള്‍ അണിനിരത്തുന്ന അന്പ്രല്ലഹൗസ്, കൊച്ചു കുട്ടികള്‍ക്കായുള്ള വിവിധതരം കളിപ്പാട്ടങ്ങളും, കുട്ടികളുടെ കൂടെയെത്തുന്ന അമ്മമാര്‍ക്ക് ആകര്‍ഷകമായ വിലക്കുറവില്‍ ഗൃഹോപകരണങ്ങളും ലഭ്യമാകുന്ന കിഡ്‌സ് ആന്‍ഡ് മദേഴ്‌സ് കോര്‍ണര്‍ എന്നിവ ഒരുക്കിയിട്ടുണ്ട്. പെന്‍സില്‍ ബോക്‌സ്, ലഞ്ച് ബോക്‌സ്, വാട്ടര്‍ ബോട്ടില്‍, പേന, പെന്‍സില്‍, ഇന്‍സ്ട്രുമെന്‍റ് ബോക്‌സ്, കളര്‍ പെന്‍സിലുകള്‍ തുടങ്ങിയവയും ലഭിക്കും.
മെഗാ ത്രിവേണി സ്റ്റുഡന്‍റ്സ് മാര്‍ക്കറ്റിന് പുറമേ എല്ലാ ത്രിവേണി സൂപ്പര്‍മാര്‍ക്കറ്റുകളിലും സ്റ്റുഡന്‍റസ് മാര്‍ക്കറ്റ് പ്രത്യേകമായി സജജീകരിക്കും. കോഴിക്കോട് ജില്ലയില്‍ 45 കേന്ദ്രങ്ങളിലും വയനാട് ജില്ലയില്‍ 15 കേന്ദ്രങ്ങളിലും സഹകരണ സംഘങ്ങളുടെ ആഭിമുഖ്യത്തില്‍ സ്റ്റുഡന്‍റസ് മാര്‍ക്കറ്റുകള്‍ ആരംഭിക്കും. ജൂണ്‍ 15 വരെ എല്ലാ സ്റ്റുഡന്‍റ്സ് മാര്‍ക്കറ്റുകളും പ്രവര്‍ത്തിക്കും.