ബാസ്‌കറ്റ്‌ ഫൈനൽ ഡേ
Saturday, June 14, 2025 2:01 AM IST
കൊച്ചി: പ്രഥമ 3x3 അണ്ടർ 23 ദേശീയ പുരുഷ-വനിതാ ബാസ്‌കറ്റ്‌ബോള്‍ ചാമ്പ്യന്‍ഷിപ്പിന്‍റെ ക്വാര്‍ട്ടര്‍, സെമി, ഫൈനല്‍ മത്സരങ്ങള്‍ ഇന്നു നടക്കും. മൂന്നാം ജയത്തോടെ കേരളത്തിന്‍റെ പുരുഷ ടീമും നേരിട്ട് ക്വാര്‍ട്ടര്‍ ഫൈനല്‍ ഉറപ്പിച്ചു.
ലീഗിലെ അവസാന മത്സരത്തില്‍ കേരള പുരുഷന്മാര്‍ ആന്ധ്രാപ്രദേശിനെ (19-6) പരാജയപ്പെടുത്തി ഗ്രൂപ്പ് ബിയില്‍ ഒന്നാമതെത്തി. കേരള വനിതകള്‍ പൂള്‍ എ ചാമ്പ്യന്മാരായി ക്വാര്‍ട്ടര്‍ ഉറപ്പാക്കിയിരുന്നു. തമിഴ്‌നാട്, ഉത്തര്‍പ്രദേശ്, ഹരിയാന, കര്‍ണാടക ടീമുകളും ഇരുവിഭാഗത്തില്‍ നോക്കൗട്ട് റൗണ്ടിലേക്ക് ഇടം നേടി.
മധ്യപ്രദേശ് വനിതാ ടീമും, തെലുങ്കാന പുരുഷ ടീമും ക്വാര്‍ട്ടര്‍ ഫൈനലില്‍ ഇടം നേടിയിട്ടുണ്ട്. പശ്ചിമ ബംഗാള്‍-ഗുജറാത്ത് പ്രീക്വാര്‍ട്ടര്‍ വിജയികളാണ് ക്വാര്‍ട്ടറില്‍ കേരള പുരുഷ ടീമിന്‍റെ എതിരാളികള്‍. വനിതകള്‍ ഹരിയാന-രാജസ്ഥാന്‍ മത്സരത്തിലെ വിജയികളെ നേരിടും.