12 മലയാളി കൗമാര താരങ്ങൾ മലേഷ്യയിൽ
Friday, June 13, 2025 12:37 AM IST
കൊച്ചി: മലയാളികളായ 12 യുവ ഫുട്ബോൾ താരങ്ങൾക്ക് മലേഷ്യയിൽ പരിശീലനത്തിന് അവസരം. സൂപ്പർ ലീഗ് കേരളയാണ്(എസ്എൽകെ) 12 ദിവസത്തെ പരിശീലനത്തിനു കേരളത്തിൽനിന്നുള്ള താരങ്ങൾക്ക് അവസരമൊരുക്കിയത്. 15 -17 പ്രായത്തിലുള്ളവരാണു പരിശീലനത്തിനു തെരഞ്ഞെടുക്കപ്പെട്ടവര്‍.
സൂപ്പർ ലീഗ് കേരളയും ആന്ദ്രേ ഇനിയേസ്റ്റ സ്‌കൗട്ടിംഗും ചേർന്നൊരുക്കുന്ന ഫുട്ബോൾ പരിശീലന പദ്ധതിയുടെ ഭാഗമായാണ് താരങ്ങളുടെ അന്താരാഷ്‌ട്ര പരിശീലനം. സംഘം ഇന്നലെ മലേഷ്യലേക്കു തിരിച്ചു.
സ്പാനിഷ് ലാ ലിഗ ക്ലബ്ബായ വിയ്യാറയലിന്‍റെ അക്കാഡമിയിലാണ് കേരള താരങ്ങൾക്കു തീവ്രപരിശീലനം ലഭിക്കുക. 24വരെ നീളുന്ന പരിശീലനത്തിന്‍റെ മുഴുവൻ ചെലവും സൂപ്പർ ലീഗ് കേരളയാണ് വഹിക്കുന്നത്.
കേരളത്തിലെ യുവതാരങ്ങൾക്ക് രാജ്യാന്തര പരിചയവും പ്രഫഷണൽ മികവും നൽകുകയാണ് ലക്ഷ്യമെന്ന് കേരള ഫുട്ബോൾ അസോസിയേഷൻ പ്രസിഡന്‍റ് നവാസ് മീരാൻ, എസ്എൽകെ ഡയറക്ടർ ഫിറോസ് മീരാൻ, സിഇഒ മാത്യു ജോസഫ് എന്നിവർ അറിയിച്ചു.
താരങ്ങൾ ഇവർ
ഹൃഷുബ് കോയോന്‍, പി. അല്‍ത്താഫ് റഹ‌്മാന്‍, പ്രയാഗ് എം. മറോളി (കണ്ണൂര്‍), ആരോണ്‍ അരൂജ (തൃശൂര്‍), അഫ്രാദ് നിഹാല്‍ മച്ചിങ്കല്‍, സി. മുഹമ്മദ് നിഹാൽ (മലപ്പുറം), ജൊഹാന്‍ ജിയോ മാത്യു, ഈവ് ആന്‍റണി, സിയോണ്‍ മാര്‍ട്ടിന്‍, അഭിനവ് ഷാജി, പി. എശ്വന്ത് മൂണ്‍ (എറണാകുളം), കെ.വി. ഫലാഹ് ലത്തീഫ് (പാലക്കാട്) എന്നിവരാണ് ടീമിലുള്ളത്. പരിശീലകന്‍: അഭിജിത്ത്.