തനുഷ്- അന്‍ഷുല്‍ റിക്കാര്‍ഡ്
Tuesday, June 10, 2025 11:43 PM IST
നോര്‍ത്താംപ്ടണ്‍: ഇംഗ്ലണ്ട് ലയണ്‍സിന് എതിരായ രണ്ടാം ചതുര്‍ദിന ക്രിക്കറ്റ് മത്സരത്തില്‍ ഇന്ത്യ എ സമനില വഴങ്ങിയെങ്കിലും അവസാനദിനം റിക്കാര്‍ഡ് ബുക്കില്‍ മഷി പുരണ്ടു.
ഇന്ത്യ എയുടെ രണ്ടാം ഇന്നിംഗ്‌സില്‍ തനുഷ് കൊടിയനും അന്‍ഷുല്‍ കംബോജും ചേര്‍ന്ന് എട്ടാം വിക്കറ്റില്‍ അഭേദ്യമായ 149 റണ്‍സ് കൂട്ടുകെട്ടുണ്ടാക്കി.
ഇന്ത്യ എയുടെ ചരിത്രത്തില്‍ എട്ടാം വിക്കറ്റിലെ ഏറ്റവും ഉയര്‍ന്ന കൂട്ടുകെട്ടാണിത്. 2010ല്‍ വെസ്റ്റ് ഇന്‍ഡീസ് എയ്ക്ക് എതിരേ ചേതേശ്വര്‍ പൂജാരയും ജസ്‌കരന്‍ദീപ് സിംഗ് ബട്ടറും ചേര്‍ന്നു നേടിയ 137 റണ്‍സായിരുന്നു ഇതുവരെയുള്ള റിക്കാര്‍ഡ്.
തനുഷ് 108 പന്തില്‍ 90ഉം അന്‍ഷുല്‍ 86 പന്തില്‍ 51ഉം റണ്‍സുമായി പുറത്താകാതെനിന്നു. മത്സരം സമനിലയില്‍ കലാശിച്ചു. സ്‌കോര്‍: ഇന്ത്യ എ 348, 417/7 ഡിക്ലയേര്‍ഡ്. ഇംഗ്ലണ്ട് ലയണ്‍സ് 327, 32/3.