തുടര്‍ച്ചയായ 14-ാം ജയം; ഡയമണ്ട് ഡുപ്ലാന്‍റിസ്
Saturday, June 14, 2025 2:01 AM IST
ഓസ്ലോ: ഡയമണ്ട് ലീഗില്‍ ഡയമണ്ടായി തിളങ്ങി സ്വീഡിഷ് പോള്‍വോള്‍ട്ടര്‍ അര്‍മാന്‍ഡ് ഡുപ്ലാന്‍റിസ്. ഓസ്ലോ ഡയമണ്ട് ലീഗില്‍ 6.15 മീറ്റര്‍ ക്ലിയര്‍ ചെയ്ത് പുരുഷ പോള്‍വോള്‍ട്ടില്‍ ഡുപ്ലാന്‍റിസ് സ്വര്‍ണം കരസ്ഥമാക്കി. ഓസ്ലോ ഡയമണ്ട് ലീഗിലെ മീറ്റ് റിക്കാര്‍ഡാണിത്. ഡയമണ്ട് ലീഗുകളില്‍ ഈ 25കാരന്‍റെ തുടര്‍ച്ചയായ 14-ാം സ്വര്‍ണമാണ്.
2017 യൂജിന്‍ പോരാട്ടത്തിലൂടെയാണ് ഡുപ്ലാന്‍റിസ് ഡയമണ്ട് ലീഗ് ആരംഭിച്ചത്. അന്ന് നാലാം സ്ഥാനത്തു ഫിനിഷ് ചെയ്തു. 2018 സ്റ്റോക്‌ഹോം ഡയമണ്ട് ലീഗിലാണ് ആദ്യ സ്വര്‍ണം.
ഓസ്ലോ ഡയമണ്ട് ലീഗില്‍ ആദ്യ സ്വര്‍ണം നേടിയത് 2020ല്‍. 2023 സൂറിച്ച് മുതല്‍ 2025 ഓസ്ലോ വരെയായി അവസാന 14 ഡയമണ്ട് ലീഗിലും ഡുപ്ലാന്‍റിസിനെ വെല്ലാന്‍ ആര്‍ക്കും സാധിച്ചിട്ടില്ല.