23

ന്യൂയോർക്ക്: മാസങ്ങൾക്കു ശേഷം ഇറാനും അമേരിക്കയും മധ്യസ്ഥരുടെ സഹായത്താൽ ആശയവിനിമയം നടത്തിയത് പശ്ചിമേഷ്യാ സംഘർഷം അവസാനിക്കുന്നതിൽ പുതിയ പ്രതീക്ഷയ്ക്കു തിരികൊളുത്തി. അതേസമയം എന്തെങ്കിലും നിർണായക തീരുമാനത്തിലേക്കു നീങ്ങുന്നതായി സൂചനയില്ല.

യുഎൻ പൊതുസഭാ സമ്മേളനത്തിൽ പങ്കെടുക്കാൻ ന്യൂയോർക്കിലെത്തിയ ഇറാൻ വിദേശകാര്യമന്ത്രി അബ്ബാസ് അരാഗ്ചിയുമായി അമേരിക്കൻ പ്രതിനിധികളായ സ്റ്റീവ് വിറ്റ്കോഫും ജാരദ് കുഷ്നറും മധ്യസ്ഥരുടെ സഹായത്താൽ ബന്ധപ്പെടുകയായിരുന്നു.

ഇറാൻ വിഷയത്തിൽ മധ്യസ്ഥത വഹിക്കുന്നവരുമായി സ്റ്റീവും ജാരദും ന‍ടത്തിയ കൂടിക്കാഴ്ച ഫലപ്രദമായിരുന്നുവെന്ന് അമേരിക്കൻ പ്രസിഡന്‍റ് ട്രംപ് അറിയിച്ചു.

ഖത്തറിന്‍റെ മധ്യസ്ഥതയിലാണ് അമേരിക്കൻ പ്രതിനിധികളെ ബന്ധപ്പെട്ടതെന്ന് ഇറേനിയൻ വിദേശകാര്യ മന്ത്രാലയം വക്താവ് ഇസ്മയിൽ ബാഗേയി ടെഹ്റാനിൽ അറിയിച്ചു. പശ്ചമേഷ്യയിലെ എല്ലാ മുന്നണികളിലും യുദ്ധം അവസാനിപ്പിക്കണം എന്നതടക്കമുള്ള ഇറാന്‍റെ നിബന്ധനകൾ കൈമാറിയിട്ടുണ്ടെന്നും വക്താവ് കൂട്ടിച്ചേർത്തു.

യുഎൻ സമ്മേളനത്തിനെത്തിയ ഖത്തർ പ്രധാനമന്ത്രി ഷെയ്ഖ് മുഹമ്മദ് അൽ താനിയുമായി ഇറേനിയൻ വിദേശാക്രമന്ത്രി അബ്ബാസ് ആരാഗ്ചി കൂടിക്കാഴ്ച നടത്തിയതായി സ്ഥീകരിച്ചിട്ടുണ്ട്.

ജൂലൈയിൽ അവസാനിച്ച ഇറാൻ-യുഎസ് സമാധാന നീക്കങ്ങൾക്കു ജീവൻ വച്ചത് അന്താരാഷ്‌ട്ര പിണയിൽ എണ്ണവില വീണ്ടും താഴാൻ സഹായിച്ചു.

അമേരിക്കയിൽ മിഡ്ടേം തെരഞ്ഞെടുപ്പ് നടക്കുന്ന നവംബർ മൂന്നിനുശേഷം ഇറാനുമായി സമാധാന കരാർ ഉണ്ടാക്കാനായേക്കുമെന്ന് പ്രസിഡന്‍റ് ട്രംപ് യുഎൻ പ്രസംഗത്തിൽ പ്രത്യാശിച്ചിരുന്നു. സമാധാന കരാറിനു തയാറായില്ലെങ്കിൽ ഇറാനെ ഉന്മൂലനം ചെയ്യേണ്ടിവരുമെന്നും ട്രംപ് ഭീഷണി മുഴക്കുകയുണ്ടായി.

Tags : Gulf War Iran America UN