23

ന്യൂഡൽഹി: കണ്ണൂർ സർവകലാശാലയിലെ മലയാളം വിഭാഗത്തിൽ ഏറെ വിവാദങ്ങൾ സൃഷ്ടിച്ച അസോസിയേറ്റ് പ്രഫസർ നിയമനവുമായി ബന്ധപ്പെട്ട മുഴുവൻ രേഖകളും സുപ്രീംകോടതിക്ക് കൈമാറാൻ സർവകലാശാല തീരുമാനിച്ചു. വിവാദമായ ഇന്‍റർവ്യൂ ലിസ്റ്റും റിസർച്ച് സ്കോറും ഉൾപ്പെടെയുള്ള സുപ്രധാന രേഖകളാണ് കോടതിയുടെ പരിശോധനയ്ക്കായി നൽകുന്നത്. ജസ്റ്റീസ് മനോജ് മിശ്ര, ജസ്റ്റീസ് വിജയ് ബിഷ്ണോയ് എന്നിവരടങ്ങുന്ന ബെഞ്ചാണ് നിലവിൽ ഈ കേസ് പരിഗണിക്കുന്നത്.

നിയമനത്തെ ന്യായീകരിച്ച് മുൻപ് സമർപ്പിച്ച സത്യവാംഗ്‌മൂലം പിൻവലിക്കുന്നത് കേസിന്‍റെ മുന്നോട്ടുള്ള പോക്കിനെ പ്രതികൂലമായി ബാധിക്കുമെന്ന ലഭിച്ച നിയമോപദേശത്തിന്‍റെ അടിസ്ഥാനത്തിലാണ് സർവകലാശാല പുതിയ നിലപാട് സ്വീകരിച്ചിരിക്കുന്നത്. സത്യവാംഗ്‌മൂലം പിൻവലിക്കാതെ തന്നെ മുഴുവൻ രേഖകളും നേരിട്ട് കോടതിയിൽ ഹാജരാക്കി നിയമന നടപടികളിലെ വസ്തുതകൾ ബോധ്യപ്പെടുത്താനാണ് ഇപ്പോൾ സർവകലാശാലയുടെ തീരുമാനം.

ഇതിനായി മുതിർന്ന അഭിഭാഷകൻ നിഖിൽ ഗോയൽ, അഭിഭാഷകൻ പി.എസ്. സുൽഫിക്കർ അലി എന്നിവർ സർവകലാശാലയ്ക്ക് വേണ്ടി സുപ്രീംകോടതിയിൽ ഹാജരാകും. സർവകലാശാലയുടെ ഈ പുതിയ നീക്കത്തിന് സംസ്ഥാന സർക്കാരിന്‍റെ പിന്തുണയും ലഭ്യമാണ്.

പരിശോധനയിൽ റിസർച്ച് സ്കോറിന്‍റെ പട്ടികയിൽ പ്രിയ വർഗീസ് അഞ്ചാം സ്ഥാനത്തായിരുന്നുവെങ്കിലും, പിന്നീട് നടന്ന ഇന്‍റർവ്യൂവിന് ശേഷമാണ് അവർ റാങ്ക് പട്ടികയിൽ ഒന്നാം സ്ഥാനത്തേക്ക് എത്തിയത്.

Tags : PriyaVarghese Appointment KannurUniversity SupremeCourt Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash