18

പരവൂർ: കായംകുളം ജംഗ്ഷനിൽ നിർമാണം പുരോഗമിക്കുന്ന റെയിൽവേ ഫൂട്ട് ഓവർബ്രിഡ്ജിന്റെ ഗർഡറുകൾ സ്ഥാപിക്കുന്ന പ്രവർത്തനങ്ങളുടെ ഭാഗമായി നാളെ മൂന്ന് പ്രധാന ട്രെയിനുകൾ ആലപ്പുഴ വഴി തിരിച്ചുവിടാൻ റെയിൽവേ തീരുമാനിച്ചു. ഇതോടെ കോട്ടയം വഴിയുള്ള യാത്രക്കാർക്ക് ഈ ട്രെയിനുകളുടെ സേവനം ലഭ്യമാകില്ല.

മംഗളൂരു സെൻട്രൽ – തിരുവനന്തപുരം എക്സ്പ്രസ് (16348): നാളെ മംഗളൂരുവിൽ നിന്ന് പുറപ്പെടുന്ന ട്രെയിൻ എറണാകുളം ടൗണിനും കായംകുളത്തിനുമിടയിൽ ആലപ്പുഴ വഴി സർവീസ് നടത്തും. പിറവം റോഡ്, കോട്ടയം, ചങ്ങനാശേരി, തിരുവല്ല, ചെങ്ങന്നൂർ, മാവേലിക്കര എന്നീ സ്റ്റേഷനുകളിലെ സ്റ്റോപ്പുകൾ ഈ ട്രെയിൻ ഒഴിവാക്കും. പകരം എറണാകുളം ജംഗ്ഷൻ, ആലപ്പുഴ, അമ്പലപ്പുഴ എന്നിവിടങ്ങളിൽ അധിക സ്റ്റോപ്പ് അനുവദിക്കും.

രാമേശ്വരം – തിരുവനന്തപുരം അമൃത എക്സ്പ്രസ് (16344): നാളെ രാമേശ്വരത്ത് നിന്ന് പുറപ്പെടുന്ന ട്രെയിൻ എറണാകുളം ടൗണിനും കായംകുളത്തിനുമിടയിൽ ആലപ്പുഴ വഴിയാകും സഞ്ചരിക്കുക. കോട്ടയം, ചങ്ങനാശേരി, തിരുവല്ല, ചെങ്ങന്നൂർ, മാവേലിക്കര സ്റ്റോപ്പുകൾ ഉണ്ടായിരിക്കില്ല. പകരം എറണാകുളം ജംഗ്ഷൻ, ആലപ്പുഴ, അമ്പലപ്പുഴ സ്റ്റേഷനുകളിൽ ട്രെയിൻ നിർത്തും.

നിലമ്പൂർ റോഡ് – തിരുവനന്തപുരം നോർത്ത് രാജ്യറാണി എക്സ്പ്രസ് (16350): നാളെ നിലമ്പൂരിൽ നിന്ന് പുറപ്പെടുന്ന ട്രെയിനും ആലപ്പുഴ വഴിയാകും സർവീസ് നടത്തുക. കോട്ടയം, ചങ്ങനാശേരി, തിരുവല്ല, ചെങ്ങന്നൂർ, മാവേലിക്കര സ്റ്റേഷനുകളിലെ സ്റ്റോപ്പുകൾ ഒഴിവാക്കി പകരം എറണാകുളം ജംഗ്ഷൻ, ആലപ്പുഴ, അമ്പലപ്പുഴ എന്നിവിടങ്ങളിൽ സ്റ്റോപ്പ് അനുവദിക്കും.

കായംകുളം ജംഗ്ഷനിൽ പുതിയ ഫുട്ട് ഓവർബ്രിഡ്ജിന്റെ ഗാംഗ്‌വേ ഗർഡറുകൾ സ്ഥാപിക്കുന്നതിനാണ് ട്രെയിനുകൾ വഴിതിരിച്ചുവിടുന്നത്. കോട്ടയം റൂട്ടിലെ സ്ഥിരം യാത്രക്കാർ നാളത്തെ ഈ മാറ്റം ശ്രദ്ധിക്കണമെന്ന് തിരുവനന്തപുരം ഡിവിഷൻ റെയിൽവേ അധികൃതർ അറിയിച്ചു.

Tags : passenger trains railway