13

കൊച്ചി: വരാപ്പുഴ അതിരൂപതയുടെ വികാരി ജനറൽമാരായ ഫാ. മാത്യു കല്ലിങ്കലിനും ഫാ. മാത്യു ഇലഞ്ഞിമറ്റത്തിനും ലെയോ പതിനാലാമൻ മാർപാപ്പ 'ചാപ്ലിൻ ടു ഹിസ് ഹോളിനെസ്' ബഹുമതി നൽകി ആദരിച്ചു.

വരാപ്പുഴ അതിരൂപതയുടെ വൈദിക സമ്മേളനത്തിൽ വച്ച് ആർച്ച്ബിഷപ്പ് ഡോ. ജോസഫ് കളത്തിപറമ്പിൽ നിയുക്ത വൈദികർക്ക് സ്ഥാന ചിഹ്നങ്ങൾ നൽകി ആദരിച്ചു. സഹായ മെത്രാൻ ഡോ. ആന്‍റണി വാലുങ്കൽ ആശംസകൾ അറിയിച്ചു. സെന്‍റ് ഫ്രാൻസിസ് അസീസി കത്തീഡ്രൽ ഇടവകാംഗമായ മോൺ. മാത്യു കല്ലിങ്കൽ ദീർഘനാൾ വരാപ്പുഴ അതിരൂപതയുടെ പ്രൊകുറേറ്റർ, ഇഎസ്എസ്എസ് ഡയറക്ടർ, അസീസി വിദ്യാനികേതൻ ഇൻസ്റ്റിസ്റ്റ്യൂഷൻസ് ഡയറക്ടർ എന്ന നിലകളിൽ സേവനമനുഷ്ഠിച്ചിട്ടുണ്ട്.

മരട് മേരി മാഗ്ദലിൻ ഇടവകാംഗമായ മോൺ. മാത്യു ഇലഞ്ഞിമറ്റം തോട്ടക്കാട്ടുകര പള്ളി വികാരി, മൈനർ സെമിനാരി റെക്ടർ, തുടർന്ന് ദീർഘകാലം ഓസ്ട്രിയയിൽ വികാരിയായും തുടർന്ന് വരാപ്പുഴ അതിരൂപതയുടെ സെമിനാരി വിദ്യാർഥികൾ, വൈദികർ, സന്യസ്തർ എന്നിവർക്കുവേണ്ടിയുള്ള വികാരി ജനറൽ ആയും സേവനമനുഷ്ഠിച്ചു വരുന്നു.

Tags : FrMathewKallingal FrMathewElanjimattam PapalAward PopeFrancis