19

കൊച്ചി: വെള്ളാപ്പള്ളി നടേശനെയും എസ്എന്‍ഡിപി യോഗത്തിന്‍റെ ഭരണസമിതിയെയും ഹൈക്കോടതി അയോഗ്യരാക്കിയതില്‍ ആഹ്ലാദപ്രകടനവും മധുര വിതരണവുമായി എസ്എന്‍ഡിപി സംരക്ഷണ മുന്നണി പറവൂര്‍ ഘടകം.

പറവൂരില്‍ സംഘടിപ്പിച്ച പരിപാടി ജില്ല സെക്രട്ടറി എ.ആര്‍. പ്രകാശന്‍ ഉദ്ഘാടനം ചെയ്തു. സംസ്ഥാന കമ്മിറ്റി അംഗം സി.ഡി. ഉണ്ണികൃഷ്ണന്‍, സതീശന്‍ തത്തപ്പിള്ളി, കെ.ജി. മധു പ്രദീപ്, തട്ടാപ്പടി ബൈജു, വി.എസ്. ബോബന്‍ തുടങ്ങി നിരവധി പേര്‍ ആഹ്ലാദപ്രകടനത്തില്‍ പങ്കെടുത്തു.

എസ്എന്‍ഡിപിയുടെ ചരിത്രത്തില്‍ ആദ്യമായാണ് ജനറല്‍ സെക്രട്ടറിയെ കോടതി പുറത്താക്കുന്നത്. കമ്പനി നിയമലംഘനം ചൂണ്ടിക്കാട്ടിയാണ് ജസ്റ്റീസ് ടി.ആര്‍. രവിയുടെ ബെഞ്ച് ഉത്തരവിട്ടത്. ഒമ്പതു വര്‍ഷമായി സ്ഥാപനം വാര്‍ഷിക റിട്ടേണ്‍ സമര്‍പ്പിച്ചിട്ടില്ലെന്ന് കണ്ടെത്തിയാണ് നടപടി.

വെള്ളാപ്പള്ളി നടേശനെ അയോഗ്യനാക്കിയ ഹൈക്കോടതി വിധിയെ ശിവഗിരി മഠം സ്വാഗതം ചെയ്തു. കോടതി വിധി ശ്രീനാരായണ ഭക്തര്‍ക്ക് ആശ്വാസമുള്ള പ്രഖ്യാപനമാണിത് എന്നാണ് ശിവഗിരി മഠാധിപതി സ്വാമി സച്ചിദാനന്ദ പറഞ്ഞത്.

Tags : Sweets disqualification Vellappally Natesan sndp