കൊച്ചി: എറണാകുളം മാര്‍ക്കറ്റിലെ കടവുഭാഗം സിനഗോഗ് ആക്രമണ കേസിലെ പ്രതി എബിന്‍ പോളിന്‍റെ മൊബൈല്‍ ഫോണില്‍ നിന്നും നിര്‍ണായക വിവരങ്ങള്‍ പൊലിസിന് ലഭിച്ചു. ഫോണില്‍ നിന്നും ഡിലീറ്റ് ചെയ്യപ്പെട്ട ചാറ്റുകളും ചിത്രങ്ങളുമടക്കമുള്ള വിവരങ്ങളാണ് പൊലിസിന് ലഭിച്ചിരിക്കുന്നത്.

എബിന്‍ പോളിന്‍റെ മൊഴിയില്‍ പറഞ്ഞ ബോസ് എന്ന വ്യക്തി നല്‍കിയ ടാസ്‌കുകളുമായാണ് പ്രതി മുന്നോട്ട് പോയിരുന്നത്. എബിന്‍ പോള്‍ ഫോണില്‍ ആയുധങ്ങള്‍ തെരഞ്ഞെതായി പൊലിസ് കണ്ടെത്തിയിരുന്നു. വിവിധ സൈറ്റുകളില്‍ ഇയാള്‍ ആയുധങ്ങള്‍ തെരഞ്ഞിട്ടുണ്ട്. ഇതു സംബന്ധിച്ച വിവരങ്ങള്‍ ഫോണിന്റെ സെര്‍ച്ച് ഹിസ്റ്ററിയില്‍ നിന്ന് പൊലിസിന് ലഭിച്ചിട്ടുണ്ട്.

പ്രതിക്ക് ആയുധം എത്തിച്ച് നല്‍കാന്‍ ടെലിഗ്രാം ചാറ്റിലെ ബോസ് നീക്കം നടത്തിയതായി കഴിഞ്ഞ ദിവസം അന്വേഷണസംഘം കണ്ടെത്തിയിരുന്നു. പ്രതിയെ പ്രത്യേക അന്വേഷണസംഘം ചോദ്യം ചെയ്ത് വരികയാണ്. ബോസിനെ നേരില്‍ അറിയില്ലെന്നാണ് ഇയാള്‍ അന്വേഷണ സംഘത്തിന് നല്‍കിയിട്ടുള്ള മൊഴി. ശാസ്ത്രീയ തെളിവുകളുടെ പിന്‍ബലത്തോടെ ഇത് കണ്ടെത്താനാകുമെന്ന പ്രതീക്ഷയിലാണ് അന്വേഷണസംഘം.

ഇതിന്‍റെ ഭാഗമായി പ്രതിയുടെ പക്കല്‍ നിന്നു പിടികൂടിയ ഇലക്ട്രോണിക് വസ്തുക്കള്‍ ശാസ്ത്രീയ പരിശോധനയ്ക്ക് വിധേയമാക്കും. കൂടാതെ ഇയാളുടെ ബാങ്ക് അക്കൗണ്ടുകളും പൊലിസ് പരിശോധിച്ചു വരികയാണ്. പഠനാവശ്യങ്ങള്‍ക്കടക്കം വിദേശത്ത് പോയ എബിന്‍റെ വിദേശ ബന്ധങ്ങളിലും അന്വേഷണം നടക്കുന്നുണ്ട്.

ഒക്ടോബര്‍ 12ന് പുലര്‍ച്ചെ 2.30 ഓടെയാണ് എറണാകുളം മാര്‍ക്കറ്റിലെ കടവുഭാഗം സിനഗോഗിന് മുന്‍വശമുള്ള ബ്ലോസം നഴ്സറിയുടെ ബാനറിന് പ്രതി തീയിട്ടത്. പശ്ചിമേഷ്യന്‍ സംഘര്‍ഷങ്ങളുടെ പശ്ചാത്തലത്തില്‍ 24 മണിക്കൂറും സംരക്ഷണം ഏര്‍പ്പെടുത്തിയിട്ടുള്ള സിനഗോഗിന് നേരെയുള്ള ആക്രമണത്തില്‍ സുരക്ഷാവീഴ്ചയുണ്ടായ സംഭവത്തില്‍ രണ്ടു പൊലിസുകാരെ സസ്പെന്‍ഡ് ചെയ്തിരുന്നു.

Tags : SynagogueAttack Police Case Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash