തൃശൂർ: തൊഴിലാളികൾ സംഘടിച്ചു പോരാടി നേടിയെടുക്കുന്നത് അസംഘടിതതൊഴിലാളികളുടെ അവകാശമാണെന്നും വികസനത്തിന്റെ സദ്ഫലങ്ങൾ എല്ലാവരിലേക്കും എത്തണമെന്നും ആർച്ച്ബിഷപ് മാർ ആൻഡ്രൂസ് താഴത്ത്.
അഖിലലോക തൊഴിലാളിദിനമായും തൊഴിലാളിമധ്യസ്ഥനായ വിശുദ്ധ യൗസേപ്പിന്റെ തിരുനാൾദിനമായും ആചരിക്കുന്ന മേയ് ദിനത്തിൽ കേരള ലേബർ മൂവ്മെന്റിന്റെ നേതൃത്വത്തിൽ നടത്തിയ തൊഴിലാളിസംഗമം ഉദ്ഘാടനം ചെയ്യുകയായിരുന്നു ആർച്ച്ബിഷപ്. മരത്താക്കരയിലെ നവീൻ ഫുഡ് പ്രോഡക്ട്സ് കമ്പനിയിൽ നടന്ന പരിപാടിയിൽ ബിജു ചിറയത്ത് അധ്യക്ഷത വഹിച്ചു. മേയ്ദിനറാലിയും വിശുദ്ധ കുർബാനയും ഉണ്ടായിരുന്നു.
കെഎൽഎം മുൻ ഡയറക്ടറും വർക്കേഴ്സ് ഇന്ത്യ ഫെഡറേഷന്റെ നാഷണൽ ഡയറക്ടറുമായ ഫാ. ജോർജ് തോമസ് നിരപ്പുകാലായിൽ മേയ് ദിനസന്ദേശം നല്കി. തൃശൂർ അതിരൂപത ഡയറക്ടർ ഫാ. പോൾ മാളിയമ്മാവ്, മോളി ജോബി, ജോയ് മാളിയേക്കൽ, ഫാ. ജോബ് വടക്കൻ, വി.എസ്. പ്രിൻസ്, നന്ദൻ കുന്നത്ത്, ഫാ. സ്റ്റീഫൻ അറയ്ക്കൽ, കെ.എസ്. ജോഷി, ജെമിൻ അക്കര, സ്ഥാപന ഉടമകളായ തോമസ്, ജോർജ്, പി.എം. രാഹുൽ, റോബസ് പറപ്പുള്ളി, ഷാജു തൊമ്മാന, ജെയിംസ് പള്ളത്ത്, ജോസ് ചിറയത്ത്, ഡേവിസ് തറയിൽ, ബേബി വാഴക്കാല തുടങ്ങിയവർ പ്രസംഗിച്ചു. ആന്റോ പോളിനെ ആദരിച്ചു.
കേരള ലേബർ മൂവ്മെന്റ് തൃശൂർ അതിരൂപത ഭാരവാഹികളുടെ നേതൃത്വത്തിൽ കേന്ദ്ര ആഘോഷ കമ്മിറ്റിയും മരത്താക്കര യൂണിറ്റ് ഭാരവാഹികളും സംയുക്തമായാണു പരിപാടി സംഘടിപ്പിച്ചത്.