കരുവാരകുണ്ട്: തുവൂരിൽ ഫർണിച്ചർ ഷെഡിന് തീപിടിച്ച് ലക്ഷങ്ങളുടെ നാശനഷ്ടം. ആർഎസ് റോഡിൽ ചീരന്പത്തൂർ വാസുവിന്റെ ഉടമസ്ഥതയിലുള്ള ഷെഡിനാണ് തീപിടിച്ചത്. വെള്ളിയാഴ്ച്ച പുലർച്ചെയായിരുന്നു സംഭവം.
ഷെഡിന് തീപിടിച്ചത് കണ്ട സമീപവാസികളാണ് വാസുവിനെ വിവരമറിയിച്ചത്. പിന്നീട് തിരുവാലിയിലെ അഗ്നിരക്ഷാസേന, കരുവാരകുണ്ട് പോലീസ്, നാട്ടുകാർ എന്നിവർ ചേർന്ന് തീയണച്ചു.
ഷെഡിൽ ഉണ്ടായിരുന്ന മരങ്ങൾ, നിർമാണം പൂർത്തിയാക്കിയ ഫർണിച്ചർ ഉത്പന്നങ്ങൾ, മെഷിനറികൾ തുടങ്ങിയവയെല്ലാം അഗ്നിക്കിരയായി. മേൽക്കൂരയുടെ ഒരു ഭാഗവും കത്തി നശിച്ചു. ലക്ഷങ്ങളുടെ നാശനഷ്ടമാണ് ഉണ്ടായിട്ടുള്ളതെന്ന് വാസു പറഞ്ഞു.
സംഭവത്തെത്തുടർന്ന് കെഎസ്ഇബി ഉദ്യോഗസ്ഥരും റവന്യു അധികൃതരും സ്ഥലത്തെത്തി പരിശോധന നടത്തി. ഷോർട്ട് സർക്യൂട്ടല്ല തീപിടിത്തത്തിന് കാരണമെന്നാണ് കണ്ടെത്തൽ. ഫർണിച്ചർ ഷെഡിന് ആരോ മനഃപൂർവം തീയിട്ടതാണന്നാണ് നിഗമനം.
ഇതേത്തുടർന്ന് വാസു കരുവാരക്കുണ്ട് പോലീസിൽ പരാതി നൽകി.സംഭവത്തിൽ വിശദമായ അന്വേഷണം വേണമെന്ന് നാട്ടുകാരും ആവശ്യപ്പെട്ടു.
Tags : Nattuvishesham Fire furniture shed Tuvoor