Editorial Audio
എത്ര ശ്രമിച്ചാലും കമ്യൂണിസത്തിനു ജനാധിപത്യം താങ്ങാനാകില്ലെന്ന പൊതുബോധത്തെ ഊട്ടിയുറപ്പിക്കരുത്. പയ്യന്നൂരിന്റെ എംഎൽഎ വി. കുഞ്ഞികൃഷ്ണനാണ്; സമ്മതിച്ചേ തീരൂ.
പയ്യന്നൂർ എംഎൽഎ വി. കുഞ്ഞികൃഷ്ണനെ പ്രവർത്തിക്കാൻ അനുവദിക്കാത്ത സിപിഎം നടപടി, ജനാധിപത്യത്തോടുള്ള വെല്ലുവിളിയാണ്. അദ്ദേഹം പങ്കെടുക്കുന്ന പരിപാടികൾ അലങ്കോലമാക്കുക, അദ്ദേഹത്തെ അവഗണിച്ച്, ജനം തോൽപിച്ച പഴയ എംഎൽഎയെ പൊതുപരിപാടികളിൽ പങ്കെടുപ്പിക്കുക, സമൂഹമാധ്യമങ്ങളിൽ അധിക്ഷേപിക്കുക... തുടങ്ങിയവ അസഹിഷ്ണുതയാണ്.
അധികാരം നഷ്ടമായി ആറുമാസം കഴിഞ്ഞ സ്ഥിതിക്ക് ഇനിയെങ്കിലും സിപിഎം തോൽവി സമ്മതിക്കണം. ഒരിടത്ത് വിജയിച്ചവരെ കൂകിത്തോൽപിക്കുക, മറ്റൊരിടത്ത് 10 വർഷം സ്വന്തം സർക്കാരിനോടു ചോദിക്കാൻ ധൈര്യമില്ലാതിരുന്ന അവകാശങ്ങൾക്കുവേണ്ടി ജീവനക്കാരെയും വിദ്യാർഥികളെയുമൊക്കെ തെരുവിലിറക്കുക. എത്ര ശ്രമിച്ചാലും കമ്യൂണിസത്തിനു ജനാധിപത്യം താങ്ങാനാകില്ലെന്ന പൊതുബോധത്തെ ഊട്ടിയുറപ്പിക്കരുത്. പയ്യന്നൂരിന്റെ എംഎൽഎ വി. കുഞ്ഞികൃഷ്ണനാണ്; സമ്മതിച്ചേ തീരൂ.
18ന് പയ്യന്നൂരിൽ നടന്ന തളിപ്പറമ്പ് സർക്കിൾ സഹകരണ യൂണിയൻ വാരാഘോഷ ഉദ്ഘാടനത്തിനെത്തിയപ്പോഴാണ് ഏറ്റവുമൊടുവിൽ കുഞ്ഞികൃഷ്ണനെ സിപിഎം അപമാനിച്ചത്. പൊതുവേദിയിൽ തങ്ങളെ അപമാനിച്ചു സംസാരിച്ചെന്നാണ് വാദം. പക്ഷേ, ആ പരിപാടിയിൽ സ്ഥലം എംഎൽഎ കുഞ്ഞികൃഷ്ണനെ ഒഴിവാക്കി പകരം നഗരസഭാ ചെയർപേഴ്സനും സിപിഎമ്മുകാരനുമായ സരിൻ ശശിയെയായിരുന്നു സംഘാടകർ ഉദ്ഘാടകനായി നിശ്ചയിച്ചിരുന്നത്. വിവാദമായതോടെ സഹകരണ വകുപ്പ് ഇടപെടുകയും എംഎൽഎയെ ഉദ്ഘാടകനാക്കാൻ നിർദേശിക്കുകയും ചെയ്തു.
തന്നെ ഒഴിവാക്കാൻ നടന്ന ശ്രമങ്ങളെക്കുറിച്ച് എംഎൽഎ പ്രസംഗത്തിൽ പരാമർശിച്ചതോടെ സിപിഎമ്മുകാർ ബഹളം തുടങ്ങുകയായിരുന്നു. പ്രതിഷേധക്കാർ വേദിയിലേക്ക് കയറുന്നത് തടയാൻ ശ്രമിച്ച, എംഎൽഎയുടെ പേഴ്സണൽ സ്റ്റാഫ് അംഗം പി. പ്രസന്നനെ സിപിഎമ്മുകാർ മർദിക്കുകയും ചെയ്തു. ഒക്ടോബറിൽ പയ്യന്നൂർ ഉപജില്ലാ കലോത്സവ സംഘാടകസമിതി ഓഫിസ് ഉദ്ഘാടനത്തിലും സ്ഥലം എംഎൽഎയെ ക്ഷണിക്കാതെ, മുൻ എംഎൽഎ ടി.ഐ. മധുസൂദനനെക്കൊണ്ട് ഉദ്ഘാടനം ചെയ്യിച്ചു. തന്നെ തോൽപിച്ചയാളുടെ സ്ഥാനത്തു കയറി നാട മുറിക്കാൻ പ്രേരിപ്പിച്ചതിലൂടെ മധുസൂദനനെയും പാർട്ടി പരിഹാസപാത്രമാക്കുകയായിരുന്നു.
സിപിഎം കണ്ണൂർ ജില്ലാ കമ്മിറ്റി അംഗമായിരുന്ന വി. കുഞ്ഞികൃഷ്ണൻ, പാർട്ടിയിലെ ഫണ്ട് തിരിമറി ആരോപണങ്ങളെത്തുടർന്ന് നേതൃത്വവുമായി അകലുകയും കഴിഞ്ഞ നിയമസഭാ തെരഞ്ഞെടുപ്പിൽ യുഡിഎഫ് പിന്തുണയോടെ സ്വതന്ത്രനായി മത്സരിച്ച് എംഎൽഎ ആകുകയുമായിരുന്നു. 60 വർഷം ഇടതു സ്ഥാനാർഥികൾ ജയിച്ച മണ്ഡലത്തിൽ ജനം തിരിച്ചടിച്ചതിന്റെ പാടുണങ്ങാൻ സമയമെടുക്കും. പക്ഷേ, സമനില തെറ്റാതെ പ്രവർത്തിച്ച് അടുത്തതവണ തിരിച്ചുവരാൻ ശ്രമിക്കുകയാണു വേണ്ടത്.
എംഎൽഎയെ പൊതുപരിപാടിയിൽനിന്ന് ഒഴിവാക്കുന്നതും ബഹിഷ്കരിക്കുന്നതുമൊക്കെ ജനാധിപത്യസംവിധാനത്തിൽ ചെയ്യരുതാത്തതാണ്. അഴിമതിയും അധാർമികതയും ചൂണ്ടിക്കാണിക്കുന്നവരെയും വിയോജിപ്പുള്ളവരെയുമൊക്കെ ഇഡിയെ വിട്ടു മാത്രമല്ല, ബഹിഷ്കരിച്ചും ആൾക്കൂട്ട വിചാരണ നടത്തിയും ഉന്മൂലനം ചെയ്തുമൊക്കെ ഇല്ലാതാക്കാം. തീവ്രതയിൽ വ്യത്യാസമുണ്ടെങ്കിലും രണ്ടും ജനാധിപത്യധ്വംസനം തന്നെ.
ഈ അസഹിഷ്ണുതയുടെ എസ്എഫ്ഐ എഡിഷനാണ് മഹാരാജാസ് കോളജിൽ കണ്ടത്. കാലടി സർവകലാശാലയിൽ 2008ൽ എൽഡിഎഫ് സർക്കാരിന്റെ കാലത്തു കേടായ ലൈറ്റ് നന്നാക്കണമെന്ന് ആവശ്യപ്പെട്ടുള്ള അക്രമസമരത്തിനെതിരേ നടപടിയെടുത്തതാണ് മഹാരാജാസിലെ പാർട്ടി വിദ്യാർഥികൾ ഏറ്റെടുത്തത്. അതിന് ഐക്യദാർഢ്യം പ്രഖ്യാപിച്ച എസ്എഫ്ഐക്കാർ മഹാരാജാസിലെ ബിരുദദാനച്ചടങ്ങിനിടെ ഉന്നതവിദ്യാഭ്യാസ മന്ത്രിയെ ബന്ദിയാക്കി.
പരാതി കേൾക്കാമെന്നു വാക്കു കൊടുത്തിട്ടും തങ്ങളുടെ ചോദ്യങ്ങൾക്കു മറുപടി പറഞ്ഞിട്ടുമതി ബാക്കി പരിപാടിയെന്നായിരുന്നു വൈസ് ചെയർപേഴ്സന്റെ നേതൃത്വത്തിലെത്തിയവരുടെ ദുശാഠ്യം. 10 വർഷം പരണത്തായിരുന്ന സ്വാതന്ത്ര്യത്തിന്റെയും ജനാധിപത്യത്തിന്റെയും സോഷ്യലിസത്തിന്റെയുമൊക്കെ കൊടിയാണ് പൊടിതട്ടിയെടുത്തത്. പന്ത്രണ്ടാം ശമ്പള പരിഷ്കരണം, പഴയ പെൻഷൻ പദ്ധതി പുനഃസ്ഥാപിക്കൽ തുടങ്ങി ജീവനക്കാരുടെയും അധ്യാപകരുടെയും വിവിധ ആവശ്യങ്ങൾ ഉന്നയിച്ചുകൊണ്ട് കഴിഞ്ഞദിവസം ആക്ഷൻ കൗൺസിൽ ഓഫ് സ്റ്റേറ്റ് എംപ്ലോയീസ് ആൻഡ് ടീച്ചേഴ്സ് സംഘടിപ്പിച്ച സെക്രട്ടേറിയറ്റ് വളയൽ സമരം മറ്റൊന്നാണ്.
അതിന് അവർക്ക് അവകാശമുണ്ട്. പക്ഷേ, എൽഡിഎഫ് സർക്കാരിനോട് 10 വർഷം ചോദിക്കാൻ പേടിയായിരുന്ന വിഷയമാണിതെന്നു മറക്കരുത്. സമരം ഉദ്ഘാടനം ചെയ്തത് ആറു മാസം മുന്പു വരെ ഇതൊക്കെ നടപ്പാക്കാൻ അധികാരമുണ്ടായിരുന്ന, മുഖ്യമന്ത്രിയായിരുന്ന പിണറായി വിജയൻ! 265 ദിവസത്തോളം കേരളത്തിലെ ഏറ്റവും കുറഞ്ഞ വരുമാനക്കാരായ ആശമാരെ തിരിഞ്ഞുനോക്കാതെ അധികാരരഥത്തിൽ ചീറിപ്പാഞ്ഞ തൊഴിലാളിവർഗ സർവാധിപത്യം!
പയ്യന്നൂർ എംഎൽഎയെ പ്രവർത്തിക്കാൻ വിടാത്തതുൾപ്പടെയുള്ള പ്രതിപക്ഷ രാഷ്ട്രീയം പ്രതിലോമകരമാണ്. അല്ലെങ്കിൽ എൽഡിഎഫ് ഭരണകാലത്തെ അഴിമതിക്കഥകൾ ഒന്നൊന്നായി പുറത്തുവന്നുകൊണ്ടിരിക്കേ സൃഷ്ടിക്കുന്ന പുകമറയാകാം. രണ്ടായാലും ജനാധിപത്യത്തിൽ അപലപിക്കപ്പെടണം. ചെറിയ വോട്ടിനൊന്നുമല്ല സിപിഎമ്മിനെ ജനം തോൽപിച്ചത്. അത് യുഡിഎഫും എൽഡിഎഫും തിരിച്ചറിഞ്ഞ് കേരളത്തിന്റെ വികസനത്തിനായി പ്രവർത്തിക്കണം.
യുഡിഎഫിന്റെ ശാപമായ പടലപ്പിണക്കങ്ങളും ഗ്രൂപ്പുകളിയും പ്രതിപക്ഷത്തിന്റെ പിന്തിരിപ്പൻ രാഷ്ട്രീയവും കേരളത്തെ ഇനിയും ആക്രമിക്കാനിറങ്ങരുത്. ആപത്കരമെന്നു നിങ്ങൾ മുന്നറിയിപ്പു നൽകുന്ന പരീക്ഷണങ്ങളിലേക്ക് ജനത്തെ തള്ളിവിടരുത്. സംശയമുണ്ടെങ്കിൽ പാർട്ടി ക്ലാസുകളിലല്ല, 35 കൊല്ലം പാർട്ടിഗ്രാമ-നഗരങ്ങളിൽ അടിമപ്പണി ചെയ്ത് ഒടുവിൽ പണി തേടി കേരളത്തിൽ തീവണ്ടിയിറങ്ങുന്ന പാർട്ടിക്കാരോടു ചോദിക്കണം.