29

ഇസ്‌ലാമാബാദ്: പാക്കിസ്ഥാനിലെ വിഘടനവാദ സംഘടനയായ ബലൂചിസ്ഥാൻ വിമോചന മുന്നണി (ബിഎൽഫ്) പുതുതായി രൂപീകരിച്ച വനിതാ സായുധ സംഘം ആദ്യമായി സൈന്യത്തെ ആക്രമിക്കുന്ന ദൃശ്യങ്ങൾ പുറത്തുവന്നു. പാക് സേനയുടെ വാഹന വ്യൂഹത്തിനു നേർക്ക് വനിതാ പോരാളികൾ വെടിയുതിർക്കുന്ന രംഗങ്ങളാണ് വീഡിയോയിലുള്ളത്. സംഭവത്തിൽ ഒന്പത് പാക് സൈനികർ കൊല്ലപ്പെട്ടതായി ബിഎൽഎഫ് അവകാശപ്പെട്ടു.

ബലൂചിസ്ഥാൻ പ്രവിശ്യയിലെ തുർബാത്തിൽ സെപ്റ്റംബർ 22നായിരുന്നു ആക്രമണം. ബിഎൽഎഫ് രൂപീകരിച്ച കരീമ സായുധ സേനാ ഡിവിഷൻ (കെഎഎഡി) എന്ന വനിതാ യൂണിറ്റാണ് പാക് സേനയിലെ ക്വിക് റെസ്പോൺസ് ഫോഴ്സിന്‍റെ മൂന്നു വാഹനങ്ങളെ ആക്രമിച്ചത്.

വനിതാ സേനയുടെ കമാൻഡർ സഹപ്രവർത്തകരോട് ദൗത്യത്തെക്കുറിച്ച് വിവരിക്കുന്നതും പിന്നാലെ പാക് സൈന്യത്തിനു നേർക്ക് വെടിയുതിർക്കുന്നതും വീഡിയോയിൽ കാണാം.

ആക്രമണത്തിൽ പാസ് സേനയുടെ വാഹനങ്ങൾ നശിച്ചെന്നാണ് ബിഎൽഎഫ് അറിയിച്ചത്. വനിതാ സേനയെ വളയാൻ ശ്രമിച്ച പാക് സൈന്യത്തെ ബിഎൽഎഫിന്‍റെ മറ്റൊരു യൂണിറ്റെത്ത് തുരത്തിയതായും അവകാശപ്പെട്ടു. ഇതിനിടെ ഒരു ബലൂച് ഭീകരൻ കൊല്ലപ്പെടുകയുണ്ടായി.

ബലൂചിസ്ഥാൻ പ്രവിശ്യയുടെ സ്വാതന്ത്ര്യത്തിനായി പോരാടിയ കരീമ ബലൂചിന്‍റെ പേരാണ് പുതിയ വനിതാ സായുധ സംഘത്തിനു നല്കിയിരിക്കുന്നത്. കരീമയെ 2020ൽ കാനഡയിൽ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തുകയായിരുന്നു.

Tags : Pakistan Balochistan Liberation Front Karima Armed Assault Division