26

കല്‍പ്പറ്റ: ജോലിയില്‍നിന്ന് പിരിച്ചുവിട്ട ഗോത്രബന്ധു മെന്‍റര്‍ അധ്യാപകര്‍ വയനാട് കളക്ടറേറ്റ് പടിക്കല്‍ നടത്തിവന്ന അനിശ്ചിതകാല നിരാഹാര സമരം പിന്‍വലിച്ചു. സമരസമിതി നേതാക്കളുമായി പട്ടികവര്‍ഗ വികസന മന്ത്രി കെ.എ. തുളസി തിരുവനന്തപുരത്ത് നടത്തിയ ചര്‍ച്ചയെത്തുര്‍ന്നാണ് എട്ട് ദിവസം മുമ്പ് ആരംഭിച്ച സമരം അവസാനിപ്പിച്ചത്.

മെന്‍റര്‍ ടീച്ചര്‍ നിയമനം വീണ്ടും നടത്തുമ്പോള്‍ നിലവില്‍ ജോലി ചെയ്തിരുന്നവര്‍ക്ക് വെയിറ്റേജ് മാര്‍ക്ക് നല്‍കുമെന്ന് സമരസമിതി പ്രതിനിധികള്‍ക്ക് മന്ത്രി ഉറപ്പുനല്‍കി.

മറ്റ് ഉറപ്പുകള്‍: പ്രത്യേക സമുദായങ്ങള്‍ക്ക് നീക്കിവച്ച തസ്തികകളില്‍ ആ സമുദായത്തില്‍പ്പെട്ട ടിടിസി, ബിഎഡ് യോഗ്യതയുള്ളവര്‍ ഇല്ലെങ്കില്‍ മറ്റുസമുദായങ്ങളിലുള്ളവരെ ആദ്യം പരിഗണിക്കും. വിജ്ഞാപനത്തില്‍ സര്‍ക്കാര്‍ ഒഴിവാക്കിയ തച്ചനാടന്‍ മൂപ്പന്‍, കാടര്‍, കരിമ്പാലന്‍ തുടങ്ങിയ ഗോത്രവിഭാഗങ്ങള്‍ക്ക് നിയമനത്തിന് അവസരം നല്‍കും. 45 വയസുകഴിഞ്ഞ മെന്‍റര്‍ അധ്യാപകരെ പട്ടികവര്‍ഗ വകുപ്പിന്‍റെ മറ്റു പദ്ധതികളില്‍ പരിഗണിക്കും.

ആദിവാസി വിദ്യാര്‍ഥികളുടെ കൊഴിഞ്ഞുപോക്ക് തടയാനും പഠന പിന്തുണ ഉറപ്പാക്കാനും 2017ല്‍ എല്‍ഡിഎഫ് സര്‍ക്കാര്‍ നിയമിച്ച 326 ഗോത്ര അധ്യാപകരെയാണ് യുഡിഎഫ് സര്‍ക്കാര്‍ പിരിച്ചുവിട്ടത്.

വയനാട്, മലപ്പുറം, പാലക്കാട് ജില്ലകളില്‍ ജോലി ചെയ്തിരുന്നവരാണ് ഇവര്‍. മെന്‍റര്‍ അധ്യാപക വിഷയം പി.എ. മുഹമ്മദ് റിയാസ് എംഎല്‍എ നിയമസഭയില്‍ ഉന്നയിക്കുകയും ചെയ്ത സാഹചര്യത്തിലാണ് സമര സമിതി പ്രതിനിധികളെ മന്ത്രി ചര്‍ച്ചയ്ക്ക് വിളിച്ചത്.

Tags : Mentor teachers jobs hunger strike