28

കൊച്ചി: കൊച്ചിയില്‍ ട്രാഫിക് പോലീസിന് നേരെ ആക്രമണം. ട്രാഫിക് എസ്‌ഐ ഉത്തംകുമാറിനാണ് മര്‍ദനമേറ്റത്. തിങ്കളാഴ്ച വൈകിട്ട് നാലിന് എംജി റോഡിലാണ് സംഭവം. കാസര്‍ഗോഡ് സ്വദേശിയായ അജീഷിനെതിരെ കേസ് എടുത്തു.

ബൈക്ക് മറ്റൊരു വാഹനത്തിന് കുറുകെ വച്ചത് ചോദ്യം ചെയ്തതിനെ തുടര്‍ന്നാണ് മര്‍ദനം. ട്രാഫിക് ബ്ലോക്കിനിടെ അജീഷ് ഒരു ട്രാവലര്‍ വാഹനത്തിന് മുന്നിലേക്ക് അപകടകരമായ രീതിയില്‍ ബൈക്ക് ഓടിച്ചു കയറ്റിയത് ട്രാവലറിന്‍റെ ഡ്രൈവര്‍ ചോദ്യം ചെയ്തു. ഇതോടെ ഇരുവരും തമ്മില്‍ വാക്കേറ്റമായി. ഇതറിഞ്ഞ് എത്തിയ എസ്‌ഐയെ യുവാവ് ആക്രമിക്കുകയായിരുന്നു.

ഹെല്‍മെറ്റ് കൊണ്ട് എസ്‌ഐയെ ഇടിക്കുകയും കൈയാങ്കളിയിലേക്ക് നീങ്ങുകയുമായിരുന്നു. സ്ഥലത്തുണ്ടായിരുന്ന നാട്ടുകാരെയും യുവാവ് ആക്രമിക്കാന്‍ ശ്രമിച്ചു. തുടര്‍ന്ന് കൂടുതല്‍ പോലീസുകാരെത്തിയാണ് ഇയാളെ കസ്റ്റഡിയില്‍ എടുത്തത്.

Tags : Youth Attack Police Helmet Traffic Crime