International
മനാമ: ഹോർമുസ് കടലിടുക്കിൽ വീണ്ടും ഇന്ത്യൻ നാവികർ ഉൾപ്പെട്ട കപ്പലിന് നേരെ ഇറാൻ ആക്രമണം. സംഭവത്തിൽ ഒരു ഇന്ത്യൻ നാവികനെ കാണാതായിട്ടുണ്ട്. പനാമ കൊടിയേന്തിയ താര ഗ്യാസ് എന്ന കപ്പലിന് നേരെയാണ് ആക്രമണം.
തിങ്കളാഴ്ച ആയിരുന്നു ആക്രമണമുണ്ടായത്. ആക്രമണ വിവരം കേന്ദ്ര തുറമുഖ മന്ത്രി സർബാനന്ദ സോനാവാൾ എക്സിലൂടെ സ്ഥിരീകരിച്ചിട്ടുണ്ട്. 24 ഇന്ത്യൻ നാവികരെ രക്ഷിച്ചതായും ഒരാളെ കാണാതായി എന്നുമാണ് കേന്ദ്രമന്ത്രി അറിയിച്ചത്. ആകെ 25പേരാണ് കപ്പലിലുണ്ടായിരുന്നത്.
ഒരാഴ്ചയ്ക്കിടെ ഇത് രണ്ടാം തവണയാണ് ഇന്ത്യൻ നാവികരുള്ള കപ്പലിന് നേരെ ഇറാൻ ആക്രമണം.അധികൃതർ എണ്ണ ടാങ്കർ കമ്പനിയും രക്ഷാപ്രവർത്തകരുമായും ചേർന്ന് കാണാതായ നാവികനായി തെരച്ചിൽ നടത്തുകയാണെന്നും മന്ത്രി അറിയിച്ചു. രക്ഷപ്പെട്ടവർക്ക് പരിക്കുകളൊന്നുമില്ലെന്നാണ് വിവരം.
National
ശ്രീനഗർ: ജമ്മു കാഷ്മീരിലെ കുൽഗാമിൽ സിആർപിഎഫ് ക്യാമ്പിന് നേരെയുണ്ടായ ഭീകരാക്രമണത്തിന് കനത്ത തിരിച്ചടി നൽകി സുരക്ഷാസേന. കുൽഗാമിലെ ലാരോ മേഖലയിൽ നടന്ന ഏറ്റുമുട്ടലിൽ രണ്ട് ഭീകരരെ സൈന്യം വധിച്ചു.
സിആർപിഎഫ് സംഘത്തിന് നേരെ നേരിട്ട് ആക്രമണം നടത്തിയ ഭീകരൻ ഉമർ നസീറിനെയാണ് വധിച്ചവരിൽ ഒരാളായി തിരിച്ചറിഞ്ഞിട്ടുള്ളത്. ആക്രമണത്തിന്റെ മുഖ്യസൂത്രധാരനെന്ന് സംശയിക്കുന്ന ലഷ്കർ-ഇ-തൊയ്ബ ഭീകരൻ മുഹമ്മദ് ലത്തീഫ് ഭട്ടും കൊല്ലപ്പെട്ടതായാണ് വിവരം. എന്നാൽ, മുഹമ്മദ് ലത്തീഫ് ഭട്ടിന്റെ മരണക്കാര്യം സുരക്ഷാസേന ഇതുവരെ ഔദ്യോഗികമായി സ്ഥിരീകരിച്ചിട്ടില്ല.
പാക്കിസ്ഥാൻ ഭീകരർക്കൊപ്പം ചേർന്ന് പ്രവർത്തിച്ചുവരികയായിരുന്ന മുഹമ്മദ് ലത്തീഫ് ഭട്ട് താഴ്വരയിലെ നിരവധി ഭീകരാക്രമണങ്ങളിൽ പ്രതിയാണെന്ന് സുരക്ഷാ ഏജൻസികൾ വ്യക്തമാക്കുന്നു. അനന്തനാഗിൽ പൊലീസ് കോൺസ്റ്റബിളിനെ വെടിവെച്ച് കൊലപ്പെടുത്തിയ സംഭവത്തിലും കുൽഗാമിൽ തൊഴിലാളികൾക്ക് നേരെയുണ്ടായ ആക്രമണത്തിലും ഇയാൾക്ക് നേരിട്ട് പങ്കുള്ളതായി നേരത്തെ കണ്ടെത്തിയിരുന്നു.
കഴിഞ്ഞ ആഴ്ച കുൽഗാമിലെ സിആർപിഎഫ് ക്യാമ്പിന് നേരെയുണ്ടായ ഭീകരാക്രമണത്തിൽ മൂന്ന് ജവാന്മാർക്ക് പരിക്കേറ്റിരുന്നു.
Kerala
മാഹി: മാഹി പള്ളൂരിൽ വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന കുട്ടികൾക്ക് നേരെ പാഞ്ഞടുത്ത തെരുവുനായയെ സൈക്കിൾ ഉപയോഗിച്ച് നേരിട്ട് എട്ടു വയസ്സുകാരൻ. പള്ളൂർ ഇടയിൽ പീടികയിൽ ഷമീമ മഹലിലാണ് സംഭവം.
വീട്ടുമുറ്റത്ത് കുട്ടികൾ കളിക്കുന്നതിനിടെ അപ്രതീക്ഷിതമായിട്ടായിരുന്നു നായയുടെ ആക്രമണം. പെട്ടെന്നുള്ള നായയുടെ വരവിൽ കുട്ടികൾ പേടിച്ചെങ്കിലും ഒപ്പമുണ്ടായിരുന്ന എട്ടു വയസുകാരൻ ഒട്ടും പരിഭ്രാന്തി കാണിക്കാതെ സമയോചിതമായി ഇടപെടുകയായിരുന്നു.
ധൈര്യപൂർവ്വം തന്റെ സൈക്കിൾ മുന്നോട്ട് വെച്ച് നായയുടെ വഴി തടയുകയും, അതുവഴി സഹോദരങ്ങളെയും മറ്റ് കുട്ടികളെയും രക്ഷിക്കുകയും ചെയ്തു.
പിന്നീട് പന്തികേട് മനസിലാക്കി കുട്ടി സൈക്കിളിൽ നിന്ന് പിന്നിലേക്ക് ചാടി രക്ഷപ്പെടുന്നതും സി.സി.ടി.വി ദൃശ്യങ്ങളിൽ വ്യക്തമാണ്. പ്രദേശത്തെ സി.സി.ടി.വി ക്യാമറയിൽ പതിഞ്ഞ ഈ ദൃശ്യങ്ങൾ പുറത്തുവന്നതോടുകൂടി കുട്ടിയുടെ മനസാന്നിധ്യത്തെയും ധൈര്യത്തെയും പ്രശംസിച്ച് നിരവധി പേരാണ് രംഗത്തെത്തിയത്
International
വാഷിംഗ്ടൺ: യുഎസിലെ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിക്കുണ്ടായ കനത്ത തിരിച്ചടിക്ക് പിന്നാലെ പശ്ചിമേഷ്യൻ സംഘർഷങ്ങൾക്ക് അയവുണ്ടാകുമെന്ന വിലയിരുത്തലുകൾക്ക് കനത്ത പ്രഹരമേൽപ്പിച്ച് വീണ്ടും പ്രകോപനപരമായ നീക്കങ്ങളുമായി ട്രംപ് സർക്കാർ മുന്നോട്ടുപോകുന്നതോടെ ഇന്ത്യ ഉൾപ്പെടെയുള്ള ലോകരാജ്യങ്ങൾക്ക് ആശങ്കയൊഴിയുന്നില്ല.
ഇറാനുമായി ഇനി ചർച്ചകളുടെ ആവശ്യമില്ലെന്നും അതിന്റെ സമയം അതിക്രമിച്ചെന്നുമാണ് അമേരിക്കൻ പ്രസിഡന്റിന്റെ നിലപാട്. യുഎസിന്റെ ഇച്ഛയ്ക്കനുസരിച്ചല്ല കാര്യങ്ങൾ മുന്നോട്ടുപോകുന്നതെങ്കിൽ വീണ്ടും ഇറാനെ ആക്രമിക്കാൻ അമേരിക്ക മടിക്കില്ലെന്നാണ് ഡോണൾഡ് ട്രംപിന്റെ നിലപാട്.
ഇറാനെതിരെ തത്കാലം ആക്രമണത്തിനില്ലെന്ന് ഏതാനും ദിവസങ്ങൾക്ക് മുമ്പ് അമേരിക്കൻ പ്രസിഡന്റ് നടത്തിയ പരാമർശം ലോകരാജ്യങ്ങൾക്ക് ആശ്വാസകരമായിരുന്നു. ദിവസങ്ങൾക്കുള്ളിൽ ട്രംപ് നിലപാട് മാറ്റിയതോടെ വീണ്ടും സ്ഥിതിഗതികൾ മാറിമറിഞ്ഞു. ഇറാനുമായി ഇനി ചർച്ചകളുടെ ആവശ്യമില്ലെന്നും ഇറാന്റെ സമ്പത്തിന്റെ അവകാശികൾ അമേരിക്കയാണെന്നും പറഞ്ഞ ട്രംപിന്റെ ഒറ്റ നിലപാടിലാണ് സാഹചര്യങ്ങൾ വീണ്ടും വഷളായിരിക്കുന്നത്.
കുത്തനെ ഉയർന്ന് ക്രൂഡ് ഓയിൽ വില
അമേരിക്കൻ പ്രസിഡന്റ് അഭിപ്രായം മാറ്റിയതോടെ ബ്രെന്റ് ക്രൂഡോയിൽ വില വീണ്ടും ആഗോളതലത്തിൽ കത്തിക്കയറി. ഇറാനെതിരായ ആക്രമണത്തിനില്ലെന്ന ട്രംപിന്റെ പ്രസ്താവനയ്ക്ക് പിന്നാലെ ബാരലിന് 90 ഡോളറിനും താഴെയെത്തിയ ക്രൂഡോയിൽ വില വീണ്ടും വർധിച്ച് 95.74 ഡോളറിലെത്തി. സംഘർഷ സാധ്യത ഉയർന്നതിന് പിന്നാലെയാണ് ക്രൂഡോയിൽ വിലയിൽ വീണ്ടും വർധന.
ഇന്ത്യ ഉൾപ്പെടെയുള്ള രാജ്യങ്ങൾക്ക് ക്രൂഡോയിൽ വില ഉയർത്തുന്ന ഭീഷണി ചെറുതല്ല. ക്രൂഡോയിൽ വിലയിലുണ്ടായ വർധനയെ തുടർന്ന് രാജ്യത്തെ എണ്ണക്കമ്പനികൾ വില വർധിപ്പിച്ചാൽ അവശ്യസാധനങ്ങളുടെ വിലയും കുതിച്ചുയരാനാണ് സാധ്യത.
എന്നാൽ അമേരിക്ക ഉയർത്തുന്ന ഭീഷണികൾക്കിടയിലും പശ്ചിമേഷ്യയിൽ നിന്നുള്ള എണ്ണ ഉത്പാദനം വർധിക്കുന്നത് പ്രത്യാശ നൽകുന്നതാണ്. ഇറാഖും സൗദി അറേബ്യയും ഉൾപ്പെടെ എണ്ണ ഉത്പാദനം വർധിപ്പിച്ചതാണ് പ്രതീക്ഷ നൽകുന്നത്. ഇതുകൂടാതെ ഹോർമുസ് വഴി ഇന്ത്യ ഉൾപ്പെടെയുള്ള രാജ്യങ്ങൾക്ക് തടസമില്ലാതെ ചരക്ക് ഗതാഗതം നടത്താമെന്ന ഇറാന്റെ പ്രഖ്യാപനവും ആശ്വാസകരമാണ്.
സ്വർണം വീണ്ടും തകർച്ചയിലേക്ക്
ഡോണൾഡ് ട്രംപിന്റെ ഇറാൻ വിരുദ്ധ പ്രസ്താവനയ്ക്ക് പിന്നാലെ അമേരിക്കയിലെ പണപ്പെരുപ്പം വർധിച്ചെന്ന കണക്കുകൾ കൂടി പുറത്തുവന്നതോടെ സ്വർണവില വീണ്ടും കൂപ്പുകുത്തി. പണപ്പെരുപ്പം വർധിച്ചെന്ന റിപ്പോർട്ടുകൾക്ക് പിന്നാലെ യുഎസ് ഫെഡറൽ റിസർവ് പലിശനിരക്ക് വർധിപ്പിക്കാനുള്ള സാധ്യതയും ഉയർന്നിട്ടുണ്ട്.
ഫെഡറൽ റിസർവ് ഡിസംബറിൽ പലിശനിരക്ക് വർധിപ്പിക്കുമെന്ന റിപ്പോർട്ടുകൾ വന്നതിന് പിന്നാലെ ക്രൂഡോയിൽ വില വീണ്ടും ഉയർന്നത് സ്വർണത്തിനോടുള്ള നിക്ഷേപകരുടെ താത്പര്യങ്ങൾക്കും മങ്ങലേൽപ്പിച്ചു. ഇതോടെ സ്വർണവില ഔൺസിന് 120 ഡോളർ ഇടിഞ്ഞ് 3872 ഡോളറിലെത്തി. ഒരു വർഷത്തിനിടെ സ്വർണം അതിന്റെ ഏറ്റവും താഴ്ന്ന വിലയിലാണ് നിലവിലുള്ളത്.
District News
ചുങ്കക്കുന്ന്: വന്യജീവി ആക്രമണത്തില് ആടുകള് ചത്തു. ചുങ്കക്കുന്ന് സ്വദേശി പുതനപ്ര അനില് ആന്റണിയുടെ നാല് ആടുകളാണു ചത്തത്. ഇന്നലെ പുലര്ച്ചെയാണു വീടിനു സമീപത്തെ തൊഴുത്തില് കെട്ടിയിരുന്ന ആടുകളെ വന്യജീവികള് കൊന്നത്. പുലര്ച്ചെ ശബ്ദം കേട്ട് തൊഴുത്തില് വന്ന് നോക്കിയപ്പോഴാണ് ആടുകളെ കടിച്ചുകൊന്ന നിലയില് കണ്ടത്. തുടര്ന്ന് വനംവകുപ്പില് വിവരം അറിയിക്കുകയായിരുന്നു. ചെന്നായ, കുറുനരി പോലുളള ജീവികള് പിടിച്ചതാണെന്നാണു വനംവകുപ്പിന്റെ നിഗമനം.
വെറ്ററിനറി ഡോക്ടറെ വരുത്തി പോസ്റ്റ്മോര്ട്ടം നടത്തി. ബീറ്റ് ഫോറസ്റ്റ് ഓഫിസര്മാരായ വി.സി. പ്രജീഷ് കുമാര്, എ.കെ. അനൂപ്, ഫോറസ്റ്റ് ബീറ്റ് അസിസ്റ്റന്റ് ടി. ബാലകൃഷ്ണന്, വാച്ചര്മാരായ ബോബി വര്ഗീസ്, റോയി മാത്യു എന്നിവരാണു പരിശോധന നടത്തിയത്.
കൊട്ടിയൂര് പഞ്ചായത്ത് പ്രസിഡന്റ് സിസിലി കണ്ണന്താനം, പഞ്ചായത്തംഗം സ്മിത വരപ്പോത്തുകുഴി എന്നിവരും സ്ഥലത്തെത്തിയിരുന്നു. രാത്രി പ്രദേശത്ത് നിരീക്ഷണം നടത്താനും കാമറ സ്ഥാപിക്കാനും വനംവകുപ്പ് തീരുമാനിച്ചിട്ടുണ്ട്.
Kerala
കോഴിക്കോട്: രാത്രിയുടെ മറവില് കനാലില് മാലിന്യം തള്ളുന്നത് കണ്ട് ഓടിയെത്തിയ യുവാവിനെ ഓട്ടോയിടിച്ച് പരിക്കേല്പിച്ചു. ബുധനാഴ്ച അര്ധരാത്രിയോടെ വടകര ചോറോട് പഞ്ചായത്തിലെ മാങ്ങോട്ട്പാറക്കടുത്താണ് സംഭവം.
കുട്ടൂലിപ്പാലം കനാലില് മാലിന്യം തള്ളുന്നത് കണ്ടാണ് സമീപവാസിയായ ഫസല് (25) ഓടിയെത്തിയത്. അപ്പോഴേക്കും ഓട്ടോ ഡ്രൈവര് മാലിന്യം തള്ളിയിരുന്നു. മാലിന്യം തള്ളി തിരിച്ചുവന്ന ഓട്ടോയ്ക്ക് ഫസല് കൈകാണിച്ചപ്പോള് ഫസലിനെ ഇടിച്ചിട്ട് നിറുത്താതെ പോവുകയായിരുന്നു.
വീഴ്ചയില് ഫസലിന് പരിക്കേറ്റു. മാലിന്യം തള്ളുന്നതും ഫസലിനെ ഓട്ടോ ഇടിച്ചിട്ട് പോകുന്നതും സിസിടിവിയില് പതിഞ്ഞിട്ടുണ്ട്. മാങ്ങോട്ടുപാറ ഭാഗത്തേക്കാണ് ഓട്ടോ പോയത്. സംഭവം ശ്രദ്ധയില്പെട്ട ചോറോട് പഞ്ചായത്ത് അധികൃതരടക്കം ഫസലില് നിന്ന് കാര്യങ്ങള് ചോദിച്ചറിഞ്ഞു. ആശുപത്രിയില് ചികിത്സ തേടിയ ശേഷം ഫസല് വടകര പൊലിസില് പരാതി നല്കി.
Kerala
പേരൂർക്കട: ട്രെയിനിൽ യുവതി ക്രൂരമായ മാനസിക-ശാരീരിക പീഡനങ്ങൾക്ക് ഇരയായതിന് പിന്നാലെ ട്രെയിനുകളിലും റെയിൽവേ സ്റ്റേഷൻ പരിസരങ്ങളിലും കർശനമായ പരിശോധന ഏർപ്പെടുത്തി റെയിൽവേ പൊലിസും സിറ്റി പൊലിസും. തിരുവനന്തപുരം റെയിൽവേ പൊലിസ്, തമ്പാനൂർ പൊലിസ്, പേട്ട പൊലിസ്, റെയിൽവേ പ്രൊട്ടക്ഷൻ ടീം എന്നിവരാണ് പരിശോധന ഇന്നുമുതൽ ശക്തമാക്കിയിരിക്കുന്നത്.
തിരുവനന്തപുരത്തെ ഒരു സ്വകാര്യ ആശുപത്രിയിലെ ഓഫീസറായ ചിറയിൻകീഴ് സ്വദേശിനിയായ 31 കാരി ചൊവ്വാഴ്ച ട്രെയിനിന് ഉള്ളിലും പുറത്തും ക്രൂരമായ ആക്രമണങ്ങൾക്ക് ഇരയായ സാഹചര്യത്തിലാണ് ഇത്. വർക്കല സ്വദേശിയും നിരവധി ക്രിമിനൽ കേസുകളിലെ പ്രതിയുമായ വിജീഷ് ആണ് സംഭവവുമായി ബന്ധപ്പെട്ട് പൊലിസിന്റെ പിടിയിലായത്.
ചിറയിൻകീഴിൽ നിന്ന് രാവിലെ ഒമ്പതോടെ ആശുപത്രിയിലേക്ക് ഡ്യൂട്ടിക്ക് എത്തുന്നതിനിടെയാണ് യുവതി ആക്രമിക്കപ്പെട്ടത്. മലബാർ എക്സ്പ്രസിലെ ജനറൽ കമ്പാർട്ട്മെന്റിൽ യാത്ര ചെയ്യുകയായ യുവതിയുടെ സമീപം എത്തിയ വിജീഷ് ഇവർക്ക് നേരെ ലൈംഗികാതിക്രമത്തിന് ശ്രമിക്കുകയായിരുന്നു.
സഹജീവനക്കാർ ഇടപെട്ടിട്ടും ഇയാൾ ശല്യം ചെയ്യുന്നത് നിർത്തിയില്ല. യുവതി ഇയാൾക്ക് പലതവണ മുന്നറിയിപ്പ് നൽകിയെങ്കിലും ഇയാൾ ചെവിക്കൊണ്ടില്ല. ഒടുവിൽ പേട്ട റെയിൽവേ സ്റ്റേഷനിൽ യുവതി ഇറങ്ങിയപ്പോൾ ഇയാൾ ഒപ്പമിറങ്ങുകയും പ്രകോപിതനായി യുവതിയുടെ കാരണത്തടിക്കുകയുമായിരുന്നു.
പട്ടാപ്പകലാണ് ഈ സംഭവങ്ങൾ നടക്കുന്നത് എന്നതിനാൽ പൊലിസും റെയിൽവേ പൊലിസും ഇതിനെ ഗൗരവമായാണ് കാണുന്നത്. ട്രെയിനുകളിൽ സ്ത്രീകൾക്ക് വേണ്ടി പ്രത്യേക കോച്ച് ഏർപ്പെടുത്തിയിട്ട് പോലും സ്ത്രീകൾക്ക് നേരെയുള്ള അതിക്രമം തടയാൻ സാധിക്കുന്നില്ല എന്നുള്ളതാണ് വാസ്തവം.
ദീർഘദൂര ട്രെയിനുകളിൽ കുറഞ്ഞത് നാല് ജനറൽ കമ്പാർട്ട്മെന്റുകൾ എങ്കിലും ഉണ്ടാകും എന്നുള്ളതാണ് വാസ്തവം. പക്ഷേ തിരക്ക് കൂടുന്നത് കാരണം സ്ത്രീകളുടെ കമ്പാർട്ട്മെന്റുകളിൽ കയറിപ്പറ്റാൻ ഇവർക്ക് സാധിക്കാറില്ല. അങ്ങനെ വരുന്ന വേളയിലാണ് മറ്റുള്ള ജനറൽ കമ്പാർട്ട്മെന്റുകളിലേക്ക് ഇവർ യാത്ര ചെയ്യാൻ നിർബന്ധിതരായിത്തീരുന്നത്.
മുമ്പ് ലോക്കൽ കമ്പാർട്ട്മെന്റുകളിൽ ഉൾപ്പെടെ പൊലിസിന്റെ ശക്തമായ പരിശോധന ഉണ്ടായിരുന്നുവെങ്കിൽ ഇപ്പോൾ അതിന്റെ ഗൗരവം കുറഞ്ഞിട്ടുണ്ട്. മലബാർ എക്സ്പ്രസ് പോലെ കൂടുതൽ ലോക്കൽ സ്റ്റേഷനുകളിൽ നിർത്തന്ന ട്രെയിനുകളിൽ സാമൂഹികവിരുദ്ധരും സ്ത്രീവിരുദ്ധരും കയറുന്നത് സ്ഥിരം സംഭവമായിട്ടുണ്ട്.
പേട്ട റെയിൽവേ സ്റ്റേഷനിൽ വച്ച് പരസ്യമായി യുവതിയെ ആക്രമിച്ച പ്രതിയെ പൊലിസ് പിടികൂടി റിമാൻഡ് ചെയ്തുവെങ്കിലും ഇത്തരത്തിലുള്ള സംഭവങ്ങൾ ആവർത്തിക്കപ്പെടുമോ എന്ന ഭയത്തിലാണ് സ്ത്രീയാത്രികർ.
സ്ത്രീകൾക്ക് എതിരെയുള്ള അതിക്രമം തടയുന്നതിനും കർശനമായി നിരീക്ഷണം നടത്തുന്നതിനും ഇന്നുമുതൽ റെയിൽവേ പൊലിസും തിരുവനന്തപുരം സിറ്റി പൊലിസും റെയിൽവേ സ്റ്റേഷനുകളിൽ ഇടവിട്ട് പരിശോധനകൾ നടത്തും.
പേട്ട സ്റ്റേഷനിൽ കർശനമായ പരിശോധനകളാണ് ഏർപ്പെടുത്തിയിരിക്കുന്നത് എന്ന് പേട്ട എസ്ഐ ഷാനിഫ് അറിയിച്ചു. പ്രത്യേക സംഘങ്ങളായി തിരിഞ്ഞായിരിക്കും പരിശോധന. ട്രെയിൻ വിവിധ സ്റ്റേഷനുകളിൽ നിർത്തിക്കഴിഞ്ഞാൽ യാത്രക്കാർ പുറത്തിറങ്ങി റെയിൽവേ സ്റ്റേഷൻ കടക്കുന്നത് വരെയും പൊലിസിന്റെ നിരീക്ഷണം ഉണ്ടാകും. ഓരോ സ്റ്റേഷനിൽ നിന്നും പുതുതായി കയറുന്ന ആൾക്കാരെ ശക്തമായ നിരീക്ഷണങ്ങൾക്ക് വിധേയമാക്കുകയും ചെയ്യും.
International
വാഷിംഗ്ടൺ ഡിസി: ഇറാനിൽ ഉടൻ ആക്രമണം പുനരാരംഭിക്കില്ലെന്ന് അമേരിക്കൻ പ്രസിഡന്റ് ട്രംപ്. ആക്രമണപദ്ധതി തത്കാലത്തേക്കു മരവിപ്പിക്കാനാണ് തീരുമാനമെന്ന് അദ്ദേഹം പറഞ്ഞു.
ഗൾഫിലെ അമേരിക്കൻ സഖ്യകക്ഷികളുടെ അഭ്യർഥന മാനിച്ചാണിത്. അതേസമയം, ഇറാനെതിരായ നാവികഉപരോധം തുടരും.അമേരിക്കയിലെത്തിയ ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൾറഹ്മാൻ അൽ താനിയുമായി കൂടിക്കാഴ്ച നടത്തിയശേഷമാണ് ട്രംപ് ഇക്കാര്യം അറിയിച്ചത്. ഇറാനും അമേരിക്കയ്ക്കും ഇടയിൽ മധ്യസ്ഥത വഹിക്കുന്ന രാജ്യങ്ങളിലൊന്നാണ് ഖത്തർ.
അമേരിക്കൻ സേന സന്നാഹങ്ങൾ പൂർത്തിയാക്കിയെന്നും എന്നാൽ, ഇപ്പോൾ ഇറാനിൽ ആക്രമണം നടത്തരുതെന്ന സൗദി, യുഎഇ, ഖത്തർ, ബഹ്റിൻ, കുവൈറ്റ് രാജ്യങ്ങളുടെ അഭ്യർഥന മാനിച്ചുവെന്നും ട്രംപ് പറഞ്ഞു.
ഇറാൻ സന്ദർശിച്ചശേഷം അമേരിക്കയിലെത്തിയ ഖത്തർ പ്രധാനമന്ത്രി വൈസ് പ്രസിഡന്റ് ജെ.ഡി. വാൻസുമായും കൂടിക്കാഴ്ച നടത്തി. ചർച്ചകൾ ശുഭപ്രതീക്ഷ നല്കുന്നുവെന്നാണ് അദ്ദേഹം പറഞ്ഞത്.
ഇതിനിടെ, ഇറാന്റെ ഏഴ് ഉപാധികൾ അംഗീകരിക്കാൻ അമേരിക്ക തയാറാകണമെന്ന് സുരക്ഷാ കൗൺസിൽ മേധാവി മൊഹ്സെൻ റേസായി ആവശ്യപ്പെട്ടു.
Kerala
കൊച്ചി: കൊച്ചിയില് വീണ്ടും പൊലിസ് ഉദ്യോഗസ്ഥന് നേരെ ആക്രമണം. കടവന്ത്ര സ്റ്റേഷനിലെ എസ്ഐ ഹരികൃഷ്ണനു നേരെയാണ് ആക്രമണം നടന്നത്. കൊല്ലം സ്വദേശി അജ്മല് പിടിയിലായി. ഇന്ദിരാഗാന്ധി ആശുപത്രിയില് അജ്മല് ബഹളം ഉണ്ടാക്കുന്നുവെന്ന പരാതി ലഭിച്ചതിനെ തുടര്ന്നാണ് എസ്ഐ എത്തിയത്.
പ്രതിയെ കസ്റ്റഡിയില് എടുക്കുന്നതിനിടെ എസ്ഐയുടെ യൂണിഫോം വലിച്ചു കീറാന് ശ്രമിക്കുകയും ആക്രമിക്കുകയുമായിരുന്നു. ഔദ്യോഗിക കൃത്യനിര്വഹണം തടസപ്പെടുത്തിയതിനും ആക്രമണത്തിനും പൊലിസ് കേസ് എടുത്തിട്ടുണ്ട്.
ഇതിനിടെ എറണാകുളം നോര്ത്ത് സ്റ്റേഷനിലെ സിപിഒക്ക് നേരെയും ആക്രമണം ഉണ്ടായി. മദ്യപിച്ച് ബഹളമുണ്ടാക്കിയതിനെ തുടര്ന്ന് പൊലിസ് സ്റ്റേഷനില് എത്തിച്ച പ്രതി കൊല്ലം ശാസ്താംകോട്ട സ്വദേശിയായ മുഹമ്മദ് ഇക്ബാല് വൈദ്യപരിശോധനയ്ക്ക് എത്തിച്ചപ്പോള് സിപിഒ അജിത് പോളിന്റെ കൈ കടിച്ചുമുറിക്കുകയായിരുന്നു.
Kerala
കൊച്ചി: കൊച്ചിയില് പൊലിസ് ഉദ്യോഗസ്ഥന് നേരെ പ്രതിയുടെ ആക്രമണം. നോര്ത്ത് പൊലിസ് സ്റ്റേഷനിലെ സിപിഒ അജിത് പോളിന്റെ കൈ പ്രതി കടിച്ചുമുറിച്ചു. കൊല്ലം ശാസ്താംകോട്ട സ്വദേശിയായ മുഹമ്മദ് ഇക്ബാല് ആണ് പൊലിസിനെ ആക്രമിച്ചത്.
നോര്ത്ത് പാലത്തിന് താഴെ മദ്യപിച്ച് ബഹളമുണ്ടാക്കിയതിനെ തുടര്ന്ന് പൊലിസ് സ്റ്റേഷനില് എത്തിച്ച പ്രതി പൊലിസുകാരെ വെല്ലുവിളിക്കുകയും ഭീഷണിപ്പെടുത്തുകയും ചെയ്തു. തുടര്ന്ന് വൈദ്യപരിശോധനയ്ക്ക് എത്തിച്ചപ്പോഴാണ് കൈ കടിച്ചുമുറിച്ചത്. ആശുപത്രിയിലും പ്രതി പരാക്രമം കാണിച്ചു. പൊലിസുകാരനെ ഉപദ്രവിച്ചതിനടക്കം പ്രതിക്കെതിരെ കേസ് രജിസ്റ്റര് ചെയ്തു.
International
ദോഹ: പശ്ചിമേഷ്യയിൽ തുടരുന്ന അനശ്ചിതത്വങ്ങൾക്കിടെ അമേരിക്കൻ പ്രസിഡന്റ് ഡോണൾഡ് ട്രംപുമായി സമാധാന ചർച്ചകൾക്ക് ഖത്തർ പ്രധാനമന്ത്രി. ഉപാധികൾ അംഗീകരിച്ചാൽ രണ്ട് ദിവസത്തിനകം ഹോർമുസ് തുറക്കാൻ തയാറെന്ന് ഇറാൻ അറിയിച്ചിട്ടുണ്ട്.
ഇറാന്റെ അവസാന സന്ദേശം കൈമാറുകയും ചർച്ചകൾ സാധ്യമാക്കുകയുമാണ് ലക്ഷ്യം. പിന്നാലെ ചൈനീസ് റഷ്യൻ പ്രസിഡന്റുമാരുമായി ട്രംപ് ചർച്ച നടത്തും. നേരത്തെ പുറത്തുവന്ന ഒരു സമാധാന ഉപാധിയിൽ ചൈനയാണ് സമാധാന നീക്കങ്ങളുടെ ഭാഗമായ ഉപാധികൾ പാലിക്കുന്നത് ഉറപ്പാക്കുന്ന ഗ്യാരണ്ടർ.
പ്രതിസന്ധി തീർക്കാൻ യുറേനിയം തങ്ങൾ സൂക്ഷിക്കാമെന്ന സമവായ ഫോർമുല മുന്നോട്ടുവച്ച രാജ്യമാണ് റഷ്യ. അതിനാൽ ഈ ചർച്ചകൾ പ്രധാനമാണ് അതേസമയം ഇറാനെതിരെ മൂന്നാമതൊരു ആക്രമണത്തിന് കൂടി സാധ്യതയുണ്ടെന്ന വിവരം അമേരിക്കൻ സെൻട്രൽ കമാൻഡ് ഇസ്രയേലിനെ ധരിപ്പിച്ചതായി റിപ്പോർട്ടുകൾ പുറത്തു വന്നിരുന്നു.
Kerala
കൊച്ചി: കൊച്ചിയില് ഡോക്ടറെ ആക്രമിച്ച കേസിലെ പ്രതികളെ രണ്ടു ദിവസത്തേക്ക് കസ്റ്റഡിയില് വിട്ടു. യുവനടി അതുല്യ ചന്ദ്ര, നടനും എക്സിക്യൂട്ടീവ് പ്രൊഡ്യൂസറുമായ ബിബിന് പെരുമ്പിള്ളി, കെ.ബി. വിഷ്ണു എന്നിവരുടെ ജാമ്യാപേക്ഷ എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി കഴിഞ്ഞ ദിവസം തള്ളിയിരുന്നു.
ഇതിന് പിന്നാലെയാണ് പ്രതികളെ കസ്റ്റഡിയില് വിട്ടത്. രോഗിയെ ചികിത്സിക്കാനെന്ന വ്യാജേന വിളിച്ചുവരുത്തി മര്ദിച്ചുവെന്നാണ് പരാതി. ഡോക്ടറുടെ മൊബൈല് ഫോണുകളും വാച്ചും സംഘം കവര്ന്നുവെന്നും പരാതിയിലുണ്ട്. പിന്നാലെയാണ് നടി ഉള്പ്പെടെയുള്ളവരെ അറസ്റ്റ് ചെയ്തത്.
അതേസമയം, നടിയുടെ ബന്ധുവിനെ ബലാത്സംഗം ചെയ്ത കേസില് പ്രതിയായ ഡോ.ജോണ്സണ് കെ.വര്ഗീസിനായി പൊലിസ് തെരച്ചില് ശക്തമാക്കിയിട്ടുണ്ട്. വീട്ടമ്മയുടെ പരാതിയില് ഇന്ഫോപാര്ക്ക് പൊലിസ് കേസ് എടുത്തതിന് പിന്നാലെ ഒളിവില് പോയ ഡോക്ടര്ക്കെതിരെ ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ട്. ഡോക്ടര് വിദേശത്തേക്ക് കടന്നതായാണ് പൊലിസിന്റെ സംശയം. ലൈംഗിക പീഡന പരാതിയില് ഡോക്ടര് മുന്കൂര് ജാമ്യാപേക്ഷ നല്കിയിട്ടുണ്ട്.
National
ലഖിസരായ്: ബിഹാറിലെ ലഖിസരായ് ജില്ലയിൽ അനധികൃത മദ്യവിൽപനയും ചൂതാട്ടവും നടക്കുന്ന കേന്ദ്രത്തിൽ റെയ്ഡിനെത്തിയ പൊലിസ് സംഘത്തിനു നേരെയുണ്ടായ ആക്രമണത്തിൽ വനിതാ കോണ്സ്റ്റബിളടക്കം നാലുപേർക്കു പരിക്കേറ്റു. ടൗണ് പൊലിസ് സ്റ്റേഷൻ പരിധിയിലെ ബൽഗുദാർ ഗ്രാമത്തിലായിരുന്നു സംഭവം. രഹസ്യവിവരത്തെത്തുടർന്ന് പരിശോധനയ്ക്കെത്തിയ സംഘത്തെ ഒരു വിഭാഗം ആക്രമിക്കുകയായിരുന്നു.
എസ്ഐ ഭഗവാൻ താക്കൂർ, കോണ്സ്റ്റബിൾമാരായ അമിത് കുമാർ ഝാ, ജിതേന്ദ്ര പാസ്വാൻ, രുചി കുമാരി എന്നിവർക്കാണ് പരിക്കേറ്റത്. കണ്ടാലറിയാവുന്ന 19 പേർക്കെതിരേയും തിരിച്ചറിയാത്ത 25 പേർക്കെതിരേയും പൊലിസ് കേസെടുത്തിട്ടുണ്ട്. ഇതുവരെ 12 പേരെ അറസ്റ്റ് ചെയ്തതായും മറ്റുള്ളവർക്കായി തെരച്ചിൽ തുടരുന്നുണ്ടെന്നും മുതിർന്ന പൊലിസ് ഉദ്യോഗസ്ഥർ അറിയിച്ചു. മദ്യത്തിന്റെ നിർമാണം, വിൽപന, കൈവശംവയ്ക്കൽ, കടത്തൽ, ഉപയോഗം എന്നിവ നിരോധിച്ചുകൊണ്ട് 2016ലാണ് ബിഹാറിൽ സന്പൂർണ മദ്യനിരോധന നിയമം നടപ്പാക്കിയത്.
International
ടെഹ്റാൻ: ഇറാനെതിരെ നിർണായക നീക്കവുമായി അമേരിക്ക. ഇറാന്റെ ആയുധ നീക്കം തടയാനെന്ന പേരിൽ അമേരിക്ക ദൗത്യ സംഘത്തെ നിയോഗിച്ചു. കര വഴിയും കടൽ വഴിയും ഇറാനിലേക്ക് ആയുധ സാമഗ്രികളും ഉത്പന്നങ്ങളും എത്തുന്നത് തടയുകയാണ് ലക്ഷ്യം.
അയേണ് ഗേറ്റ് എന്ന പേരിലാണ് അമേരിക്ക ഇറാനെതിരെ ടാസ്ക് ഫോഴ്സിനെ പ്രഖ്യാപിച്ചിരിക്കുന്നത്. കാസ്പിയൻ കടൽ വഴിയും മറ്റും ഇറാനിലെത്തുന്ന സാമഗ്രികൾ ആയുധ നിർമാണത്തിന് ഉപയോഗിക്കുന്നു എന്നാണ് അമേരിക്കയുടെ ആരോപണം.
ഇതുകൂടാതെ ഇറാന്റെ ആണവ പദ്ധതികളെ കുറിച്ച് വിവരം നൽകുന്നവർക്ക് രണ്ട് കോടി ഡോളർ വരെ പാരിതോഷികവും അമേരിക്ക പ്രഖ്യാപിച്ചിട്ടുണ്ട്. യുഎസ് സെൻട്രൽ കമാൻഡ് ആണ് ആണവ പദ്ധതികളെ കുറിച്ച് വിവരം നൽകുന്നവർക്ക് പാരിതോഷികം പ്രഖ്യാപിച്ചത്.
ആണവ പദ്ധതികൾ, സ്ഥലം, പിന്നിലുള്ള വ്യക്തികൾ തുടങ്ങിയ വിവരം നൽകുന്നവർക്കാണ് വൻ പാരിതോഷികം പ്രഖ്യാപിച്ചിരിക്കുന്നത്. എന്നാൽ ഇറാൻ ഇതുവരെ അമേരിക്കയുടെ പ്രഖ്യാപനത്തോട് പ്രതികരിച്ചിട്ടില്ല.
National
ചണ്ഡിഗഡ്: ഹരിയാനയിലെ ഗുരുഗ്രാമിൽ സുഹൃത്തുക്കളെ കാത്തുനിൽക്കുകയായിരുന്ന യുവാവിന്റെ മൊബൈൽഫോൺ ബൈക്കിലെത്തിയ സംഘം തട്ടിയെടുത്തു. ചെറുക്കാൻ ശ്രമിച്ച യുവാവിന് അക്രമികളുടെ വെട്ടേറ്റു. സിവിൽ ലൈൻസ് സ്വദേശി വൈഭവ് വർമ്മയ്ക്കാണ് വെട്ടേറ്റത്.
സുഹൃത്തുക്കളായ തനിഷ്ക് നാരംഗ്, ഹർഷിത് എന്നിവരെ കാത്തുനിന്ന് ഫോണിൽ സംസാരിക്കുന്നതിനിടെയാണ് ഹെൽമെറ്റ് ധരിച്ചെത്തിയ രണ്ട് പേർ ബൈക്കിൽ എത്തിയത്. പിന്നിലിരുന്നയാൾ വൈഭവിന്റെ കൈയിലുണ്ടായിരുന്ന ഫോൺ തട്ടിയെടുത്ത് രക്ഷപ്പെടാൻ ശ്രമിച്ചു. വൈഭവ് ചെറുത്തുനിൽക്കാൻ ശ്രമിച്ചെങ്കിലും അക്രമികളിൽ ഒരാൾ മൂർച്ചയേറിയ ആയുധം കൊണ്ട് അദ്ദേഹത്തിന്റെ മുഖത്ത് പരിക്കേൽപ്പിക്കുകയായിരുന്നു. ബൈക്കിന്റെ നമ്പർ നോക്കാൻ അദ്ദേഹത്തിന് കഴിഞ്ഞില്ല.
പ്രതികൾ രക്ഷപ്പെട്ടതിനെത്തുടർന്ന് വൈഭവ് മറ്റൊരു ബൈക്കിൽ ലിഫ്റ്റ് ചോദിച്ച് അവരെ പിന്തുടരാൻ ശ്രമിച്ചെങ്കിലും ഫലമുണ്ടായില്ല. തുടർന്ന് വഴിയാത്രക്കാരന്റെ ഫോണിൽ നിന്ന് പിതാവിനെ വിവരമറിയിക്കുകയും കുടുംബം സ്ഥലത്തെത്തിയ ശേഷം സഹോദരൻ പൊലിസിൽ വിവരമറിയിക്കുകയും ചെയ്തു.
ഉടൻതന്നെ സ്ഥലത്തെത്തിയ പൊലിസ് വൈഭവിന്റെ പരിക്കുകൾ പരിശോധിച്ചു. സംഭവത്തിൽ കേസെടുത്തിട്ടുണ്ടെന്നും പ്രതികളെ കണ്ടെത്താനായി പ്രദേശത്തെ സിസിടിവി ദൃശ്യങ്ങൾ പരിശോധിച്ചുവരികയാണെന്നും അധികൃതർ അറിയിച്ചു.
Kerala
മലപ്പുറം: വൈലത്തൂരിൽ പൊലിസ് ഉദ്യോഗസ്ഥനെ അതിക്രൂരമായി മർദിച്ച രണ്ട് യുവാക്കളും അറസ്റ്റിൽ. ഒളിവിൽ പോയ തിരൂർ സ്വദേശി മുഹമ്മദ് സഫ്വാനെ ആലപ്പുഴയിൽ വച്ചാണ് പിടികൂടിയത്.
മൂർച്ചയുള്ള ഏതോ ആയുധം കയ്യിൽ വച്ചാണ് യുവാക്കൾ തന്നെ മർദിച്ചതെന്ന് ചികിത്സയിൽ കഴിയുന്ന എഎസ്ഐ രാമചന്ദ്രൻ പറഞ്ഞു. രണ്ടു ദിവസം നീണ്ട അന്വേഷണത്തിന് ഒടുവിലാണ് മുഹമ്മദ് സഫ്വാൻ പൊലീസിന്റെ പിടിയിലായത്. കഴിഞ്ഞ ദിവസം മലപ്പുറത്ത് ഒരു സുഹൃത്തിന്റെ വീട്ടിൽ ഒളിവിൽ കഴിഞ്ഞ സഫ്വാൻ ആലപ്പുഴയിലേക്ക് ട്രെയിൻ മാർഗം പോയെന്ന വിവരം കിട്ടിയ പൊലീസ് അവിടെവച്ച് പ്രതിയെ പിടികൂടി.
ലഹരി ഇടപാടിൽ രണ്ടു വർഷം അബുദാബിയിലെ ജയിലിലിൽ കിടന്നിട്ടുള്ള സഫ്വാനെ നാടുകടത്തിയതായിരുന്നു. നാട്ടിലെത്തിയിട്ടും ലഹരി ഇടപാടും കവർച്ചയും നടത്തി. സ്വന്തം വീട്ടിൽ നിന്ന് 40 പവൻ സ്വർണം മോഷ്ടിച്ചെന്ന പരാതിയും സഫ്വാനെതിരെ മുൻപ് ഉണ്ടായിരുന്നതായി കൽപകഞ്ചേരി പൊലീസ് പറയുന്നു.
എഐസ്ഐയെ അക്രമിച്ച കേസിൽ മറ്റൊരു പ്രതി ദിൽഷാദിനെ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു. വധശ്രമത്തിനും കവർച്ചയ്ക്കും കേസെടുത്തു. മുഖത്ത് സാരമായി പരിക്കേറ്റ എ എസ് ഐ രാമചന്ദ്രൻ ആശുപത്രിയിൽ തുടരുകയാണ്.
വൈലത്തൂർ ഹയർ സെക്കണ്ടറി സ്കൂളിന് സമീപത്ത് ബൈക്കിൽ ഹെൽമറ്റില്ലാതെ എത്തിയ പ്രതികളുടെ പെരുമാറ്റത്തിൽ ലഹരി ഉപയോഗം സംശയിച്ച പൊലിസ്, ഇവരുടെ വാഹനത്തിന്റെ നമ്പർ കുറിച്ചെടുത്തിരുന്നു. ഇതിൽ പ്രകോപിതരായാണ് ഈ യുവാക്കൾ എഎസ്ഐയെ ക്രൂരമായി മർദിച്ചത്. പൊലീസ് ഉദ്യോഗസ്ഥരുടെ മൊബൈല് ഫോണും പ്രതികള് കവര്ന്നു.
District News
മേപ്പയ്യൂര്: കോളജ് വിദ്യാര്ഥിനികള്ക്ക് നേരേ മേപ്പയ്യൂരിൽ ആക്രമണം. കോളജ് വിട്ട് വീട്ടിലേക്ക് പോകുകയായിരുന്ന വിദ്യാര്ഥിനികളെ ഒരുസംഘം യുവാക്കള് ഇരുചക്രവാഹനത്തില് പിന്തുടര്ന്ന് അക്രമിക്കുകയായിരുന്നു. യുവാക്കള് അസഭ്യം പറയുന്നതും അക്രമിക്കാന് വരുന്നതുമായ ദൃശ്യങ്ങള് ഉള്പ്പെടെ പുറത്തുവന്നിട്ടുണ്ട്. റോഡിലൂടെ നടന്നു പോകുകയായിരുന്ന പെൺകുട്ടികളെ യുവാക്കൾ കമന്റടിക്കുകയും പിന്നീട് ഇരുചക്ര വാഹനത്തിൽ പിന്തുടർന്ന് ഉപദ്രവിക്കുകയുമായിരുന്നു.
യുവാക്കളുടെ ആക്രമണ ദൃശ്യങ്ങൾ പെൺകുട്ടികളിലൊരാൾ മൊബൈൽ ഫോണിൽ പകർത്താൻ ശ്രമിക്കുന്നതിനിടെ ഫോൺ തട്ടിയെടുക്കാനും അക്രമകാരികൾ ശ്രമിച്ചു. പൊലിസിൽ പരാതി നൽകിയാൽ ജീവിക്കാൻ അനുവദിക്കില്ലെന്ന് യുവാക്കൾ ഭീഷണിപ്പെടുത്തിയതായും തങ്ങളുടെ ദൃശ്യങ്ങൾ ഫോണിൽ പകർത്തുകയും പിന്നീട് ഇത് സോഷ്യൽ മീഡിയയിലൂടെ അശ്ലീല പരാമർശങ്ങളോടെ പ്രചരിപ്പിച്ചതായും പെൺകുട്ടികൾ പറഞ്ഞു. സംഭവത്തിൽ പെൺകുട്ടികൾ പയ്യോളി പൊലിസ് സ്റ്റേഷനിൽ പരാതി നൽകിയിട്ടുണ്ട്.
Kerala
കൊല്ലം: ശാസ്താംകോട്ട റെയിൽവേ സ്റ്റേഷനിൽ യാത്രക്കാർക്കുനേരെ തെരുവുനായയുടെ ആക്രമണം. രണ്ട് പേർക്ക് കടിയേറ്റു. ഇന്ന് രാവിലെയാണ് സംഭവം.
ട്രെയിൻ കയറാനെത്തിയ യാത്രക്കാരനും റെയിൽവേ ജീവനക്കാരൻ സത്യനുമാണ് നായയുടെ കടിയേറ്റത്. തിരക്കേറിയ സമയത്തായിരുന്നു സംഭവം. പരിക്കേറ്റവരെ ശാസ്താംകോട്ട താലൂക്ക് ആശുപത്രിയിൽ പ്രവേശിപ്പിച്ചു. നാട്ടുകാർ ചേർന്ന് നായയെ തല്ലിക്കൊന്നതോടെയാണ് കൂടുതൽ പേർക്ക് കടിയേൽക്കുന്നത് ഒഴിവായത്.
ആയിരക്കണക്കിന് യാത്രക്കാർ ആശ്രയിക്കുന്ന സ്റ്റേഷനിൽ തെരുവുനായ ശല്യം രൂക്ഷമാണ്. പ്ലാറ്റ്ഫോമുകളിലും പരിസരത്തും നായ്ക്കളുടെ സാന്നിധ്യം യാത്രക്കാരുടെ സുരക്ഷയ്ക്ക് ഭീഷണിയാകുന്നു. തെരുവുനായ ശല്യം നിയന്ത്രിക്കാനും യാത്രക്കാരുടെ സുരക്ഷ ഉറപ്പാക്കാനും റെയിൽവേ അധികൃതർ അടിയന്തര നടപടി സ്വീകരിക്കണമെന്ന ആവശ്യം ശക്തമാണ്.
International
ടെഹ്റാൻ: അമേരിക്കൻ ഇടക്കാല തെരഞ്ഞെടുപ്പിൽ ഡെമോക്രാറ്റുകൾ വൻ വിജയം നേടി സഭകളുടെ ഭരണം പിടിച്ചെടുത്തതിനു പിന്നാലെ, ഇറേനിയൻ ജനതയ്ക്ക് മുന്നറിയിപ്പുമായി പരമോന്നത നേതാവ് മുജ്തബ ഖമനയ്.
ഭരണമാറ്റം ഉണ്ടായെങ്കിലും അമേരിക്കയുടെ ഇറാൻ വിരുദ്ധ നയങ്ങളിൽ അയവുണ്ടാകില്ലെന്ന് മുജ്തബയുടേതായി എക്സിൽ പുറത്തുവിട്ട പ്രസ്താവനയിൽ വ്യക്തമാക്കി.
അമേരിക്ക വീണ്ടും ആക്രമണം തുടരുകയാണെങ്കിൽ പശ്ചിമേഷ്യൻ യുദ്ധം കൂടുതൽ മേഖലകളിലേക്ക് വ്യാപിക്കുമെന്ന് അദ്ദേഹം മുന്നറിയിപ്പ് നൽകി. ട്രംപ് ഭരണകൂടത്തിന്റെ ഇറാൻവിരുദ്ധ യുദ്ധനയങ്ങൾക്ക് അമേരിക്കൻ ജനത ‘നോ’പറഞ്ഞിരിക്കുകയാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ് ഉൾപ്പടെയുള്ള മുതിർന്ന നേതാക്കൾ ചൂണ്ടിക്കാട്ടി
Kerala
കൊല്ലം: മരുമകന്റെ ആക്രമണത്തിൽ ഗുരുതരമായി പരിക്കേറ്റ് ചികിത്സയിലായിരുന്ന വയോധിക മരിച്ചു. ഭരണിക്കാവ് ബസ് സ്റ്റാൻഡിനു സമീപം പനപ്പെട്ടി ചിറയിൽ പടിഞ്ഞാറ്റതിൽ ശ്യാമള (65) ആണ് മരിച്ചത്. സംഭവത്തിൽ കൊലപാതകശ്രമത്തിന് കേസെടുത്ത പൊലിസ് മരുമകൻ വടക്കൻ മൈനാഗപ്പള്ളി സ്വദേശി കെ. ശിവനെ (41) അറസ്റ്റ് ചെയ്തു.
ഞായറാഴ്ചയായിരുന്നു സംഭവം. ഭർത്താവുമായി വഴക്ക് പതിവായതോടെ ശിവന്റെ ഭാര്യയായ രജനി ഞായറാഴ്ച വൈകിട്ട് അമ്മ ശ്യാമളയുടെ വീട്ടിലെത്തി. ഇതറിഞ്ഞ് ശിവൻ പിന്നാലെ എത്തി രജനീയുമായും ശ്യാമളയുമായും വഴക്കുണ്ടാക്കി. ആക്രമിക്കാനായി വന്ന ശിവനിൽനിന്നും രക്ഷനേടാൻ ഇരുവരും അയൽ വീട്ടിലേക്ക് ഓടി. പിന്തുടർന്നെത്തിയ ശിവൻ തടിക്കഷ്ണം ഉപയോഗിച്ച് രജനിയെ ആക്രമിക്കാൻ ശ്രമിക്കുന്നതിനിടയിൽ ശ്യാമളയ്ക്ക് അടിയേറ്റുവെന്നാണ് പൊലിസ് പറയുന്നത്.
തലപിളർന്ന് ഗുരുതരാവസ്ഥയിലായ ശ്യാമളയെ ബന്ധുക്കളും നാട്ടുകാരും ചേർന്ന് ഭരണിക്കാവിലെയും തുടർന്ന് അടൂരിലെയും സ്വകാര്യ ആശുപത്രിയിൽ പ്രവേശിപ്പിച്ചു. ഇവിടെനിന്നു കോട്ടയം മെഡിക്കൽ കോളജ് ആശുപത്രിയിൽ തീവ്ര പരിചരണ വിഭാഗത്തിലേക്ക് മാറ്റി. വെന്റിലേറ്ററിന്റെ സഹായത്തോടെ ചികിത്സയിലിരിക്കെ പുലർച്ചെ മൂന്നിനാണ് മരണം സംഭവിച്ചത്. സംഭവസ്ഥലത്തുനിന്നു രക്ഷപ്പെട്ട ശിവനെ മുതുപിലാക്കാട്ടുനിന്നു പോലീസ് അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
International
കീവ്: തെക്കുകിഴക്കൻ യുക്രെയ്നിലെ സഹായവിതരണ കേന്ദ്രമായി പ്രവർത്തിച്ചിരുന്ന സ്കൂളിൽ റഷ്യ നടത്തിയ ബോംബിംഗിൽ 31 പേർ കൊല്ലപ്പെട്ടു. 50 പേരെ കാണാതായിട്ടുണ്ട്.
തെക്കുകിഴക്കൻ പ്രദേശമായ സാപ്പോറിഷ്യയിൽ യുദ്ധമുന്നണിയിൽ സ്ഥിതി ചെയ്യുന്ന കോമിഷുവാകാ ഗ്രാമത്തിൽ തിങ്കളാഴ്ചയായിരുന്നു ആക്രമണം.
എല്ലാ തിങ്കളാഴ്ചയിലും സ്കൂളിൽ സഹായവസ്തുക്കൾ വിതരണം ചെയ്തിരുന്നു.
ജനങ്ങൾ സാധനങ്ങൾ വാങ്ങാനെത്തിയപ്പോൾ റഷ്യൻ സേന ബോംബിടുകയായിരുന്നുവെന്ന് യുക്രെയ്ൻ പ്രസിഡന്റ് സെലൻസ്കി പറഞ്ഞു. സ്ഫോടനമേഖലയിൽ രക്ഷാപ്രവർത്തകരെത്തിയപ്പോൾ രണ്ടാമതും ബോംബിട്ടു.
നാലു പൊലിസുകാരും രണ്ട് രക്ഷാപ്രവർത്തകരും കൊല്ലപ്പെട്ടവരിൽ ഉൾപ്പെടുന്നു. തെരച്ചിലിൽ കൂടുതൽ മൃതദേഹങ്ങൾ കണ്ടെത്താൻ സാധ്യതയുണ്ടെന്നാണു റിപ്പോർട്ട്.യുക്രെയ്ൻ സർക്കാർ സാപ്പോറിഷ്യ മേഖലയിൽ മൂന്നുദിവസത്തെ ദുഃഖാചരണം പ്രഖ്യാപിച്ചു.
അതേസമയം, യുക്രെയ്ൻ സൈനിക യൂണിറ്റുകളെ ലക്ഷ്യമിട്ടായിരുന്നു ആക്രമണമെന്ന് റഷ്യൻ പ്രതിരോധ മന്ത്രാലയം അവകാശപ്പെട്ടു. 25 യുക്രെയ്ൻ സൈനികർ കൊല്ലപ്പെട്ടെന്നും 15 സൈനിക വാഹനങ്ങൾ, ഇലക്ട്രോണിക് ആക്രമണത്തിനുള്ള സ്റ്റേഷൻ എന്നിവ നശിപ്പിച്ചെന്നും റഷ്യ കൂട്ടിച്ചേർത്തു.
സാപ്പോറിഷ്യക്കു പുറമേ യുക്രെയ്ന്റെ ഇതര ഭാഗങ്ങളിലും റഷ്യൻ വ്യോമാക്രമണങ്ങളുണ്ടായി.
289 ഡ്രോണുകൾ, 17 ബാലിസ്റ്റിക് മിസൈൽ, 59 ക്രൂസ് മിസൈൽ എന്നിവയാണ് റഷ്യ പ്രയോഗിച്ചതെന്ന് സെലൻസ്കി അറിയിച്ചു.
Kerala
പാലക്കാട്: ഒറ്റപ്പാലം നഗരത്തിൽ വീണ്ടും തെരുവുനായ ആക്രമണം. ഡെലിവറി ജോലി ചെയ്യുന്നതിനിടെ യുവാവിന് തെരുവുനായയുടെ കടിയേറ്റു. മായന്നൂർ കൊണ്ടാഴി സ്വദേശിയായ 35 വയസുകാരൻ സജിത്തിനാണ് കടിയേറ്റത്.
ചൊവ്വാഴ്ച ഉച്ചയോടെ നഗരത്തിലെ കമലാലയം റോഡിൽ വെച്ചാണ് സംഭവം. ഫ്ലിപ്കാർട്ടിൽ ഓർഡർ ചെയ്ത ഉൽപന്നം ഉപഭോക്താവിന് കൈമാറാൻ എത്തിയതായിരുന്നു യുവാവ്. ഇടതുകാലിൽ ആഴത്തിലുള്ള മൂന്ന് മുറിവുകൾ ഏറ്റു. യുവാവ് താലൂക്ക് ആശുപത്രിയിൽ ചികിത്സ തേടി.
Kerala
പാലക്കാട്: ഒറ്റപ്പാലം നഗരത്തിൽ വീണ്ടും തെരുവുനായ ആക്രമണം. ഡെലിവറി ജോലി ചെയ്യുന്നതിനിടെ യുവാവിന് തെരുവുനായയുടെ കടിയേറ്റു. മായന്നൂർ കൊണ്ടാഴി സ്വദേശിയായ സജിത്തിനാണ് കടിയേറ്റത്.
ചൊവ്വാഴ്ച ഉച്ചയോടെ നഗരത്തിലെ കമലാലയം റോഡിൽ വച്ചാണ് സംഭവം. ഫ്ലിപ്കാർട്ടിൽ ഓർഡർ ചെയ്ത ഉൽപന്നം ഉപഭോക്താവിന് കൈമാറാൻ എത്തിയതായിരുന്നു യുവാവ്.
ഇടതുകാലിൽ ആഴത്തിലുള്ള മൂന്ന് മുറിവുകൾ ഏറ്റു. യുവാവ് താലൂക്ക് ആശുപത്രിയിൽ ചികിത്സ തേടി.
National
മസ്കറ്റ്: ഒമാൻ തീരത്ത് ഇന്ത്യൻ പതാക വഹിച്ചിരുന്ന കപ്പലിന് നേരെ ആക്രമണം. ഇന്ത്യൻ നാവികന് ദാരുണാന്ത്യം. 14 ഇന്ത്യൻ നാവികരുമായി പോയിരുന്ന കാർഗോ കപ്പലിന് നേരെയാണ് ആക്രമണം നടന്നത്.
തിരിച്ചറിയാത്ത മേഖലയിൽ നിന്നുണ്ടായ വ്യോമാക്രമണത്തിലാണ് ഇന്ത്യൻ നാവികൻ കൊല്ലപ്പെട്ടതെന്നാണ് കേന്ദ്രമന്ത്രി സർബാനന്ത സോണോവാൾ വിശദമാക്കിയത്. എംഎസ്വി അൽ ജുസുഫി എന്ന കപ്പലിന് നേരെയാണ് ആക്രമണമുണ്ടായത്.
13 പേരെ കപ്പലിൽ നിന്ന് സുരക്ഷിതരായി രക്ഷപ്പെടുത്തിയിട്ടുണ്ട്. ഒമാൻ കോസ്റ്റ്ഗാർഡാണ് നാവികരെ രക്ഷപ്പെടുത്തിയത്. ഗുജറാത്ത് സ്വദേശിയായ നാവികൻ ഗൻഡാർ നഹിം അജിജ് ആണ് പരിക്കുകളേറ്റ് കൊല്ലപ്പെട്ടത്.
അമേരിക്ക ഇറാൻ യുദ്ധത്തിന് പിന്നാലെയുണ്ടായ ഹൂത്തികളുടെ സൗദി അറേബ്യയ്ക്കെതിരായ ആക്രമണങ്ങളിൽ ഇന്ത്യൻ പതാകയുള്ള കാർഗോ കപ്പലുകൾക്കെതിരെ ആക്രമണം താരതമ്യേന കുറവായിരുന്നു.
ഫെബ്രുവരി മുതൽ 22 ഇന്ത്യക്കാരാണ് അമേരിക്ക ഇസ്രയേൽ യുദ്ധത്തിനിടയിൽ കൊല്ലപ്പെട്ടത്. ഇതിൽ 14 പേർ നാവികരായിരുന്നുവെന്നാണ് കഴിഞ്ഞ ആഴ്ച കേന്ദ്രം പുറത്ത് വിട്ട കണക്ക് വിശദമാക്കുന്നത്.
International
ടെഹ്റാൻ/ വാഷിംഗ്ടൺ ഡിസി: പശ്ചിമേഷ്യയിൽ വീണ്ടും യുദ്ധഭീതി വിതച്ച് ഹോർമുസ് കടലിടുക്കിലെ ഇറാന്റെ ഖെഷം ദ്വീപിനു നേരേ അമേരിക്കയുടെ മിന്നലാക്രമണം.
അമേരിക്കൻ ഇടക്കാല തെരഞ്ഞെടുപ്പിന് മണിക്കൂറുകൾക്ക് മുന്പാണ് മേഖലയെ വിറപ്പിച്ച വ്യോമാക്രമണം നടന്നത്. മേഖലയിലെ യുഎസ് സൈനികകേന്ദ്രങ്ങൾക്കും വിമാനങ്ങൾക്കും നേരേ ഇറാൻ തൊടുത്തുവിട്ട ഉപരിതല-വ്യോമ മിസൈലുകൾ തകർക്കാനാണ് ഈ പ്രതിരോധ ആക്രമണമെന്ന് യുഎസ് വൃത്തങ്ങൾ പറഞ്ഞു.
അതേസമയം, ആക്രമണത്തിന് തൊട്ടുമുമ്പ് ഖെഷം ദ്വീപിനും ഹോർമുസ് കടലിടുക്കിനും മുകളിലായി പറന്ന അമേരിക്കയുടെ എംക്യുഎം-170 ഇനത്തിൽപ്പെട്ട രണ്ട് ഡ്രോണുകളെ വെടിവച്ചിട്ടതായി ഇറാൻ വിപ്ലവഗാർഡ് അറിയിച്ചു. എംക്യു-9 ഇനത്തിൽപ്പെട്ട മറ്റൊരു ഡ്രോണിനെ ഹോർമുസ് കടലിടുക്കിലും വെടിവച്ചിട്ടതായി വിപ്ലവഗാർഡ് വക്താവ് കൂട്ടിച്ചേർത്തു.
ഖെഷം ദ്വീപിനു പുറമേ സമീപപ്രദേശങ്ങളായ ഹെംഗാം ദ്വീപ്, ബന്ദർ അബ്ബാസ് തുറമുഖം എന്നിവിടങ്ങളിലും ശക്തമായ സ്ഫോടനശബ്ദങ്ങൾ കേട്ടതായി ഇറാന്റെ ഫാർസ് വാർത്താ ഏജൻസി റിപ്പോർട്ട് ചെയ്തു. യുഎസ് സൈനിക നടപടിയെത്തുടർന്ന് രാജ്യാന്തരവിപണിയിൽ അസംസ്കൃത എണ്ണവില വർധിച്ചിട്ടുണ്ട്.
അതേസമയം, അമേരിക്കയുടെ ആക്രമണത്തിന് ശക്തമായ തിരിച്ചടി നൽകാൻ ഇറാനും അവകാശമുണ്ടെന്ന് വിദേശകാര്യ ഡെപ്യൂട്ടി മന്ത്രി കാസെം ഘരീബാബാദി പ്രതികരിച്ചു. ശത്രുക്കളുടെ ഏതു തെറ്റായ നീക്കത്തിനും ഭൂമിശാസ്ത്രപരമായ അതിരുകളില്ലാത്തതും അപ്രതീക്ഷിതവുമായ തിരിച്ചടി നൽകുമെന്ന് ഇറാൻ പാർലമെന്റ് സ്പീക്കർ മുഹമ്മദ് ബഖർ ഖാലിബാഫും സൈനികമേധാവി അലി അബ്ദുള്ളാഹിയും മുന്നറിയിപ്പ് നൽകി.
നയതന്ത്ര ചർച്ചകൾ ഊർജിതം
യുദ്ധം ഒഴിവാക്കാനും മേഖലയിൽ സമാധാനം പുനഃസ്ഥാപിക്കാനും ഖത്തറിന്റെയും സൗദി അറേബ്യയുടെയും മധ്യസ്ഥതയിൽ ചർച്ചകൾ സജീവമായി. എന്നാൽ, ഹോർമുസ് കടലിടുക്ക് തുറക്കുന്നത് ഉൾപ്പടെയുള്ള കാര്യങ്ങളിൽ തങ്ങൾ മുന്നോട്ടുവച്ച ഏഴു വ്യവസ്ഥകളും അമേരിക്ക പൂർണമായും അംഗീകരിക്കണമെന്ന് ഇറേനിയൻ സെക്യൂരിറ്റി ഉദ്യോഗസ്ഥൻ മൊഹ്സെൻ റെസായി ആവശ്യപ്പെട്ടു.
ഇരുരാജ്യങ്ങളും തമ്മിലുള്ള അഭിപ്രായവ്യത്യാസങ്ങൾ പരിഹരിച്ച് സമാധാനം പുനഃസ്ഥാപിക്കാൻ ഖത്തർ മധ്യസ്ഥശ്രമങ്ങൾ തുടരുകയാണ്. കഴിഞ്ഞ എട്ടു ദിവസമായി തുടരുന്ന ചർച്ചയിലെ നിർദേശങ്ങൾ ഇറാനും അമേരിക്കയും പരിശോധിച്ചുവരികയാണെന്ന് ഖത്തർ വിദേശകാര്യ മന്ത്രാലയം അറിയിച്ചു.
നയതന്ത്ര ചർച്ചകളെ സ്വാഗതം ചെയ്യുമ്പോഴും സൈനിക നടപടികളിൽനിന്നു പിന്നോട്ടില്ലെന്ന സൂചനയാണ് യുഎസ് പ്രസിഡന്റ് ഡോണൾഡ് ട്രംപ് നൽകുന്നത്. സാഹചര്യം ആവശ്യപ്പെട്ടാൽ കടുത്ത നടപടികളിലേക്കു കടക്കാൻ മടിക്കില്ലെന്ന് അദ്ദേഹം ഫോക്സ് ന്യൂസിനോട് പറഞ്ഞു. ആക്രമണത്തിന് ഒട്ടും തിടുക്കമില്ല. ഇറാനെ സാന്പത്തികമായി തളർത്തി. അവരുടെ ആണവപദ്ധതി സ്ഥിതിചെയ്യുന്ന പിക്ആക്സ് മലയിൽ ചിലപ്പോൾ ആക്രമിച്ചേക്കും. അതിന് ഒരു മണിക്കൂർ മതിയെന്നും ട്രംപ് കൂട്ടിച്ചേർത്തു.
ആണവ ആക്രമണമുണ്ടായാൽ പ്രതിരോധിക്കേണ്ട വിധത്തെക്കുറിച്ച് ഇറാനിലെ ജനങ്ങൾക്ക് അധികൃതർ മുന്നറിയിപ്പും ജാഗ്രതാ നിർദേശങ്ങളും നൽകുന്നതായുള്ള റിപ്പോർട്ടുകളും പുറത്തുവരുന്നുണ്ട്.
National
കോൽക്കത്ത: ബംഗാളിൽ കൂദാശാകർമങ്ങൾക്കിടെ പള്ളിക്കുനേരേ ആക്രമണം. സൗത്ത് 24 പർഗാനാസ് ജില്ലയിലെ നാരായൺതാല ഗ്രാമത്തിൽ പുതുതായി നിർമിച്ച സിഎൻഐ പള്ളിയുടെ കൂദാശാ കർമങ്ങൾക്കിടെ ശനിയാഴ്ചയാണ് ഒരുസംഘമാളുകൾ ക്രൂരമായ ആക്രമണം അഴിച്ചുവിട്ടത്.
ചർച്ച് ഓഫ് നോർത്ത് ഇന്ത്യ (സിഎൻഐ) ബാരക്പുർ ബിഷപ് സുബ്രതോ ചക്രവർത്തി, വൈദികർ, സ്ത്രീകളും കുട്ടികളും അടക്കമുള്ള വിശ്വാസികൾ എന്നിവർ പങ്കെടുത്ത ചടങ്ങിലേക്ക് മുപ്പതോളംവരുന്ന അക്രമിസംഘം അതിക്രമിച്ചു കയറുകയായിരുന്നു.
ബിഷപ്പിന്റെ കാർമികത്വത്തിൽ നടന്ന ചടങ്ങ് അക്രമികൾ തടസപ്പെടുത്തുകയും പള്ളിവളപ്പിൽ നാശനഷ്ടങ്ങൾ വരുത്തുകയും കുരിശ് തകർക്കുകയും ചെയ്തു. തടയാൻ ശ്രമിച്ച വൈദികരെയും വിശ്വാസികളെയും ക്രൂരമായി മർദിച്ചു.
ദൃശ്യങ്ങൾ മൊബൈൽ ഫോണിൽ പകർത്താൻ ശ്രമിച്ചവരുടെ ഫോണുകൾ തകർത്തതായി പൊലിസ് പറഞ്ഞു. സ്ത്രീകൾക്കു നേരേയും ആക്രമണമുണ്ടായി. ഇനിയിവിടെ ഒരുവിധത്തിലുള്ള മതപരമായ ചടങ്ങുകളും നടത്താൻ അനുവദിക്കില്ലെന്ന് ഭീഷണിപ്പെടുത്തിയതായും വിശ്വാസികൾ പറഞ്ഞു.
സംഭവത്തിൽ പൊലിസ് അന്വേഷണം ആരംഭിച്ചിട്ടുണ്ട്. ആക്രമണത്തെ ക്രിസ്ത്യൻ സംഘടനയായ ‘ബംഗീയ ക്രിസ്തീയ പരിസേബ’ (ബിസിപി) ശക്തമായി അപലപിച്ചു. ന്യൂനപക്ഷ സമുദായത്തെ ഭയപ്പെടുത്താനുള്ള ശ്രമമാണ് ഇതിനു പിന്നിലെന്ന് അവർ ആരോപിച്ചു.
ഓഗസ്റ്റ്-സെപ്റ്റംബർ മാസങ്ങളിലും സംസ്ഥാനത്തിന്റെ വിവിധ ഭാഗങ്ങളിൽ സമാന സംഭവങ്ങൾ റിപ്പോർട്ട് ചെയ്തിട്ടുണ്ടെന്നും ന്യൂനപക്ഷങ്ങൾക്കു നേരേ വർധിച്ചുവരുന്ന ആക്രമണങ്ങളിൽ ആശങ്കയുണ്ടെന്നും എഐസിസി ജനറൽ സെക്രട്ടറി കെ.സി. വേണുഗോപാൽ പറഞ്ഞു. ആക്രണത്തിനു പിന്നിൽ പ്രവർത്തിച്ചവർക്കെതിരേ ശക്തമായ നടപടി വേണമെന്ന് അദ്ദേഹം ആവശ്യപ്പെട്ടു.
പശ്ചിമബംഗാളിലെതന്നെ ബുർദ്വാനിലെ ട്രൂ ലൈറ്റ് ഹാർവെസ്റ്റേഴ്സ് പെന്തക്കോസ്ത് പള്ളിയിൽ ഞായറാഴ്ച നടന്ന പ്രാർഥനയ്ക്കിടയിലും അറുപതോളം വരുന്ന സംഘം ആക്രമണം നടത്തി. പ്രാർഥനയ്ക്കു നേതൃത്വം നൽകിയ പാസ്റ്റർ ഛട്ടു ദാസിന് ഗുരുതരമായി പരിക്കേറ്റു.
ആറു മാസത്തിനിടെ സംസ്ഥാനത്ത് ക്രിസ്ത്യൻ സമൂഹത്തിനെതിരേ 26 ആക്രമണ സംഭവങ്ങൾ റിപ്പോർട്ട് ചെയ്തിട്ടുണ്ടെന്ന് ബംഗീയ ക്രിസ്തീയ പരിസേബ ജനറൽ സെക്രട്ടറി ഹെരോദ് മല്ലിക് ചുണ്ടിക്കാട്ടി.
Kerala
കണ്ണൂർ: മന്ത്രിയെ ആക്രമിക്കാനല്ലാതെ ബൊക്കെ കൊടുക്കാനാണോ കെഎസ്യു, യൂത്ത് കോൺഗ്രസ് പ്രവർത്തകർ റെയിൽവേ സ്റ്റേഷനിൽ പോയതെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ.
മന്ത്രി വീണാ ജോർജിനെ കെഎസ്യു പ്രവർത്തകർ ആക്രമിച്ചിട്ടില്ലെന്ന പ്രത്യേക അന്വേഷണ സംഘം ഡിജിപിക്ക് നൽകിയ റിപ്പോർട്ടിനെക്കുറിച്ച് മാധ്യമപ്രവർത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.
" ബഹുമാനപ്പെട്ട മന്ത്രി അങ്ങ് ആരോഗ്യവകുപ്പിൽ സ്വീകരിച്ച നടപടികളിൽ എല്ലാം ഞങ്ങൾ പൂർണ തൃപ്തരാണ്. അങ്ങേക്ക് ഒരു ബൊക്കെ തരാം. അതിനുവേണ്ടി പോയതാണോ. പ്രതിഷേധത്തിന്റെ ഭാഗമായി രണ്ടു നീക്കങ്ങളുണ്ട്. ഒരു നീക്കം മന്ത്രിയുടെ വീട്ടിൽ റീത്ത് വച്ചതല്ലേ. മന്ത്രി മരിച്ചുവെന്നല്ലേ അതിന്റെ അർഥം.
മന്ത്രിയെ പ്രതീകാത്മകമായി കൊന്നിട്ട് റീത്ത് വയ്ക്കലാണോ പ്രതിഷേധം. കോൺഗ്രസിന്റെ നേതാക്കൾ പോലും ആ നടപടിയെ തള്ളിപ്പറഞ്ഞില്ലേ. കോൺഗ്രസുകാർ പ്രതിപക്ഷത്തിരുന്ന് ചെയ്ത തെറ്റുകളെയെല്ലാം സംരക്ഷിക്കാൻ വേണ്ടിയിട്ട് പ്രത്യേക അന്വേണസംഘം രൂപീകരിക്കുന്നതാണ് ഇപ്പോൾ കാണുന്ന ഒരു പ്രവണതയെന്ന് ജയരാജൻ പറഞ്ഞു.
Kerala
കണ്ണൂർ: മുൻമന്ത്രി വീണാ ജോർജിനെ ആക്രമിച്ചുവെന്ന കേസിൽ കെഎസ്യു പ്രവർത്തകർക്ക് ക്ലീൻ ചിറ്റ്. പ്രവർത്തകർ മന്ത്രിയെ ആക്രമിക്കാൻ ശ്രമിച്ചിട്ടില്ലെന്നും കണ്ണൂരിൽ നടന്നത് കരിങ്കൊടി പ്രതിഷേധം മാത്രമാണെന്നുമാണ് പ്രത്യേക അന്വേഷണസംഘം റിപ്പോർട്ട് നൽകിയത്.
മുൻമന്ത്രിയും ഗൺമാനും സംഭവത്തെ പെരുപ്പിച്ചുകാണിക്കുകയായിരുന്നുവെന്നും റിപ്പോർട്ടിൽ വ്യക്തമാക്കുന്നു. 2026 ഫെബ്രുവരി 26-ന് കണ്ണൂർ റെയിൽവേ സ്റ്റേഷനിൽവച്ച് മന്ത്രിയെ കെഎസ്യു പ്രവർത്തകർ ആക്രമിച്ചു എന്നായിരുന്നു കേസ്.
പ്രക്ഷോഭത്തിനിടെ കൈയാങ്കാളിയുണ്ടായതായും ഈ ഘട്ടത്തിൽ മന്ത്രിക്ക് നേരിയ പരിക്കേറ്റതായും പരിയാരം മെഡിക്കൽ കോളജിലെ ഡോക്ടർമാർ മൊഴി നൽകിയിട്ടുണ്ട്. എന്നാൽ സംഭവം നടക്കുമ്പോൾ മന്ത്രിയെ ആക്രമിക്കാൻ ശ്രമിച്ചുവെന്ന് ആദ്യം മൊഴി നൽകിയ ഗൺമാൻ പിന്നീട് അത് തിരുത്തി. മന്ത്രിയുടെ സമ്മർദ്ദപ്രകാരമാണ് അന്ന് ആക്രമണശ്രമമുണ്ടെന്ന തരത്തിൽ മൊഴി നൽകേണ്ടി വന്നതെന്നാണ് ഗൺമാൻ പിന്നീട് അന്വേഷണസംഘത്തിന് മൊഴി നൽകിയത്.
ഇതുമായി ബന്ധപ്പെട്ട് വിവിധ അനുകൂല മൊഴികൾ കേസിന്റെ ആദ്യഘട്ടത്തിൽ ഉണ്ടായിരുന്നുവെങ്കിലും നിലവിൽ കേസ് കോടതിയുടെ പരിഗണനയിലിരിക്കെ യുഡിഎഫ് സർക്കാർ പ്രത്യേക അന്വേഷണസംഘത്തെ നിയോഗിച്ച് വീണ്ടും അന്വേഷണം നടത്തുകയായിരുന്നു. ഇതിനിടയിലാണ് ഗൺമാൻ മൊഴി മാറ്റിയത്. പുതിയ അന്വേഷണ റിപ്പോർട്ടിന്റെ പശ്ചാത്തലത്തിൽ കേസ് നിലനിൽക്കാത്ത സ്ഥിതിയിലേക്കെത്തും.
Kerala
തിരുവനന്തപുരം: കണ്ണൂർ റെയിൽവേ സ്റ്റേഷനിൽവച്ച് മുൻ ആരോഗ്യമന്ത്രി വീണാ ജോർജിനെ കെഎസ്യു പ്രവർത്തകർ ആക്രമിച്ചെന്ന കേസിൽ പ്രത്യേക അന്വേഷണ സംഘം ഡിജിപിക്ക് റിപ്പോർട്ട് നല്കി.
വീണാ ജോർജിനെ കെഎസ്യു പ്രവർത്തകർ ആക്രമിച്ചിട്ടില്ലെന്നും മന്ത്രിയുടെ അടുത്തെത്താൻ പോലും കഴിഞ്ഞില്ലെന്നും വ്യക്തമാക്കുന്നതാണ് റിപ്പോർട്ട്. പൊലിസും പ്രവര്ത്തകരുമായി ഉന്തും തള്ളുമുണ്ടായി. ഇതിനിടയില്പ്പെട്ടതിനാലാണ് വീണാജോര്ജിന് കഴുത്തുവേദന ഉണ്ടായത്. മുൻമന്ത്രിയും ഗൺമാനും പ്രശ്നം പെരുപ്പിച്ച് കാണിച്ചുവെന്നും പുറത്ത് പരിക്കില്ലെന്നാണ് ഡോക്ടര്മാരുടെ റിപ്പോര്ട്ടെന്നും പ്രത്യേക അന്വേഷണ സംഘം വ്യക്തമാക്കി.
നേരത്തെ കേസില് എസ്ഐ ദീപ്തി മൊഴിമാറ്റിയിരുന്നു. തന്റെ പേരില് കള്ളമൊഴി എഴുതിച്ചേര്ത്തുവെന്നും സുരക്ഷാ ചുമതലയുണ്ടായിരുന്ന ദീപ്തി എസ്ഐടിക്ക് മൊഴി നല്കി. വീണാ ജോർജിനെ പ്രതിരോധത്തിലാക്കി ഗൺമാൻ അഭിലാഷിന്റെ മൊഴിയും പുറത്തുവന്നിരുന്നു.
National
അമരാവതി: ആന്ധ്രപ്രദേശിലെ അനന്തപുർ ജില്ലയിൽ സ്കൂളിലെ ക്ലാസ്മുറിയിലേക്ക് അതിക്രമിച്ചു കയറി പത്താംക്ലാസ് വിദ്യാർഥിനിയെ യന്ത്രവാൾ ഉപയോഗിച്ച് കൊലപ്പെടുത്താൻ ശ്രമിച്ച ഇരുപത്തൊന്നുകാരൻ പിടിയിൽ.
ശ്രീ സത്യസായ് ജില്ലയിലെ ധർമവരം നഗലൂർ സ്വദേശിയായ ഹേമന്ത് ആണ് ക്രൂരകൃത്യം നടത്തിയത്. പെൺകുട്ടിയുടെ ബന്ധുവാണ് പ്രതിയെന്നാണ് പ്രാഥമിക വിവരം. ആക്രമണത്തിൽ ഗുരുതരമായി പരിക്കേറ്റ പെൺകുട്ടിക്ക് അടിയന്തര ശസ്ത്രക്രിയ നൽകിയശേഷം വിദഗ്ധ ചികിത്സയ്ക്കായി ബംഗളൂരുവിലേക്ക് മാറ്റും.
അനന്തപുർ ജില്ലയിലെ രപ്തഡു മണ്ഡലിലുള്ള ജില്ലാ പരിഷദ് ഹൈസ്കൂളിൽ ശനിയാഴ്ച രാവിലെയാണ് സംഭവം നടന്നത്. ക്ലാസ് തുടങ്ങുന്നതിന് തൊട്ടുമുമ്പ് സ്കൂളിൽ അതിക്രമിച്ചുകയറിയ ഹേമന്ത് പെൺകുട്ടിയെ ആക്രമിക്കുകയായിരുന്നു. കുട്ടിയുടെ മുഖത്തും കഴുത്തിലും പുറത്തും ആഴത്തിൽ പരിക്കേറ്റിട്ടുണ്ട്. മറ്റ് വിദ്യാർഥികൾ നിലവിളിച്ചിട്ടും പ്രതി ആക്രമണം തുടർന്നു. ഈ സമയം പെൺകുട്ടിയെ രക്ഷിക്കാൻ ശ്രമിക്കുന്നതിനിടയിൽ മറ്റൊരു വിദ്യാർഥിനിക്കും പരിക്കേറ്റു.
രക്തത്തിൽ കുളിച്ചുകിടന്ന പെൺകുട്ടിയെ ഉപേക്ഷിച്ച് പ്രതി സ്കൂളിൽനിന്നും രക്ഷപ്പെടുകയായിരുന്നു. തുടർന്ന് സ്കൂൾ അധികൃതർ വിവരം അറിയിച്ചതിനെ തുടർന്ന് പൊലിസെത്തിയാണ് പരിക്കേറ്റ കുട്ടിയെ അടുത്തുള്ള ആശുപത്രിയിലേക്ക് മാറ്റിയത്.
സംഭവത്തിൽ കൊലപാതകശ്രമത്തിന് കേസെടുത്ത പൊലിസ്, പിന്നീട് ധർമവരം റെയിൽവേ സ്റ്റേഷനിൽനിന്നാണ് പ്രതിയെ പിടികൂടിയത്. ആക്രമണത്തിനുള്ള യഥാർത്ഥ കാരണം എന്താണെന്ന് വ്യക്തത വന്നിട്ടില്ല.
National
അമരാവതി: ആന്ധ്രാപ്രദേശിൽ ക്ലാസ് മുറിയിൽ വച്ച് പത്താം ക്ലാസ് വിദ്യാർഥിക്ക് നേരെ ആക്രമണം. ഗോപിക എന്ന പത്താംക്ലാസ് വിദ്യാർഥിയാണ് ആക്രമണത്തിനിരയായത്. പ്രണയാഭ്യർഥന നിരസിച്ചതിനെ തുടർന്ന് യുവാവ് ചെയിൻസോ ഉപയോഗിച്ച് പെൺകുട്ടിയുടെ മുഖം വെട്ടിപ്പരിക്കേൽപ്പിക്കുകയായിരുന്നു. അനന്തപൂർ ജില്ലയിലെ ഹൈസ്കൂളിൽ വെള്ളിയാഴ്ചയായിരുന്നു സംഭവം നടന്നത്.
ഗുരുതരമായി പരിക്കേറ്റ പെൺകുട്ടിയെ സഹപാഠികളും അധ്യാപകരും ചേർന്ന് ഉടൻതന്നെ അടുത്തുള്ള ആശുപത്രിയിൽ പ്രവേശിപ്പിച്ചു. പെൺകുട്ടിക്ക് വിദഗ്ധ ചികിത്സ ഉറപ്പാക്കാൻ മുഖ്യമന്ത്രി എൻ. ചന്ദ്രബാബു നായ്ഡു കർശന നിർദേശം നൽകിയിട്ടുണ്ട്.
ക്ലാസ്മുറിക്കുള്ളിലേക്ക് ചെയിൻസോയുമായി അതിക്രമിച്ചുകടന്ന പ്രതി സഹപാഠികൾ നോക്കിനിൽക്കെയാണ് ഗോപികയെ ആക്രമിച്ചത്. പെൺകുട്ടിയുടെ മുഖത്തും തലയിലും പുറത്തുമാണ് പ്രതി ആഴത്തിലുള്ള പരിക്കുകൾ ഏൽപ്പിച്ചത്. ആക്രമണം തടയാൻ ശ്രമിച്ച ലക്ഷ്മി എന്ന മറ്റൊരു വിദ്യാർഥിക്കും പരിക്കേറ്റിട്ടുണ്ട്. സംഭവത്തിന് ശേഷം പ്രതി രക്ഷപ്പെടുകയായിരുന്നു.
ഗോപികയുടെ ബന്ധുവാണ് പ്രതിയെന്നും ഇയാൾ കുറച്ചുകാലമായി പെൺകുട്ടിയെ നിരന്തരം ശല്യപ്പെടുത്തിവരികയായിരുന്നുവെന്നും പ്രാഥമിക അന്വേഷണത്തിൽ വ്യക്തമായിട്ടുണ്ട്. ശല്യം തുടർന്നാൽ മാതാപിതാക്കളോട് പരാതിപ്പെടുമെന്ന് ഗോപിക പ്രതിക്ക് മുന്നറിയിപ്പ് നൽകിയിരുന്നു. ഇതേതുർന്നാണ് ഇയാൾ പെൺക്കുട്ടിയെ പരിക്കേൾപ്പിച്ചത്.
സംഭവത്തിൽ പൊലിസ് കേസെടുത്തിട്ടുണ്ട്. ഒളിവിൽ പോയ പ്രതിക്കായി തെരച്ചിൽ ഊർജിതമാക്കിയിട്ടുണ്ട്. കുറ്റവാളിയെ എത്രയും പെട്ടെന്ന് പിടികൂടി കടുത്ത നിയമനടപടി സ്വീകരിക്കാൻ മുഖ്യമന്ത്രി പൊലിസിന് കർശന നിർദേശം നൽകിയിട്ടുണ്ട്.
Kerala
വൈപ്പിന്: ഭാര്യയുടെ തറവാട്ട് വീട്ടില് വാടകക്കാരായി എത്തിയവരുമായുള്ള വാക്കുതര്ക്കത്തിനിടെ യുവാവിന് വടിവാളുകൊണ്ട് വെട്ടേറ്റു. പുതുവൈപ്പ് കമ്പനി പീടിക തൈപ്പറമ്പ് ആഷിക്കിനാണ് (29) വെട്ടേറ്റത്. സംഭവത്തില് മുഖ്യപ്രതിയെ ഞാറക്കല് പൊലിസ് രാത്രി തന്നെ അറസ്റ്റ് ചെയ്തു. ചേരാനല്ലൂര് വടുതല സത്യതറയില് സഞ്ജു (24) ആണ് അറസ്റ്റിലായത്.
വ്യാഴാഴ്ച രാത്രി എട്ടോടെ വളപ്പ് ബീച്ച് റോഡില് ആയിരുന്നു സംഭവം. കഴുത്തിന് നേരെയുള്ള വെട്ട് ഇടതു കൈകൊണ്ട് തടഞ്ഞതിനെ തുടര്ന്ന് ആഷിക്കിന്റെ കൈയിലാണ് വെട്ടേറ്റത്. ഇടതുകൈമുട്ടിന് താഴെ മുറിഞ്ഞ് അസ്ഥി ഒടിഞ്ഞുതൂങ്ങി രക്തം വാര്ന്ന നിലയില് ആഷിക്കിനെ രാത്രി തന്നെ എറണാകുളം സ്പെഷലിസ്റ്റ് ആശുപത്രിയില് പ്രവേശിപ്പിച്ച് അടിയന്തര ശസ്ത്രക്രിയ നടത്തി.
വടിവാളില് കയറിപ്പിടിച്ച ആഷിക്കിന്റെ കൈകളും മുറിഞ്ഞിട്ടുണ്ട്. തടയാന് ചെന്ന് ആഷിക്കിന്റെ അമ്മ സ്മിത, ഭാര്യ രഹിത, അനുജത്തി ഹരിത എന്നിവര്ക്കും പരിക്കുണ്ട്. രഹിതയുടെ തറവാട്ടില് താമസിക്കാന് വന്നവരുമായി ഉണ്ടായ തര്ക്കത്തിനിടെ ഒന്നാം പ്രതി സഞ്ജു വാടക വീട്ടിലേക്ക് ഓടിക്കയറി വടിവാള് കൊണ്ടുവന്ന് ആക്രമിക്കുകയായിരുന്നു. രണ്ടാം പ്രതി സനീഷ് ഒളിവിലാണ്. ഇയാള്ക്കായി തെരച്ചില് നടക്കുന്നുണ്ട്.
Kerala
കന്പംമെട്ട്: കുഴിത്തൊളുവിൽ ഭാര്യയെ കമ്പിവടിക്ക് ആക്രമിച്ചയാൾ സ്വയം വെടിവച്ചു മരിച്ചു. കുഴിത്തൊളു പോസ്റ്റ് ഒാഫീസിലെ പോസ്റ്റ് ഒഫീസ് ജീവനക്കാരിയായ ശ്രീജയെയാണ് ഭർത്താവ് സന്തോഷ് ആക്രമിച്ചത്. കമ്പിവടി ഉപയോഗിച്ചു തലയ്ക്ക് അടിക്കുകയായിരുന്നു. തുടർന്ന് കൈയിൽ കരുതിയിരുന്ന റിവോൾവർ ഉപയോഗിച്ചു സ്വയം വെടിവച്ചു മരിച്ചു.
ഇന്നു രാവിലെയായിരുന്നു സംഭവം. പരിക്കേറ്റ യുവതി അതീവ ഗുരുതരാവസ്ഥയിൽ ചികിത്സയിലാണ്. പോസ്റ്റ് ഒാഫീസിൽ എത്തിയാണ് സന്തോഷ് ഭാര്യയെ ആക്രമിച്ചത്. കമ്പംമെട്ട് പോലീസ് കേസെടുത്ത് അന്വേഷണം ആരംഭിച്ചു.
Kerala
വൈപ്പിന്: വായ്പയെടുത്തു കുടിശിക വരുത്തിയവര്ക്കെതിരെയുള്ള ആര്ബിട്രേഷന് നടപടിക്കായി നിയോഗിക്കപ്പെട്ട ഉദ്യോഗസ്ഥരെ രണ്ടംഗസംഘം വഴിയില് തടഞ്ഞുനിര്ത്തി കൈയേറ്റം ചെയ്തതായി പരാതി.
കൊച്ചി അസിസ്റ്റന്റ് രജിസ്ട്രാര് ഓഫീസിലെ സ്പെഷല് സെയില് ഓഫീസര് തൊടുപുഴ കൈതക്കോട് ആലുങ്കല് ഷിഹാബ് കരീം, എടവനക്കാട് സര്വീസ് സഹകരണ ബാങ്കിലെ ജീവനക്കാരായ സിയാദ്, ആദിത്യ വിനോദ്, ഹര്ഷാദ് എന്നിവര്ക്കെതിരെയാണ് കൈയേറ്റമുണ്ടായത്. കഴിഞ്ഞ ദിവസം എടവനക്കാട് ചാത്തങ്ങാട് മായാബസാറിലായിരുന്നു സംഭവം.
ഈ ഭാഗത്ത് നോട്ടീസ് നല്കാന് വേണ്ടി എത്തിയ സംഘത്തിന്റെ കാര് ബൈക്ക് കൊണ്ട് വട്ടം വച്ച് തടഞ്ഞ ശേഷം രണ്ടംഗസംഘം അസഭ്യം പറയുകയും കൈയേറ്റം ചെയ്യുകയുമായിരുന്നു. ഞാറക്കല് പൊലിസില് നല്കിയ പരാതിയില് എടവനക്കാട് പെരുമ്പടപ്പില് അഖില്, തോട്ടുങ്കല് ലിജേഷ് എന്നിവര്ക്കെതിരെ കേസ് എടുത്തു.
National
ജയ്പൂർ: ജയ്പൂരിലെ ജംദോളിയിൽ ജ്വല്ലറി ഉടമകളായ രണ്ട് സഹോദരങ്ങളെ ബൈക്കിലെത്തിയ സംഘം വെടിവയ്ക്കുകയും ഇരുമ്പ് വടികൊണ്ട് അടിക്കുകയും ചെയ്തു. ഇവരെ രക്ഷിക്കാൻ എത്തിയ ഒരു സ്ത്രീയുടെ കാലിനും അക്രമികളുടെ വെടിയേറ്റു. ആക്രമണത്തിന് ശേഷം സംഘം ആഭരണങ്ങളുമായി കടന്നുകളഞ്ഞു. രാധാ ഗോവിന്ദ് വിഹാറിലെ 'എസ്.ആർ. ജ്വല്ലേഴ്സ്' എന്ന സ്ഥാപനം പൂട്ടി സ്കൂട്ടറിൽ വീട്ടിലേക്ക് മടങ്ങുകയായിരുന്ന സോനു സ്വർൺകർ (35), നിഷു സോണി (38) എന്നിവരെയാണ് മൂന്നു പേരടങ്ങുന്ന സംഘം ആക്രമിച്ചത്. ബുധനാഴ്ച രാത്രിയായിരുന്നു സംഭവം.
വെടിയുതിർത്ത് സഹോദരങ്ങളെ സ്കൂട്ടറിൽ നിന്ന് താഴെയിറക്കിയ അക്രമികൾ, ആഭരണങ്ങൾ അടങ്ങിയ ബാഗ് തട്ടിയെടുക്കാൻ ശ്രമിച്ചു. ഇവർ ചെറുത്തുനിന്നപ്പോൾ ഇരുമ്പ് വടികൾ ഉപയോഗിച്ച് മർദിക്കുകയായിരുന്നു. രണ്ട് ചെറിയ ആഭരണ പെട്ടികളും ഒരു സ്വർണമാലയും അക്രമികൾ കവർന്നതായി കുടുംബം ആരോപിച്ചു.
ഇവരുടെ നിലവിളി കേട്ട് സീമ ഗുപ്ത (32) എന്ന സ്ത്രീ സഹായത്തിനായി ഓടിയെത്തി. കല്ലുകളുമായി അക്രമികളെ നേരിടാൻ ശ്രമിച്ചെങ്കിലും കൂടുതൽ ആളുകൾ തടിച്ചുകൂടുന്നതിന് മുമ്പ് അക്രമികൾ ഇവരുടെ കാലിലേക്ക് വെടിയുതിർക്കുകയായിരുന്നു. തുടർന്ന് സംഘം അവിടെനിന്ന് രക്ഷപ്പെടുകയും ചെയ്തു.
പരിക്കേറ്റ മൂവരെയും ഉടൻ തന്നെ ആശുപത്രിയിൽ പ്രവേശിപ്പിച്ചു. ആക്രമണത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. സംഭവത്തിൽ കേസെടുത്ത പൊലിസ് അന്വേഷണം ആരംഭിച്ചിട്ടുണ്ട്.
International
ബെൽഗ്രേഡ്: സെർബിയൻ തലസ്ഥാനമായ ബെൽഗ്രേഡിൽ ഇസ്രേലി എംബസിക്കു മുന്നിൽ കത്തിയാക്രമണത്തിനു ശ്രമിച്ചയാളെ പൊലിസുകാരൻ വെടിവച്ചു കൊന്നു. പ്രായപൂർത്തിയാകാത്ത അക്രമി സെർബിയൻ പൗരനാണ്.
“അള്ളാഹു അക്ബർ” എന്നു വിളിച്ചുകൊണ്ടാണ് ഇയാൾ ആക്രമണം നടത്തിയതെന്ന് സെർബിയൻ ആഭ്യന്തരമന്ത്രാലയം അറിയിച്ചു. സംഭവത്തെ ഭീകരാക്രമണം ആയിട്ടാണു പരിഗണിക്കുന്നത്.
രണ്ടു കത്തികളുമായി എത്തിയ ഇയാൾ ഇസ്രേലി എംബസിക്കു മുന്നിൽ പാറാവ് നിൽക്കുന്ന പൊലിസുകാരുടെ ഗാർഡ്ഗൗസ് തുറന്ന് ആക്രമണം നടത്തുകയായിരുന്നു. കത്തികളിലൊന്ന് പൊലിസുകാരനു നേർക്ക് വലിച്ചെറിഞ്ഞു. പൊലിസുകാരൻ തിരിച്ചുവെടിവയ്ക്കുകയും അക്രമിസ്ഥലത്തു മരണമടയുകയും ചെയ്തു. കത്തിയേറിൽ പൊലിസുകാരന്റെ മുഖത്ത് ചെറിയ പരിക്കേറ്റു.
ഇസ്ലാമിക് സ്റ്റേറ്റ് ഭീകരസംഘടനയുടെ അനുഭാവി ആയിരുന്ന അക്രമി പൊലിസിന്റെ നിരീക്ഷണത്തിലായിരുന്നു. ഇയാളുടെ സോഷ്യൽ മീഡിയ അക്കൗണ്ടിൽ ഇസ്ലാമിക് സ്റ്റേറ്റ് പതാക പോസ്റ്റ് ചെയ്തിരുന്നതായും കണ്ടെത്തി.
ആക്രമണത്തിന്റെ പശ്ചാത്തലത്തിൽ സെർബിയയിൽ ഭീകരാക്രമണ ജാഗ്രത റെഡ് അലർട്ടിലേക്ക് ഉയർത്തി. ഇസ്രേലി പാർലമെന്റ് തെരഞ്ഞെടുപ്പിന്റെ പിറ്റേന്നാണ് ഈ ആക്രമണം.
2024ൽ ജൂണിൽ ബെൽഗ്രേഡിലെ ഇസ്രേലി എംബസിക്കു കാവൽ നിന്നിരുന്ന പൊലിസുകാരനെ ഒരക്രമി ക്രോസ്ബോ ഉപയോഗിച്ച് ആക്രമിച്ചിരുന്നു. അക്രമിയെ പൊലിസുകാരൻ വെടിവച്ചുകൊന്നു.
International
അബുജ: വടക്കുകിഴക്കൻ നൈജീരിയയിൽ കൊള്ളക്കാരുടെ ആക്രമണത്തിൽ 62 പേർ കൊല്ലപ്പെട്ടു. തരാബ സംസ്ഥാനത്ത് വെള്ളിയാഴ്ചയാണ് ആക്രമണം. 52 പേർക്കു പരിക്കേറ്റു.
ഒട്ടേറെ പേർ പലായനം ചെയ്തു. മരണസംഖ്യ ഇനിയും ഏറെ ഉയർന്നേക്കാമെന്നാണു വിലയിരുത്തൽ. ഇതുവരെ അഞ്ച് മൃതദേഹങ്ങൾ കണ്ടെടുത്തു. ഇതിൽ പതിനഞ്ചെണ്ണം ബെന്യു നദിയിൽനിന്നാണ് കണ്ടെടുത്തത്.
വടക്കുകിഴക്കൻ നൈജീരിയിൽ നാട്ടുകാർക്കു നേർക്ക് സായുധ സംഘങ്ങളുടെ ആക്രമണം പതിവാണ്.
International
അമ്മാൻ: ഓർത്തഡോക്സ് പള്ളിയിലെ ഭീകരാക്രമണത്തിനു മറുപടിയായി തെക്കൻ സിറിയയിൽ വ്യോമാക്രമണം നടത്തി ഇരുപതിലേറെ ഇസ്ലാമിക് സ്റ്റേറ്റ് ഭീകരരെ വധിച്ചതായി ജോർദാൻ സർക്കാർ അറിയിച്ചു. ഭീകരരുടെ ഒളിത്താവളങ്ങളിൽ തിങ്കളാഴ്ചയായിരുന്നു ആക്രമണം.
വെള്ളിയാഴ്ച ഒന്പതു പേർ കൊല്ലപ്പെട്ട പള്ളിയാക്രമണ ത്തിനു പിന്നിൽ അതിർത്തിക്കപ്പുറത്തുള്ള ഭീകരസംഘടനകളാണെന്നു ജോർദാൻ സർക്കാർ പറഞ്ഞിരുന്നു.
സിറിയൻ ഭരണകൂടത്തിന്റെ സഹകരണത്തോടെയാണ് വ്യോമാക്രമണങ്ങളെന്ന് ജോർദാൻ അവകാശപ്പെട്ടു. എന്നാൽ, സിറിയ ഇക്കാര്യം നിഷേധിച്ചു. ആക്രമണത്തിൽ മൂന്നു കുട്ടികളും ഒരു സ്ത്രീയും അടക്കം ഏഴു സിവിലിയന്മാർ കൊല്ലപ്പെട്ടെന്നും ജോർദാൻ ഭരണകൂടം ഇതിൽ ഖേദം പ്രകടിപ്പിച്ചുവെന്നും സിറിയ അവകാശപ്പെട്ടു.
വ്യോമാക്രമണത്തിനു പിന്നാലെ ജോര്ദാനുമായുള്ള അതിര്ത്തി അടച്ചതായി സിറിയ അറിയിച്ചു. വ്യോമാക്രമണത്തില് വിശദമായ അന്വേഷണം ആരംഭിച്ചെന്നും ജോര്ദാന് അധികൃതരെ ബന്ധപ്പെടുന്നുണ്ടെന്നും സിറിയ പറഞ്ഞു.
ഇതിനിടെ പള്ളിയാക്രമണവുമായി ബന്ധപ്പെട്ട് അടുത്ത ബന്ധുക്കളായ മൂന്നുപേരെ ജോർദാൻ പൊലീസ് കഴിഞ്ഞദിവസം അറസ്റ്റ് ചെയ്തിട്ടുണ്ട്.
ഹമൗദിലെ സെന്റ് ജോർജ് പള്ളിയിൽ മൃതസംസ്കാരച്ചടങ്ങിനിടെ ഉണ്ടായ ആക്രമണത്തിന്റെ ഉത്തരവാദിത്വം ഒരു സംഘടനയും ഏറ്റെടുത്തിട്ടില്ല.
International
റിയാദ്: സൗദി അറേബ്യയുടെ പ്രതിരോധ മന്ത്രാലയത്തിന് നേരെ ആക്രമണം നടത്തിയതായി ഹൂതികൾ. റിയാദിലെ പ്രതിരോധ മന്ത്രാലയത്തിന് നേരെ തങ്ങളുടെ സായുധസേന മിസൈലാക്രമണം നടത്തിയെന്നാണ് ഹൂതികളുടെ വാദം.
തങ്ങളുടെ മിസൈലുകൾ ലക്ഷ്യം കണ്ടതായി ഹൂതി സൈനിക വക്താവ് യഹ്യ സരീ അറിയിച്ചു. ഹൂതികളുടെ രണ്ട് മിസൈൽ ആക്രമണങ്ങളെ പ്രതിരോധിച്ചെന്ന സൗദിയുടെ പ്രസ്താവനക്ക് പിന്നാലെയാണ് ഹൂതികൾ അവകാശവാദവുമായി രംഗത്തെത്തിയത്.
സൗദി അറേബ്യയിലെ മറ്റ് പ്രധാന കേന്ദ്രങ്ങൾക്ക് നേരെയും ആക്രമണം നടത്തിയതായി ഹൂതികൾ അവകാശവാദം ഉന്നയിച്ചു. സൗദിയുടെ രണ്ട് സൈനിക വിമാനങ്ങളെ ആക്രമിച്ചെന്നാണ് ഹൂതികളുടെ അവകാശവാദം.
ഇതുകൂടാതെ സൗദിയുടെ ഏറ്റവും വലിയ എണ്ണശുദ്ധീകരണ ശാലയായ റാസ് തനൂറയ്ക്ക് നേരെയും ആക്രമണം നടത്തിയതായി ഹൂതികൾ അറിയിച്ചു. എന്നാൽ ഇതുസംബന്ധിച്ച് സൗദി അധികൃതർ സ്ഥിരീകരണം നടത്തിയിട്ടില്ല.
Kerala
തിരുവനന്തപുരം: വന്യജീവി ആക്രമണം മൂലം ഉണ്ടാകുന്ന മരണത്തിനുള്ള നഷ്ടപരിഹാരം 17.5 ലക്ഷമായി വർധിപ്പിച്ചു. വന്യജീവി ആക്രമണം മൂലമുണ്ടാകുന്ന മരണത്തിനുള്ള നഷ്ടപരിഹാരവും പരിക്കേൽക്കുന്നവർക്കുള ചികിത്സാ ധനസഹായവും ഉൾപ്പെടെ നിലവിൽ നൽകുന്ന തുകയുടെ 25 ശതമാനം വർധിപ്പിച്ച് സർക്കാർ ഉത്തരവിറക്കി. പുതുക്കിയ ഉത്തരവ് പ്രകാരം വന്യജീവി ആക്രമണത്തിൽ ഉണ്ടാകുന്ന മരണത്തിന് നിലവിലുള്ള 14 ലക്ഷം രൂപയെന്ന നഷ്ടപരിഹാരം 17.5 ലക്ഷം രൂപയായി വർധിപ്പിച്ചു.
പാന്പ്, തേനീച്ച, കടന്നൽ എന്നിവയുടെ ആക്രമണം മൂലമുള്ള മരണത്തിന് നാലു ലക്ഷമെന്നത് അഞ്ചു ലക്ഷം രൂപയായി ഉയർത്തി. വന്യജീവി ആക്രമണത്തിൽ 40 ശതമാനം മുതൽ 60 ശതമാനം വരെ അംഗവൈകല്യം സംഭവിച്ചാൽ നൽകുന്ന നഷ്ടപരിഹാരം രണ്ടു ലക്ഷം രൂപയെന്നത് 2.5 ലക്ഷം രൂപയായി വർധിപ്പിച്ചു.60 ശതമാനത്തിലധികം അംഗവൈകല്യം സംഭവിച്ചാൽ 3,12,500 രൂപ നഷ്ടപരിഹാം നൽകും.
പരിക്കേറ്റ് ചികിത്സയിൽ കഴിയേണ്ടി വന്നാൽ പുതിയ ഉത്തരവ് പ്രകാരം പരിക്കിന്റെ ഗുരുതരാവസ്ഥ അനുസരിച്ച് 1,25000 രൂപ വരെ ലഭിക്കും. ഒരാഴ്ചയ്ക്ക് മുകളിൽ ആശുപത്രിവാസം വേണ്ടിവരുന്ന ഗുരുതര പരിക്കുകൾക്ക് ഒരു ലക്ഷം രൂപ വരെ സിഎംഡിആർഎഫിൽ നിന്നും അനുവദിക്കും.
അതീവ ഗുരുതരമായി പരിക്കേൽക്കുന്നവർക്കും ദീർഘകാലം ചികിത്സ ആവശ്യമായി വരുന്ന വർക്കും ചികിത്സയ്ക്കായി വൻതുക ചെലവാകുന്ന സാഹചര്യത്തിൽ, ചികിത്സിക്കുന്ന ഡോക്ടറുടെ സർട്ടിഫിക്കറ്റിന്റെ അടിസ്ഥാനത്തിൽ ചികിത്സയ്ക്ക് ചെലവായ യഥാർഥ തുക മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അനുവദിക്കാവുന്നതാണെന്നും ഉത്തരവിൽ പറയുന്നു.
International
റിയാദ്: സൗദി അറേബ്യയിലേക്ക് വീണ്ടും ആക്രമണം നടത്തി ഹൂതികൾ. റിയാദ്, ദമാം, നജ്റാൻ വിമാനത്താവളങ്ങൾ ആക്രമിച്ചുവെന്നാണ് ഹൂതികളുടെ അവകാശവാദം.
ഈസ്റ്റ് - വേസ്റ്റ് പൈപ്പ് ലൈനും, റാബിഗ് ഓയിൽ റിഫൈനറിയും യാമ്പുവിൽ ആരാംകോ കമ്പനിയും ആക്രമിച്ചെന്നും ഹൂതികൾ അവകാശപ്പെട്ടു.
അതേസമയം സംഘർഷത്തിന്റെ പശ്ചാത്തലത്തിൽ മിഡിൽ ഈസ്റ്റിലെ അമേരിക്കൻ പൗരന്മാർക്കുള്ള ജാഗ്രത നിർദേശം അമേരിക്ക പുതുക്കി. സംഘർഷം വ്യാപിച്ചേക്കുമെന്നും മുൻകരുതൽ വേണമെന്നുമാണ് നിർദേശം നൽകിയിരിക്കുന്നത്.
National
ചെന്നൈ: തമിഴ്നാട്ടിലെ തൂത്തുക്കുടിയിൽ വീട്ടിനുള്ളിൽ അതിക്രമിച്ചു കയറി അജ്ഞാതർ നടത്തിയ ആക്രമണത്തിൽ സ്ത്രീ കൊല്ലപ്പെട്ടു. ഭർത്താവിനും മകനും ഗുരുതരമായി പരിക്കേറ്റു. സംഭവസ്ഥലത്തുനിന്ന് ദമ്പതികളുടെ രണ്ട് പെൺകുട്ടികളെ കാണാതായിട്ടുണ്ട്. മേരി രജില (39) എന്ന സ്ത്രീയാണ് കൊല്ലപ്പെട്ടത്. ഭർത്താവ് മുത്തുകൃഷ്ണൻ (50), മകൻ ബ്ലെസ്സെറ്റ് രാജ (10) എന്നിവർക്ക് ഗുരുതരമായി പരിക്കേറ്റു. ബ്ലെസി (15), പ്രിൻസ പാപ (14) എന്നിവരെയാണ് കാണാതായത്. വെള്ളിയാഴ്ച പുലർച്ചെയാണ് സംഭവം.
മുതലൂരിൽ താമസിക്കുന്ന മുത്തുകൃഷ്ണന്റെയും കുടുംബത്തിന്റെയും വീട്ടിലേക്ക് അജ്ഞാതരായ അക്രമികൾ കയറുകയായിരുന്നു. ഉറങ്ങിക്കിടക്കുകയായിരുന്ന കുടുംബാംഗങ്ങളെ അക്രമികൾ മർദിക്കുകയായിരുന്നുവെന്നാണ് പ്രാഥമിക വിവരം.
ആക്രമണത്തിൽ ഗുരുതരമായി പരിക്കേറ്റ മേരി രജില സംഭവസ്ഥലത്തുവച്ചുതന്നെ മരിച്ചു. ഭർത്താവ് മുത്തുകൃഷ്ണനും ഇളയ മകൻ ബ്ലെസ്സെറ്റ് രാജയും ഗുരുതര പരിക്കുകളോടെ ചികിത്സയിലാണ്.
വിവരം അറിഞ്ഞ ഉടൻ തന്നെ പൊലിസ് സ്ഥലത്തെത്തി പരിശോധന നടത്തി. ആക്രമണത്തിന് പിന്നാലെ കാണാതായ രണ്ട് പെൺകുട്ടികളെ അക്രമികൾ തട്ടിക്കൊണ്ടുപോയതായി പൊലിസ് സംശയിക്കുന്നു. കുട്ടികൾക്കായുള്ള തിരച്ചിൽ ആരംഭിച്ചിട്ടുണ്ട്. കൂടുതൽ അന്വേഷണം നടന്നുവരികയാണ്.
Kerala
വൈപ്പിന്: എളങ്കുന്നപ്പുഴയില് സ്വകാര്യ ബസ് ഡ്രൈവറെ കൊല്ലാന് ശ്രമിക്കുന്നത് തടഞ്ഞ പൊലിസ് ഉദ്യോഗസ്ഥരെ ആക്രമിച്ച ഗുണ്ടകള്ക്കെതിരെ മറ്റൊരു കേസ് കൂടി രജിസ്റ്റര് ചെയ്തു. ബസ് ഡ്രൈവറെ ആയുധം ഉപയോഗിച്ച് കൊല്ലാന് ശ്രമിച്ചതിനും കുത്തിമുറിവേല്പ്പിക്കുകയും വധഭീഷണി മുഴക്കിയതിനുമാണ് പുതിയ കേസ്.
കൂടാതെ ഡ്രൈവറുടെ പക്കല് ഉണ്ടായിരുന്ന 1,670 രൂപയും 29,000 രൂപ വിലവരുന്ന മൊബൈല് ഫോണ് മോഷ്ടിച്ചതിനുള്ള വകുപ്പുകളും ചേര്ത്തിട്ടുണ്ട്. ബസ് ഡ്രൈവറായ പുതുവൈപ്പ് കരീത്തറ നിതീഷ് കുമാര് (39) നല്കിയ പരാതിയിലാണ് കേസ്.
പ്രതികളായ ഞാറക്കല് വട്ടത്തറ മുന്ന എന്ന് വിളിക്കുന്ന പ്രജിത്ത്, സഹോദരന് പ്രജീഷ്, സുഹൃത്ത് വരാപ്പുഴ ചരിയം തുരുത്ത് നികത്തിത്തറ രാഗിന്, കണ്ടലറിയാവുന്ന മറ്റൊരാള് എന്നിവര്ക്കെതിരെ പൊലിസിനെ ആക്രമിച്ചതിന് എട്ടോളം വകുപ്പുകള് ചേര്ത്താണ് കേസ് എടുത്തത്.
അറസ്റ്റിലായ മൂന്നു പ്രതികളുമായി പൊലിസ് വ്യാഴാഴ്ച തെളിവെടുപ്പ് നടത്തിയിരുന്നു. ഞാറക്കല് എസഎച്ച്ഒ ഇന്ചാര്ജ് കെ.കെ. ഷബാബിന്റെ നേതൃത്വത്തില് സംഭവം നടന്ന എളങ്കുന്നപ്പുഴ നയാര പമ്പില് എത്തിച്ചാണ് തെളിവെടുപ്പ് നടത്തിയത്. മൂന്നു ദിവസത്തേക്ക് കസ്റ്റഡിയില് വാങ്ങിയ പ്രതികളെ ശനിയാഴ്ച കോടതിയില് വീണ്ടും ഹാജരാക്കും. ഇതിനിടെ ഒളിവിലായ നാലാമനു വേണ്ടി പൊലിസ് വ്യാപകമായ തെരച്ചില് ആരംഭിച്ചിട്ടുണ്ട്.
International
ദുബായി: സൗദിയിൽ ഹൂതികളുടെ മിസൈൽ, ഡ്രോൺ ആക്രമണങ്ങളിൽ ഇന്ത്യക്കാരൻ ഉൾപ്പെടെ നാല് പേർ കൊല്ലപ്പെട്ടു. ദമാമിലെ കിംഗ് ഫഹദ് രാജ്യാന്തര വിമാനത്താവളത്തിലുണ്ടായ ആക്രമണത്തിലാണ് ഗ്രൗണ്ട് സപ്പോർട്ട് സ്റ്റാഫായ യുപി ഗോരഖ്പുർ സ്വദേശി കമലേഷ് പാണ്ഡെ (37) മരിച്ചത്. സൗദി പൗരനും കൊല്ലപ്പെട്ടു.
രണ്ട് ഇന്ത്യക്കാരുൾപ്പെടെ എട്ട് പേർക്കു പരുക്കേറ്റു. സൗദി എണ്ണക്കമ്പനിയായ അരാംകോയുടെ ഷൈബ എണ്ണപ്പാടത്തുണ്ടായ ആക്രമണത്തിൽ ഫിലിപ്പീൻസ്, നേപ്പാൾ സ്വദേശികളും കൊല്ലപ്പെട്ടു. ഇന്ത്യക്കാരനും പാക്കിസ്ഥാൻകാരനും പരിക്കേറ്റു.
ഈ മാസം ആദ്യം റിയാദ് കിംഗ് ഖാലിദ് വിമാനത്താവളത്തിലെ ആക്രമണത്തിലും ഇന്ത്യക്കാരൻ കൊല്ലപ്പെട്ടിരുന്നു.
International
റിയാദ്: സൗദി തലസ്ഥാനമായ റിയാദിലേയ്ക്കും വിശുദ്ധ നഗരമായ മദീന മേഖലയിലേയ്ക്കും വീണ്ടും ആക്രമണം നടത്തി ഹൂതികൾ. നാല് ഡ്രോണുകൾ തകർത്തതായി സൗദി സേന അറിയിച്ചു.
ദമ്മാം വിമാനത്താവളത്തിലേക്കും അരാംകോയുടെ ശൈബ എണ്ണപ്പാടത്തേക്കും നടത്തിയ ആക്രമണങ്ങളിൽ മരിച്ചവരുടെ എണ്ണം നാലായി. പത്ത് പേർക്ക് പരിക്കേറ്റു. സൗദിയിൽ കുടുങ്ങിയ ഇന്ത്യൻ ഉംറ തീർഥാടകരെ തിരികെയെത്തിക്കാൻ എല്ലാ സഹായവും നൽകുന്നുണ്ടെന്ന് വിദേശകാര്യ മന്ത്രാലയം അറിയിച്ചു.
വിശുദ്ധ നഗരങ്ങളായ മക്കയും മദീനയും ആക്രമിക്കില്ലെന്നതാണ് ഹൂതി നിലപാട്. എന്നാൽ ബുധനാഴ്ചയും ഇന്നും ആക്രമണമുണ്ടായി. റിയാദിലേക്കും മദീനയിലേക്കുമായി നാല് ഡ്രോണുകളെത്തി. ഇവ തകർത്തു. കഴിഞ്ഞ ദിവസത്തെ ആക്രമണം തങ്ങളുടേതല്ലെന്നാണ് ഹൂതികൾ വിശദീകരിച്ചത്.
എന്നാൽ റിയാദിൽ സൗദിയുടെ പ്രതിരോധ മന്ത്രാലയം ആക്രമിച്ചെന്ന് ഹൂതികൾ അവകാശപ്പെട്ടു. അബഹ വിമാനത്താവളം ആക്രമിച്ചെന്ന് അവകാശപ്പെട്ടതിനൊപ്പം ദമാം വിമാനത്താവളവും ആരാംകോ റിഫൈനറിയും ആക്രമിച്ചത് ഹൂത്തികൾ സ്ഥിരീകരിക്കുകയും ചെയ്തു. തങ്ങൾക്ക് നേരെ സൗദി നടത്തിയ ആക്രമണങ്ങളിൽ മൊത്തം മരണം 562 ആയി എന്ന് ഹൂതികൾ പറഞ്ഞു.