ന്യൂഡൽഹി: മാസപ്പടിക്കേസിൽ വിജിലൻസ് അന്വേഷണത്തിന് ഉത്തരവിട്ട കേരള ഹൈക്കോടതി വിധിക്കെതിരെ പ്രതിപക്ഷ നേതാവ് പിണറായി വിജയനും മകൾ ടി. വീണയും ഉൾപ്പെടെയുള്ളവർ സമർപ്പിച്ച ഹർജി അടിയന്തരമായി പരിഗണിക്കണമെന്ന ആവശ്യം സുപ്രീം കോടതി തള്ളി.

ദസറ അവധിക്കാലത്ത് ഹർജി കേൾക്കാൻ പ്രത്യേക ബെഞ്ച് രൂപീകരിക്കുന്നത് പരിഗണിക്കാമെന്ന് ചീഫ് ജസ്റ്റീസ് വ്യക്തമാക്കി. സാധിച്ചില്ലെങ്കിൽ ഈ മാസം 26-ന് കേസ് പരിഗണിക്കുമെന്നും കോടതി അറിയിച്ചു.

ഹൈക്കോടതി ഉത്തരവിന്‍റെ പശ്ചാത്തലത്തിൽ പ്രതിപക്ഷ നേതാവിനെ ഉൾപ്പെടെ കേന്ദ്ര അന്വേഷണ ഏജൻസികൾ അറസ്റ്റ് ചെയ്യാൻ സാധ്യതയുണ്ടെന്നും അതിനാൽ അടിയന്തരമായി വാദം കേൾക്കണമെന്നും ഹർജിക്കാർക്കു വേണ്ടി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂത്ര കോടതിയിൽ വാദിച്ചു.

എന്നാൽ, ഈ വാദം തള്ളിയ സുപ്രീം കോടതി സാധാരണ നടപടിക്രമങ്ങളിലൂടെ കേസ് കേൾക്കാമെന്ന് നിലപാടെടുക്കുകയായിരുന്നു. ഹൈക്കോടതി സിംഗിൾ ബെഞ്ചിന്‍റെ അന്വേഷണ ഉത്തരവ് ചോദ്യം ചെയ്താണ് പിണറായി വിജയൻ, മന്ത്രി മുഹമ്മദ് റിയാസ്, ടി. വീണ തുടങ്ങിയവർ സുപ്രീം കോടതിയെ സമീപിച്ചത്.

Tags : Lawyer PinarayiVijayan SupremeCourt Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash