കണ്ണൂർ: അമിത വിലയ്ക്ക് ഉപഭോക്താക്കൾക്ക് നല്കുന്നതിന് അനധികൃതമായി കൊണ്ടുപോവുകയായിരുന്ന24 കുറ്റി ഗ്യാസ് സിലിണ്ടറുകൾ പിടികൂടി. ജില്ലാ സപ്ലൈ ഓഫീസർ കെ.എൻ. ബിന്ദുവിന്റെ നേതൃത്വത്തിലുള്ള സംഘം കണ്ണപുരം -ഇരിണാവ് റോഡിന് സമീപം നടത്തിയ പരിശോധനയിൽ അഗ്നി ഗ്യാസ് ഏജൻസി എന്ന സ്ഥാപനത്തിന്റെവാഹനത്തിൽ നിന്നാണ് സിലിണ്ടറുകൾ പിടികൂടിയത്.
താലൂക്ക് സപ്ലൈ ഓഫീസർ ജെ.എം. സ്മിത, റേഷനിംഗ് ഇൻസ്പെക്ടർമാരായ പി.വി. വിനോദ് കുമാർ, കെ. റിജേഷ് , സി. രാജീവൻ , വൈ. റോബർട്ട് എന്നിവരും പരിശോധന സംഘത്തിലുണ്ടായിരുന്നു. തുടർ ദിവസങ്ങളിലും പരിശോധന കർശനമാക്കുമെന്നും നിലവിൽ പൈപ്പ്ഡ് നാച്ച്വറൽ ഗ്യാസ് കണക്ഷൻ വീടുകളിൽ ഉപയോഗിക്കുന്ന ഉപഭോക്താക്കൾ അവരുടെ ഗാർഹിക ഗ്യാസ് സിലിണ്ടറുകൾ ഗ്യാസ് ഏജൻസി വഴി തിരികെ നൽകേണ്ടതാണെന്നും, അല്ലാത്ത പക്ഷം അത്തരം ഉപഭോക്താക്കൾക്കെതിരേ നടപടി സ്വീകരിക്കുമെന്നും ജില്ലാ സപ്ലൈ ഓഫീസർ അറിയിച്ചു.
Tags : Nattuvishesham Local News gas cylinder