ഏലപ്പീടിക: ഇരുപത്തിയാറു വർഷമായി ഭൂമിയുടെ അവകാശത്തിനായി പോരാടുന്ന ഏലപ്പീടിക വെള്ളക്കല്ലുങ്കൽ സ്റ്റാൻലി ജോസഫിനെ കണിച്ചാർ പഞ്ചായത്ത് ഭരണസമിതി അംഗങ്ങൾ സന്ദർശിച്ച് പിന്തുണ അറിയിച്ചു.
ഭൂമി സംബന്ധമായ പ്രശ്നത്തിൽ പഞ്ചായത്തിന്റെ ഭാഗത്തുനിന്ന് സാധ്യമായ എല്ലാ പിന്തുണയും ഉറപ്പുനൽകുമെന്ന് ഭരണസമിതി അറിയിച്ചു.
സ്റ്റാൻലിയുടെ കുടുംബം നേരിടുന്ന ഭൂമി തർക്കം, വനംവകുപ്പ് സ്ഥാപിച്ച ജണ്ട മൂലം അനുഭവിക്കുന്ന ദുരിതങ്ങൾ, സുരക്ഷിതമായ വീട് നിർമിക്കാൻ കഴിയാത്ത സാഹചര്യം, വാനരശല്യം മൂലമുണ്ടാകുന്ന ബുദ്ധിമുട്ടുകൾ എന്നിവ ഭരണസമിതി അംഗങ്ങൾ നേരിൽ കണ്ട് വിലയിരുത്തി. ഭൂമി സംബന്ധമായ പ്രശ്നത്തിന് എത്രയും വേഗം ശാശ്വത പരിഹാരം കാണാൻ ബന്ധപ്പെട്ട വകുപ്പുകൾ അടിയന്തരമായി ഇടപെടണമെന്നും അവർ ആവശ്യപ്പെട്ടു.
പഞ്ചായത്ത് പ്രസിഡന്റ് ഡോ. ട്രീസാ പോൾ, വൈസ് പ്രസിഡന്റ് ചാക്കോ തൈക്കുന്നേൽ, പഞ്ചായത്തംഗം ജിബിൻ ജയ്സൺ, വാർഡംഗം മിനി സെബാസ്റ്റ്യൻ, കണിച്ചാർ പഞ്ചായത്ത് ആസൂത്രണ സമിതി ഉപാധ്യക്ഷൻ സിനോ ജോസ് എന്നിവരുടെ നേതൃത്വത്തിലുള്ള സംഘമാണ് സ്റ്റാൻലിയുടെ വീട് സന്ദർശിച്ചത്.
Tags : Nattuvishesham Districte News