പത്തനംതിട്ട: കെഎസ്ആർടിസി ഓർഡിനറി ബസുകളിൽ സ്ത്രീകൾക്ക് സൗജന്യ യാത്ര സർക്കാർ പ്രഖ്യാപിച്ചത് ജില്ലയിൽ ഏറ്റവും കൂടുതൽ ഉപകാരപ്പെടുക സംസ്ഥാനപാതകളിലെ യാത്രികർക്ക്. എംസി റോഡ്, ടികെ റോഡ്, കെപി റോഡ്, പിഎം റോഡുകളിലൂടെയാണ് ഓർഡിനറി സർവീസുകൾ കൂടുതലായുള്ളത്.
വനിതകളായ ഉദ്യോഗസ്ഥർ, അധ്യാപകർ, മറ്റു ജീവനക്കാർ, വിദ്യാർഥിനികൾ തുടങ്ങി സ്ഥിരം യാത്രക്കാരായ വനിതകൾക്ക് സൗജന്യ യാത്രയുടെ പ്രയോജനം ലഭിക്കും. സാധാരണക്കാരായ വീട്ടമ്മമാരും മറ്റും വളരെ കുറച്ചു മാത്രമേ ജില്ലയിൽ കെഎസ്ആർടിസി ബസുകളിൽ യാത്രക്കാരായി നിലവിലുള്ളൂ. രാവിലെയും വൈകുന്നേരവുമാണ് ജില്ലയിലെ ഓർഡിനറി ബസുകളിൽ തിരക്കുള്ളത്.
ചെയിൻ സർവീസുകളുള്ള റൂട്ടുകളിൽ ഓഫീസ്, സ്കൂൾ സമയങ്ങളിൽ തിരക്ക് വർധിക്കാനാണ് സാധ്യത. ഇത് മുന്നിൽക്കണ്ട് പത്തനംതിട്ട - ഭരണിക്കാവ് - കൊല്ലം റൂട്ടിലടക്കം കെഎസ്ആർടിസി രാവിലെയും വൈകുന്നേരവും ഫാസ്റ്റ് പാസഞ്ചർ ബസുകൾ ഓടിക്കാനും തുടങ്ങിയിട്ടുണ്ട്.
കെഎസ്ആർടിസിയിലെ സൗജന്യ യാത്ര ജില്ലയിലെ സ്വകാര്യ ബസുകളെ സാരമായി ബാധിച്ചേക്കാം. കെഎസ്ആർടിസിക്കൊപ്പം സർവീസ് നടത്തുന്ന റൂട്ടുകളെയാണ് ഇത് ബാധിക്കുക. പിഎം റോഡിലും ടികെ റോഡിൽ തിരുവല്ല ഭാഗത്തേക്കും സ്വകാര്യ ബസുകൾ കെഎസ്ആർടിസിക്കൊപ്പമാണ് ഓടുന്നത്. എന്നാൽ നിലവിലെ സാഹചര്യത്തിൽ ഗ്രാമീണ മേഖലയിലെ സ്വകാര്യ ബസ് റൂട്ടുകൾക്ക് സൗജന്യ യാത്ര ഭീഷണിയാകില്ല.
ജില്ലയിൽ 36. 80 ശതമാനം കെഎസ്ആർടിസി ബസുകൾ
പത്തനംതിട്ട ജില്ലയിൽ പൊതുഗതാഗത രംഗത്ത് 36.80 ശതമാനമാണ് കെഎസ്ആർടിസി ബസുകൾ ഉള്ളത്. കെഎസ്ആർടിസിയുടെ പൊതുഗതാഗത വിഹിതത്തിൽ പത്തനംതിട്ട ഏഴാം സ്ഥാനത്താണ്.
ഷെഡ്യൂളുകളിൽ 50 ശതമാനത്തിലേറെയും ഓർഡിനറി സർവീസുകളാണ്.
ജില്ലയിൽ കെഎസ്ആർടിസിക്ക് പത്തനംതിട്ട, തിരുവല്ല, അടൂർ, മല്ലപ്പള്ളി, പന്തളം, റാന്നി, കോന്നി എന്നിവിടങ്ങളിൽ ബസ് സ്റ്റേഷനുകളുണ്ട്. ഇതിൽ പന്തളം, കോന്നി, റാന്നി, മല്ലപ്പള്ളി എന്നിവ ഓപ്പറേറ്റിംഗ് സെന്ററുകളാണ്. പത്തനംതിട്ട, തിരുവല്ല, അടൂർ എന്നിവയാണ് ഡിപ്പോകൾ.
എംസി റോഡ് കടന്നുപോകുന്ന തിരുവല്ലയിലാണ് കെഎസ്ആർടിസിക്ക് കൂടുതൽ ഓർഡിനറി സർവീസുകളുള്ളത്. തിരുവല്ലയിൽ നിന്ന് എംസി റോഡിലൂടെ അടൂർ വരെയും കോട്ടയം വരെയും ഓർഡിനറി സർവീസുകൾ യഥേഷ്ടം ലഭ്യമാണ്. പത്തനംതിട്ടയിലേക്ക് തിരുവല്ലയിൽ നിന്ന് ഓർഡിനറി സർവീസുണ്ട്. ദീർഘദൂര ബസുകൾക്കൊപ്പം തിരുവല്ല ഡിപ്പോ ഓപ്പറേറ്റ് ചെയ്യുന്ന ഫാസ്റ്റ് പാസഞ്ചർ ബസുകളും പത്തനംതിട്ടയിലക്കുള്ളതിനാൽ ഓർഡിനറി സർവീസുകൾ ഇടവിട്ട സമയങ്ങളിൽ മാത്രമാണുള്ളത്.
റാന്നി, മല്ലപ്പള്ളി, മാവേലിക്കര, എടത്വ റൂട്ടുകളാണ് തിരുവല്ലയിൽ നിന്നും കൂടുതലായി ഓർഡിനറി സർവീസുകളുള്ള മറ്റ് റൂട്ടുകൾ. ഗ്രാമീണ മേഖലകളിലേക്ക് പരിമിതമായി മാത്രമേ നിലവിൽ ബസുകൾ ഓപ്പറേറ്റ് ചെയ്യുന്നുള്ളൂ. തിരുവല്ല ഡിപ്പോ കോവിഡ് കാലത്ത് നിർത്തിവച്ച പല ഓർഡിനറി സർവീസുകളും പിന്നീട് ആരംഭിച്ചിട്ടില്ല.
അടൂരിൽ നിന്ന് കൊട്ടാരക്കര, കൊല്ലം, പുനലൂർ, കായംകുളം, പത്തനംതിട്ട ഭാഗങ്ങളിലേക്ക് ഓർഡിനറി ബസുകൾ ലഭ്യമാകും. അടൂരിൽ നിന്ന് ഉൾപ്രദേശങ്ങളിലേക്കുള്ള സർവീസുകൾ പരിമിതമാണ്.
പത്തനംതിട്ടയിൽ നിന്ന് പുനലൂർ, റാന്നി, കോഴഞ്ചേരി, തിരുവല്ല, അടൂർ, പന്തളം, ആങ്ങമൂഴി, മലയാലപ്പുഴ, കിടങ്ങന്നൂർ - ചെങ്ങന്നൂർ എന്നിവയാണ് പ്രധാന ഓർഡിനറി റൂട്ടുകൾ. ഗ്രാമീണ റൂട്ടുകൾ പലതും തഴയപ്പെട്ടിരിക്കുകയാണ്. മുണ്ടക്കയം, കൊല്ലം, കോട്ടയം എന്നിവിടങ്ങളിലേക്കും ഓർഡിനറി സർവീസുകൾ പത്തനംതിട്ടയിൽ നിന്ന് ലഭ്യമാകും. പത്തനംതിട്ടയിൽ 61 ഷെഡ്യൂളുകളുള്ളതിൽ 26 ഓർഡിനറി സർവീസുകളുണ്ട്.
മല്ലപ്പള്ളിയിൽ നിന്ന് കോട്ടയം - കോഴഞ്ചേരി റൂട്ടാണ് പ്രധാനമായുള്ള ഓർഡിനറി റൂട്ട്. ചുങ്കപ്പാറ - കല്ലൂപ്പാറ തിരുവല്ല സർവീസുകളും ഉണ്ട്. എന്നാൽ കുന്നന്താനം വഴിയുള്ള തിരുവല്ല സർവീസുകൾ ഓടുന്നില്ല. റാന്നി, ആനിക്കാട്, മുക്കൂർ, ചങ്ങനാശേരി മേഖലകളിലേക്ക് ബസുകൾ ലഭ്യവുമല്ല. റാന്നിയിൽ നിന്ന് വെച്ചൂച്ചിറ സർവീസുകളാണ് പ്രധാനമായുള്ള ഓർഡിനറി. മറ്റ് ഓർഡിനറി ബസുകൾ രാവിലെ തന്നെ പ്രധാന ഡിപ്പോകൾ കേന്ദ്രീകരിച്ച് ഓടുകയാണ് രീതി. ഉൾപ്രദേശങ്ങളിലേക്ക് സർവീസുകൾ ഇല്ല.
സ്വകാര്യബസുകൾ കൂടുതലായി സർവീസ് നടത്തുന്ന കോഴഞ്ചേരി, മല്ലപ്പള്ളി, അത്തിക്കയം ഭാഗങ്ങളിലേക്ക് റാന്നിയിൽ നിന്ന് കെഎസ്ആർടിസി ബസുകൾ ഇല്ല. കോന്നിയിൽ നിന്ന് 10 ഓർഡിനറി ഷെഡ്യൂളുകളുള്ളതിൽ കല്ലേലി, മെഡിക്കൽ കോളജ്, കൊക്കാത്തോട് ഭാഗങ്ങളിലേക്ക് ഓടുന്നുണ്ട്. മറ്റുള്ളവ പിഎം റോഡ് വഴി ഓടിക്കുകയാണ് രീതി.
കെഎസ്ആർടിസി തിരിഞ്ഞുനോക്കാത്ത റൂട്ടുകൾ
ജില്ലയിൽ കെഎസ്ആർടിസി ബസുകൾക്കു വേണ്ടാത്ത നിരവധി റൂട്ടുകളുണ്ട്. സ്വകാര്യ ബസുകൾ മാത്രം ഓടുന്ന ഈ റൂട്ടുകളിലെ വനിതാ യാത്രക്കാർക്ക് സൗജന്യ യാത്ര തത്കാലം സ്വപ്നമായി തുടരും.
പത്തനംതിട്ട - ആറന്മുള - ചെങ്ങന്നൂർ, പത്തനംതിട്ട - കുളനട - പന്തളം, പത്തനംതിട്ട - കൊടുമൺ - അടൂർ, പത്തനംതിട്ട - വി. കോട്ടയം, പത്തനംതിട്ട - നാരങ്ങാനം - കോഴഞ്ചേരി, പത്തനംതിട്ട - തണ്ണിത്തോട് - ചിറ്റാർ. പത്തനംതിട്ട - പ്രക്കാനം - ഇലവുംതിട്ട - കോഴഞ്ചേരി.
റാന്നി - മല്ലപ്പള്ളി, റാന്നി - അത്തിക്കയം, റാന്നി - വടശേരിക്കര, റാന്നി - ചെറുകോൽപ്പുഴ - കോഴഞ്ചേരി, റാന്നി - ചുങ്കപ്പാറ - മല്ലപ്പള്ളി, റാന്നി - മണിമല - കോട്ടയം.
മല്ലപ്പള്ളി - ചങ്ങനാശേരി, മല്ലപ്പള്ളി - മുക്കൂർ - തിരുവല്ല, മല്ലപ്പള്ളി - കുന്നന്താനം - തിരുവല്ല, മല്ലപ്പള്ളി - എഴുമറ്റൂർ - കോഴഞ്ചേരി, മല്ലപ്പള്ളി - ആനിക്കാട്, മല്ലപ്പള്ളി - തുരുത്തിക്കാട്.
പന്തളം - കിടങ്ങന്നൂർ - കോഴഞ്ചേരി, പന്തളം - നൂറനാട് - കായംകുളം. അടൂർ - ചൂരക്കോട് - മണ്ണടി. അടൂർ - ആനന്ദപ്പള്ളി - പന്തളം.
Tags : Local News Nattuvishesham Pathanamthitta