പുതുക്കാട്: കുറുമാലി പുഴയിലെ മാഞ്ഞാംകുഴി റെഗുലേറ്റർ പാലത്തിനു സമീപത്തെ കടവിൽ കുളിക്കാൻ ഇറങ്ങി ഒഴുക്കിൽപ്പെട്ട സ്ത്രീയെ രക്ഷപ്പെടുത്തി യുവാക്കൾ. തൊട്ടിപ്പാൾ പള്ളം സ്വദേശി ശാന്ത(55)യെയാണ് രക്ഷപ്പെടുത്തിയത്.
ഞായറാഴ്ച വൈകിട്ട് മൂന്നരയോടെയാണ് സംഭവം. പാലത്തിന് സമീപത്തെ കടവിൽ കുളിക്കാൻ ഇറങ്ങിയ ശാന്ത ഒഴുക്കിൽപ്പെട്ട് മുങ്ങിത്താഴുകയായിരുന്നു. ശാന്തയുടെ നിലവിളികേട്ട് കടവിലുണ്ടായിരുന്ന തൃപ്രയാർ ചിറയ്ക്കൽ സ്വദേശികളായ പൊന്നാപുള്ളി സന്ദീപ്, പേരോത്ത് രജീഷ് എന്നിവരാണ് പുഴയിലിറങ്ങി ശാന്തയെ രക്ഷപ്പെടുത്തിയത്. ആദ്യം സന്ദീപാണ് പുഴയിലേക്കു ചാടി രക്ഷപ്പെടുത്താൻ ശ്രമിച്ചത്. മരണവെപ്രാളത്തിലായ ശാന്തയെ രക്ഷപ്പെടുത്താനുള്ള ശ്രമത്തിനിടെ സന്ദീപും വെള്ളത്തിൽ താഴ്ന്നത് ആശങ്കയായി. ഇതുകണ്ട രജീഷ് പുഴയിൽ ചാടി ഇരുവരെയും കരയിലേക്ക് വലിച്ചുകയറ്റുകയായിരുന്നു. ചിറയ്ക്കലിൽനിന്ന് ആറംഗ സംഘമാണ് മാഞ്ഞാംകുഴി ഷട്ടർ കാണാൻ എത്തിയത്. ഉല്ലാസയാത്രയിൽ ഒരാളുടെ ജീവൻ രക്ഷിക്കാൻ കഴിഞ്ഞതിലുള്ള ചാരിതാർഥ്യത്തിലാണ് ഈ യുവാക്കൾ.
Tags : Nattuvishesham Districte News