കാഞ്ഞിരപ്പള്ളി: മഹാത്മാഗാന്ധി സർവകലാശാല ഡിഗ്രി പരീക്ഷയിൽ മിന്നും വിജയം കരസ്ഥമാക്കി കാഞ്ഞിരപ്പള്ളി സെന്റ് ഡൊമിനിക്സ് കോളജ്. സർവകലാശാലയിലെ ഒട്ടുമിക്കവിഷയങ്ങളിലെയും മുൻനിര റാങ്കുകൾ സ്വന്തമാക്കാൻ കോളജിനു കഴിഞ്ഞു. വിദ്യാഭ്യാസമേഖലയിൽ അറുപതാണ്ടുകളുടെ സുവർണചരിത്രം പൂർത്തിയാക്കിയ വർഷമാണ് കോളജിന്റെ ഈ നേട്ടം എന്നത് ശ്രദ്ധേയമാണ്.
ബികോം ഫിനാൻസ് ആൻഡ് ടാക്സേഷനിൽ ടി.എസ്. ആയിഷ ഒന്നാം റാങ്കും ദൃശ്യ ദിനേശ് രണ്ടാം റാങ്കും കരസ്ഥമാക്കിയപ്പോൾ ബിഎസ്സി ബോട്ടണിയിലെ ആദ്യ നാല് റാങ്കുകളും അമൃത സാബു, ജിസ്ബി ജയ്സൺ, അനുശ്രീ എസ്. കുമാർ, എം.എസ്. ശ്രീലക്ഷ്മി എന്നിവർ നേടി. ബികോം ഫിനാൻഷ്യൽ മാർക്കറ്റിൽ മന്ന സജീവ് ഒന്നാം റാങ്കും വിദ്യ വിജയൻ രണ്ടാം റാങ്കും മുഹമ്മദ് മുബീൻ മൂന്നാം റാങ്കും സ്വന്തമാക്കി. ബിഎ ഇംഗ്ലീഷിൽ ലിറ്റാ റോസ് സിജോ അഞ്ചാം റാങ്കും ബിഎ ഇക്കണോമിക്സിൽ സിൽറ്റാ ജോൺ ആറാം റാങ്കും കരസ്ഥമാക്കി. ബിഎസ്സി ഫിസിക്സ് നയന റെജിയും ബികോം മോഡൽ മൂന്ന് കംപ്യൂട്ടർ സയൻസ് വിഭാഗത്തിൽ ആഗ്നസ് മരിയയും ഏഴാം റാങ്ക് സ്വന്തമാക്കി കോളജിന് അഭിമാനമായി മാറി.
റാങ്ക് ജേതാക്കളെ കോളജ് മാനേജർ ആർച്ച്പ്രീസ്റ്റ് ഫാ. ഡോ. കുര്യൻ താമരശേരി, പ്രിൻസിപ്പൽ ഇൻ ചാർജ് ഡോ. ബിനോ പി. ജോസ്, ബർസാർ ഫാ. ഡോ. മനോജ് പാലക്കുടി എന്നിവരും അധ്യാപകരും പൂർവവിദ്യാർഥി സംഘടനയും അഭിനന്ദിച്ചു.