മഴയെത്തുടർന്ന് ഇന്നലെ കോതമംഗലം ടൗണില് താലൂക്ക് ആശുപത്രിക്ക് സമീപം രൂപപ്പെട്ട വെള്ളക്കെട്ട്.
കോതമംഗലം: തോട് മണ്ണിട്ട് മൂടിയതിനെ തുടർന്ന് കോതമംഗലം ടൗണിൽ വെള്ളക്കെട്ട്. താലൂക്ക് ആശുപത്രിക്ക് സമീപം ബൈപ്പാസിലേക്കുള്ള ലിങ്ക് റോഡാണ് വെള്ളത്തില് മുങ്ങിയത്. ഇന്നലെ വൈകുന്നേരമുണ്ടായ കനത്ത മഴയിലാണ് സംഭവം. റോഡിന് സമീപത്തെ സ്വകാര്യഭൂമിയില് കഴിഞ്ഞദിവസങ്ങളില് മണ്ണിട്ടിരുന്നു. ഇതുമൂലം ഈ ഭാഗത്ത് തോട് മൂടി പോകുകയും ചെയ്തു.
താലൂക്ക് ആശുപത്രി ഭാഗത്തുനിന്നുള്ള വെള്ളം ഒഴുകുന്ന തോടായിരുന്നു ഇത്. ലിങ്ക് റോഡില് വലിയതോതില് വെള്ളക്കെട്ടും രൂപപ്പെട്ടു. വെള്ളക്കെട്ട് പ്രധാനറോഡിലേക്കും വ്യാപിച്ചിരുന്നു. പ്രധാനറോഡിലും ലിങ്ക് റോഡിലും ഗതാഗതതടസമുണ്ടായി. വെള്ളക്കെട്ട് പരിഹരിക്കാൻ അധികൃതർ ഇടപെടണമെന്ന് നാട്ടുകാർ ആവശ്യപെട്ടു.