അടിമാലി: അപ്പർ ചെങ്കുളം ജലവൈദ്യുതിയുടെ ഭാഗമായി ചെങ്കുളം ഡാമിൽനിന്നു വെള്ളത്തൂവലിലേക്ക് നിർമിക്കുന്ന ടണൽ നിർമാണത്തിലെ അപാകതകൾ പരിഹരിക്കണമെന്നാവശ്യപ്പെട്ട് കെഎസ്ഇബി പ്രോജക്ട് ഓഫീസിന് മുന്നിലേക്ക് ബഹുജന മാർച്ചും ധർണയും നടത്തി. വെള്ളത്തൂവൽ പഞ്ചായത്ത് പ്രസിഡന്റ് ജോർജ് തോമസ് പ്രതിഷേധ ധർണ ഉദ്ഘാടനം ചെയ്തു.
മാനദണ്ഡങ്ങൾ അവഗണിച്ച് 150 മുതൽ 200 വരെ കുഴികൾ അടിച്ച് സ്ഫോടനങ്ങൾ നടത്തുന്നതായാണ് ആക്ഷേപം. സ്ഫോടനസമയത്ത് മൂന്ന് കിലോമീറ്റർ ദൂരെയുള്ള വീടുകൾക്കും മറ്റു കെട്ടിടങ്ങൾക്കും നാശനഷ്ടങ്ങൾ സംഭവിക്കുന്നതായി പ്രതിഷേധക്കാർ ആരോപിച്ചു.
പ്രദേശത്തെ വീടുകൾക്കും സ്ഥാപനങ്ങൾക്കും നാശനഷ്ടം ഉണ്ടാകാത്ത രീതിയിൽ നിർമാണ പ്രവർത്തനങ്ങൾ നടത്തണമെന്നും നിലവിൽ നാശനഷ്ടമുണ്ടായ വീടുകൾക്കും കെട്ടിടങ്ങൾക്കും കുടിവെള്ള സ്രോതസുകൾക്കും അർഹമായ നഷ്ടപരിഹാരം നൽകണമെന്നും സമരക്കാർ ആവശ്യപ്പെട്ടു.
യോഗത്തിൽ വെള്ളത്തൂവൽ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ പി.സി. ജയൻ അധ്യക്ഷത വഹിച്ചു. കോൺഗ്രസ് മണ്ഡലം പ്രസിഡന്റ് ടോമി, അബ്ദുൾ കലാം, സജി പൂതക്കുഴി തുടങ്ങിയവർ പ്രസംഗിച്ചു.
Tags : Nattuvishesham Districte News