19

കൊച്ചി: എറണാകുളം എളംകുളത്തിന് സമീപം സ്വകാര്യ ബസിടിച്ച് സ്കൂട്ടർ യാത്രികന് പരിക്കേറ്റ സംഭവത്തിൽ ഡ്രൈവർക്കെതിരെ കടവന്ത്ര പൊലിസ് കേസെടുത്തു. കുമ്പളം സ്വദേശി രവീന്ദ്രന്‍റെ (67) പരാതിയിലാണ് നടപടി.

വ്യാഴാഴ്ച വൈകുന്നേരം 4:45-ഓടെ കടവന്ത്രയിൽ നിന്ന് വൈറ്റില ഭാഗത്തേക്ക് സഞ്ചരിക്കുകയായിരുന്ന രവീന്ദ്രന്‍റെ സ്കൂട്ടറിൽ ഒരേ ദിശയിൽ വന്ന സ്വകാര്യ ബസ് ഇടിക്കുകയായിരുന്നു. മറ്റൊരു സ്വകാര്യ ബസിനെ മറികടക്കാൻ അമിതവേഗതയിലെത്തിയതാണ് അപകടത്തിന് കാരണമായതെന്ന് പൊലിസ് പറഞ്ഞു.

അപകടത്തിൽ രവീന്ദ്രന്‍റെ ഇടത് കൈത്തണ്ടയ്ക്കും ഇരുമുട്ടുകൾക്കും പാദങ്ങൾക്കും പരിക്കേറ്റിട്ടുണ്ട്. റോഡിന് നടുവിൽ വീണ അദ്ദേഹത്തിന്‍റെ ശരീരത്തിലൂടെ ബസിന്‍റെ പിൻചക്രങ്ങൾ കയറിയിറങ്ങാതിരുന്നതും, ബസിന് പിന്നാലെ വന്ന മറ്റ് വാഹനങ്ങൾ കൃത്യസമയത്ത് നിർത്തിയതുമാണ് വൻ ദുരന്തം ഒഴിവാക്കിയത്.

എന്നാൽ അപകടത്തിനുശേഷം ബസ് ജീവനക്കാർ കൃത്യമായ വൈദ്യസഹായം നൽകിയില്ലെന്നും ആശുപത്രിയിൽ ഉപേക്ഷിച്ചു കടന്നുകളഞ്ഞെന്നും പരാതിയുണ്ട്. അപകടം ഉണ്ടാക്കിയ കെഎൽ 31 ഇ 7878 നമ്പർ ബസിന്‍റെ ഡ്രൈവറോട് ശനിയാഴ്ച സ്റ്റേഷനിൽ ഹാജരാകാൻ നിർദേശം നൽകിയതായി കടവന്ത്ര പൊലിസ് സ്റ്റേഷൻ എസ്എച്ച്ഒ ഹരികൃഷ്ണൻ അറിയിച്ചു.

Tags : Case Driver Scooter Deepika DeepikaNewspaper BreakingNews NewsUpdate Headlines