29

കൊച്ചി: മുണ്ടംവേലിയിലെ പി ആന്‍ഡ് ടി കോളനി ഫ്‌ളാറ്റ് നിവാസികളെ അവഹേളിച്ച സംഭവത്തില്‍ മുന്‍ എംഎല്‍എയും സിപിഎം നേതാവുമായ കെ.ജെ. മാക്‌സിക്കെതിരെ ഫ്‌ളാറ്റ് നിവാസികള്‍. അവഹേളന പരാമര്‍ശം പിന്‍വലിക്കുന്നുവെന്ന് കെ.ജെ. മാക്‌സി പറഞ്ഞെങ്കിലും പരസ്യമായി മാപ്പ് പറയണമെന്ന ആവശയത്തിലാണ് ഫ്‌ളാറ്റ് നിവാസികള്‍.

നിര്‍മാണത്തിലെ അപാകതയും ശോചനീയാവസ്ഥയും കാരണം മൂന്നു വര്‍ഷത്തിലേറെയായി ദുരിതം അനുഭവിക്കുകയാണ് മുണ്ടംവേലിയിലെ ഫ്‌ളാറ്റ് നിവാസികള്‍. ഒരു ചടങ്ങില്‍ പ്രസംഗിക്കവെ ഫ്‌ളാറ്റ് പൊളിച്ചു പണിയുമെന്ന് മുഖ്യമന്ത്രി വി.ഡി. സതീശന്‍ പറഞ്ഞിരുന്നു. ഇതിന് പിന്നാലെയായിരുന്നു, ഭരണം മാറിയപ്പോള്‍ താമസക്കാര്‍ ഒതളങ്ങ പോലെ തിരിഞ്ഞു എന്ന് കെ.ജെ. മാക്‌സി പറഞ്ഞത്.

ഈ പരാമര്‍ശം പിന്‍വലിക്കുന്നതായി കെ.ജെ. മാക്‌സി മാധ്യമങ്ങളിലൂടെ പറഞ്ഞെങ്കിലും പരസ്യമായി മാപ്പ് പറയണമെന്നാണ് മുണ്ടംവേലി ഫ്‌ളാറ്റ് നിവാസികളുടെ സമരസമിതിയുടെ ആവശ്യം. ഇല്ലെങ്കില്‍ മാക്‌സിയുടെ വീട്ടിലേക്ക് പ്രതിഷേധ മാര്‍ച്ച് നടത്താനാണ് സമരസമിതിയുടെ നീക്കം.

സൗത്ത് റെയില്‍വേയ്ക്ക് സമീപം പേരണ്ടൂര്‍ കനാലിന്‍റെ കൈവരിയ്ക്കരികെ താമസിച്ചിരുന്ന പി ആന്‍ഡ് ടി കോളനി നിവാസികള്‍ക്ക് മെച്ചപ്പെട്ട താമസസൗകര്യം ഒരുക്കാനായി ജിസിഡിഎ സൗജന്യമായി വിട്ടുനല്‍കിയ സ്ഥലത്ത് കഴിഞ്ഞ എല്‍ഡിഎഫ് സര്‍ക്കാരിന്‍റെ കാലത്താണ് ഫ്‌ളാറ്റ് നിര്‍മിച്ചത്. എന്നാല്‍ സ്റ്റീല്‍ സ്ട്രക്ചറില്‍ നിര്‍മിച്ച കെട്ടിടത്തിന് വ്യാപകമായി വിള്ളല്‍ രൂപപ്പെട്ടു.

മുകളിലുള്ള അപ്പാര്‍ട്ട്‌മെന്‍റിലെ കക്കൂസ് മലിനജലം താഴേ നിലയിലുള്ളവരുടെ അടുക്കളയിലേക്കും കിടപ്പുമുറികളിലേക്കുമാണ് ഒലിച്ചിറങ്ങിയത്. മഴക്കാലത്ത് ചോര്‍ച്ച വ്യാപകമായി. പരിശോധനകള്‍ നടന്നെങ്കിലും പരിഹാരമുണ്ടായില്ല. യുഡിഎഫ് സര്‍ക്കാര്‍ വന്ന ശേഷം ഫ്‌ളാറ്റ് നിവാസികള്‍ ജിസിഡിഎ ഓഫീസിന് മുന്നില്‍ പ്രതിഷേധ സമരം നടത്തി. പിന്നാലെയാണ് ഫ്‌ളാറ്റ് പൊളിച്ചു പണിയുമെന്ന് മുഖ്യമന്ത്രി പറഞ്ഞത്.

Tags : Mundamveli Flat Residents Protest KJMaxi