ലോക റോബോട്ട് ഒളിമ്പ്യാഡ് ഏഷ്യ പസഫിക് ഓപ്പൺ ചാമ്പ്യൻഷിപ്പിൽ ഒന്നാംസ്ഥാനം കരസ്ഥമാക്കിയ ഇന്ത്യൻ ടീം. മലയാളിയായ ഇവാൻ മെർജിൻ ജോസ് (ഉൾചിത്രത്തിൽ)
ഹൈദരാബാദ്: ലോക റോബോട്ട് ഒളിമ്പ്യാഡ് ഏഷ്യ പസഫിക് ഓപ്പൺ ചാമ്പ്യൻഷിപ്പിൽ മലയാളി വിദ്യാർഥിയടങ്ങിയ ഇന്ത്യൻ ടീമിന് ചരിത്രനേട്ടം. 14 വയസിന് താഴെയുള്ളവരുടെ ‘ഫ്യൂച്ചർ ഇന്നവേറ്റേഴ്സ് ജൂനിയർ’വിഭാഗത്തിലാണ് മുംബൈയിൽനിന്നുള്ള ടീം ഒന്നാംസ്ഥാനം കരസ്ഥമാക്കിയത്.
മുംബൈയിൽ പഠിക്കുന്ന മലയാളിയായ ഇവാൻ മെർജിൻ ജോസ്, അഗസ്ത്യ ഹുബ്ലികർ, റെയാൻഷ് ജാദവ് എന്നിവരടങ്ങിയതായിരുന്നു ഇന്ത്യൻ ടീം. ഇവാൻ മെർജിൻ ജോസ് തൃശൂർ കുരിയച്ചിറ സ്വദേശിയാണ്. മെർജിൻ ജോസ് പൊഴോലിപ്പറമ്പിൽ, അശ്വതി മെർജിൻ എന്നിവരാണ് മാതാപിതാക്കൾ.
ഹൈദരാബാദിലെ ജിഎംആർ അറീനയിൽ 2-ന് സമാപിച്ച മത്സരത്തിൽ 20-ലധികം രാജ്യങ്ങളിൽ നിന്നായി 149 ടീമുകൾ മത്സരിച്ചു. ‘റോബോട്ടുകൾ സംസ്കാരത്തെ തൊടുമ്പോൾ’ എന്നതായിരുന്നു മത്സരപ്രമേയം. മത്സരത്തിൽ ദക്ഷിണ കൊറിയ രണ്ടാം സ്ഥാനവും ഫിലിപ്പീൻസ് മൂന്നാം സ്ഥാനവും നേടി.
നൂറ്റാണ്ടുകളിലേറെ പഴക്കമുള്ള പരമ്പരാഗത നെയ്ത്ത് കരകൗശല വിദ്യയെ ആധുനിക സാങ്കേതികവിദ്യ ഉപയോഗിച്ച് സംരക്ഷിക്കാനും വികസിപ്പിക്കാനുമുള്ള പ്രോജക്ടാണ് ഇന്ത്യൻ സംഘം അവതരിപ്പിച്ചത്. തൊഴിലാളികളുടെ സർഗാത്മകതയ്ക്കും പരമ്പരാഗത വൈദഗ്ധ്യത്തിനും മങ്ങലേൽപ്പിക്കാതെ റോബോട്ടിക്സും ആർട്ടിഫിഷ്യൽ ഇന്റലിജൻസും സമന്വയിപ്പിച്ചാണ് ഈ സംവിധാനം പ്രവർത്തിക്കുന്നത്.
Tags : Malayali Shine RobotOlympiad Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash