കൊച്ചി: കൊച്ചി സിറ്റി പൊലിസ് കമ്മീഷണറായി ആര്‍. നിശാന്തിനി ഇന്ന് ചുമതലയേക്കും. ചേരാനെല്ലൂരില്‍ അഡീഷണല്‍ ജില്ലാ ജഡ്ജിയുടെ മകനായ പതിനേഴുകാരന്‍ ഓടിച്ച കാറിടിച്ച് തട്ടുകട ഉടമ മരിച്ച കേസില്‍ പൊലിസിനുണ്ടായ വീഴ്ചയെ തുടര്‍ന്ന് കമ്മീഷണറായിരുന്ന കാളിരാജ് മഹേഷ് കുമാറിനെ സ്ഥാനത്തു നിന്നു മാറ്റുകയായിരുന്നു.

ആദ്യ ദക്ഷിണ മേഖല ഐജിയായിരുന്ന ആര്‍. നിശാന്തിനി കൊച്ചി സിറ്റി പൊലീസിന്റെ ആദ്യ വനിത കമ്മീഷണറായാണ് ചുമതലയേക്കുന്നത്. ചേരാനല്ലൂര്‍ അപകടത്തിലെ അന്വേഷണത്തില്‍ പൊലിസിന്റെ ഭാഗത്തു നിന്ന് ഗുരുതരമായ വീഴ്ചകളുണ്ടായെന്നാണ് കണ്ടെത്തല്‍. കേസ് കൈകാര്യം ചെയ്തതിലും തുടരന്വേഷണത്തിന് മേല്‍നോട്ടം വഹിച്ചതിലും കമ്മിഷണറുടെ ഭാഗത്തു നിന്ന് അനാസ്ഥയുണ്ടായതായി എഡിജിപി പി. വിജയന്‍ റിപ്പോര്‍ട്ട് നല്‍കിയിരുന്നു.

അന്വേഷണത്തിലെ വീഴ്ചയെ തുടര്‍ന്ന് ചേരാനല്ലൂര്‍ സ്റ്റേഷനിലെ സിഐ ശ്യാംകുമാര്‍, എസ്എച്ച്ഒ വിശ്വജിത്ത്, ഗ്രേഡ് എഎസ്ഐ മനോജ്, സീനിയര്‍ സിപിഒ അരുണ്‍ ജോഷി എന്നിവരെ നേരത്തെ സസ്പെന്‍ഡ് ചെയ്തിരുന്നു. പ്രായപൂര്‍ത്തിയാകാത്ത പ്രതിക്ക് തുടക്കത്തില്‍ എളുപ്പം ജാമ്യം ലഭിച്ചതും തെളിവുകള്‍ നശിപ്പിക്കാന്‍ സഹായകരമാകുന്ന തരത്തില്‍ പൊലിസ് നിഷ്‌ക്രിയത്വം പാലിച്ചെന്ന ആരോപണവും നടപടികള്‍ക്ക് കാരണമായി.

Tags : KeralaPolice RNishanthini Kochi CityPoliceCommissioner