14

കൊച്ചി: കേസ് ഏറ്റെടുത്തതിന്‍റെ വൈരാഗ്യത്തില്‍ അഭിഭാഷകന്‍റെ പിതാവിനെ കുത്തിപ്പരിക്കേല്‍പ്പിച്ച് എതിര്‍കക്ഷികള്‍. മുരുക്കുംപാടം തോട്ടുങ്കല്‍പറമ്പില്‍ മോഹന്‍ദാസിനെ (80) ആണ് ഗാര്‍ഹിക പീഡനക്കേസിലെ എതിര്‍കക്ഷികള്‍ കത്തിയും മറ്റ് മാരകായുധങ്ങളും ഉപയോഗിച്ച് കുത്തിപ്പരിക്കേല്‍പ്പിച്ചത്.

മുരുക്കുംപാടം കോമത്ത് വീട്ടില്‍ വേലു എന്ന് വിളിക്കുന്ന ഡാസ്റ്റര്‍, വാവക്കുട്ടി എന്ന് വിളിക്കുന്ന ഡൈനാസ്റ്റര്‍ എന്നിവരെ ഞാറക്കല്‍ പോലീസ് കസ്റ്റഡിയിലെടുത്തു. വ്യാഴാഴ്ച വൈകുന്നേരം 5.30ന് മോഹന്‍ദാസിന്‍റെ വീട്ടില്‍ അതിക്രമിച്ച് കയറിയാണ് കൃത്യം നടത്തിയത്. സാരമായി പരിക്കേറ്റ മോഹന്‍ദാസ് എറണാകുളത്തെ സ്വകാര്യ ആശുപത്രിയില്‍ ഗുരുതരാവസ്ഥയില്‍ ചികിത്സയിലാണ്.

ഒന്നാം പ്രതിയായ ഡാസ്റ്ററിന്‍റെ ഭാര്യ നല്‍കിയ സ്വകാര്യ അന്യായം മോഹന്‍ദാസിന്‍റെ അഭിഭാഷകനായ മകന്‍ ഏറ്റെടുത്തതിലുള്ള വൈരാഗ്യമാണ് കൊലപാതകശ്രമത്തിന് കാരണമെന്ന് മോഹന്‍ദാസിന്‍റെ ഭാര്യ ലൗലി പോലീസിന് മൊഴിനല്‍കി. അറസ്റ്റു രേഖപ്പെടുത്തി പ്രതികളെ ഇന്ന് കോടതിയില്‍ ഹാജരാക്കും.

Tags : Rivalry Lawyer Father Attack