1

കൊച്ചി: ചെക്ക് കേസിൽ ശിക്ഷിക്കപ്പെട്ട മാണി സി. കാപ്പൻ എംഎൽഎയെ അയോഗ്യനാക്കണമെന്ന പരാതിയിൽ നിയമപരമായ തീരുമാനമെടുക്കാൻ ഹൈക്കോടതി സ്പീക്കർക്ക് നിർദ്ദേശം നൽകി. കേസിൽ സ്പീക്കറുടെ തീരുമാനം വൈകുന്നുവെന്ന് കാട്ടി പരാതിക്കാരനായ ദിനേശ് മേനോൻ നൽകിയ ഹർജി തീർപ്പാക്കിക്കൊണ്ടാണ് കോടതി ഉത്തരവ്.

സ്പീക്കർ അല്ല തീരുമാനമെടുക്കേണ്ടതെങ്കിൽ പരാതി ഗവർണർക്ക് കൈമാറാനും കോടതി നിർദേശിച്ചിട്ടുണ്ട്. നാല് ചെക്ക് കേസുകളിലായി മൂന്നര വർഷം തടവിന് ശിക്ഷിക്കപ്പെട്ട മാണി സി. കാപ്പന് എംഎൽഎയായി തുടരാൻ അർഹതയില്ലെന്നാണ് ഹർജിക്കാരൻ കോടതിയിൽ വാദിച്ചത്.

എന്നാൽ, ഒറ്റ കേസിൽ രണ്ട് വർഷമോ അതിൽ കൂടുതലോ തടവ് ശിക്ഷ ലഭിച്ചാൽ മാത്രമാണ് അയോഗ്യത ബാധകമാകൂ എന്നാണ് മാണി സി. കാപ്പന്‍റെ ഭാഗത്തുനിന്ന് കോടതിയിൽ ഉന്നയിച്ച വാദം.

ഈ സാഹചര്യത്തിലാണ് വിഷയം നിയമപരമായി പരിശോധിച്ച് ഉചിതമായ തീരുമാനമെടുക്കാൻ ഹൈക്കോടതി സ്പീക്കർക്ക് നിർദേശം നൽകിയിരിക്കുന്നത്.

Tags : Complaint Disqualification ManiCKappan HighCourt Speaker Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash