ഐക്യത്തിന്‍റെ സന്ദേശം വളർത്തേണ്ടത് കാലഘട്ടത്തിന്‍റെ ആവശ്യം: മാർ ആലഞ്ചേരി : Deepika.com Nattu Visesham

KOTTAYAM

ഐക്യത്തിന്‍റെ സന്ദേശം വളർത്തേണ്ടത് കാലഘട്ടത്തിന്‍റെ ആവശ്യം: മാർ ആലഞ്ചേരി

Monday, April 29, 2024 7:13 AM IST

അതിരമ്പുഴ: ഐക്യത്തിന്‍റെ സന്ദേശം വളർത്തേണ്ടതും പ്രോത്സാഹിപ്പിക്കേണ്ടതും കാലഘട്ടത്തിന്‍റെ ആവശ്യമെന്ന് കർദിനാൾ മാർ ജോർജ് ആലഞ്ചേരി. അതിരമ്പുഴ സെന്‍റ് മേരീസ് ഫൊറോന പള്ളിയിലെ ഇടവക ദിനാചരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

കൂട്ടായ്മയുടെ സന്ദേശം ഈ കാലഘട്ടത്തിൽ ശക്തമാകണം. ഒന്നിച്ചുള്ള പ്രവർത്തനമാണ് സഭയെ ഐക്യപ്പെടുത്തുന്നത്. മറ്റുള്ളവർക്കുവേണ്ടി ജീവിക്കുന്ന ശൈലി രൂപപ്പെടണം. ഈശോ മിശിഹായിലുള്ള വിശ്വാസത്തിൽ ഒന്നാകുമ്പോഴാണ് ദൈവമക്കളെന്ന സ്ഥാനത്തിന് നാം അർഹരാകുന്നതെന്നു കർദിനാൾ മാർ ജോർജ് ആലഞ്ചേരി പറഞ്ഞു.

വികാരി റവ. ഡോ. ജോസഫ് മുണ്ടകത്തിൽ സമ്മേളനത്തിൽ അധ്യക്ഷത വഹിച്ചു. ഡോ. കുര്യാസ് കുമ്പളക്കുഴി മുഖ്യപ്രഭാഷണം നടത്തി. അസി. വികാരി ഫാ. നൈജിൽ തൊണ്ടിക്കാക്കുഴിയിൽ, പാരിഷ് കൗൺസിൽ സെക്രട്ടറി സഞ്ജിത് പി. ജോസ് എന്നിവർ പ്രസംഗിച്ചു. മാർ ജോർജ് ആലഞ്ചേരിയുടെ 80-ാം ജന്മദിനം കേക്ക് മുറിച്ച് ആഘോഷിച്ചു.

ഉച്ചകഴിഞ്ഞ് 3.30ന് അർപ്പിച്ച വിശുദ്ധ കുർബാനയ്ക്കുശേഷമായിരുന്നു സമ്മേളനം. പരിപാടികൾക്കു തുടക്കംകുറിച്ച് കൈക്കാരൻ ടി.ജെ. ജേക്കബ് തലയണക്കുഴി പതാക ഉയർത്തി. തുടർന്നായിരുന്നു സമ്മേളനം.

2500ലേറെ കുടുംബങ്ങൾ ഉൾക്കൊള്ളുന്ന ഇടവകയിലെ വിശ്വാസികളുടെ സംഗമമായി ഇടവക ദിനാചരണം മാറി. വിവാഹ ജീവിതത്തിന്‍റെ 50, 25 വർഷങ്ങൾ പൂർത്തിയാക്കിയ ദമ്പതികളെയും സംസ്ഥാന തലത്തിൽ മികവു തെളിയിച്ച ഇടവകാംഗങ്ങളെയും സമ്മേളനത്തിൽ ആദരിച്ചു. സ്നേഹവിരുന്നോടെയാണ് പരിപാടികൾ സമാപിച്ചത്.

അസി. വികാരിമാരായ ഫാ. നവീൻ മാമൂട്ടിൽ, ഫാ. സിറിൽ കൈതക്കളം, ഫാ. ടോണി കോയിൽപറമ്പിൽ, കൈക്കാരന്മാരായ ജോണി കുഴുപ്പിൽ, എം.സി. മാത്യു വലിയപറമ്പിൽ, തോമസ് ജോസഫ് പുതുശേരിൽ തുടങ്ങിയവർ നേതൃത്വം നൽകി.