അറക്കുളം: വിനോദ സഞ്ചാരികള്ക്കായി കാഞ്ഞാര് വാട്ടര്ഷെഡ് തീം പാര്ക്കിന് സമീപം ചെക്ക്ഡാം നിര്മിക്കുന്നു. സര്വേ നടപടികള് പൂര്ത്തിയായിവരുന്ന പദ്ധതിക്ക് വകുപ്പുതല അനുമതി ലഭിച്ചാല് ഉടന് നിര്മാണം ആരംഭിക്കും. 8.38 കോടി രൂപയാണ് പദ്ധതിയുടെ മുതല് മുടക്ക്.
ബോട്ട് സര്വീസ്, സ്പീഡ് ബോട്ട് സര്വീസുകള് എന്നിവ ഇവിടെ നടപ്പാക്കും. കേരള ഇറിഗേഷന് ഇന്ഫ്രാ സ്ട്രക്ചര് ഡെവലെപ്മെന്റ് കോര്പറേഷനായിരിക്കും പദ്ധതിക്കു നേതൃത്വം നല്കുന്നത്. മുന് മന്ത്രി റോഷി അഗസ്റ്റിനാണ് ഫണ്ട് അനുവദിച്ചതും പ്ലാനിംഗ് നടത്തിയതും.
പന്ത്രണ്ട് മാസവും വെള്ളം കിട്ടത്തക്ക വിധത്തിലാണ് പദ്ധതി പ്ലാന് ചെയ്തിരിക്കുന്നത്. അതിനാല് ബോട്ട് സര്വീസിന് തടസം ഉണ്ടാകില്ല. അറക്കുളം, കുടയത്തൂര് പഞ്ചായത്തുകള്ക്കാണ് ഇതിന്റെ പ്രയോജനം കൂടുതല് ലഭിക്കുന്നത്. നിര്മാണം പൂര്ത്തിയാകുന്നതോടെ ജില്ലയിലേക്കെത്തുന്ന വിനോദ സഞ്ചാരികള്ക്ക് ഇവിടം ഇടത്താവളമാകും. എറണാകുളം മൗണ്ട്കാര്വ് പ്രോജക്ടാണ് നിര്മാണ പ്രവൃത്തികള് നടത്തുന്നത്.
അറക്കുളം പഞ്ചായത്ത് പ്രസിഡന്റ് ഉഷ ഗോപിനാഥ്, വൈസ് പ്രസിഡന്റ് ഇമ്മാനുവേല്, സ്റ്റാന്ഡിംഗ് കമ്മിറ്റി ചെയര്മാന്മാരായ പി.ഡി. പുഷ്പകുമാര്, വി.സി. മണിയമ്മ എന്നിവര് സര്വേ നടപടികള്ക്ക് നേതൃത്വം നല്കി.
Tags : Nattuvishesham Local News Boating Kanjar River