വെള്ളരിക്കുണ്ട്: സമൂഹത്തിൽ വർധിച്ചുവരുന്ന മദ്യപാന ശീലവും ഇതര ലഹരി വസ്തുക്കളുടെ ഉപയോഗവും നിയന്ത്രിക്കുന്നതിന്റെ ഭാഗമായി വീര്യം കുറഞ്ഞ മദ്യം അടക്കമുള്ള ലഹരിവസ്തുക്കളുടെ വ്യാപനം തടയാൻ സർക്കാർ സത്വര നടപടികൾ സ്വീകരിക്കണമെന്ന് വെളളരിക്കുണ്ട് ഫൊറോന കൗൺസിൽ യോഗം പ്രമേയത്തിലൂടെ ആവശ്യപ്പെട്ടു. വെള്ളരിക്കുണ്ടിൽ അഗ്നിരക്ഷാനിലയം ആരംഭിക്കണമെന്നും യോഗം ആവശ്യപ്പെട്ടു.
വെള്ളരിക്കുണ്ട് ലിറ്റിൽ ഫ്ലവർ ഫൊറോന പള്ളിയിൽ നടന്ന യോഗം വികാരി ജനറാൾ മോൺ. മാത്യു ഇളംതുരുത്തിപടവിൽ ഉദ്ഘാടനം ചെയ്തു. ഫൊറോന വികാരി ഫാ. ഡോ. ജോൺസൺ അന്ത്യാംകുളം അധ്യക്ഷത വഹിച്ചു. അതിരൂപതാ ചാൻസലർ ഫാ. ഡോ. ജോസഫ് മുട്ടത്തുകുന്നേൽ വിഷയാവതരണം നടത്തി. ഫാ. ഡോ. തോമസ് മേൽവെട്ടത്ത്, ജോസഫ് കുമ്മിണിയിൽ, എബി അമ്പലത്തിങ്കൽ എന്നിവർ പ്രസംഗിച്ചു.
ഫൊറോന കൗൺസിൽ ഭാരവാഹികളായി ഫാ. ഡോ. ജോൺസൺ അന്ത്യാംകുളം- പ്രസിഡന്റ്, ഫാ. ജയിംസ് മൂന്നാനപ്പള്ളി- വൈദിക പ്രതിനിധി, ജോസഫ് കുമ്മിണിയിൽ- ഫൊറോന കോ-ഓർഡിനേറ്റർ, എബി അമ്പലത്തിങ്കൽ, റിജി മൂലയിൽ- സെക്രട്ടറിമാർ എന്നിവരെയും അതിരൂപത പാസ്റ്ററൽ കൗൺസിലിലേക്ക് ജോസഫ് ആനക്കല്ലിൽ, ഷിജി ചെറുവേലിൽ, ജേക്കബ് പാലനിൽക്കുംതൊട്ടിയിൽ എന്നിവരെയും തെരഞ്ഞെടുത്തു.