ഇരിട്ടി- തളിപ്പറമ്പ് സംസ്ഥാന പാതയിൽ കുയിലൂർ മയിൽക്കുന്നിൽ കൂറ്റൻ പ്ലാവ് റോഡിനു കുറുകെ കടപുഴകി വീണ നിലയിൽ.
ഇരിട്ടി: ഇരിട്ടി- തളിപ്പറമ്പ് സംസ്ഥാന പാതയിൽ കുയിലൂർ മയിൽകുന്നിൽ റോഡരികിലെ കൂറ്റൻ പ്ലാവ് കടപുഴകി വീണ് ഗതാഗതം തടസപ്പെട്ടു. ഇന്നലെ വൈകുന്നേരം ആറോടെയായിരുന്നു സംഭവം. ഇടതടവില്ലാതെ ബസുകൾ അടക്കമുള്ള വാഹനങ്ങൾ കടന്നു പോകുന്ന റോഡിൽ അപകട സമയത്ത് വാഹനങ്ങളോ കാൽനടയാത്രക്കാരോ ഇല്ലാത്തതിനാലാണ് ദുരന്തം ഒഴിവായത്. മരം വീണ് ഹൈ ടെൻഷൻ വൈദ്യുതി തൂണുകളും ലൈനുകളും തകർന്നു. ഇരിട്ടിയിൽ നിന്നും അഗ്നിരക്ഷാ സേനയെത്തി മരം മുറിച്ചു മാറ്റിയാണ് ഗതാഗതം പുനസ്ഥാപിച്ചത്. ഇരിട്ടി സീനിയർ ഫയർ ആൻഡ് റെസ്ക്യൂ ഓഫീസർ കെ.വി. വിജീഷ്, ഫയർ ആൻഡ് റസ്ക്യു ഓഫീസർമാരായ രാജേഷ്, അരുൺ, രാഹുൽ, ഹോം ഗാർഡ് ബെന്നി സേവ്യർ എന്നിവരുടെ നേതൃത്വത്തിലുള്ള സംഘമാണ് മരം മുറിച്ചു നീക്കി ഗതാഗതം പുനഃസ്ഥാപിച്ചത്.
Tags : Nattuvishesham District news