തൃപ്പൂണിത്തുറ മിനിസിവിൽ സ്റ്റേഷൻ വളപ്പിൽ കൂടിക്കിടക്കുന്ന മരക്കഷണങ്ങൾ.
തൃപ്പൂണിത്തുറ: വെട്ടിമാറ്റിയിട്ട മരത്തിന്റെ തടികളും ഉപയോഗശൂന്യമായ വണ്ടികളും നിറഞ്ഞ് തൃപ്പൂണിത്തുറ മിനി സിവിൽ സ്റ്റേഷൻ. ഇടുങ്ങിയ മുറ്റം മാത്രമുള്ള തൃപ്പൂണിത്തുറ മിനി സിവിൽ സ്റ്റേഷൻ വളപ്പിലാണ് മാസങ്ങൾക്ക് മുന്പ് വെട്ടിമാറ്റിയ മരത്തിന്റെ തടിക്കഷണങ്ങളും മരക്കൊമ്പുകളും കൂട്ടിയിട്ടിരിക്കുന്നത്.
ഒട്ടേറെ സർക്കാർ ഓഫീസുകൾ പ്രവർത്തിക്കുന്ന സിവിൽ സ്റ്റേഷൻ വളപ്പിൽ വിവിധ ആവശ്യങ്ങൾക്കായെത്തുന്ന ആളുകളുടെ വാഹനങ്ങൾ പാർക്ക് ചെയ്യാൻ പോലും ഇടമില്ലാത്ത സ്ഥിതിയാണ്.
ഇതിനിടയിലാണ് മരത്തടികളും ഇവിടെ സ്ഥലം അപഹരിക്കുന്നത്. കൂടിക്കിടക്കുന്ന മരത്തടികൾക്കിടയിലൂടെ ഇഴജന്തുക്കളെ ഭയന്നാണ് ഓഫീസ് ജീവനക്കാരും മറ്റും നടക്കുന്നത്.
പൊതുയിടം ശുചിയാക്കലും മറ്റു ശുചീകരണങ്ങളുമെല്ലാം സിവിൽ സ്റ്റേഷൻ വളപ്പിൽ മുറപോലെ നടക്കുന്നുണ്ടെങ്കിലും നാളുകളായി കൂട്ടിയിട്ടിരിക്കുന്ന മരക്കൊമ്പുകളും മറ്റും ഇവിടെനിന്ന് നീക്കാൻ ആരും മുൻകൈയെടുക്കുന്നില്ലെന്ന ആക്ഷേപം ഉയരുന്നുണ്ട്.
Tags : Local News Nattuvishesham Ernakulam