പ്രതീകാത്മക ചിത്രം
തിരുവനന്തപുരം: സ്വകാര്യ ധനകാര്യ സ്ഥാപനത്തിൽ ലക്ഷങ്ങളുടെ തിരിമറി നടത്തിയെന്ന ആരോപണത്തെ തുടർന്ന് ജീവനൊടുക്കാന് ശ്രമിച്ച യുവതികളില് ഒരാള് മരിച്ചു. വെങ്ങാനൂര് സ്വദേശി അഞ്ജു(28) ആണ് മരിച്ചത്.
മറ്റൊരു യുവതി തീവ്രപരിചരണ വിഭാഗത്തിൽ ചികിത്സയിലാണ്. ജൂണ് 30ന് ആയിരുന്നു സംഭവം. വെങ്ങാനൂരിൽ പ്രവര്ത്തിക്കുന്ന സൂര്യ ഫിനാന്സ് എന്ന സ്വകാര്യ സ്വര്ണപണയ സ്ഥാപനത്തിലാണ് രണ്ട് യുവതികൾക്കെതിരെ ആരോപണമുയർന്നത്.
പിന്നാലെ എലിവിഷം കഴിച്ചാണ് യുവതികൾ ജീവനൊടുക്കാന് ശ്രമിച്ചത്. എന്നാല് അഞ്ജുവിനൊപ്പം വിഷം കഴിച്ച പെണ്കുട്ടി വീട്ടിലെത്തി വിവരം പറഞ്ഞു. ഉടന് തന്നെ അവരെ തിരുവനന്തപുരം മെഡിക്കല് കോളജിൽ പ്രവേശിപ്പിക്കുകയായിരുന്നു.
എന്നാല് അഞ്ജു ഇക്കാര്യം വീട്ടില് പറഞ്ഞില്ല. സ്ഥാപനത്തിലെ തിരിമറി സംബന്ധിച്ച് ഇതുവരെ പോലീസിൽ പരാതി ലഭിച്ചിട്ടില്ല. അഞ്ജുവിന്റെ മരണത്തില് അസ്വഭാവിക മരണത്തിന് കേസെടുത്ത് വെങ്ങാനൂര് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
Tags : kerala police death saynotosuicide trivandrum