തിരുവനന്തപുരം: വെങ്ങാനൂരിൽ യുവാവിനെ ബിയർ കുപ്പികൊണ്ട് തലയ്ക്കടിച്ച് കൊലപ്പെടുത്താൻ ശ്രമിച്ച സഹോദരങ്ങൾ പിടിയിൽ. നെല്ലിവിള കൊല്ലൻവിള സ്വദേശി എ.എം. അരുണിന് നേരെയാണ് ആക്രമണമുണ്ടായത്.
കേസിൽ വെങ്ങാനൂർ നെല്ലിവിള ചരുവിള സ്വദേശികളും സഹോദരങ്ങളുമായ അഖിൽ(24), അജിൻ(23) എന്നിവരാണ് പിടിയിലായത്. അസഭ്യം പറഞ്ഞത് ചോദ്യം ചെയ്തതാണ് പ്രതികളെ പ്രകോപിപ്പിച്ചത്. വിഴിഞ്ഞം പോലീസ് ആണ് പ്രതികളെ പിടികൂടിയത്.
മാർച്ച് മൂന്നിന് രാത്രി ഏഴോടെ വെങ്ങാനൂർ കായൽക്കരയ്ക്ക് സമീപമാണ് സംഭവം നടന്നത്. പ്രതികൾ ബിയർക്കുപ്പികൊണ്ട് അരുണിന്റെ തലയ്ക്ക് അടിക്കുകയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.