കൊച്ചി: മാർ തോമ്മാശ്ലീഹയുടെ രക്തസാക്ഷിത്വത്തിന്റെ ദീപ്തസ്മരണ പുതുക്കുന്ന നാളെ സീറോമലബാർ സഭയുടെ ആസ്ഥാന കാര്യാലയമായ കാക്കനാട് മൗണ്ട് സെന്റ് തോമസിൽ ദുക്റാന തിരുനാൾ ആചരണവും സഭാ ദിനാഘോഷവും നടക്കും. രാവിലെ 8.30ന് മേജർ ആർച്ച്ബിഷപ് മാർ റാഫേൽ തട്ടിൽ പതാകയുയർത്തും. 8.45 ന് അദ്ദേഹത്തിന്റെ കാർമികത്വത്തിൽ റാസ കുർബാന. ബിഷപ് മാർ ബോസ്കോ പുത്തൂർ വചനസന്ദേശം നൽകും.
11ന് നടക്കുന്ന പൊതുസമ്മേളനത്തിൽ മന്ത്രിമാരായ സണ്ണി ജോസഫ്, മോൻസ് ജോസഫ്, റോജി എം. ജോൺ, ഗവ. ചീഫ് വിപ്പ് അപു ജോൺ ജോസഫ് എന്നിവർ മുഖ്യാതിഥികളായിരിക്കും. ഇവർ സീറോമലബാർ സഭയുടെ ആദരം ഏറ്റുവാങ്ങും. സഭാംഗവും കത്തോലിക്ക കോൺഗ്രസിന്റെ സജീവ പ്രവർത്തകനുമായ പ്രമുഖ പ്രവാസി വ്യവസായി ഷെവ. ഡേവിസ് എടക്കളത്തൂരിനെയും ആദരിക്കും.
"ഹിസ്റ്ററി ഓഫ് ക്രിസ്റ്റ്യാനിറ്റി ഇൻ ഇന്ത്യ’ എന്ന പുസ്തക പരമ്പരയിലെ രണ്ടാമത്തെ പുസ്തകത്തിന്റെ പ്രകാശനവും ചടങ്ങിൽ നടക്കും. തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ, ഫാ. ഡോ. പയസ് മലേക്കണ്ടത്തിൽ എന്നിവർ പ്രസംഗിക്കും.
മാർതോമ്മാ നസ്രാണികളുടെ വിശ്വാസ പൈതൃകത്തിന്റെ ഓർമപ്പെടുത്തലായും സാമുദായിക ഐക്യബോധത്തിന്റെ ആവിഷ്കാരമായും നടക്കുന്ന സഭാ ദിനാഘോഷത്തിൽ സീറോമലബാർ സഭയിലെ വിവിധ രൂപതകളിൽനിന്നുള്ള വൈദിക, സമർപ്പിത, അല്മായ പ്രതിനിധികൾ പങ്കെടുക്കുമെന്ന് പിആർഒ ഫാ. ഡോ. ടോം ഓലിക്കരോട്ട് അറിയിച്ചു.
കത്തോലിക്ക കോൺഗ്രസ് ഗ്ലോബൽ മീറ്റ്: പതാകപ്രയാണം ഉദ്ഘാടനം
ഒക്ടോബർ 19 മുതൽ 23 വരെ റോമിൽ നടക്കുന്ന കത്തോലിക്ക കോൺഗ്രസ് ഗ്ലോബൽ മീറ്റിന് മുന്നോടിയായി 40 രാജ്യങ്ങളിലൂടെ സഞ്ചരിക്കുന്ന പതാക പ്രയാണത്തിന്റെ ഉദ്ഘാടനം മേജർ ആർച്ച്ബിഷപ് മാർ തട്ടിൽ സഭാ ദിനാഘോഷ സമ്മേളനത്തിൽ നിർവഹിക്കും. കത്തോലിക്ക കോൺഗ്രസ് ഗ്ലോബൽ പ്രസിഡന്റ് പ്രഫ. രാജീവ് കൊച്ചുപറമ്പിലിന് മേജർ ആർച്ച്ബിഷപ് പതാക കൈമാറും.
Tags :