ഫ്രാൻസിസ് ജോർജിന് വൈക്കത്ത് ഉജ്വല വരവേൽപ്പ് : Deepika.com Nattu Visesham

KOTTAYAM

ഫ്രാൻസിസ് ജോർജിന് വൈക്കത്ത് ഉജ്വല വരവേൽപ്പ്

Sunday, April 21, 2024 4:55 AM IST

കോട്ടയം: വൈക്കം മണ്ണില്‍ യുഡിഎഫ് സ്ഥാനാര്‍ഥി കെ. ഫ്രാന്‍സിസ് ജോര്‍ജിന് ഉജ്വല വരവേല്‍പ്പ്. യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ് ഉദ്ഘാടനം ചെയ്തു.
ചെമ്പ് മണ്ഡലത്തിലെ കാട്ടിക്കുന്ന് രാജീവ് ഗാന്ധി സ്മൃതി മണ്ഡപത്തില്‍ പുഷ്പാര്‍ച്ചന നടത്തിയാണ്പര്യടനത്തിനു തുടക്കം കുറിച്ചത്.

പൂക്കളും ഷാളുകളുമായി സ്ഥാനാര്‍ഥിയെ കാത്തുനിന്നു. വൈക്കത്തെ വോട്ടര്‍മാര്‍ യുഡിഎഫിനായി കൈകോര്‍ക്കുന്ന മികച്ച കാഴ്ചകളാണ് പര്യടനത്തിലുടനീളം കാണാന്‍ സാധിച്ചത്. ചെമ്പ് മണ്ഡലത്തിലെ കാട്ടിക്കുന്നില്‍ ആരംഭിച്ച പര്യടനം മറവന്‍തുരുത്ത്, ഉദയനാപുരം, തലയോലപ്പറമ്പ്, വെള്ളൂര്‍ മണ്ഡലങ്ങളിലെ വിവിധ പ്രദേശങ്ങളിലൂടെ സഞ്ചരിച്ച് വീണ്ടും ചെമ്പ് മണ്ഡലത്തില്‍ പ്രവേശിച്ച് ബ്രഹ്മമംഗലത്ത് സമാപിച്ചു.

തോമസ് ചാഴികാടന് പിറവത്ത് വൻ സ്വീകരണം

കോട്ടയം: എല്‍ഡിഎഫ് സ്ഥാനാര്‍ഥി തോമസ് ചാഴികാടന്‍ ഇന്നലെ പിറവം നിയമസഭാ നിയോജകമണ്ഡലത്തിലെ വിവിധ വ്യവസായ ശാലകളിലെത്തി തൊഴിലാളികളെ നേരില്‍കണ്ടു വോട്ടഭ്യര്‍ഥിച്ചു.

മുളന്തുരുത്തിയുടെ സമീപ പ്രദേശങ്ങളില്‍ പ്രവര്‍ത്തിക്കുന്ന ഒഇഎന്‍ ഇന്ത്യ, മാതാ എന്‍റര്‍പ്രൈസസ്, എആര്‍ ഇലക്‌ട്രോടെക്, ഗ്രാന്‍പെല്‍ ഇന്ത്യ പ്രൈവറ്റ് ലിമിറ്റഡ് എന്നീ വ്യവസായ സ്ഥാനങ്ങളിലാണ് സ്ഥാനാര്‍ഥിയെത്തിയത്. ഉച്ചയോടെ സൗഹൃദ സന്ദര്‍ശനം പൂര്‍ത്തിയാക്കി പാലാ നിയോജകമണ്ഡലത്തിലേക്ക്. വൈകുന്നേരം പാലായെ ഇളക്കിമറിച്ച വമ്പന്‍ റോഡ്‌ഷോയിലും തോമസ് ചാഴികാടന്‍ പങ്കെടുത്തു. ഊരശാല അമ്പലം മുതല്‍ വെള്ളഞ്ചൂര്‍ വരെയായിരുന്നു റോഡ് ഷോ. വാദ്യമേളങ്ങളുടെയും നാടന്‍ കലാരൂപങ്ങളുടെയും അകമ്പടിയോടെ നടന്ന റോഡ്‌ഷോയില്‍ ആയിരങ്ങള്‍ പങ്കെടുത്തു.

കായൽക്കരകളിലൂടെ ജനസമ്പര്‍ക്കം നടത്തി തുഷാർ വെള്ളാപ്പള്ളി

കോട്ടയം: കോട്ടയം പാര്‍ലമെന്‍റ് മണ്ഡലത്തിലെ എന്‍ഡിഎ സ്ഥാനാര്‍ഥി തുഷാര്‍ വെള്ളാപ്പളളി കുമരകത്തിന്‍റെ മനോഹാരമായ കായല്‍ക്കരകളിലൂടെ ജനസമ്പര്‍ക്കം നടത്തി.
ചെങ്ങളത്ത് ആരംഭിച്ച പര്യടനം കുമരകം ചന്തയില്‍ സമാപിച്ചു.