മരണപ്പാച്ചിൽ സ്വകാര്യ ബസ് ഡ്രൈവറുടെ ലൈസൻസ് സസ്പെൻഡ് ചെയ്തു : Deepika.com Nattu Visesham

ERNAKULAM

മരണപ്പാച്ചിൽ സ്വകാര്യ ബസ് ഡ്രൈവറുടെ ലൈസൻസ് സസ്പെൻഡ് ചെയ്തു

Sunday, May 5, 2024 4:33 AM IST

കാക്കനാട്: ഇടപ്പള്ളി-പറവൂർ റൂട്ടിൽ സർവീസ് നടത്തുന്ന സ്വകാര്യ ബസ് അപകടകരമായ രീതിയിൽ ഓടിച്ച സംഭവത്തിൽ ബസ് ഡ്രൈവറുടെ ലൈസൻസ് സസ്പെൻഡ് ചെയ്തു. പറവൂർ സ്വദേശിയായ ഡ്രൈവർ വി.ബി. ബൈജുവിന്‍റെ ലൈസൻസാണ് എറണാകുളം ജോയിന്‍റ് ആർടിഒ സസ്പെൻഡ് ചെയ്തത്.

19ന് വൈകിട്ട് 6ഓടെയായിരുന്നു കേസിന് ആസ്പദമായ സംഭവം. ബസ് റോഡിന്‍റെ വലതുവശം ചേർന്ന് ചേരാനല്ലൂർ ജംഗ്ഷനിലേക്ക് പായിച്ച് ഇരുചക്ര വാഹന യാത്രക്കാരനെ അപായപ്പെടുത്താൻ ശ്രമിച്ച സംഭവത്തിലാണ് നടപടി.

ബസ് അപകടകരമായ രീതിയിൽ ഓടിക്കുന്നത് നോർത്ത് പറവൂർ മോട്ടോർ വെഹിക്കിൾ ഇൻസ്പെക്ടർ എസ്. ഗിരീഷിന്‍റെയും അസി. മോട്ടോർ വെഹിക്കിൾ ഇൻസ്പെക്ടർ അൻസാറിന്‍റെയും ശ്രദ്ധയിൽപ്പെട്ടതിനെത്തുടർന്ന് നടത്തിയ അന്വേഷണത്തിലാണ് ബസ് ഡ്രൈവറെ കണ്ടെത്തിയത്. ഡാഷ്ബോർഡ് കാമറയിൽനിന്ന് കിട്ടിയ ദൃശ്യങ്ങൾ ഉൾപ്പടെ എറണാകുളം ആർടിഒ മനോജിന് കൈമാറി.

ആർടിഒയുടെ നിർദേശത്തെ തുടർന്ന് മോട്ടോർ വെഹിക്കിൾ ഇൻസ്പെക്ടർ എ.ആർ. രാജേഷ് നടത്തിയ തുടരന്വേഷണത്തിൽ ഡ്രൈവർ കുറ്റക്കാരനാമെന്ന് കണ്ടെത്തുകയായിരുന്നു. തുടർന്ന് എറണാകുളം ജോയിന്‍റ് ആർടിഒ സുരേഷ് കുമാർ പ്രതിയുടെ ലൈസൻസ് സസ്പെൻഡ് ചെയ്യുകയായിരുന്നു.