29

ബംഗളൂരു: മൈസൂരു റോഡിന് സമീപം പ്രഭാത സവാരിക്കിടെ കാട്ടാനയുടെ കുത്തേറ്റു വയോധികൻ കൊല്ലപ്പെട്ടു. രാജരാജേശ്വരി മെഡിക്കൽ കോളജിനു സമീപം ദൊഡ്ഡബെലെയിൽ മകൾക്കൊപ്പം നടക്കാനിറങ്ങിയ നാഗരാജു (60) ആണ് മരിച്ചത്.

മൈസൂരു റോഡിൽ രാജരാജേശ്വരി മെഡിക്കൽ കോളജിൽ നിന്ന് രണ്ടു കിലോമീറ്റർ അകലെവെച്ചാണ് ആക്രമണമുണ്ടായത്. മകൾക്കൊപ്പം റോഡിലൂടെ നടക്കുമ്പോൾ എത്തിയ കാട്ടാന നാഗരാജുവിനെ ആക്രമിക്കുകയായിരുന്നു.

വാരിയെല്ലിന് ഗുരുതരമായി പരിക്കേറ്റ് റോഡിൽ വീണ അദ്ദേഹത്തെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആനയുടെ ആക്രമണത്തിൽ സമീപത്തെ ഒരു അപ്പാർട്ട്മെന്‍റിന്‍റെ മതിലും തകർന്നിട്ടുണ്ട്.

ബന്നാർഘട്ട വനമേഖലയിൽ നിന്നിറങ്ങിയ കൊമ്പനാണ് ആക്രമണം നടത്തിയതെന്ന് വനംവകുപ്പ് ഉദ്യോഗസ്ഥർ സ്ഥിരീകരിച്ചു. ആനയെ പിടികൂടാനായി വനംവകുപ്പിന്‍റെ മൂന്ന് പ്രത്യേക സംഘങ്ങളെ നിയോഗിച്ചിട്ടുണ്ട്.