Kerala
തിരുവനന്തപുരം: മൂല്യനിർണയം നടത്താതിരുന്നത് സാങ്കേതിക പിഴവ് കാരണമെന്ന് പിഎസ്സി പരീക്ഷ വിഭാഗം അഡിഷണൽ സെക്രട്ടറി ആർ. ഹരി. സംസ്ഥാന ആസൂത്രണ ബോർഡ് പരീക്ഷയിൽ 58 മാർക്കിന്റെ മൂല്യനിർണയം നടത്താതിരുന്നതിലാണ് സാങ്കേതിക പിഴവ് കാരണമായെന്ന് ഹരി എസ്ഐടിക്ക് മൊഴി നൽകിയത്.
ഹരിയെ ഇന്ന് വീണ്ടും ചോദ്യം ചെയ്യും. ഉച്ചയോടെ കോടതിയിൽ ഹാജരാക്കുമെന്നാണ് വിവരം. അതേസമയം വരും ദിവസങ്ങളിൽ പിഎസ്സിയിലെ കൂടുതൽ അംഗങ്ങളെ ചോദ്യം ചെയ്യാനാണ് തീരുമാനം. പിഎസ്സി ചെയർമാൻ എം. ആർ ബൈജുവിനോട് വീണ്ടും ഹാജരാകാൻ ആവശ്യപ്പെട്ടെങ്കിലും ഹാജരായിട്ടില്ല.
ഹൈക്കോടതി വിധി വന്നതിനുശേഷം ഹാജരാകാമെന്നാണ് ബൈജു എസ്ഐടിയെ അറിയിച്ചത്. ബൈജുവിനെ പ്രതിയാക്കാനാണ് എസ്ഐടിയുടെ തീരുമാനം. ഇക്കാര്യത്തിൽ പ്രത്യേക അന്വേഷണസംഘം നിയമോപദേശം തേടിയിട്ടുണ്ട്.
Kerala
തിരുവനന്തപുരം: പിഎസ്സി ചെയർമാനെയും അംഗങ്ങളെയും പിരിച്ചുവിടാൻ രാഷ്ട്രപതിയോട് ശിപാർശ ചെയ്ത മുൻ ഗവർണർ രാജേന്ദ്ര വിശ്വനാഥ് അർലേക്കറുടെ നടപടി സംസ്ഥാന സർക്കാരിന്റെ ഉപദേശപ്രകാരമല്ലെന്ന് മുഖ്യമന്ത്രി വി.ഡി. സതീശൻ.
മന്ത്രിസഭയുടെ ഉപദേശപ്രകാരമാണ് ഗവർണർ പ്രവർത്തിക്കേണ്ടതെങ്കിലും ഈ വിഷയത്തിൽ അദ്ദേഹം തന്നിഷ്ടപ്രകാരമാണ് തീരുമാനമെടുത്തത്. ഭരണഘടനയുടെ അടിസ്ഥാന തത്വങ്ങൾ പാലിക്കാതെയാണ് ഗവർണർ ഇത്തരം സുപ്രധാന വിഷയങ്ങളിൽ ഇടപെടുന്നത്. ഗവർണറുടെ ഈ നീക്കം പിഎസ്സിയിലെ ക്രമക്കേടുകൾ മറച്ചുവയ്ക്കാനുള്ള ശ്രമത്തിന്റെ ഭാഗമാണോ എന്ന് സംശയിക്കേണ്ടിയിരിക്കുന്നുവെന്നും മുഖ്യമന്ത്രി മാധ്യമങ്ങളോടു പ്രതികരിച്ചു.
പിഎസ്സിയിൽ നടന്ന നിയമനങ്ങളുമായി ബന്ധപ്പെട്ട് ഞെട്ടിക്കുന്ന വിവരങ്ങളാണ് പ്രാഥമിക അന്വേഷണത്തിൽ കണ്ടെത്തിയത്. പിഎസ്സിയുടെ വിശ്വാസ്യത പൂർണമായും തകർക്കുന്ന രീതിയിലുള്ള റിപ്പോർട്ടുകളാണ് പുറത്തുവരുന്നത്. എന്നാൽ ഈ വിശ്വാസ്യത വീണ്ടെടുക്കാൻ സർക്കാർ പ്രതിജ്ഞാബദ്ധമാണ്. ഇത്തരം ക്രമക്കേടുകൾ ഒരു കാരണവശാലും അംഗീകരിക്കാൻ കഴിയില്ല. കുറ്റക്കാരായ മുഴുവൻ ആളുകളെയും നിയമത്തിന് മുന്നിൽ കൊണ്ടുവരും. ഇക്കാര്യത്തിൽ യാതൊരുവിധ വിട്ടുവീഴ്ചയ്ക്കും സർക്കാർ തയാറല്ലെന്നും മുഖ്യമന്ത്രി പറഞ്ഞു.
Kerala
തിരുവനന്തപുരം: പിഎസ്സി പരീക്ഷാ ക്രമക്കേട് കേസുമായി ബന്ധപ്പെട്ട് പിഎസ്സി ചെയർമാനെതിരെ സെക്രട്ടറി സാജു ജോർജ് ക്രൈംബ്രാഞ്ച് പ്രത്യേക അന്വേഷണ സംഘത്തിന് മൊഴി നൽകി. ആസൂത്രണ ബോർഡ് പരീക്ഷാ വിവാദത്തിൽ തനിക്ക് യാതൊരു പങ്കുമില്ലെന്നും ചെയർമാൻ ഏകപക്ഷീയമായാണ് തീരുമാനങ്ങൾ എടുത്തതെന്നുമാണ് സെക്രട്ടറി വ്യക്തമാക്കിയത്.
പിഎസ്സി ചെയർമാൻ എം.ആർ. ബൈജു സുപ്രധാന തീരുമാനങ്ങൾ എടുക്കുമ്പോൾ കൂട്ടായ ചർച്ചകൾ നടത്താറില്ലെന്നും സെക്രട്ടറിയെ പല കാര്യങ്ങളും അറിയിക്കാറില്ലെന്നും സാജു ജോർജ് മൊഴി നൽകി. കേസിലെ പ്രധാന പ്രതിയായ അഡീഷണൽ സെക്രട്ടറി ആർ. ഹരിയുമായി ചേർന്നാണ് ചെയർമാൻ തീരുമാനങ്ങളെല്ലാം കൈക്കൊണ്ടിരുന്നതെന്നും സെക്രട്ടറി ചൂണ്ടിക്കാണിച്ചു.
സെക്രട്ടറി അറിയാതെ പരീക്ഷകളുടെ തീയതി മാറ്റുന്നത് ഉൾപ്പെടെയുള്ള പല കാര്യങ്ങളും ചെയർമാന്റെ ഭാഗത്തുനിന്ന് ഉണ്ടായിട്ടുണ്ടെന്നാണ് അന്വേഷണ സംഘത്തിന് ലഭിച്ച വിവരം.
ഈ കേസിൽ പിഎസ്സി ചെയർമാൻ എം.ആർ. ബൈജുവിനെയും മറ്റ് ചില കമ്മീഷൻ അംഗങ്ങളെയും ക്രൈംബ്രാഞ്ച് പ്രതിപ്പട്ടികയിൽ ഉൾപ്പെടുത്തിയിട്ടുണ്ട്. ചെയർമാനെ കൂടാതെ മറ്റ് കമ്മീഷൻ അംഗങ്ങളും തങ്ങളെ ഉൾപ്പെടുത്താതെയാണ് ചെയർമാൻ പല തീരുമാനങ്ങളും എടുത്തതെന്ന് മൊഴി നൽകിയിട്ടുണ്ട്. കേസിലെ മറ്റ് പ്രതികളായ അഡീഷണൽ സെക്രട്ടറി ആർ. ഹരി, റിട്ട. ഡെപ്യൂട്ടി സെക്രട്ടറി പി. സതീഷ് എന്നിവരെ ക്രൈംബ്രാഞ്ച് ഇതിനോടകം അറസ്റ്റ് ചെയ്തിട്ടുണ്ട്.
Kerala
കൊച്ചി: സംസ്ഥാന പ്ലാനിംഗ് ബോര്ഡിലെ ചീഫ് തസ്തികയിലേക്കുള്ള നിയമന ക്രമക്കേടുമായി ബന്ധപ്പെട്ട കേസില് ഒരു പിഎസ്സി അംഗത്തെപ്പോലും പ്രതി ചേര്ക്കാത്ത സാഹചര്യത്തില് ക്രൈംബ്രാഞ്ച് അന്വേഷണത്തെ പിഎസ്സി എതിര്ക്കുന്നതെന്തിനെന്നു ഹൈക്കോടതി.
ക്രമക്കേട് കാട്ടിയിട്ടില്ലെങ്കില് അതു ബോധ്യപ്പെടുത്തിയാല് മതി. അന്വേഷണത്തെ ഭയപ്പെടുന്നതെന്തിനെന്നും ജസ്റ്റീസ് എ. ബദറുദ്ദീന് ചോദിച്ചു. അന്വേഷണം റദ്ദാക്കണമെന്നാവശ്യപ്പെട്ട് പിഎസ്സി നല്കിയ ഹര്ജി പരിഗണിക്കവേയാണു കോടതി ഇക്കാര്യം ആരാഞ്ഞത്.
ആസൂത്രണ ബോര്ഡിലെ ആദ്യ നിയമന നടപടികള് സംശയനിഴലിലാണെന്ന് കോടതി പറഞ്ഞു. പ്രമുഖ രാഷ്ട്രീയ പാര്ട്ടിയുമായി ബന്ധമുള്ളവരെയാണു പരിഗണിച്ചതെന്ന് ആക്ഷേപമുണ്ട്. ഹര്ജിക്കാരുടെ വിശദീകരണം അപ്പാടെ ദഹിക്കുന്നതല്ല. വിവരാവകാശ മറുപടി വൈകിച്ചത് വൃത്തികേടുകള് പുറത്തറിയാതിരിക്കാനാണെന്ന് കരുതേണ്ടിവരും. ഉദ്യോഗാര്ഥികളുടെ കഠിനാധ്വാനം വൃഥാവിലാകുന്ന വിധമായിരുന്നു നിയമന രീതികള്.
അഴിമതി നിരോധന നിയമത്തിലെ 17(എ) പ്രകാരം മുന്കൂര് അനുമതി വേണമോ, രജിസ്റ്റര് ചെയ്ത എഫ്ഐആര് നിലനില്ക്കുമോ എന്നീ കാര്യങ്ങളിലാണു തീര്പ്പുണ്ടാകേണ്ടതെന്നും കോടതി പറഞ്ഞു. ഹര്ജിക്കാരുടെയും എതിര്കക്ഷികളുടെയും വാദം പൂര്ത്തിയാക്കിയ കോടതി തുടര്ന്ന് ഹര്ജി വിധി പറയാന് മാറ്റി.
പരിരക്ഷ കവചമാക്കി പിഎസ്സി
പിഎസ്സി ഭരണസമിതിയംഗങ്ങള്ക്കു പ്രത്യേക പരിരക്ഷയുണ്ടെന്നും നിയമനാധികാരി ഗവര്ണറാണെങ്കിലും അംഗങ്ങളെ നീക്കാനുള്ള അധികാരം രാഷ്ട്രപതിക്കു മാത്രമാണുള്ളതെന്നുമായിരുന്നു പിഎസ്സിയുടെ വാദം. ഇതിന് സുപ്രീംകോടതി സമിതിയുടെ അനുമതിയും വേണം.
പ്ലാനിംഗ് ബോര്ഡ് നിയമനനടപടികളില് പിഴവു പറ്റിയതു ബോധപൂര്വമല്ല. കുറേ ചോദ്യങ്ങള് ബോധപൂര്വം മൂല്യനിര്ണയം നടത്താതിരുന്നതല്ല. പരീക്ഷയില് പങ്കെടുത്ത എല്ലാവരുടെയും അത്രയും ചോദ്യങ്ങള്ക്കുള്ള ഉത്തരം മൂല്യനിര്ണയം ചെയ്തിട്ടില്ല. തെറ്റ് പിഎസ്സിക്കു ബോധ്യമായതിനാല് തിരുത്തിയതായും ഹര്ജിക്കാര് ചൂണ്ടിക്കാട്ടി.
പിഎസ്സിയെ ചിലര് കുടുംബസ്വത്തുപോലെയാക്കിയെന്ന് സര്ക്കാരിനുവേണ്ടി ഹാജരായ ഡയറക്ടര് ജനറല് ഓഫ് പ്രോസിക്യൂഷന് കുറ്റപ്പെടുത്തി. ചില ചോദ്യങ്ങളുടെ മൂല്യനിര്ണയം ഒഴിവാക്കിയും മറ്റും നവീന രീതിയിലുള്ള തട്ടിപ്പാണു നടന്നത്.
180 പരാതികള് ലഭിച്ചു. മൂന്ന് കേസുകളെടുത്തു. രണ്ട് ഉന്നതര് അറസ്റ്റിലായി. മറ്റ് ഉദ്യോഗാര്ഥികള് സമര്പ്പിച്ച വിവരാവകാശ അപേക്ഷയില് പിഎസ്സി മറുപടി നല്കിയത് 300 ദിവസം കഴിഞ്ഞാണ്. കൈകള് ശുദ്ധമാണെങ്കില് അങ്കലാപ്പെന്തിനെന്നും ഡിജിപി ചോദിച്ചു.
Kerala
കൊച്ചി: ആസൂത്രണ ബോർഡ് മൂല്യനിർണയത്തിലുണ്ടായ വീഴ്ച സാങ്കേതികം മാത്രമാണെന്ന് കേരള പബ്ലിക് സർവീസ് കമ്മീഷൻ (പിഎസ്സി) ഹൈക്കോടതിയിൽ വ്യക്തമാക്കി. ഉദ്യോഗാർഥി പിഴവ് ചൂണ്ടിക്കാണിച്ച ഉടൻ തന്നെ അത് പരിഹരിക്കുകയും പുനർമൂല്യനിർണയം നടത്തി ഷോർട്ട് ലിസ്റ്റ് പുനഃപ്രസിദ്ധീകരിക്കുകയും ചെയ്തതായി പിഎസ്സി കോടതിയെ അറിയിച്ചു.
ഒരൊറ്റ പിഴവ് മാത്രമാണുണ്ടായതെന്ന് പിഎസ്സി ആവർത്തിച്ചപ്പോൾ, ആവർത്തിച്ചുള്ള പിഴവുകൾ കേൾക്കുന്നുണ്ടല്ലോ എന്ന് കോടതി പ്രതികരിച്ചു. റാങ്ക് ലിസ്റ്റിൽ ഉൾപ്പെട്ടവർ ഭരണകക്ഷിയുടെ ആളുകളാണെന്ന് ആരോപണമുണ്ടല്ലോയെന്നും കോടതി ചോദിച്ചു.
എന്നാൽ അത്തരം വാദങ്ങൾ തികച്ചും തെറ്റാണെന്നും മാധ്യമങ്ങളാണ് അത്തരം വാർത്തകൾ പ്രചരിപ്പിക്കുന്നതെന്നുമായിരുന്നു പിഎസ്സിയുടെ മറുപടി. മാധ്യമങ്ങളിൽ വരുന്നതല്ല യാഥാർഥ്യമെന്നും കോടതി അത് കണക്കിലെടുക്കരുതെന്നും പിഎസ്സി ആവശ്യപ്പെട്ടു.
ക്രൈംബ്രാഞ്ച് അന്വേഷണത്തിന് എതിരായ പിഎസ്സിയുടെ ഹർജി പരിഗണിക്കുകയായിരുന്നു ഹൈക്കോടതി.
Kerala
തിരുവനന്തപുരം: പിഎസ്സി പരീക്ഷാ തട്ടിപ്പില് മുന് പിഎസ്സി ചെയര്മാനും സിപിഎം നേതാവുമായ എം.കെ. സക്കീറിലേക്കും അന്വേഷണം നീളുന്നു.
കഴിഞ്ഞ നിയമസഭാ തെരഞ്ഞെടുപ്പില് പൊന്നാനിയിലെ എല്ഡിഎഫ് സ്ഥാനാര്ഥിയായിരുന്ന എം.കെ. സക്കീര് 2016 മുതല് 2022 വരെയായിരുന്നു പിഎസ്സിയുടെ ചെയര്മാനായിരുന്നത്.
നിലവില് അന്വേഷണം നടക്കുന്ന നാല് കേസുകളില് രണ്ടെണ്ണത്തില് പരീക്ഷ നടന്നത് എം.കെ. സക്കീര് ചെയര്മാനായിരുന്ന കാലത്താണ്.
ഫിഷറീസ് എകസ്റ്റന്ഷന് ഓഫീസര്, ഖാദി ബോര്ഡ് വില്ലേജ് ഓയില് ഇന്സ്പ്കെടര് എന്നീ തസ്തികകളിലേക്കുള്ള പരീക്ഷകളാണ് എം.കെ. സക്കീറിന്റെ കാലത്ത് നടന്നത്. സക്കീറിന് ഉടന് നോട്ടീസ് നല്കി ചോദ്യം ചെയ്യുന്നതിനാണ് പ്രത്യേക അന്വേഷണ സംഘം തയാറെടുക്കുന്നത്.
Kerala
തിരുവനന്തപുരം: പിഎസ്സി പരീക്ഷാ ക്രമക്കേടുമായി ബന്ധപ്പെട്ട് ഒളിവിൽ കഴിഞ്ഞിരുന്ന പിഎസ് സി അഡീഷണൽ സെക്രട്ടറി ആർ. ഹരിയെ പ്രത്യേക അന്വേഷണസംഘം അറസ്റ്റ് ചെയ്തു.
എറണാകുളത്ത് ഒളിവിൽ കഴിയവേയാണ് ഹരിയെ ഇന്നലെ പിടികൂടിയത്. പിഎസ്സി ചെയർമാന്റെ വലംകൈയായാണ് ആർ. ഹരി അറിയപ്പെട്ടിരുന്നത്. പിഎസ്സി പരീക്ഷത്ത ട്ടിപ്പുമായി ബന്ധപ്പെട്ടു നടക്കുന്ന രണ്ടാമത്തെ അറസ്റ്റാണിത്. നേരത്തേ മുൻ ഡെപ്യൂട്ടി സെക്രട്ടറി പി. സതീഷിനെ അറസ്റ്റ് ചെയ്തിരുന്നു.
പിഎസ്സി സെക്രട്ടറി സാജു ജോർജിനെ ഇന്നു പ്രത്യേക അന്വേഷണസംഘം ഇന്നു ചോദ്യം ചെയ്യും. ചോദ്യംചെയ്യാൻ ഹാജരാകാൻ നിർദേശിച്ച് കഴിഞ്ഞ ദിവസം നോട്ടീസ് നൽകിയിരുന്നു. പരീക്ഷാ കണ്ട്രോളറും തിങ്കളാഴ്ച ചോദ്യം ചെയ്യലിന് എത്തണമെന്നു നിർദേശിച്ചിരുന്നു.
പിഎസ്സി അംഗങ്ങളെയും അടുത്തയാഴ്ച കൂട്ടത്തോടെ ചോദ്യം ചെയ്യാനാണു തീരുമാനം. 12 കമ്മിഷനംഗങ്ങൾക്ക് തിങ്കളാഴ്ച മുതൽ ചോദ്യംചെയ്യലിന് ഹാജരാകാൻ നോട്ടീസ് നൽകി.
പരീക്ഷാ, നിയമന ക്രമക്കേടുകളിൽ ചെയർമാനും അംഗങ്ങൾക്കും പുറമെ സിപിഎം അനുഭാവികളായ ചില ഉദ്യോഗസ്ഥർക്കും പങ്കുണ്ടെന്ന് ക്രൈംബ്രാഞ്ച് കണ്ടെത്തിയതായാണ് വിവരം.
Kerala
തിരുവനന്തപുരം: പിഎസ്സി പരീക്ഷാ തട്ടിപ്പിൽ ഒളിവിലായിരുന്ന അഡീഷനൽ സെക്രട്ടറി ആർ. ഹരി അറസ്റ്റിൽ. കോയമ്പത്തൂരിലെ ഈശാ യോഗ കേന്ദ്രത്തിൽ ഒളിവിലായിരുന്ന ഹരി എറണാകുളത്തെ ബന്ധുവീട്ടിൽ എത്തിയതിന് പിന്നാലെയാണ് അറസ്റ്റ് ചെയ്തത്.
ക്രമക്കേട് നടന്ന ആസൂത്രണ ബോർഡ് പരീക്ഷയുടെ മൂല്യനിർണയ ചുമതലയായിരുന്നു ഹരിക്ക്. ഹരിക്കൊപ്പം മൂല്യനിർണയ ചുമതലയുണ്ടായിരുന്ന ഡെപ്യൂട്ടി സെക്രട്ടറിയായിരുന്ന പി. സതീഷിനെ കഴിഞ്ഞ ദിവസമാണ് അറസ്റ്റ് ചെയ്തത്.
പ്രതി ചേർത്തതിന് പിന്നാലെ ഹരിയെ സസ്പെൻഡ് ചെയ്തിരുന്നു. ചെയർമാനും ഹരിയും ചേർന്നാണ് കൂടിയാലോചന ഇല്ലാതെ എല്ലാ തീരുമാനങ്ങളെടുക്കുന്നുവെന്ന് കഴിഞ്ഞ ദിവസം കമ്മീഷനിലെ ചില അംഗങ്ങൾ ക്രൈം ബ്രാഞ്ചിന് മൊഴി നൽകിയിരുന്നു.
Kerala
തിരുവനന്തപുരം: സംസ്ഥാനത്തു നടന്ന പിഎസ്സി ക്രമക്കേടുകൾ സംബന്ധിച്ച വിവരങ്ങൾ ഗവർണർ ഓംപ്രകാശ് മാഥുറിനെ ധരിപ്പിച്ചു ബിജെപി പ്രതിനിധിസംഘം.
ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിന്റെ നേതൃത്വത്തിലുള്ള സംഘമാണു ഇന്നലെ ഗവർണറെ കണ്ടത്.
പിഎസ്സി തൊഴിൽ തട്ടിപ്പിന്റെ ഗൗരവം ഗവർണറെ ബോധ്യപ്പെടുത്തിയതായും നിയമ സംവിധാനത്തിലൂടെ യുവജനങ്ങൾക്കു നീതി ഉറപ്പാക്കാൻ ശക്തമായ തുടർനടപടികൾ സ്വീകരിക്കണമെന്ന് അഭ്യർഥിച്ചതായും കൂടിക്കാഴ്ചയ്ക്കുശേഷം രാജീവ് ചന്ദ്രശേഖർ പറഞ്ഞു.
Kerala
തിരുവനന്തപുരം: പിഎസ്സി നിയമനത്തട്ടിപ്പ് കേസിൽ പിഎസ്സി ചെയർമാൻ എം.ആർ. ബൈജു ഇന്ന് എസ്ഐടിക്ക് മുന്നിൽ ചോദ്യംചെയ്യലിന് ഹാജരായേക്കും. ഉച്ചയ്ക്ക് രണ്ടിന് ക്രൈംബ്രാഞ്ച് ആസ്ഥാനത്ത് ഹാജരാകാനാണ് നോട്ടീസ് നൽകിയിരിക്കുന്നത്.
ചോദ്യം ചെയ്യണമെങ്കില് അന്വേഷണസംഘം പിഎസ്സി ആസ്ഥാനത്ത് വരണമെന്നായിരുന്നു നേരത്തെയുള്ള പിഎസ്സി ചെയർമാന്റെയും അംഗങ്ങളുടെയും നിലപാട്. ഒച്ചിഴയുന്ന വേഗതയിലുള്ള അന്വേഷണത്തിനെതിരെ ഹൈക്കോടതി രൂക്ഷ വിമർശനം ഉന്നയിച്ചതോടെയാണ് അന്വേഷണ സംഘം നടപടി എടുത്തത്.
ആസൂത്രണ ബോർഡ് നിയമനത്തട്ടിപ്പിൽ നോട്ടീസ് നൽകി നാല് അംഗങ്ങളിൽ മൂന്ന് പേരെയും ചോദ്യം ചെയ്തിരുന്നു. അതേസമയം, എം.ആർ. ബൈജുവിനെ സംശയ നിഴലിൽ നിർത്തും വിധത്തിൽ കഴിഞ്ഞ ദിവസം കമ്മീഷനിലെ ഒരംഗം എസ്ഐടിക്ക് മൊഴി നൽകിയതായി സൂചനയുണ്ട്. ചെയർമാനെതിരെ മുഖ്യമന്ത്രിക്ക് നേരത്തെ കത്ത് നൽകിയ അംഗമാണിതെന്നാണ് വിവരം.
Kerala
കൊച്ചി: ക്രൈംബ്രാഞ്ച് അന്വേഷണത്തിനെതിരായ പിഎസ്സിയുടെ ഹര്ജി നവംബര് രണ്ടിന് പരിഗണിക്കാനായി ഹൈക്കോടതി മാറ്റി. ഹര്ജി പരിഗണിക്കവെ സര്ക്കാറിനും പിഎസ്സിക്കുമെതിരെ ജസ്റ്റിസ് എ. ബദറുദീന് വിമര്ശനം ആവര്ത്തിച്ചു. എത്ര സൂത്രം കാണിച്ചാലും സത്യം പുറത്തു വരുമെന്ന് കോടതി വ്യക്തമാക്കി.
മമ്മൂട്ടി ചിത്രം ഒരു സിബിഐ ഡയറിക്കുറിപ്പ് സിനിമയിലെ കഥാപാത്രങ്ങളെയടക്കം ഓര്മപ്പെടുത്തിയായിരുന്നു കോടതിയുടെ വിമര്ശനം.
കേസില് പിഎസ്സി രണ്ട് ഉദ്യോഗസ്ഥരെ സസ്പെന്ഡ് ചെയ്തുവെന്നും അന്വേഷണം ഊര്ജിതമായി മുന്നോട്ട് പോവുകയാണെന്നും സര്ക്കാരിന് വേണ്ടി ഹാജരായ ഡയറക്ടര് ജനറല് ഓഫ് പ്രോസിക്യൂഷന് ടി. ആസിഫ് അലി കോടതിയെ അറിയിച്ചു.
പിഎസ്സി നടപടി ആരംഭിക്കുകയും രണ്ട് ഉദ്യോഗസ്ഥരെ സസ്പെന്ഡ് ചെയ്യുകയും ചെയ്ത സാഹചര്യത്തില് എഫ്ഐആര് റദ്ദാക്കണമെന്ന ആവശ്യം നിയമപരമായി നിലനില്ക്കില്ലെന്നും അദ്ദേഹം കോടതിയെ അറിയിച്ചു. ഈ സാഹചര്യത്തില് ആയിരുന്നു ജസ്റ്റിസ് എ. ബദറുദീന്റെ വിമര്ശനം.
സിബിഐ ഡയറിക്കുറിപ്പ് സിനിമയിലെ മമ്മൂട്ടിയും തിലകനും തമ്മിലുള്ള സംഭാഷണം പരാമര്ശിച്ചായിരുന്നു വിമര്ശനം. കൂടാതെ മങ്ങാട്ടച്ഛനും കുഞ്ഞാലി മരയ്ക്കാരും തമ്മിലുള്ള കഥയും കോടതി പരാമര്ശിച്ചു. പിഎസ്സിക്കെതിരെ ആദ്യം കോടതിയെ സമീപിച്ച ഉദ്യോഗാര്ഥി ജയലാലിന് ഒബ്ജെക്ഷന് ഫയല് ചെയ്യാനുള്ള സമയം നല്കിയാണ് ഹര്ജി നവംബര് രണ്ടിന് പരിഗണിക്കാനായി മാറ്റിയത്.
Kerala
തിരുവനന്തപുരം: പിഎസ്സി പരീക്ഷാ ക്രമക്കേടിൽ വില്ലേജ് ഓഫീസ് ഇൻസ്പെക്ടർ, ഫിഷറീസ് എക്സ്റ്റൻഷൻ ഓഫീസർ നിയമനങ്ങളുമായി ബന്ധപ്പെട്ട് ക്രൈംബ്രാഞ്ച് രണ്ട് എഫ്ഐആർ കൂടി രജിസ്റ്റർ ചെയ്തു. എന്നാൽ ഈ കേസുകളിൽ നിലവിൽ ആരെയും പ്രതിയാക്കിയിട്ടില്ല.
ഫിഷറീസ് എക്സ്റ്റൻഷൻ ഓഫീസർ പരീക്ഷയുടെ റാങ്ക് ലിസ്റ്റിൽ ആദ്യ നൂറിനുള്ളിൽ ഉൾപ്പെട്ടവരെല്ലാം ഫിഷറീസ് സർവകലാശാലയിലെ വിദ്യാർഥികളാണ്. ചോദ്യപേപ്പർ തയാറാക്കിയതും ഇന്റർവ്യൂ ബോർഡിൽ ഉണ്ടായിരുന്നതും ഇതേ സർവകലാശാലയിലെ അധ്യാപകരാണെന്നും, എസ്എഫ്ഐ പ്രവർത്തകർക്കും യൂണിയൻ നേതാക്കൾക്കുമായി ക്രമക്കേട് നടത്തിയെന്നുമാണ് മറ്റ് ഉദ്യോഗാർഥികളുടെ പ്രധാന ആരോപണം.
അതേസമയം, കേസുമായി ബന്ധപ്പെട്ട് രണ്ട് പിഎസ്സി അംഗങ്ങളെ ഇന്ന് ക്രൈംബ്രാഞ്ച് ചോദ്യം ചെയ്യും. ചോദ്യംചെയ്യൽ നടപടികൾ വീഡിയോയിൽ റിക്കാർഡ് ചെയ്യും.
Kerala
മുതിർന്ന പൗരൻമാരുടെ പരിചരണവും അവകാശസംരക്ഷണവും എന്ന ബില്ലിലൂടെ നിയമസഭ ചരിത്ര ചുവടുവയ്പാണ് നടത്തിയത്. ഏറെ വൈകിയ ചർച്ചയ്ക്കും ഭേദഗതിക്കുമൊടുവിൽ ബിൽ സഭ പാസാക്കി.
മദ്രാസ് ഹിന്ദു മതധർമ ഭേദഗതി ബില്ലും ഉൾപ്പടെ മൂന്നു ബില്ലുകളാണ് സഭ ഇന്നലെ പാസാക്കിയത്. സൈലന്റ് സിൻഡിക്കറ്റ് ആശുപത്രികളിൽ പ്രവർത്തിക്കുന്നുവെ അന്താരാഷ്ട്ര കന്പനികൾ ആരോഗ്യമേഖലയെ പിടിമുറുക്കുന്നതിനു സർക്കാർ അനുവദിക്കുന്നുവെന്നുമാരോപിച്ച് പ്രതിപക്ഷം കൊണ്ടുവന്ന അടിയന്തരപ്രമേയം ഇരുവിഭാഗവും തമ്മിലുള്ള വാഗ്വാദത്തിനും ഇറങ്ങിപ്പോക്കിനും കാരണമായി.
ഹൈസ്കൂൾ വിദ്യാർഥികളുടെ ബാഗുകളുടെ അമിതഭാരം മൂലമുള്ള പ്രയാസങ്ങൾ പരിഹരിക്കുന്നതു സംബന്ധിച്ചു തൃശൂർ എറിയാട് ജികെവിഎച്ച്എസ്എസ് സ്കൂൾ ലീഡർ മുംതസീറിന്റെ ഹർജി, കെ.കെ. വത്സരാജ് സഭയിൽ അവതരിപ്പിച്ചതിലൂടെ സഭ മറ്റൊരു ശ്രദ്ധേയമായ സംഭവത്തിനു സാക്ഷ്യംവഹിച്ചു. പിഎസ്സി വിഷയത്തിലൂടെ ഗവർണർക്കെതിരേ സബ്മിഷനിലൂടെ രംഗത്തുവരാനുള്ള പിണറായി വിജയന്റെ ശ്രമത്തെ റൂളിംഗ് നടത്തിയാണ് സ്പീക്കർ തടഞ്ഞത്. എന്റെ റൂളിംഗിനെക്കുറിച്ച് സീനിയർ നേതാവായ അങ്ങേക്കു മനസിലായിട്ടുണ്ടെന്ന് എനിക്കറിയാമെന്നായിരുന്നു പിണറായിയോട് സ്പീക്കറുടെ പ്രതികരണം. അങ്ങയെ ധിക്കരിക്കാനില്ലെന്ന് പിണറായി പറഞ്ഞതോടെ സബ്മിഷൻ അവതരണം അവിടെ അവസാനിച്ചു.
സഭയ്ക്കുള്ളിലെ നോട്ടമായിരുന്നു മുഖ്യമന്ത്രിയും പ്രതിപക്ഷനേതാവും തമ്മിൽ കോർത്ത മറ്റൊരു വിഷയം. അടിയന്തര പ്രമേയത്തിന്റെ ചൂടേറിയ ചർച്ചാസമയത്താണ് പ്രതിപക്ഷനേതാവ് പിണറായി വിജയൻ മുഖ്യമന്ത്രിക്കെതിരേ പരിഹാസ അസ്ത്രം തൊടുത്തുവിട്ടത്. ഇതു വാദപ്രതിവാദങ്ങളിലേക്കും ചൂടേറിയ ചർച്ചയിലേക്കും സഭയെ നയിച്ചു. സഭയിൽ ഇനി മുതൽ താൻ പ്രതിപക്ഷ നിരയിലേക്കു നോക്കി സംസാരിക്കാമെന്നു പ്രതിപക്ഷ നേതാവ് പരിഹാസത്തോടെ പറഞ്ഞു. മുഖ്യമന്ത്രി സംസാരിക്കുന്പോൾ ഭരണപക്ഷത്തെ നോക്കി സംസാരിക്കുന്നതിനെ കൊള്ളിച്ചായിരുന്നു പ്രതിപക്ഷനേതാവിന്റെ ഒളിയന്പ്.
ഓരോ വ്യക്തികൾക്കും വ്യത്യസ്തമായ ശൈലികൾ ഉണ്ടാകുമെന്നും എന്റെ ശൈലിയെ പരിഹസിക്കേണ്ടതില്ല; പ്രതിപക്ഷ നേതാവിന്റെ ശൈലി അനുകരിക്കാൻ താനില്ലെന്നുമായിരുന്നു മുഖ്യമന്ത്രി വി.ഡി.സതീശന്റെ മറുപടി.
നിയമസഭയിൽ സ്പീക്കറെയാണ് നോക്കി സംസാരിക്കേണ്ടതെന്നും അല്ലാതെ ഭരണപക്ഷത്തെ ആളുകളെ നോക്കി കറങ്ങിയല്ല സംസാരിക്കണ്ടതെന്നുമായിരുന്നു പിണറായിയുടെ മറുപടി. ഏതായാലും എനിക്കു ഭരണപക്ഷത്തിനുനേരേ നോക്കുന്നതിന് അഭിമാനമുണ്ടെന്നും ഒന്നുവല്ലെങ്കിലും 102 പേരുണ്ടല്ലോയെന്നും പ്രതിപക്ഷനേതാവിനു പ്രതിപക്ഷനിരയിലേക്കു നോക്കാൻ ബുദ്ധിമുട്ട് ഉണ്ടാകുമെന്നും മുഖ്യമന്ത്രി തിരിച്ചടിച്ചു. എന്നാൽ നിയമസഭ നടപടിക്രമം അനുസരിച്ചു സ്പീക്കറെ നോക്കി സംസാരിക്കുന്നതാണ് രീതിയെന്നാണ് പിണറായിവിജയൻ വീണ്ടും ആവർത്തിച്ചത്.
എന്നാൽ സംഭവം ചൂടേറിയ ചർച്ചയിലേക്കു വെറുതെ പോകുന്നതുകണ്ടു സ്പീക്കർ ഇടപെട്ടു. ഇരുകൂട്ടർക്കും ബുദ്ധിമുട്ട് ഉണ്ടാകാതെയിരിക്കാൻ ഭരണപക്ഷവും പ്രതിപക്ഷവും സ്പീക്കറെ നോക്കി സംസാരിച്ചുകൊള്ളൂവെന്ന് സംഭവത്തിൽ ഇടപെട്ട് തിരുവഞ്ചൂർ രാധാകൃഷ്ണൻ പറഞ്ഞുവെങ്കിലും സ്പീക്കറെ അഭിസംബോധന ചെയ്താൽമതിയെന്നും മുഴുവൻ സമയവും നോക്കേണ്ടതില്ലെന്നുമാണ് മുഖ്യമന്ത്രി പറഞ്ഞത്. സ്പീക്കറെ മുഖ്യമന്ത്രി തിരുത്തിയിരിക്കുകയാണെന്നാണ് പ്രതിപക്ഷനേതാവ് പറഞ്ഞെങ്കിലും താൻ തർക്കവിഷയത്തിലേക്കൊന്നും പോകുന്നില്ലെന്നു പറഞ്ഞ സ്പീക്കർ വിഷയം അവസാനിപ്പിച്ചു.
ഔഷധിയിലെ മുൻചെയർപേഴ്സന്റെ അനധികൃത സൗന്ദര്യചികിത്സയെ കുറിച്ചുള്ള വി.ജി. സജീന്ദ്രന്റെ ചോദ്യം സഭയ്ക്കുള്ളിൽ ചിരിപടർത്തി. 300 കോഴിമുട്ട പുഴുങ്ങി തിന്നുകയും മൂന്നു കിലോ ചെന്പരത്തിമൊട്ട് ചെവിയിൽ വയ്ക്കുകയും നെല്ലിക്കയ്ക്ക് പകരം നാരങ്ങാനീരുകൊണ്ടു തളം വയ്ക്കുകയും ചെയ്താൽ സൗന്ദര്യം വർധിക്കുമോ എന്നായിരുന്നു സജീന്ദ്രന്റെ ചോദ്യം. ചോദ്യം ആരോഗ്യമന്ത്രിയോടായിരുന്നു. ഔഷധി ലാഭത്തിൽ പോകുന്ന പൊതുമേഖല സ്ഥാപനമാണെന്നും അവിടെ സൗന്ദര്യചികിത്സയ്ക്കല്ല, പകരം ജനങ്ങളുടെ ആരോഗ്യത്തിനാണ് പ്രധാന്യമെന്നുമായിരുന്നു മന്ത്രി മുരളീധരന്റെ മറുപടി.
17കാരൻ ഓടിച്ച കാർ ഇടിച്ചു തട്ടുകട നടത്തുന്ന മധ്യവയസ്ക്കൻ മരിച്ച സംഭവവും പ്രതിപക്ഷനേതാവ് ഉന്നയിച്ചു. ഈ സംഭവത്തിൽ തുടക്കത്തിൽ പൊലിസിനു വീഴ്ച സംഭവിച്ചുവെന്ന് അഭ്യന്തരമന്ത്രി രമേശ് ചെന്നിത്തല സമ്മതിച്ചു. നീതി എല്ലാവർക്കും തുല്യമാണെന്നും ഒരു കാരണവശാലും കുറ്റവാളി രക്ഷപ്പെടില്ലെന്നും ആഭ്യന്തരമന്ത്രി സഭയെ അറിയിച്ചതോടെ പ്രതിപക്ഷവും അഭ്യന്തരവകുപ്പിനെ വിശ്വസിച്ചു.
Kerala
തിരുവനന്തപുരം: സംസ്ഥാനത്തെ പിഎസ്സി പരീക്ഷാ ക്രമക്കേടുകളുമായി ബന്ധപ്പെട്ട് മൂന്ന് പുതിയ കേസുകൾ കൂടി ഇന്ന് രജിസ്റ്റർ ചെയ്യും. അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ, വില്ലേജ് ഓയിൽ ഇൻസ്പെക്ടർ, ഫിഷറീസ് എക്സ്റ്റൻഷൻ ഓഫീസർ എന്നീ തസ്തികകളിലേക്ക് നടത്തിയ പരീക്ഷകളിലാണ് വൻ ക്രമക്കേടുകൾ കണ്ടെത്തിയിരിക്കുന്നത്.
അതേസമയം, പരീക്ഷാ ക്രമക്കേടിൽ ഹൈക്കോടതി കടുപ്പിച്ചതോടെ കേസ് അന്വേഷിക്കുന്ന ക്രൈംബ്രാഞ്ചിന് മുന്നിൽ ഹാജരാകാനും സഹകരിക്കാനും പിഎസ്സി അംഗങ്ങൾ തയാറായേക്കുമെന്നാണ് വിവരം.
Kerala
തിരുവനന്തപുരം: കേരള പബ്ലിക് സർവീസ് കമ്മീഷൻ (പിഎസ്സി) ചെയർമാനെതിരെയുള്ള ഗവർണറുടെ നടപടിയിൽ പ്രതികരണവുമായി മന്ത്രി കെ. മുരളീധരൻ രംഗത്ത്. പിഎസ്സിയുടെ ഭാഗത്ത് വ്യക്തമായ ക്രമക്കേടുകൾ നടന്നിട്ടുണ്ടെന്നും, അതുകൊണ്ടാണ് സംസ്ഥാന സർക്കാർ തന്നെ അന്വേഷണത്തിന് ഉത്തരവിട്ടതെന്നും അദ്ദേഹം വ്യക്തമാക്കി.
സർക്കാർ പ്രഖ്യാപിച്ച അന്വേഷണത്തോട് സഹകരിക്കാത്ത നിലപാടാണ് പിഎസ്സിയുടെ ഭാഗത്തുനിന്നും ഉണ്ടായത്. ഈ പശ്ചാത്തലത്തിലായിരിക്കാം ഗവർണർ അത്തരമൊരു കർശന നടപടിയിലേക്ക് കടന്നത്. പിഎസ്സി ഒരു സ്വതന്ത്ര സ്ഥാപനമാണെങ്കിലും, അത് പ്രവർത്തിക്കേണ്ട ലക്ഷ്യങ്ങളിൽ നിന്നും പൂർണമായി വ്യതിചലിച്ച സാഹചര്യത്തിലാണ് സർക്കാർ ഇതിൽ ഇടപെടേണ്ടി വന്നതെന്നും മുരളീധരൻ പറഞ്ഞു.
അഴിമതിയുടെ സ്ഥാപനമായി പിഎസ്സി മാറി. എൽഡിഎഫ് ഉയർത്തുന്നത് വെറും രാഷ്ട്രീയ ആരോപണങ്ങൾ മാത്രമാണ്. പിഎസ്സിയെ ഇത്രയധികം വഷളാക്കിയ മറ്റൊരു കാലഘട്ടം കേരളത്തിന്റെ ചരിത്രത്തിൽ വേറെയുണ്ടായിട്ടില്ല.
നിലവിലുള്ള പിഎസ്സി ബോർഡ് ഉടൻ തന്നെ മാറണമെന്ന കാര്യത്തിൽ ആർക്കും യാതൊരു സംശയവുമില്ല. പിഎസ്സി അംഗങ്ങളുടെ നിയമന രീതികളുൾപ്പെടെയുള്ള കാര്യങ്ങൾ ഇനി ഗൗരവമായി ആലോചിക്കേണ്ടതുണ്ടെന്നും മന്ത്രി കൂട്ടിച്ചേർത്തു.
Kerala
തിരുവനന്തപുരം: കേരള പബ്ലിക് സർവീസ് കമ്മീഷൻ ചെയർമാനെയും അംഗങ്ങളെയും പുറത്താക്കണമെന്ന ഗവർണറുടെ ശിപാർശക്കെതിരെ നിയമോപദേശം തേടാൻ ചെയർമാൻ തീരുമാനിച്ചു. ഗവർണർ പ്രവർത്തിക്കേണ്ടത് ഭരണഘടനയ്ക്ക് വിധേയമായിട്ടാണെന്ന് ചൂണ്ടിക്കാണിച്ചാണ് ചെയർമാന്റെ ഈ നീക്കം.
സംസ്ഥാന പിഎസ്സി ചെയർമാനെയും 15 അംഗങ്ങളെയും പുറത്താക്കണമെന്ന് ആവശ്യപ്പെട്ട് ഗവർണർ രാഷ്ട്രപതിക്ക് റിപ്പോർട്ട് സമർപ്പിച്ചിരുന്നു. ആസൂത്രണ ബോർഡ് നിയമനം ഉൾപ്പെടെയുള്ള വിവിധ നിയമനങ്ങളിലെ ക്രമക്കേടുകൾ ആരോചിച്ചാണ് ഗവർണറുടെ ഈ അസാധാരണ നടപടി.
സ്ഥാനമൊഴിയുന്നതിന് തൊട്ടുമുമ്പുള്ള ആഴ്ചയിലാണ് രാജേന്ദ്ര ആർലേക്കർ രാഷ്ട്രപതിക്ക് ശിപാർശ നൽകിയത്. കേരളത്തിന്റെ ചരിത്രത്തിൽ ഇത്തരമൊരു സംഭവം ആദ്യമായാണ് ഉണ്ടാകുന്നത്.
Kerala
തിരുവനന്തപുരം: പിഎസ്സി ചെയർമാനെയും അംഗങ്ങളെയും പിരിച്ചുവിടാനുള്ള ഗവർണറുടെ ശിപാർശക്കെതിരെ പ്രതിപക്ഷ നേതാവ് പിണറായി വിജയൻ. ഗവര്ണറുടെ നടപടി നിയമവിരുദ്ധവും ഭരണഘടനാ വ്യവസ്ഥകളുടെ ലംഘനവും കടുത്ത അധികാര ദുര്വിനിയോഗവുമാണെന്നും അദ്ദേഹം കുറ്റപ്പെടുത്തി.
പോകുന്ന പോക്കിൽ ഒരു നിയമ വിരുദ്ധ നീക്കം കൂടി നടത്തിയിരിക്കുകയാണ്. ഗവർണർ പ്രവർത്തിക്കേണ്ടത് ഭരണഘടനാ പ്രകാരമാണ്. സുപ്രീംകോടതി അന്വേഷണം നടത്തിയ ശേഷമേ രാഷ്ട്രപതിക്ക് ഇടപെടാൻ വ്യവസ്ഥയുള്ളു. രാഷ്ട്രീയ വിരോധം വച്ച് പിഎസ്എസിയെ തകർക്കാനാണ് നീക്കമെന്നും പിണറായി ഫേസ്ബുക്ക് കുറിപ്പിൽ ആരോപിച്ചു.
പിണറായി വിജയന്റെ ഫേസ്ബുക്ക് കുറിപ്പിന്റെ പൂർണരൂപം:
കേരളത്തിലെ പിഎസ്സി ചെയര്മാനെ നീക്കണമെന്നും കമ്മീഷനെ തന്നെ പിരിച്ചുവിടണമെന്നും ആവശ്യപ്പെട്ട് രാഷ്ട്രപതിക്ക് കേരള ഗവര്ണര് ശിപാര്ശ നല്കിയതായി വാര്ത്ത വന്നിരിക്കുകയാണ്. ഗവര്ണറുടെ നടപടി നിയമവിരുദ്ധവും ഭരണഘടനാ വ്യവസ്ഥകളുടെ ലംഘനവും കടുത്ത അധികാര ദുര്വിനിയോഗവുമാണ്.
ഇന്ത്യന് ഭരണഘടനയുടെ ആര്ട്ടിക്കിള് 316 പ്രകാരമാണ് പബ്ലിക് സര്വ്വീസ് കമ്മീഷനെ നിയമിക്കുന്നത്. അങ്ങിനെ നിയമിക്കപ്പെടുന്ന അംഗങ്ങള്ക്ക് ആറു വര്ഷത്തെ കാലാവധിയാണ് ആര്ട്ടിക്കിള് 316 (2) പ്രകാരം നിശ്ചയിച്ചിട്ടുള്ളത്. ഈ കാലാവധിക്കകം ഒരംഗത്തെ നീക്കം ചെയ്യണമെങ്കില് ആര്ട്ടിക്കിള് 317 പ്രകാരമുള്ള നടപടിക്രമങ്ങള് പാലിക്കേണ്ടതുണ്ട്.
ഒരംഗത്തിന്റെ ഭാഗത്തുനിന്ന് ഉണ്ടാകുന്ന പ്രവൃത്തി ദോഷം സംബന്ധിച്ച പരാതിയിന്മേല് സുപ്രീം കോടതി ഒരു അന്വേഷണ വിചാരണ നടത്തി ചെയര്മാനേയും അംഗങ്ങളെയും നീക്കം ചെയ്യേണ്ടതാണെന്ന് റിപ്പോര്ട്ട് ചെയ്തതിന് ശേഷം മാത്രമേ, രാഷ്ട്രപതിക്ക് ഇക്കാര്യത്തില് തീരുമാനമെടുക്കാന് കഴിയുകയുള്ളൂ.
അത്തരത്തിലൊരു അന്വേഷണ വിചാരണയും കേരളത്തിലെ പിഎസ്സി അംഗങ്ങള്ക്കെതിരായി സുപ്രീംകോടതിയില് നടന്നിട്ടില്ല. അതുകൊണ്ടുതന്നെ ഗവര്ണര്ക്ക് ഇത്തരത്തിലൊരു ഒരു ശിപാര്ശ നടത്താന് ഭരണഘടനാപരമായി യാതൊരു അധികാരവുമില്ല. സ്ഥാനം ഒഴിഞ്ഞ ഗവര്ണര് പോകുന്ന പോക്കില് സംസ്ഥാനത്ത് ഇതുവരെ നടത്തിയ നിയമവിരുദ്ധ ഇടപെടലുകളുടെ തുടര്ച്ചയായി ഇത്തരത്തിലൊരു ശിപാര്ശ നടത്തിയതായാണ് മനസിലാക്കുന്നത്.
ഗവര്ണർ മന്ത്രിസഭയുടെ ഉപദേശ നിര്ദേശങ്ങള്ക്കനുസരിച്ച് മാത്രമേ ഏതു പ്രവൃത്തിയും നടത്താനാകൂ എന്ന് ആര്ട്ടിക്കിള് 163 അസന്നിഗ്ധമായി വ്യക്തമാക്കുന്നുണ്ട്. ഗവര്ണര്ക്ക് ഇക്കാര്യത്തില് ഒരുവിധ സ്വതന്ത്രമായ അധികാരവും ഇല്ലെന്നർഥം.
മന്ത്രിസഭയ്ക്കാവട്ടെ ആര്ട്ടിക്കിള് 317 പ്രകാരം സുപ്രീംകോടതിയുടെ അന്വേഷണ വിചാരണയുടെ റിപ്പോര്ട്ടിന്റെ അടിസ്ഥാനത്തിലല്ലാതെ തീരുമാനവും എടുക്കാന് കഴിയില്ല. അതായത് പൂര്ണമായും ഭരണഘടനാവിരുദ്ധവും നിയമവിരുദ്ധവുമായ നടപടിയാണ് ഗവര്ണര് ചെയ്തുവച്ചിട്ടുള്ളത്.
പിഎസ്സി ഒരു തുടര്ച്ചയാണ്. സര്ക്കാരുകള് മാറി വരുമ്പോള് നിലവിലുള്ള പിഎസ്സി അംഗങ്ങളെയും ചെയര്മാനെയും പുറത്താക്കുന്ന പതിവില്ല. അവരുടെ കാലാവധി പൂര്ത്തീകരിക്കുന്ന മുറയ്ക്ക് പുതിയ അംഗങ്ങളെ നിയമിക്കുക മാത്രമാണ് ചെയ്തുവരുന്നത്.
രാഷ്ട്രീയ വൈരനിര്യാതന ബുദ്ധിയുടെ അടിസ്ഥാനത്തില് പിഎസ്സിയെ സമീപിച്ച ചരിത്രം കേരളത്തിലില്ല. അതുകൊണ്ട് തന്നെ സംസ്ഥാന സര്ക്കാര്, ഗവര്ണറുടെ ഈ നിയമവിരുദ്ധ നടപടിയില് നിലപാട് വ്യക്തമാക്കണം. ഗവര്ണര്മാര് ഭരണഘടനാവിരുദ്ധമായി സ്വീകരിക്കുന്ന ഇത്തരം നിലപാടുകളെ യുഡിഎഫ് സര്ക്കാര് പിന്തുണയ്ക്കുന്നുണ്ടോ?
സംസ്ഥാന സര്ക്കാരിന്റെ ഫെഡറല് അധികാരങ്ങളില് യൂണിയന് സര്ക്കാരിന്റെ ഏജന്റായി നിരന്തരം ഗവര്ണര്മാരെ ഉപയോഗിക്കുന്ന രീതിയാണ് ബിജെപി സ്വീകരിക്കുന്നത്. അതിന്റെ കൂടി ഭാഗമായാണ് ഇതിനെ കാണേണ്ടത്. ഇപ്പോള് രാഷ്ട്രീയ പക്ഷപാതിത്വത്തോടെയും മുന്വിധിയോടെയും നിലവിലുള്ള പിഎസ്സിയെ പിരിച്ചുവിടാന് ഗവര്ണറുടെ ഈ നിയമവിരുദ്ധ പ്രവൃത്തി മറയാക്കി സര്ക്കാര് അനുകൂല സമീപനം സ്വീകരിക്കാന് ഉദ്ദേശിക്കുന്നുണ്ടോ?
അതോ ഗവര്ണറുടെ നിലപാടിനെ അപലപിക്കാന് തയാറുണ്ടോ? അതല്ല, ഗവര്ണര്മാരുടെ നിയമവിരുദ്ധ പ്രവര്ത്തനങ്ങള്ക്ക് പ്രത്യക്ഷമായോ പരോക്ഷമായോ പിന്തുണ നല്കാനാണ് സര്ക്കാര് ഉദ്ദേശിക്കുന്നതെങ്കില് സര്ക്കാര് വലിയ വില കൊടുക്കേണ്ടിവരും. അമിതാധികാര പ്രവണതകൾക്ക് വഴിയൊരുക്കലാകും അത്.
പ്രശംസനീയമായ രീതിയില് സര്ക്കാര് നിയമനങ്ങള് ഏറ്റെടുത്ത് പൂര്ത്തീകരിക്കുന്ന സ്ഥാപനമാണ് കേരളത്തിലെ പിഎസ്സി. ലക്ഷക്കണക്കിന് ഉദ്യോഗാര്ത്ഥികള്ക്ക് കഴിഞ്ഞ പത്തുവര്ഷം നിയമനം നല്കാന് പിഎസ്സിക്ക് കഴിഞ്ഞിട്ടുണ്ട്. ഏതെങ്കിലും ഒരു നിയമനത്തില് ക്രമക്കേട് ആരോപിച്ച് ഒരു സംവിധാനത്തിന്റെ മുഴുവന് വിശ്വാസ്യതയും തകര്ക്കാനുള്ള സംഘടിത ശ്രമവും ഗൂഢാലോചനയുമാണ് ഇപ്പോള് നടക്കുന്നത്. ഇതിനെ നാം ഒറ്റക്കെട്ടായി ചെറുക്കേണ്ടതാണ്.
Kerala
തിരുവനന്തപുരം: പിഎസ്സി പരീക്ഷാ ക്രമക്കേടിൽ രണ്ട് ഉദ്യോഗസ്ഥരെ പ്രതി ചേർക്കാൻ ക്രൈംബ്രാഞ്ച് നീക്കം. ചോദ്യം ചെയ്യാനായി രണ്ട് പിഎസ്സി അംഗങ്ങൾക്ക് വീണ്ടും നോട്ടിസ് നൽകാനാണ് തീരുമാനം.
ആസൂത്രണ ബോർഡ് പരീക്ഷ ക്രമക്കേടിലെ ക്രൈംബ്രാഞ്ച് അന്വേഷണത്തെ ചോദ്യം ചെയ്ത് പിഎസ്സി നൽകിയ ഹർജി പരിഗണിക്കവേ കഴിഞ്ഞ ദിവസം സർക്കാരിന് ഹൈക്കോടതിയുടെ രൂക്ഷ വിമർശനം നേരിട്ടിരുന്നു.
കേസിൽ പ്രധാന പ്രതിയെ ചോദ്യം ചെയ്യാതെ എന്ത് അന്വേഷണം എന്നായിരുന്നു സർക്കാരിനോട് ഹൈക്കോടതി ചോദിച്ചത്. പിഎസ്സിയും സർക്കാരും ഭായ് ഭായ് കളിച്ചാൽ ജനങ്ങൾക്ക് സംശയം തോന്നുമെന്നും വിമർശിച്ചു.
Kerala
കൊച്ചി: ആസൂത്രണ ബോർഡ് പരീക്ഷാ ക്രമക്കേട് കേസിൽ സർക്കാരിന് ഹൈക്കോടതിയുടെ രൂക്ഷ വിമർശനം. പ്രധാന പ്രതിയെ ചോദ്യം ചെയ്യാതെ എന്ത് അന്വേഷണമാണ് നടക്കുന്നതെന്ന് കോടതി സർക്കാരിനോട് ചോദിച്ചു. പിഎസ്സിയും സർക്കാരും ഭായ് ഭായ് കളിച്ചാൽ ജനങ്ങൾക്ക് സംശയം തോന്നുമെന്നും കോടതി നിരീക്ഷിച്ചു.
അന്വേഷണവുമായി പിഎസ്സി സഹകരിക്കുന്നില്ലെന്ന് സർക്കാർ കോടതിയിൽ ആവർത്തിച്ചു. എന്നാൽ ചട്ടങ്ങൾ പാലിക്കാതെയാണ് ക്രൈംബ്രാഞ്ച് അന്വേഷണം നടത്തുന്നതെന്നായിരുന്നു പിഎസ്സിയുടെ വാദം. പരീക്ഷാ ക്രമക്കേടുമായി ബന്ധപ്പെട്ട അന്വേഷണത്തിന്റെ നടപടിക്രമങ്ങളും പുരോഗതിയും സംബന്ധിച്ച തർക്കത്തിനിടെയാണ് കോടതി രൂക്ഷമായ പരാമർശങ്ങൾ ഉന്നയിച്ചത്.
അന്വേഷണത്തിൽ പ്രധാന പ്രതിയെ ചോദ്യം ചെയ്തിട്ടുണ്ടോയെന്നതടക്കമുള്ള കാര്യങ്ങളിൽ കോടതി സർക്കാരിനോട് വിശദീകരണം തേടി. തുടർന്ന് കേസ് പരിഗണിക്കുന്നത് മാറ്റി. 27ന് വീണ്ടും പരിഗണിക്കും. പിഎസ്സിക്ക് എതിരെ ഹൈക്കോടതിയെ സമീപിച്ച ഉദ്യോഗാർഥി വി.എസ്.ജയലാലിനെ കക്ഷിയാക്കുകയും ചെയ്തു.
Kerala
തിരുവനന്തപുരം: നിലവില് എല്ഡി ക്ലർക്ക് റാങ്ക് പട്ടികയിലുള്ള 20589 ഉദ്യോഗാര്ഥികളില് നിയമന ശിപാര്ശ ലഭിച്ചത് 1871 പേര്ക്ക് മാത്രം! 2025 ഓഗസ്റ്റ് ഒന്നിനു നിലവില് വന്ന റാങ്ക് പട്ടികകളില് 14 ജില്ലകളിലായി 20589 ഉദ്യോഗാര്ഥികളാണ് ഉള്പ്പെട്ടിട്ടുള്ളത്.
വിവിധ വകുപ്പുകളില് എല്ഡി ക്ലര്ക്ക് തസ്തികയിലേക്കുള്ള പിഎസ്സി റാങ്ക് പട്ടിക നിലവില് വന്ന് 13 മാസം കഴിയുമ്പോഴും നിയമനം ഇഴയുകയാണ്.
തൃശൂര്-204, തിരുവനന്തപുരം-172, ഇടുക്കി- 124 വയനാട്- 66, കാസര്ഗോഡ്-76 എന്നിങ്ങനെ പോകുന്നു നിയമന ശിപാര്ശകളുടെ കണക്ക്. ഇതില് 547 എണ്ണവും നോണ് ജോയിനിംഗ് ഡ്യൂട്ടി (എന്ജെഡി) ഒഴിവിലാണെന്നാണ് കണക്കുകള് സൂചിപ്പിക്കുന്നത്.
2028 ജലൈ 31 വരെയാണ് നിലവിലെ റാങ്ക് പട്ടികയുടെ കാലാവധി. മുന് റാങ്ക് പട്ടികയില് 20589 പേരാണ് ഉള്പ്പെട്ടിരുന്നത്. ഇതില്നിന്നും 12673 പേര്ക്ക് നിയമന ശിപാര്ശ ലഭിച്ചിരുന്നു.
Kerala
തിരുവനന്തപുരം: ആസൂത്രണ ബോർഡ് പരീക്ഷയിലെ പുനർമൂല്യ നിർണയത്തിൽ ഒന്നാമതെത്തിയ ശ്യാം കൃഷ്ണന് നിയമനം നൽകാൻ പിഎസ്സി. നേരത്തെ ഒന്നാം റാങ്ക് നേടി ജോലിയിൽ പ്രവേശിച്ച ഇടത് സംഘടനാനേതാവ് അരുൺ ജെ. പ്രതാപിന്റെ നിയമന ശിപാർശ പിഎസ്സി റദ്ദാക്കും.
വിവരം ഹൈക്കോടതിയെയും അറിയിക്കും. എന്നാൽ, നിയമനം നടന്നിട്ട് ഒരുവർഷം കഴിഞ്ഞത് കൊണ്ട് അരുൺ ജെ പ്രതാപിനെ പുറത്താക്കിയാൽ നിയമപോരാട്ടത്തിനും സാധ്യതയുണ്ട്.
വെള്ളിയാഴ്ച രാത്രിയാണ് ആസൂത്രണ ബോർഡിലെ വിവാദമായ പിഎസ്സി പരീക്ഷയുടെ പുതുക്കിയ റാങ്ക് പട്ടിക പിഎസ്സി പുറത്ത് വിട്ടത്. പരാതിക്കാരനായ ശ്യാം കൃഷ്ണനാണ് പുനർമൂല്യ നിർണയത്തിൽ ഒന്നാം റാങ്ക്.
പഴയ പട്ടികയിൽ ഒന്നാമതെത്തി നിയമനം നേടിയ അരുൺ പ്രതാപ് അഞ്ചാമതായി. പത്ത് ഉത്തരങ്ങൾ മൂല്യനിർണയം നടത്താതെ പിഎസ്സി നടത്തിയ ക്രമക്കേട് പഴയ പട്ടികയിലെ മൂന്നാം റാങ്കുകാരനായ ശ്യാം കൃഷ്ണന്റെ നിയമപോരാട്ടത്തിലൂടെയാണ് വെളിച്ചത്തുവന്നത്.
ചീഫ് ഇൻഡസ്ട്രി ആന്റ് ഇൻഫ്രാസ്ട്രക്ചർ പ്ലാൻ കോർഡിനേഷൻ ഡിവിഷൻ പോസ്റ്റുകളിലേക്കുള്ള പൊതുപരീക്ഷയിലായിരുന്നു ക്രമക്കേട് ആരോപണം. 10 ചോദ്യങ്ങളുടെ ഉത്തരങ്ങൾ പരിശോധിക്കാതെയിരുന്നു ചുരുക്കപട്ടിക പ്രസിദ്ധീകരിച്ച് റാങ്ക് പട്ടിക തയ്യാറാക്കിയത്. ഇടത് സംഘടനാ പ്രവർത്തകനായ അരുണിന് ഒന്നേകാൽ ലക്ഷം ശമ്പളം വരുന്ന തസ്തികയിലേക്ക് അതിവേഗ നിയമനവും നൽകി. പിന്നാലെയാണ് ക്രമക്കേട് പുറത്തുവന്നത്.
ശ്യാം കൃഷ്ണന് നിയമനം നൽകാൻ പിഎസ്സി നടപടികള് ഉടന് ആരംഭിക്കും.
Kerala
കൊച്ചി: സംസ്ഥാന പ്ലാനിംഗ് ബോര്ഡ് ചീഫ് തസ്തികയിലെ നിയമനവുമായി ബന്ധപ്പെട്ടു നടക്കുന്ന ക്രൈംബ്രാഞ്ച് അന്വേഷണവുമായി പിഎസ്സി ചെയര്മാനടക്കം സഹകരിക്കാത്തതെന്തെന്നു ഹൈക്കോടതി.
ഉത്തരവാദികള് ആരെന്നു കണ്ടെത്തുന്നതിനായി ബന്ധപ്പെട്ട വസ്തുതകള് അറിയാവുന്നവര് എന്ന നിലയിലല്ലേ പിഎസ്സി അംഗങ്ങളെയടക്കം ചോദ്യം ചെയ്യാന് വിളിപ്പിക്കുന്നത്. പ്രതിയെന്ന നിലയിലല്ലല്ലോ? അന്വേഷണസംഘത്തിനു മുന്നില് ഹാജരായി വിവരങ്ങള് നല്കാനും വാദമുന്നയിക്കാനും രേഖകള് സമര്പ്പിക്കാനും അവസരമുണ്ട്. ധാര്മികവും നിയമപരവും ഭരണഘടനാപരവുമായ ഉത്തരവാദിത്വം ഇക്കാര്യത്തില് പിഎസ്സി അംഗങ്ങള്ക്കുണ്ടെന്നും ജസ്റ്റീസ് എ. ബദറുദ്ദീന് പറഞ്ഞു.
സർക്കാർ കടുത്ത നടപടി സ്വീകരിക്കാത്തതെന്ത്?
നോട്ടീസ് നല്കിയിട്ടും അന്വേഷണവുമായി സഹകരിക്കുന്നില്ലെങ്കില് അടുത്ത കടുത്ത നടപടി സ്വീകരിക്കാത്തതെന്തെന്നു കോടതി സര്ക്കാരിനോട് ചോദിച്ചു. പരീക്ഷയില് 58 മാര്ക്കിന്റെ മൂല്യനിര്ണയം നടത്താതെപോയതില് പ്രഥമദൃഷ്ട്യാ അഴിമതിയില്ലേയെന്നും കോടതി ആരാഞ്ഞു. നിയമന ക്രമക്കേടുമായി ബന്ധപ്പെട്ട ക്രൈംബ്രാഞ്ച് അന്വേഷണ ഉത്തരവും കേസും റദ്ദാക്കണമെന്നാവശ്യപ്പെട്ട് പിഎസ്സി നല്കിയ ഹര്ജിയാണു കോടതിയുടെ പരിഗണനയിലുള്ളത്.
പിഎസ്സി അംഗങ്ങള്ക്കും ജീവനക്കാര്ക്കുമെതിരേ അന്വേഷണത്തിന് ഉത്തരവിടാന് സര്ക്കാരിന് അധികാരമില്ലെന്നാണ് ഹര്ജിക്കാരുടെ വാദം.
പൊതുസേവകരെന്ന നിലയില് അന്വേഷണത്തിന് മുന്കൂര് അനുമതിയെക്കുറിച്ച് വിജിലന്സ് ഡയറക്ടറുടെ കത്തില്തന്നെ പറയുന്നുണ്ട്. കംപ്യൂട്ടറൈസ്ഡ് മൂല്യനിര്ണയമായതിനാല് സാങ്കേതികമായ പിഴവുകൊണ്ടാണ് ഇത്തരമൊരു അബദ്ധം സംഭവിച്ചത്.
ക്രൈംബ്രാഞ്ച് അന്വേഷണത്തിനുള്ള സര്ക്കാര് ഉത്തരവിനെത്തുടര്ന്ന് പിഎസ്സി അംഗങ്ങളടക്കമുള്ളവര്ക്ക് ചോദ്യംചെയ്യലിനു ഹാജരാകാന് നോട്ടീസ് നല്കിയിട്ടുണ്ടെന്നും തടയണമെന്നും ഹര്ജിക്കാര് ആവശ്യപ്പെട്ടു.
എന്നാല്, പിഎസ്സി തീരുമാനവും ശിപാര്ശയുമായി ബന്ധപ്പെട്ടുണ്ടാകുന്ന ആരോപണങ്ങളിലെ അന്വേഷണത്തിനു മാത്രമേ ചട്ടപ്രകാരം മുന്കൂര് അനുമതി ആവശ്യമുള്ളൂ എന്ന് സര്ക്കാരിനുവേണ്ടി ഹാജരായ പ്രോസിക്യൂഷന് ഡയറക്ടര് ജനറല് (ഡിജിപി) ടി. ആസഫലി ചൂണ്ടിക്കാട്ടി.
പിഎസ്സിയുമായി ബന്ധപ്പെട്ട രണ്ടുപേര്ക്കെതിരേയാണ് ആരോപണമെന്നിരിക്കെ പിഎസ്സി എന്ന സ്ഥാപനം എന്തിനാണു കോടതിയെ സമീപിക്കുന്നതെന്ന് മനസിലാകുന്നില്ല.
പിഎസ്സിയുമായി ബന്ധപ്പെട്ടുണ്ടാകുന്നത് ഒറ്റപ്പെട്ട പരാതികളല്ലെന്നും 180 പരാതികള് ഇതിനകം ലഭിച്ചിട്ടുണ്ടെന്നും ഡിജിപി ചൂണ്ടിക്കാട്ടി. പിഎസ്സിയുടെ ഹര്ജി നിലനില്ക്കുന്നതല്ലെന്നും വാദമുയര്ത്തി.
വഞ്ചിക്കപ്പെടുന്നത് യുവതലമുറ
അനുമതിയും ഹര്ജിയുടെ നിലനില്പും സംബന്ധിച്ച് ഡിജിപി ഉന്നയിച്ച വാദം കോടതിയും ചൂണ്ടിക്കാട്ടി. സര്ക്കാര് ജോലിക്കായി കഠനാധ്വാനം ചെയ്തു മത്സര പരീക്ഷയെ നേരിടുന്ന അഭ്യസ്തവിദ്യരായ യുവതലമുറയാണു വഞ്ചിക്കപ്പെടുന്നതെന്ന് കോടതി അഭിപ്രായപ്പെട്ടു.
ഉദ്യോഗാര്ഥികളുടെ ഏക പ്രതീക്ഷയായ പിഎസ്സിയെ സംരക്ഷിക്കണമെന്നു നിരീക്ഷിച്ച കോടതി, തുടര്ന്ന് മുന്കൂര് അനുമതിയുടെ കാര്യത്തിലും ഹര്ജി നിലനില്ക്കുമോയെന്നതിലും വിശദീകരണം സമര്പ്പിക്കാന് സര്ക്കാരിനു നിര്ദേശം നല്കി. തുടര്ന്ന് ഹര്ജി വീണ്ടും 13ന് പരിഗണിക്കാനായി മാറ്റി.
ഹര്ജിയില് അപാകതയുണ്ടെന്ന രജിസ്ട്രിയുടെ എതിര്പ്പ് അംഗീകരിച്ച് ഹര്ജി പരിഗണിക്കാതിരുന്ന സിംഗിള് ബെഞ്ചിന്റെ മുന് ഉത്തരവിനെതിരേ പിഎസ്സി നേരത്തേ ഡിവിഷന് ബെഞ്ചിനെ സമീപിച്ചിരുന്നു. തുടര്ന്ന് ഹര്ജി പരിഗണിച്ചു തീര്പ്പാക്കാന് നിര്ദേശിച്ച് സിംഗിള് ബെഞ്ചിലേക്കുതന്നെ കേസ് മടക്കുകയായിരുന്നു.
Kerala
തിരുവനന്തപുരം: സംസ്ഥാന ആസൂത്രണ ബോര്ഡ് പരീക്ഷാ ക്രമക്കേടുമായി ബന്ധപ്പെട്ട കേസില് കേരള പബ്ലിക് സര്വീസ് കമ്മീഷനെതിരേയുള്ള ഹൈക്കോടതി വിമര്ശനം വന് തിരിച്ചടിയായി. ഉദ്യോഗസ്ഥര്ക്കെതിരായ ക്രൈംബ്രാഞ്ച് അന്വേഷണം സ്റ്റേ ചെയ്യണമെന്ന പിഎസ്സിയുടെ ആവശ്യവും ഹൈക്കോടതി തള്ളിയിട്ടുണ്ട്.
പരീക്ഷാ നടത്തിപ്പിലെ വീഴ്ചകള് സംബന്ധിച്ച് പിഎസ്സി ഉദ്യോഗസ്ഥര്ക്കും ചില ഉദ്യോഗാര്ഥികള്ക്കും എതിരേ ക്രൈംബ്രാഞ്ച് അന്വേഷണം ആരംഭിച്ചിരുന്നു. പിഎസ്സി അംഗങ്ങളോട് ചോദ്യംചെയ്യലിനായി ക്രൈംബ്രാഞ്ച് ആസ്ഥാനത്ത് ഹാജരാകുന്നതിനും നോട്ടീസ് നല്കിത്തുടങ്ങിയിരുന്നു. ഇതിനെതിരേയായിരുന്നു പിഎസ്സി ഹൈക്കോടതിയെ സമീപിച്ചത്.
ഉദ്യോഗസ്ഥരെ വിളിച്ചുവരുത്താന് ക്രൈംബ്രാഞ്ചിനു കഴിയില്ലെന്ന വാദവും പിഎസ്സി ഉന്നയിച്ചു. പിഎസ്സി അംഗങ്ങളെ മനഃപൂര്വം കുറ്റക്കാരാക്കാന് ശ്രമം നടക്കുകയാണെന്നായിരുന്നു പിഎസ്സിയുടെ നിലപാട്. ഭരണഘടനാ സ്ഥാപനമായ പബ്ലിക് സര്വീസ് കമ്മിഷനിലെ അംഗങ്ങളെ ക്രൈംബ്രാഞ്ച് ആസ്ഥാനത്തേക്ക് വിളിപ്പിക്കുന്നതില് പ്രോട്ടോക്കോള് പ്രശ്നമുണ്ടെന്ന വാദവും പിഎസ്സി ഉയര്ത്തി.
അതേസമയം പിഎസ്സി നിയമന ക്രമക്കേട് പുറത്തുവന്നതോടെ മുഖം രക്ഷിക്കാനുള്ള നീക്കങ്ങളായിരുന്നു പബ്ലിക് സര്വീസ് കമ്മിഷന് നടത്തിയത്. ക്രമക്കേട് പുറത്തായതോടെ അന്വേഷണം അട്ടിമറിക്കാനുള്ള നീക്കവും പിഎസ്സി തലപ്പത്ത് നടന്നതായാണ് വിവരം. ഇതും വിവാദമായ സാഹചര്യത്തിലാണ് മറ്റു വഴികളില്ലാതെ ക്രമക്കേടുകളിലെ അന്വേഷണം ആഭ്യന്തര വിജിലന്സ് എസ്പിക്കു കൈമാറാന് പിഎസ്സി യോഗത്തില് തീരുമാനമായത്.
ആസൂത്രണ ബോര്ഡിലെ ഉയര്ന്ന തസ്തികയായ ചീഫ് നിയമനത്തിന് 2022 ലായിരുന്നു വിജ്ഞാപനം പുറപ്പെടുവിച്ചത്. 200ലധികം പേരായിരുന്നു പരീക്ഷയെഴുതിയത്. ഒന്നേകാല് ലക്ഷത്തിലേറെ രൂപ ശമ്പളം ലഭിക്കുന്ന തസ്തികകളില് നിയമനം നേടിയവര് ഇടതുപക്ഷ സംഘടനാ പ്രവര്ത്തകരാണെന്ന ആരോപണമാണ് ഉയര്ന്നത്.
പ്ലാനിംഗ് ബോര്ഡ് ചീഫ് തസ്തികയിലേക്കു നടത്തിയ പരീക്ഷയിലെ 10 ചോദ്യങ്ങള്ക്കു മാര്ക്കിടാതെ റാങ്ക് ലിസ്റ്റ് തയാറാക്കി നിയമനം നല്കിയതാണ് വിവാദമായത്. ഉദ്യോഗാര്ഥികള് ഉത്തരക്കടലാസിന്റെ പകര്പ്പ് എടുത്തതോടെയാണ് ക്രമക്കേട് പുറത്തുവന്നത്. ആകെയുള്ള 28 ചോദ്യങ്ങളില് 18 എണ്ണത്തിനു മാത്രമേ പിഎസ്സി മാര്ക്കിട്ടിട്ടുള്ളൂ. 53 മാര്ക്കിനുള്ള ബാക്കി 10 ചോദ്യങ്ങള് മൂല്യനിര്ണയം നടത്താന് അധ്യാപകര്ക്ക് കൈമാറിയില്ല.
Kerala
തിരുവനന്തപുരം: നാലു തസ്തികകളിലേക്ക് ചുരുക്കപ്പട്ടിക പ്രസിദ്ധീകരിക്കുന്നതിന് ഇന്നലെ ചേര്ന്ന പിഎസ്സി യോഗം തീരുമാനിച്ചു.
ലീഗല് മെട്രോളജി വകുപ്പില് ഇന്സ്പെക്ടര് ഓഫ് ലീഗല് മെട്രോളജി, സോയില് സര്വേ ആൻഡ് സോയില് കണ്സര്വേഷന് വകുപ്പില് സോയില് കണ്സര്വേഷന് ഓഫിസര്, സോയില് സര്വേ ആൻഡ് സോയില് കണ്സര്വേഷന് വകുപ്പില് സോയില് സര്വേ ഓഫിസര്/റിസര്ച്ച് അസിസ്റ്റന്റ്/കാര്ട്ടോഗ്രോഫര്/ടെക്നിക്കല് അസിസ്റ്റന്റ്, കേരള കാര്ഷിക സര്വകലാശാലയില് ഫാം അസിസ്റ്റന്റ് ഗ്രേഡ് 2 (അഗ്രി) തസ്തികളിലേക്കാണ് ചുരുക്കപ്പട്ടിക പ്രസിദ്ധീകരിക്കുന്നത്.
Kerala
കോഴിക്കോട്: പിഎസ്സിക്ക് ക്രൈംബ്രാഞ്ചിനെ ഭയമാണെന്ന് ആഭ്യന്തരമന്ത്രി രമേശ് ചെന്നിത്തല. കാലിക്കട്ട് പ്രസ് ക്ലബ് മാധ്യമ അവാര്ഡ്ദാന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം.
പല നിയമനത്തിലും ഉണ്ടായിട്ടുള്ള ഗുരുതരമായ ക്രമക്കേടുകള് കണ്ടെത്തിയതിന്റെ അടിസ്ഥാനത്തിലാണ് ക്രൈംബ്രാഞ്ച് കേസെടുത്തത്. എന്നാല്, ക്രൈംബ്രാഞ്ച് അന്വേഷണത്തിനു ഹാജരാകാന് ആവശ്യപ്പെട്ടാല് പിഎസ്സി ചെയര്മാനും അംഗങ്ങളും വരുന്നില്ല.
ഞങ്ങള് അന്വേഷണത്തില് അതീതരാണെന്ന നിലപാടിലാണ്. അവര് ക്രൈംബ്രാഞ്ച് അന്വേഷണത്തെ ഭയപ്പെടുകയാണ്. ഒന്നും ഭയപ്പെടാനില്ലെങ്കില് ആരുടെ മുന്നിലും അന്വേഷണത്തിന് തയാറാണെന്ന ആര്ജവമാണു കാണിക്കേണ്ടതെന്നും അദ്ദേഹം പറഞ്ഞു. പിഎസ്സി ചെയര്മാനും അംഗങ്ങള്ക്കും ക്രൈംബ്രാഞ്ചിനു മുന്നില് വരേണ്ടിവരുമെന്നും അദ്ദേഹം പറഞ്ഞു.
കാലിക്കട്ട് പ്രസ് ക്ലബ്ബിൽ നടന്ന ചടങ്ങിൽ പ്രസിഡന്റ് ഇ.പി. മുഹമ്മദ് അധ്യക്ഷത വഹിച്ചു.
Kerala
കൊച്ചി: സ്റ്റേറ്റ് പ്ലാനിംഗ് ബോര്ഡ് ചീഫ് തസ്തികയിലെ നിയമന ക്രമക്കേടുമായി ബന്ധപ്പെട്ട പരാതിയിന്മേലുള്ള ക്രൈംബ്രാഞ്ച് അന്വേഷണത്തിനുള്ള സര്ക്കാര് ഉത്തരവും കേസും റദ്ദാക്കണമെന്നാവശ്യപ്പെട്ട് പിഎസ്സി നല്കിയ ഹര്ജി പരിഗണിച്ചു തീര്പ്പാക്കാന് ഹൈക്കോടതി സിംഗിള് ബെഞ്ചിനു ഡിവിഷന് ബെഞ്ചിന്റെ നിര്ദേശം.
എഫ്ഐആര് റദ്ദാക്കാനായി റിട്ട് പെറ്റീഷന് ഫയല് ചെയ്യാനാകില്ലെന്ന രജിസ്ട്രിയുടെ എതിര്പ്പ് അംഗീകരിച്ചു ഹര്ജി പരിഗണിക്കാതിരുന്ന സിംഗിള് ബെഞ്ച് ഉത്തരവ് റദ്ദാക്കിയ ജസ്റ്റീസുമാരായ കെ.നടരാജന്, ജോണ്സണ് ജോണ് എന്നിവരടങ്ങുന്ന ഡിവിഷന് ബെഞ്ച് പിഎസ്സി നല്കിയ അപ്പീല് തീര്പ്പാക്കി.
പിഎസ്സി അംഗങ്ങള്ക്കും ജീവനക്കാര്ക്കുമെതിരേ അന്വേഷണത്തിന് ഉത്തരവിടാന് സര്ക്കാരിന് അധികാരമില്ലെന്നു ചൂണ്ടിക്കാട്ടി പിഎസ്സി നല്കിയ ഹര്ജിയാണു കോടതിയുടെ പരിഗണനയിലുള്ളത്.
നിയമനവുമായി ബന്ധപ്പെട്ടു ചില ചോദ്യങ്ങളുടെ മൂല്യനിര്ണയം നടത്താതെ പോയത് മനഃപൂര്വമല്ലെന്നാണു ഹര്ജിയിലെ വാദം. ഈ വീഴ്ച പിഎസ്സിതന്നെ പരിഹരിച്ചിട്ടുമുണ്ട്.
ക്രൈംബ്രാഞ്ച് രജിസ്റ്റര് ചെയ്ത എഫ്ഐആറില് കുറ്റകൃത്യത്തിന്റെ വിശദാംശങ്ങള് വ്യക്തമാക്കിയിട്ടില്ലെന്നും ഹര്ജിയില് പറയുന്നു. ക്രൈംബ്രാഞ്ച് അന്വേഷണത്തിനുള്ള സര്ക്കാര് ഉത്തരവിനെത്തുടര്ന്നാണ് കേസെടുത്തത്. ഇതിനു പിന്നാലെ അംഗങ്ങളടക്കമുള്ളവര്ക്ക് ചോദ്യം ചെയ്യലിനു ഹാജരാകാന് നോട്ടീസും നല്കിയിട്ടുണ്ട്.
District News
മക്കരപ്പറമ്പ: ഉദ്യോഗാര്ഥികള്ക്കായുള്ള ഗ്രാമപഞ്ചായത്തിന്റെ സൗജന്യ പിഎസ്സി പരിശീലനം ഇന്ന് തുടങ്ങും. മക്കരപ്പറമ്പ ഗവണ്മെന്റ്് വൊക്കേഷണല് ഹയര് സെക്കന്ഡറി സ്കൂളില് രാവിലെ 10ന് ജില്ലാ കളക്ടര് ഡോ. വിനയ് ഗോയല് ഉദ്ഘാടനം ചെയ്യും.
ഗ്രാമപഞ്ചായത്ത് പ്രസിഡന്റ് സി.പി. അബ്ദുറഹ്മാന് അധ്യക്ഷത വഹിക്കും. ഉദ്യോഗാര്ഥികള്ക്കും തൊഴില്രഹിതരായ വീട്ടമ്മമാര്ക്കും ഒറ്റത്തവണ പിഎസ്സി രജിസ്ട്രേഷന് നടത്തുന്നതിനുള്ള സൗകര്യവും ഒരുക്കിയിട്ടുണ്ട്. അവധി ദിവസങ്ങളിലാണ് പരിശീലന ക്ലാസുകള് .
Kerala
തിരുവനന്തപുരം: പിഎസ്സി ആസൂത്രണ ബോർഡ് പരീക്ഷാ ക്രമക്കേടുമായി ബന്ധപ്പെട്ട മൊഴിയെടുപ്പിനായി പിഎസ്സി ആസ്ഥാനത്തേക്കു പോകേണ്ടതില്ലെന്നു ക്രൈംബ്രാഞ്ചിനു നിയമോപദേശം.
ക്രൈംബ്രാഞ്ച് അന്വേഷണ സംഘം തീരുമാനിക്കുന്ന സ്ഥലത്ത് ചോദ്യം ചെയ്യലിനു ഹാജരാകാൻ നിർദേശിക്കുന്നതിൽ തെറ്റില്ലെന്നാണ് ക്രൈം ബ്രാഞ്ചിനു ലഭിച്ച നിയമോപദേശം. അതേസമയം ക്രൈംബ്രാഞ്ച് ചോദ്യം ചെയ്യലിനായി നോട്ടീസ് നൽകിയ പശ്ചാത്തലത്തിൽ പിഎസ്സി അംഗങ്ങൾ ഹൈക്കോടതിയെ സമീപിച്ചു.
പിഎസ്സി അംഗങ്ങളെ ചോദ്യം ചെയ്യുന്നതുമായി ബന്ധപ്പെട്ട് തർക്കം നിലനിൽക്കുന്നതിനിടെ ചോദ്യം ചെയ്യുന്നതിനായി ക്രൈം ബ്രാഞ്ച് ആസ്ഥാനത്തേക്കു പോകേണ്ടതുണ്ടോ എന്ന കാര്യത്തിനാണ് പിഎസ്സി അംഗങ്ങൾ കൂടുതൽ വ്യക്തത തേടിയിരിക്കുന്നത്.
പരീക്ഷാ ക്രമക്കേടുമായി ബന്ധപ്പെട്ട് കേസ് രജിസ്റ്റർ ചെയ്ത് പിഎസ്സി അംഗങ്ങളെ പ്രതിയാക്കിയിട്ടില്ല. ആ സാഹചര്യത്തിൽ നോട്ടീസ് നൽകി വിളിപ്പിക്കുന്പോൾ പോകേണ്ടതുണ്ടോ എന്നുള്ള കാര്യത്തിലാണ് വ്യക്തത തേടുന്നത്.
കഴിഞ്ഞ ചൊവ്വാഴ്ച ക്രൈംബ്രാഞ്ച് ആസ്ഥാനത്ത് ഹാജരാകണമെന്നു കാണിച്ചായിരുന്നു പിഎസ്സി അംഗങ്ങൾക്ക് ക്രൈംബ്രാഞ്ച് നോട്ടീസ് നൽകിയിരുന്നത്. എന്നാൽ നിലവിൽ ഹാജരാകേണ്ടെന്ന നിലപാടിൽ ഉറച്ചു നിൽക്കുകയാണ് പിഎസ്സി അംഗങ്ങൾ.
Kerala
തിരുവനന്തപുരം: പിഎസ്സി പരീക്ഷാ ക്രമക്കേട് കേസിൽ നാല് പിഎസ്സി അംഗങ്ങളെ ചോദ്യം ചെയ്യുന്നതുമായി ബന്ധപ്പെട്ട് ക്രൈംബ്രാഞ്ചും പിഎസ്സിയും തമ്മിലുള്ള തർക്കം മുറുകുന്നു. ക്രൈംബ്രാഞ്ച് ആസ്ഥാനത്ത് ഹാജരാകില്ലെന്ന പിഎഎസ്സി അംഗങ്ങളുടെ നിലപാടിനോടു വഴങ്ങേണ്ടതില്ലെന്നാണ് പ്രത്യേക അന്വേഷണസംഘത്തിന്റെ തീരുമാനം.
പിഎസ്സി അംഗങ്ങളായ എസ്.എ. സെയ്ഫ്, എസ്. ശ്രീകുമാർ, സി.കെ. ഷാജിബ്, സ്റ്റാനി തോമസ് എന്നിവർ ഇന്നലെ ചോദ്യംചെയ്യലിനായി ക്രൈംബ്രാഞ്ച് ആസ്ഥാനത്ത് ഹാജരാകണമെന്നു കാണിച്ച് അന്വേഷണസംഘം നോട്ടീസ് നൽകിയിരുന്നു. എന്നാൽ ഇവർ ഇന്നലെ ഹാജരായില്ല. ഈ പശ്ചാത്തലത്തിൽ തുടർ നടപടികൾ സംബന്ധിച്ച് അന്വേഷണ സംഘം നിയമോപദേശം തേടി.
ഭരണഘടനാ സ്ഥാപനമായ പിഎസ്സിയുടെ അംഗങ്ങൾ അന്വേഷണ ഏജൻസിയുടെ ഓഫീസിലെത്തി ചോദ്യം ചെയ്യലിന് വിധേയരാകുന്ന കീഴ്വഴക്കമില്ലെന്ന നിലപാടാണ് പിഎസ്സി ആവർത്തിക്കുന്നത്. കഴിഞ്ഞ ദിവസം ചേർന്ന പിഎസ്സി യോഗത്തിലും ചോദ്യംചെയ്യലിനായി ഹാജരാകേണ്ടതില്ലെന്ന തീരുമാനമാണ് ഉണ്ടായത്.
എന്നാൽ, ചോദ്യംചെയ്യലിനു മുന്നിൽ എല്ലാവരും തുല്യരാണെന്നും അന്വേഷണസംഘം ആവശ്യപ്പെടുന്ന സ്ഥലത്ത് അംഗങ്ങൾ ഹാജരാകണമെന്നുമാണ് എസ്ഐടിയുടെ നിലപാട്. ഈ നിലപാടിൽനിന്ന് പിന്നോട്ടില്ലെന്നും അന്വേഷണ സംഘം വ്യക്തമാക്കുന്നു.
ആസൂത്രണ ബോർഡ് ചീഫ് തസ്തികയിലേക്കു നടന്ന പരീക്ഷയിൽ ഗുരുതര ക്രമക്കേട് കണ്ടെത്തിയതിനെ ത്തുടർന്നാണ് നാല് പിഎഎസ്സി അംഗങ്ങളെ ചോദ്യം ചെയ്യാൻ എസ്ഐടി നോട്ടീസ് നൽകിയത്.
Kerala
തിരുവനന്തപുരം: വിവിധ തസ്തികകളിലേക്ക് വിജ്ഞാപനം പുറപ്പെടുവിക്കുന്നതിനു ഇന്നലെ ചേര്ന്ന പിഎസ്സി യോഗം തീരുമാനിച്ചു.
ജനറല് റിക്രൂട്ട്മെന്റ് - സംസ്ഥാനതലം
കേരള തുറമുഖ വകുപ്പില് (ഹൈഡ്രോഗ്രാഫിക് സര്വേ വിംഗ്) ഡ്രാഫ്റ്റ്സ്മാന് ഗ്രേഡ് 2, കേരള സ്റ്റേറ്റ് ഫിനാന്ഷ്യല് എന്റര്പ്രൈസസ് ലിമിറ്റഡില് (കെഎസ്എഫ്ഇ) പ്യൂണ്/വാച്ച്മാന് (കെഎസ്എഫ്ഇയിലെ പാര്ട്ട്ടൈം ജീവനക്കാരില് നിന്നും നേരിട്ടുള്ള നിയമനം)
ജനറല് റിക്രൂട്ട്മെന്റ് - ജില്ലാതലം
തൃശൂര്, കോഴിക്കോട് ജില്ലകളില് വനം വന്യജീവി വകുപ്പില് ഫോറസ്റ്റ് ബോട്ട് ഡ്രൈവര് (നേരിട്ടും തസ്തികമാറ്റം മുഖേനയും)
സ്പെഷ്യല് റിക്രൂട്ട്മെന്റ് - സംസ്ഥാനതലം
കേരള ഹയര്സെക്കന്ഡറി വിദ്യാഭ്യാസ വകുപ്പില് ഹയര് സെക്കന്ഡറി സ്കൂള് ടീച്ചര് (സ്റ്റാറ്റിസ്റ്റിക്സ്) (പട്ടികവര്ഗം), തദ്ദേശസ്വയം ഭരണ വകുപ്പില് (ഗ്രൂപ്പ് 4 പ്ലാനിംഗ് വിംഗ്) ഡ്രാഫ്റ്റ്സ്മാന് ഗ്രേഡ് 2/ടൗണ് പ്ലാനിംഗ് സര്വേയര് ഗ്രേഡ് 2 (പട്ടികജാതി/പട്ടികവര്ഗം)
എന്സിഎ റിക്രൂട്ട്മെന്റ് -സംസ്ഥാനതലം
കേരള ഹയര്സെക്കന്ഡറി വിദ്യാഭ്യാസ വകുപ്പില് ഹയര്സെക്കന്ഡറി സ്കൂള് ടീച്ചര് (ജൂനിയര്) അറബിക് (പട്ടികജാതി/പട്ടികവര്ഗം), കേരള പോലീസ് വകുപ്പില് പോലീസ് കോണ്സ്റ്റബിള് ഡ്രൈവര്/വുമണ് പോലീസ് കോണ്സ്റ്റബിള് ഡ്രൈവര് (എല്സി/എഐ), കേരള സ്റ്റേറ്റ് ഫിനാന്ഷ്യല് എന്റര്പ്രൈസസ് ലിമിറ്റഡില് (കെഎസ്എഫ്ഇ) പ്യൂണ്/വാച്ച്മാന് (കെഎസ്എഫ്ഇയിലെ പാര്ട്ട്ടൈം ജീവനക്കാരില് നിന്നും നേരിട്ടുള്ള നിയമനം - പട്ടികവര്ഗം തസ്തികകളിലേക്കാണ് വിജ്ഞാപനം പുറപ്പെടുവിക്കുന്നത്.
രണ്ടു തസ്തികകളിലേക്ക് അഭിമുഖം നടത്തുന്നതിനും ഇന്നലെ ചേര്ന്ന പിഎസ്സി യോഗം തീരുമാനിച്ചു. കേരള മിനറല്സ് ആന്ഡ് മെറ്റല്സ് ലിമിറ്റഡില് മേറ്റ് (മൈന്സ്), കേരള സ്റ്റേറ്റ് ഫിനാന്ഷ്യല് എന്റര്പ്രൈസസ് ലിമിറ്റഡില് പ്യൂണ്/വാച്ച്മാന് (കെഎസ്എഫ്ഇയിലെ പാര്ട്ട്ടൈം ജീവനക്കാരില് നിന്നും നേരിട്ടുള്ള നിയമനം) തസ്തികകളിലേക്കാണ് അഭിമുഖം നടത്തുന്നത്.
Kerala
തിരുവനന്തപുരം: ആസൂത്രണ ബോർഡ് പരീക്ഷ ക്രമക്കേടിൽ ക്രൈംബ്രാഞ്ച് ആസ്ഥാനത്തേക്ക് വിളിച്ചുവരുത്തി ചോദ്യം ചെയ്യാനുള്ള നീക്കത്തിനെതിരെ പിഎസ്സി അംഗങ്ങൾ.
ചോദ്യം ചെയ്യാലിനായി ക്രൈംബ്രാഞ്ച് ആസ്ഥാനത്തേക്ക് പോകേണ്ടതില്ലെന്നാണ് പിഎസ്സി അംഗങ്ങളുടെ തീരുമാനം.
പ്രോട്ടോക്കോൾ ചൂണ്ടിക്കാട്ടിയാണ് പിഎസ്സി ചെയർമാന്റെയും അംഗങ്ങളുടെയും നീക്കം. സെപ്റ്റംബർ 15 മുതൽ പിഎസ്സിയിൽ വച്ച് മൊഴിയെടുക്കാം. എല്ലാ അംഗങ്ങൾക്കും പ്രത്യേകം മുറികളുണ്ട്. അവിടെവച്ച് ചോദ്യം ചെയ്യാമെന്നും അംഗങ്ങൾ അറിയിച്ചു. ഇതുസംബന്ധിച്ച് ക്രൈംബ്രാഞ്ച് ഐജിക്ക് കത്ത് നൽകി
Kerala
തിരുവനന്തപുരം: ആസൂത്രണ ബോർഡ് പരീക്ഷ ക്രമക്കേടിൽ പിഎസ്സി ചെയർമാനെയും അംഗങ്ങളെയും ചോദ്യം ചെയ്യാൻ ക്രൈംബ്രാഞ്ച്. ഈ മാസം 15 മുതൽ അംഗങ്ങളുടെ മൊഴിയെടുക്കാനാണ് തീരുമാനം.
അംഗങ്ങളെ ചോദ്യം ചെയ്തശേഷം ചെയർമാൻ എം.ആര്. ബൈജുവിനെ ചോദ്യം ചെയ്യും. മൂല്യനിർണയത്തിന്റെ ചുമതലയുള്ള രണ്ട് ഉദ്യോഗസ്ഥർക്ക് ഗുരുതര വീഴ്ചയുണ്ടായെന്ന് ക്രൈംബ്രാഞ്ച് കണ്ടെത്തിയിരുന്നു. ഇവർക്കെതിരെ വകുപ്പ് തല നടപടി ആവശ്യപ്പെട്ട് പൊലിസ് മേധാവി സർക്കാരിന് കത്ത് നൽകി.
പരീക്ഷാക്രമക്കേടിൽ അന്വേഷണം ഉന്നതങ്ങളിലേക്ക് നീങ്ങുന്നു. ചെയർമാനെയും അംഗങ്ങളെയും ചോദ്യം ചെയ്യാനാണ് ക്രൈംബ്രാഞ്ച് തീരുമാനം. 15 മുതൽ ഹാജരാകാൻ നോട്ടീസ് നൽകി തുടങ്ങി. അന്വേഷണ സംഘത്തിലെ എസ്പി സഖറിയയാണ് നോട്ടീസ് നൽകിയത്.
നിയമന തട്ടിപ്പിൽ അന്വേഷണ സംഘം കമ്മീഷൻ അംഗങ്ങളുടെ മൊഴി രേഖപ്പെടുത്തുന്നത് അസാധാരണ നടപടിയാണ്.
Kerala
തിരുവനന്തപുരം: റാങ്ക് പട്ടികകളുടെ കാലാവധി നീട്ടുന്നതിൽ പിഎസ്സിയുമായി ചർച്ച ചെയ്യുമെന്ന് മുഖ്യമന്ത്രി വി.ഡി. സതീശൻ.
മന്ത്രിസഭയുടെ ശിപാർശ പിഎസ്സിയിൽ എത്തിയപ്പോഴേക്കും റാങ്ക് പട്ടികയുടെ കാലാവധി കഴിഞ്ഞ് പുതിയ പട്ടിക പ്രസിദ്ധീകരിച്ചു. കാലാവധി നീട്ടുന്നതിൽ നിയമപരമായ പ്രശ്നങ്ങളുണ്ട്.
സർക്കാരിന് പിഎസ്സിയോട് ശിപാർശ ചെയ്യാനുള്ള അധികാരമേയുള്ളൂ. 18 സ്കൂൾ അധ്യാപക റാങ്ക് പട്ടികകളുടെ കാലാവധി നീട്ടാൻ പിഎസ്സിയോട് ശിപാർശ ചെയ്യാൻ കഴിഞ്ഞ ആഴ്ചയിലെ മന്ത്രിസഭാ യോഗം തീരുമാനിച്ചിരുന്നു.
Kerala
തിരുവനന്തപുരം: ആറു തസ്തികകളിലേക്ക് ചുരുക്കപ്പട്ടിക പ്രസിദ്ധീകരിക്കുന്നതിന് ഇന്നലെ ചേര്ന്ന പിഎസ്സി യോഗം തീരുമാനിച്ചു.
വ്യാവസായിക പരിശീലന വകുപ്പില് ജൂനിയര് ഇന്സ്ട്രക്ടര് (അപ്ഹോള്സ്റ്ററര് ), കേരള സംസ്ഥാന പ്രോസിക്യൂഷന് സര്വീസില് അസിസ്റ്റന്റ് പബ്ലിക് പ്രോസിക്യൂട്ടര് ഗ്രേഡ് 2, മെഡിക്കല് വിദ്യാഭ്യാസ വകുപ്പില് അസിസ്റ്റന്റ് പ്രഫസര് ഇന് പീഡിയാട്രിക് ഗ്യാസ്ട്രോ എന്ററോളജി, തൃശൂര് ജില്ലയില് തദ്ദേശസ്വയംഭരണ വകുപ്പില് (തൃശൂര് കോര്പ്പറേഷന് ഇലക്ട്രിസിറ്റി വിംഗ്) സബ് എന്ജിനിയര്, വിവിധ ജില്ലകളില് തദ്ദേശസ്വയംഭരണ വകുപ്പില് ലൈബ്രേറിയന് ഗ്രേഡ് 4 ആന്ഡ് കള്ച്ചറല് അസിസ്റ്റന്റ്, കേരളത്തിലെ സഹകരണമേഖലിയിലെ അപ്പെക്സ് സൊസൈറ്റികള്/കേരള സ്റ്റേറ്റ് കോ-ഓപ്പറേറ്റീവ് ഫെഡറേഷന് ഫോര് ഫിഷറീസ് ഡെവലപ്മെന്റ് ലിമിറ്റഡില് (മത്സ്യഫെഡ്) പ്രോജക്ട് ഓഫീസര് (പാര്ട്ട് 1 - ജനറല് കാറ്റഗറി, പാര്ട്ട് 2- മത്സ്യതൊഴിലാളികള്/ മത്സ്യത്തൊഴിലാളികളുടെ ആശ്രിതര്) തസ്തികകളിലേക്കാണ് ചുരുക്കപ്പട്ടിക പ്രസിദ്ധീകരിക്കുന്നത്.
Kerala
തിരുവനന്തപുരം: തൃശൂര് ജില്ലയില് വിവിധ വകുപ്പുകളില് സര്ജന്റ് തസ്തികയിലേക്ക് ചുരുക്കപ്പട്ടിക പ്രസിദ്ധീകരിക്കുന്നതിനു ഇന്നലെ ചേര്ന്ന പിഎസ്സി യോഗം തീരുമാനിച്ചു.
ഹാര്ബര് എന്ജിനിയറിംഗ് വകുപ്പില് ഡ്രാഫ്റ്റ്സ്മാന് ഗ്രേഡ് 2/ഓവര്സിയര് ഗ്രേഡ് 2 (മെക്കാനിക്കല്) തസ്തികയിലേക്ക് സാധ്യതാപട്ടിക പ്രസിദ്ധീകരിക്കുന്നതിനും ഇന്നലെ ചേര്ന്ന പിഎസ്സി യോഗം തീരുമാനിച്ചു.
Kerala
തിരുവനന്തപുരം: കേരളത്തിലെ പിഎസ്സി പരീക്ഷാക്രമക്കേടിൽ ഗവർണർ രാജേന്ദ്ര ആർലേക്കർ ഇടപെടൽ ശക്തമാക്കുന്നു. പരീക്ഷാക്രമക്കേടുമായി ബന്ധപ്പെട്ട് നൂറോളം പരാതികൾ ഉയർന്ന സാഹചര്യത്തിൽ രാഷ്ട്രപതിക്ക് റിപ്പോർട്ട് നൽകുന്നതിനുള്ള നീക്കമാണ് ഗവർണർ നടത്തുന്നത്.
പിഎസ്സി ഭരണഘടനാ സ്ഥാപനമായതിനാൽ അതിനെതിരായ നടപടികളുടെ നിയമസാധ്യത സംബന്ധിച്ചാണ് ഗവർണർ നിയമോപദേശം തേടിയതെന്നാണ് ലോക്ഭവൻ വൃത്തങ്ങൾ പറയുന്നത്. രാഷ്ട്രപതി വിഷയം സുപ്രീംകോടതിയുടെ അന്വേഷണത്തിന് റഫർ ചെയ്താൽ പിഎസ്സി ചെയർമാനെയും അംഗങ്ങളെയും സസ്പെൻഡ് ചെയ്യാൻ ഗവർണർക്ക് കഴിയുമോയെന്നതടക്കമുള്ള കാര്യങ്ങളാണ് പരിശോധിക്കുന്നത്.
സുപ്രീംകോടതിയുടെ അന്വേഷണ റിപ്പോർട്ടിന്റെ അടിസ്ഥാനത്തിൽ രാഷ്ട്രപതിക്ക് പിഎസ്സിയെ പിരിച്ചുവിടാൻ ഭരണഘടനാപരമായി സാധിക്കുമോയെന്നും ഗവർണർ പരിശോധിക്കുന്നുണ്ട്. നിലവിലെ സർക്കാർ നടപടികളിലും ക്രൈംബ്രാഞ്ചിന്റെ പ്രത്യേക അന്വേഷണത്തിലും ഗവർണർ തൃപ്തനല്ലെന്നാണ് ലോക്ഭവൻ വൃത്തങ്ങളുടെ വിശദീകരണം.
രണ്ടുമാസമായി വിവാദം തുടരുന്ന സാഹചര്യത്തിലും കേസിൽ കാര്യമായ വഴിത്തിരിവുണ്ടായിട്ടില്ലെന്നാണ് രാജ്ഭവന്റെ വിലയിരുത്തൽ. പരീക്ഷാക്രമക്കേടുമായി ബന്ധപ്പെട്ട് നൂറോളം പരാതികൾ ലഭിച്ചിട്ടുണ്ടെങ്കിലും നിലവിൽ പരീക്ഷാത്തട്ടിപ്പുമായി ബന്ധപ്പെട്ട ഒരു കേസിലാണ് അന്വേഷണം കേന്ദ്രീകരിച്ചിരിക്കുന്നത്. മറ്റു പരാതികൾ പരിശോധിച്ചുവരികയാണെന്നും തെളിവുകളുടെ അടിസ്ഥാനത്തിൽ തുടർനടപടി സ്വീകരിക്കുമെന്നുമാണ് അന്വേഷണസംഘത്തിന്റെ നിലപാട്.
അതിനിടെ ചരിത്രത്തിലാദ്യമായി പോലീസ് പിഎസ്സിയുടെ പരീക്ഷാവിഭാഗത്തിലെത്തി രേഖകൾ പരിശോധിച്ചതും കേസിൽ നിർണായക നീക്കമായിരുന്നു. എന്നാൽ ഇതുവരെ സമഗ്രമായ നടപടിയുണ്ടാകാത്ത സാഹചര്യത്തിലാണ് ഗവർണർ നേരിട്ട് ഇടപെടൽ ശക്തമാക്കുന്നത്.
Kerala
തിരുവനന്തപുരം: പിഎസ്സി ഉദ്യോഗാർഥികളുടെ സമരം ശക്തമാകുന്നതിനിടെ, പ്രതിഷേധക്കാരെ നേരിട്ട് ചർച്ചയ്ക്ക് വിളിക്കണമെന്ന് ആവശ്യപ്പെട്ട് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ മുഖ്യമന്ത്രിക്ക് കത്തയച്ചു.
സമരം ചെയ്യുന്ന ഉദ്യോഗാർഥികളുടെ ന്യായമായ ആവശ്യങ്ങൾ അനുഭാവപൂർവ്വം പരിഹരിക്കാൻ സർക്കാർ അടിയന്തരമായി ഇടപെടണമെന്നാണ് കത്തിലുള്ളത്.
ഉദ്യോഗാർഥികളുടെ ആവശ്യങ്ങൾ മുൻനിർത്തി സമരം കൂടുതൽ ശക്തമാക്കാനാണ് ബിജെപി സംസ്ഥാന നേതൃത്വത്തിന്റെ തീരുമാനം. ഇതിന്റെ ഭാഗമായി തിങ്കളാഴ്ച ബിജെപി കോർ കമ്മിറ്റി യോഗം ചേർന്ന് സമരം വിപുലീകരിക്കുന്നതുമായി ബന്ധപ്പെട്ട തുടര്നടപടികൾക്ക് രൂപം നൽകും.
Kerala
തിരുവനന്തപുരം: പരീക്ഷാ ക്രമക്കേടുമായി ബന്ധപ്പെട്ട പരാതികള് പുറത്തുവന്നതിന് പിന്നാലെ പരാതിക്കാരെയും മാധ്യമങ്ങളെയും വിമര്ശിച്ച് പിഎസ്സി. യശസ് കളങ്കപ്പെടുത്താന് ബോധപൂര്വ്വം ശ്രമിക്കുന്നുവെന്നും പല പരാതികളും അടിസ്ഥാനരഹിതവുമാണെന്ന് പിഎസ്സി ആരോപിച്ചു.
അതേസമയം, പരീക്ഷാ ക്രമക്കേടിൽ പരാതി പ്രവാഹം തുടരുകയാണ്. എസ്ഐടിക്ക് ലഭിച്ച പരാതികൾ 100 കടന്നിരുന്നു. മുഴുവൻ പരാതികളിലും എസ്ഐടി മൊഴി രേഖപ്പെടുത്തിയിട്ടുണ്ട്.
പരമാവധി തെളിവുകൾ ശേഖരിക്കാനുള്ള ശ്രമത്തിലാണ് എസ്ഐടി. ആസൂത്രണ ബോർഡ് ചീഫ് പരീക്ഷാ ക്രമക്കേടിലാണ് എസ്ഐടി കേസ് എടുത്തിരിക്കുന്നത്. ക്രൈംബ്രാഞ്ച് ഐജി അജിതാ ബീഗത്തിന്റെ നേതൃത്വത്തിലാണ് അന്വേഷണം നടക്കുന്നത്.
Kerala
തിരുവനന്തപുരം: ആസൂത്രണ ബോർഡ് പരീക്ഷാ ക്രമക്കേടുമായി ബന്ധപ്പെട്ട വിവരങ്ങൾ മുഴുവൻ കൈമാറണമെന്ന് ആവശ്യപ്പെട്ട് കേരള പബ്ലിക് സർവീസ് കമ്മീഷനു വിവരാവകാശ കമ്മീഷൻ ഡോ. സോണിച്ചൻ പി.ജോസഫ് നോട്ടീസയച്ചു. 13നകംആവശ്യപ്പെട്ട മുഴുവൻ വിവരങ്ങളും ഉദ്യോഗാർഥിക്കു കൈമാറി കമ്മീഷനു റിപ്പോർട്ട് സമർപ്പിക്കണമെന്നാണ് നിർദേശം.
ആവശ്യപ്പെടുന്ന വിവരങ്ങൾ സമർപ്പിച്ചില്ലെങ്കിൽ പിഴയിലേക്കും നടപടിക്കുള്ള ശിപാർശയിലേക്കും നീങ്ങുമെന്ന മുന്നറിയിപ്പും നൽകുന്നു. ആസൂത്രണ ബോർഡിലെ നിയമനവുമായി ബന്ധപ്പെട്ട വിവാദത്തിൽ പിഎസ്സിയോടു ഈ നിയമനവുമായി ബന്ധപ്പെട്ട പരീക്ഷാരേഖകൾ അടിയന്തരമായി പുറത്തുവിടാൻ സംസ്ഥാന വിവരാവകാശ കമ്മീഷൻ നേരത്തെ ഉത്തരവിട്ടിരുന്നു.
നിയമനനടപടികളിലെ സുതാര്യത ചോദ്യംചെയ്യപ്പെട്ട സാഹചര്യത്തിലാണ് പരീക്ഷാ രേഖകൾ പരസ്യപ്പെടുത്താൻ കമ്മീഷൻ നിർദ്ദേശിച്ചത്. ഉദ്യോഗാർഥികളുടെ ഉത്തരക്കടലാസുകളും അഭിമുഖത്തിൽ അവർക്ക് ലഭിച്ച മാർക്കും ഉൾപ്പെടെയുള്ള വിവരങ്ങൾ ഉടൻ പുറത്തുവിടണമെന്നാണ് നേരത്തെ ഉത്തരവിൽ വ്യക്തമാക്കിയിരുന്നത്.
വിവരങ്ങൾ കൈമാറുന്നതിനുപകരം കോടതിയിൽ പോകുന്നുവെന്നാണ് പിഎസ്സി അറിയിച്ചത്. എന്നാൽ കോടതി പോയില്ലെന്നു മാത്രമല്ല, മൂന്നാഴ്ച കഴിഞ്ഞിട്ടും വിവരം കൈമാറിയില്ല.
വിവരങ്ങൾ കൈമാറാനുള്ള മുൻ ഉത്തരവ് ഉദ്യോഗസ്ഥൻ മനഃപൂർവ്വം അട്ടിമറിക്കുകയാണെന്നും ഇതു വിവരാവകാശ നിയമത്തോടുള്ള വെല്ലുവിളിയാണെന്നും കമ്മീഷൻ കുറ്റപ്പെടുത്തുന്നു. ഈ സാഹചര്യത്തിലാണ് ഇൻഫർമേഷൻ ഓഫീസർക്കെതിരെ കർശന നടപടി സ്വീകരിക്കുമെന്ന് കമ്മീഷൻ മുന്നറിയിപ്പ് നൽകുകയും പിഎസ്സിയ്ക്ക് നോട്ടീസ് അയയ്ക്കുകയും ചെയ്തത്.
Kerala
തിരുവനന്തപുരം: കനത്ത മഴയെ തുടർന്ന് പരീക്ഷാ കേന്ദ്രങ്ങളിലെത്താനാവാത്ത ഉദ്യോഗാർഥികൾക്കായി വീണ്ടും പരീക്ഷ നടത്തുമെന്ന് പിഎസ്സി. ഇടുക്കി, കോട്ടയം, പത്തനംതിട്ട ജില്ലകളിലെ ഉദ്യോഗാർഥികൾക്കാണ് വീണ്ടും പരീക്ഷ എഴുതാൻ അവസരം.
ഓഗസ്റ്റ് 22ന് നടത്തുന്ന അവസാനഘട്ട പരീക്ഷയിൽ പങ്കെടുക്കാൻ അവസരം നൽകുമെന്നും ഇതിനായി പുറപ്പെടുവിക്കുന്ന മാർഗനിർദേശങ്ങൾ പ്രകാരം ഉദ്യോഗാർഥികൾ അപേക്ഷ സമർപ്പിക്കേണ്ടതാണെന്നും പിഎസ്സി അറിയിച്ചു.
Kerala
കൊച്ചി: എയ്ഡഡ് കോളജുകളിലെ അധ്യാപകനിയമനം പിഎസ്സിക്കു വിടുന്നതിനെക്കുറിച്ച് പഠിക്കുന്നതിന് സിന്ഡിക്കറ്റ് ഉപസമിതിയെ നിയോഗിക്കാന് തീരുമാനിച്ച കേരള സര്വകലാശാലയുടെ തീരുമാനം നിയമവിരുദ്ധമാണെന്നും അടിയന്തരമായി പിന്വലിക്കണമെന്നും കേരള പ്രൈവറ്റ് കോളജ് മാനേജ്മെന്റ്സ് അസോസിയേഷന്.
ഇക്കാര്യം വ്യക്തമാക്കി സംസ്ഥാന പ്രസിഡന്റ് ഡോ. എം.ഇ. കുര്യാക്കോസ്, ജനറല് സെക്രട്ടറി ഡോ. എം. ഉസ്മാന് എന്നിവര് കേരള സര്വകലാശാല വൈസ് ചാന്സലര്ക്കു നിവേദനം നൽകി.
മാനേജ്മെന്റുകളുടെ അവകാശങ്ങള് ഉയര്ത്തിപ്പിടിക്കുന്ന വിവിധ സുപ്രീംകോടതി വിധികളുണ്ടെന്നും അസോസിയേഷന് ഭാരവാഹികള് ചൂണ്ടിക്കാട്ടി. കേരള സര്വകലാശാലയുടെ ഈ നിയമവിരുദ്ധ നീക്കം സര്ക്കാരിന്റെ ശ്രദ്ധയില്പ്പെടുത്തുമെന്നും അവര് അറിയിച്ചു.
മാനേജ്മെന്റ്സ് അസോസിയേഷന്റെ വാദം
Kerala
തിരുവനന്തപുരം: പിഎസ്സി പരീക്ഷാ തട്ടിപ്പുമായി ബന്ധപ്പെട്ട അന്വേഷണം നിർണായക ഘട്ടത്തിലേക്ക് കടക്കുന്നു. ഇതിനിടെ സിപിഎം നേതാവിനെ ഒന്നാം റാങ്കിലെത്തിക്കാൻ അട്ടിമറി നടന്നതായും കണ്ടെത്തി.
ആസൂത്രണ ബോർഡിലെ പരീക്ഷയിലാണ് സിപിഎം സംഘടനാ നേതാവിനെ ഒന്നാം റാങ്കിലെത്തിക്കാൻ പിഎസ്സി നടത്തിയ തട്ടിപ്പിന്റെ വിവരങ്ങൾ എസ്ഐടിക്ക് ലഭിച്ചത്.
ഒന്നാം റാങ്ക് ലഭിച്ച സിപിഎം സംഘടനാ നേതാവ് എഴുതാതെ വിട്ട നാലും തെറ്റിച്ച ആറും ചോദ്യങ്ങൾ ഒന്നാകെ മൂല്യനിർണയത്തിൽനിന്ന് ഒഴിവാക്കി. എല്ലാ ചോദ്യങ്ങളും മൂല്യനിർണയം നടത്തിയിരുന്നെങ്കിൽ ഒന്നാം റാങ്കുകാരൻ ചുരുക്കപ്പട്ടികയിൽ പോലും ഇടംപിടിക്കുമായിരുന്നില്ല.
രണ്ടാംറാങ്കുകാരനേക്കാൾ 53മാർക്ക് കുറവാണ് ഇയാൾക്ക്. ഒരുമാർക്കിന്റെ വ്യത്യാസത്തിൽ ഒന്നാംറാങ്കിലെത്തിയ ഇയാൾ ഏക ഒഴിവിൽ നിയമനം നേടി ഇപ്പോഴും ആസൂത്രണ ബോർഡിൽ ജോലിചെയ്യുകയാണെന്നും കണ്ടെത്തി.
പിഎസ്സിയിലെ ഉന്നതരും രാഷ്ട്രീയക്കാരുമടക്കം നടത്തിയ വൻ ഗൂഢാലോചനയാണ് അട്ടിമറിക്ക് പിന്നിലെന്നാണു സംശയം.
ഒന്നാംറാങ്ക് ഉറപ്പിക്കാൻ നേതാവിന്റെ ഉത്തരക്കടലാസ് പരിശോധിച്ച് തെറ്റിയതും എഴുതാതെവിട്ടതുമായ ചോദ്യങ്ങൾ കണ്ടെത്തുകയും അത് മൂല്യനിർണയത്തിൽനിന്ന് ബോധപൂർവം ഒഴിവാക്കുക യുമായിരുന്നു. പരീക്ഷാവിഭാഗത്തിലെ ഉന്നതഉദ്യോഗസ്ഥരാണ് ഇതിനു പിന്നിൽ. മൂന്നുപേരുടെ പങ്ക് കണ്ടെത്തി. 58 മാർക്കിന്റെ ഉത്തരങ്ങൾ മൂല്യനിർണയം നടത്താതെ നേതാവിന് അനധികൃത നിയമനം നൽകി തട്ടിപ്പു നടത്തിയെന്നാണ് കണ്ടെത്തൽ.
പിഎസ്സി നടത്തിയ ആസൂത്രണ ബോർഡിലെ ചീഫ് (ഇൻഡസ്ട്രി ആൻഡ് ഇൻഫ്രാസ്ട്രക്ചർ) പരീക്ഷാ ക്രമക്കേടുമായി ബന്ധപ്പെട്ട കണ്ടെത്തലുകളിൽ ചെയർമാന്റെയും രണ്ട് അംഗങ്ങളുടെയും മൊഴിയെടുക്കാനാണ് ക്രൈംബ്രാഞ്ച് നീക്കം. ഇതിന്റെ ഭാഗമായി ഇവർക്ക് വൈകാതെ നോട്ടീസ് നൽകും. ചെയർമാൻ ഉൾപ്പെടെയുള്ള ബോർഡാണ് ഇന്റർവ്യു നടത്തിയതെന്നാണ് കണ്ടെത്തിയത്.
പിഎസ്സിയിലെ ഡെപ്യൂട്ടി സെക്രട്ടറി, ജൂനിയർ സൂപ്രണ്ട്, സിസ്റ്റം അനലിസ്റ്റ് എന്നിവരെ ചോദ്യംചെയ്തു. ക്രമക്കേടുകൾ നടത്തിയ കന്പ്യൂട്ടറുകളിലെ ലോഗുകൾ പിടിച്ചെടുത്തു. പിഎസ്സിയുടെ ചരിത്രത്തിൽ ഇതുവരെ ഉണ്ടാകാത്ത അട്ടിമറിയാണ് ഇതെന്നാണ് ക്രൈംബ്രാഞ്ച് കരുതുന്നത്.
ഇതുവരെ ലഭിച്ച പരാതികളിൽ 90 എണ്ണത്തിൽ അന്വേഷണം വേണ്ടിവരുമെന്നാണ് ക്രൈംബ്രാഞ്ച് പ്രത്യേക അന്വേഷണസംഘത്തിന്റെ നിഗമനം. എഡിജിപിയുടെ നേതൃത്വത്തിൽ ഇന്നലെ ചേർന്ന അവലോകന യോഗത്തിൽ എസ്ഐടി വിപുലീകരിക്കാനും തീരുമാനിച്ചു.
Kerala
തിരുവനന്തപുരം: പിഎസ്സി നടത്തിയ ആസൂത്രണ ബോർഡിലേക്കുള്ള പരീക്ഷയിലെ ക്രമക്കേട് സംബന്ധിച്ച് വിശദമായ അന്വേഷണം വേണമെന്നു ആഭ്യന്തര വിജിലൻസ്.
പരീക്ഷാ നടത്തിപ്പ് സംബന്ധിച്ച പ്രാഥമിക അന്വേഷണത്തിൽ ഗുരുതരമായ ക്രമക്കേടുകളെന്നാണ് കണ്ടെത്തൽ.
ഈ സാഹചര്യത്തിൽ പരീക്ഷാ ക്രമക്കേട് സംബന്ധിച്ച് ഉന്നത ഉദ്യോഗസ്ഥർക്കുളള പങ്കിനെക്കുറിച്ചും കൂടുതൽ അന്വേഷണം വേണമെന്നും ആഭ്യന്തര വിജിലൻസ് ആവശ്യപ്പെടുന്നു. ആഭ്യന്തര വിജിലൻസ് എസ്പിയുടെ നേതൃത്വത്തിലാണ് അന്വേഷണം നടന്നത്. റിപ്പോർട്ട് പിഎസ്സി സർക്കാരിനു സമർപ്പിക്കും.
നിലവിൽ ആഭ്യന്തര വിജിലൻസ് അന്വേഷണത്തിനൊപ്പം തന്നെ ക്രൈം ബ്രാഞ്ച് അന്വേഷണം പുരോഗമിക്കുന്നതിനാൽ ഇപ്പോൾ നൽകിയ റിപ്പോർട്ടിന്റെ അടിസ്ഥാനത്തിൽ മറ്റൊരു അന്വേഷണത്തിന് സർക്കാർ ഉത്തരവിടാൻ സാധ്യതയില്ല.
Kerala
തിരുവനന്തപുരം: സംസ്ഥാന ആസൂത്രണ ബോർഡ് തസ്തികകളിലേക്കുള്ള പിഎസ്സി പരീക്ഷാ നടത്തിപ്പിൽ ഗുരുതര വീഴ്ച സംഭവിച്ചതായി പിഎസ്സി ആഭ്യന്തര വിജിലൻസ് അന്വേഷണത്തിൽ കണ്ടെത്തൽ.
പരീക്ഷാ മൂല്യനിർണയത്തിലെ ഗുരുതര വീഴ്ചകൾ പരിശോധിച്ച റിപ്പോർട്ടിൽ ഉത്തരവാദികളായ ഉദ്യോഗസ്ഥർക്കെതിരേ വകുപ്പുതല നടപടി സ്വീകരിക്കാനും പിഎസ്സി ആഭ്യന്തര വിജിലൻസ് എസ്പി നടത്തിയ അന്വേഷണത്തിന്റെ റിപ്പോർട്ടിൽ ശിപാർശ ചെയ്തിട്ടുണ്ടെന്നാണ് സൂചന.
പരീക്ഷാ നടത്തിപ്പുമായി ബന്ധപ്പെട്ട് ഉയർന്ന ആരോപണങ്ങളിൽ നടത്തിയ അന്വേഷണത്തിന്റെ റിപ്പോർട്ട് ആഭ്യന്തര വിജിലൻസ് എസ്പി, പിഎസ്സി ചെയർമാന് ഔദ്യോഗികമായി കൈമാറിയതായാണ് വിവരം.
ആരോപണം ഉയർന്നപ്പോൾ പിഎസ്സി നടത്തിയ പ്രാഥമിക അന്വേഷണം കാര്യക്ഷമമല്ലെന്ന വിമർശനം ഉയർന്നതിനെ തുടർന്നാണ് പിന്നീട് വിജിലൻസ് എസ്പിയുടെ നേതൃത്വത്തിൽ ആഭ്യന്തര അന്വേഷണം പ്രഖ്യാപിച്ചത്. പരീക്ഷാ നടത്തിപ്പിൽ വീഴ്ച പറ്റിയിട്ടുണ്ടെന്ന കാര്യത്തിൽ ഇപ്പോൾ വ്യക്തമായ സ്ഥിരീകരണം വന്നിരിക്കുകയാണെന്നാണ് വിലയിരുത്തൽ.
ആസൂത്രണ ബോർഡിലെ മൂന്ന് വിഭാഗങ്ങളിലെ ചീഫ് തസ്തികകളിലേക്കുള്ള പൊതുപരീക്ഷയുടെ മൂല്യനിർണയത്തിൽ 10 ചോദ്യങ്ങളുടെ ഉത്തരങ്ങൾ പരിശോധിക്കാതെയാണ് ഫലം പ്രസിദ്ധീകരിച്ചതെന്നാണ് ആഭ്യന്തര വിജിലൻസ് റിപ്പോർട്ടിലെ പ്രധാന കണ്ടെത്തൽ.
ഇതിൽ രണ്ട് തസ്തികകളുടെ റാങ്ക് പട്ടിക പ്രസിദ്ധീകരിക്കുകയും രണ്ട് ഉദ്യോഗാർഥികൾക്ക് നിയമനം നൽകുകയും ചെയ്തിരുന്നു. പരീക്ഷാ നടപടിക്രമങ്ങളിലെ ഗുരുതര വീഴ്ചയാണ് ഇതിലൂടെ സംഭവിച്ചതെന്നാണ് റിപ്പോർട്ട് വിലയിരുത്തുന്നത്.
റിപ്പോർട്ട് നാളെ ചേരുന്ന പിഎസ്സി യോഗം വിശദമായി ചർച്ച ചെയ്യും. റിപ്പോർട്ടിന്റെ അടിസ്ഥാനത്തിൽ പരീക്ഷാ വിഭാഗത്തിലെ വീഴ്ചകൾക്ക് കാരണക്കാരായ ഉദ്യോഗസ്ഥർക്കെതിരേ നടപടിയുണ്ടായേക്കും.
അതേസമയം ആസൂത്രണ ബോർഡ് തസ്തികകളിലെ നിയമന ക്രമക്കേടുകളെക്കുറിച്ചുള്ള പ്രത്യേക അന്വേഷണസംഘത്തിന്റെ അന്വേഷണവും അവസാന ഘട്ടത്തിലാണ്. എസ്ഐടി അന്വേഷണ റിപ്പോർട്ട് ക്രൈംബ്രാഞ്ച് എഡിജിപിക്ക് ഉടൻ കൈമാറും. തുടർന്ന് റിപ്പോർട്ട് സംസ്ഥാന പോലീസ് മേധാവി പരിശോധിച്ച ശേഷമായിരിക്കും സംഭവത്തിൽ ക്രിമിനൽ കേസ് എടുക്കുന്നതടക്കമുള്ള തുടർനടപടികളിലേക്കു കടക്കുക.
District News
ആലപ്പുഴ: തേർഡ്ഗ്രേഡ് ഓവർസീയർ/തേർഡ് ഗ്രേഡ് ഡ്രാഫ്ട്മാൻ (കാറ്റഗറി നമ്പർ 222/2025, 567/2025) എൽഎസ്ജിഡി, ഓവർസീയർഗ്രേഡ് -2 (സിവിൽ)- യൂണിവേഴ്സിറ്റീസ് ഇൻ കേരള തസ്തികയിലേക്കുള്ള തെരഞ്ഞെടുപ്പിനായി കേരള പബ്ലിക് സർവീസ് കമ്മീഷൻ 29ന് രാവിലെ ഏഴു മുതൽ 8.50 വരെ നടത്തുന്ന ഒഎംആർ പരീക്ഷാ കേന്ദ്രത്തിൽ മാറ്റം.
ജില്ലയിൽ സെന്റർ നമ്പർ 1046 -ലജനത്തുൽ മുഹമ്മദീയ ഹയർ സെക്കൻഡറി സ്കൂൾ, ആലപ്പുഴ കളക്ടറേറ്റിന് സമീപം എന്ന പരീക്ഷാ കേന്ദ്രം ലഭിച്ച രജിസ്റ്റർ നമ്പർ 1320584 മുതൽ 1320783 വരെയുള്ള ഉദ്യോഗാർഥികൾ, അവർക്ക് ലഭിച്ചിട്ടുള്ള അഡ്മിഷൻ ടിക്കറ്റും അസൽ തിരിച്ചറിയൽ രേഖയുമായി ടിഡി ഹയർ സെക്കൻഡറി സ്കൂൾ ജനറൽ ആശുപത്രിക്ക് തെക്ക് വശം, ആലപ്പുഴ എന്ന പരീക്ഷാ കേന്ദ്രത്തിൽ ഹാജരാകേണ്ടതാണ്.