വിദേശവാസം ഒരു വ്യക്തിയുടെ ജീവിതത്തെ എത്രത്തോളം സ്വാധീനിക്കുമെന്ന വിഷയത്തിൽ സോഷ്യൽ മീഡിയയിൽ വലിയൊരു ചർച്ച കൊഴുക്കുകയാണ്. റൂചി എന്ന ഇൻസ്റ്റാഗ്രാം കണ്ടെന്റ് ക്രിയേറ്റർ പങ്കുവെച്ച ഒരു വിഡിയോയാണ് ഈ വാദപ്രതിവാദങ്ങൾക്ക് കാരണമായത്.
ജീവിതത്തിൽ വലിയൊരു മാറ്റം ആഗ്രഹിക്കുന്നവർ വെറും അഞ്ച് അല്ലെങ്കിൽ ആറ് വർഷത്തേക്ക് ഇന്ത്യ വിട്ട് വിദേശത്തേക്ക് മാറണമെന്നാണ് ഇവർ വിഡിയോയിലൂടെ നിർദ്ദേശിക്കുന്നത്.
അപരിചിതമായ സാഹചര്യങ്ങളിൽ ഒറ്റയ്ക്ക് ജീവിക്കുമ്പോൾ ഉണ്ടാകുന്ന അനുഭവങ്ങൾ മനുഷ്യനെ കൂടുതൽ ആത്മവിശ്വാസമുള്ളവരും സ്വതന്ത്രരുമാക്കുമെന്നും, ഇതിനൊപ്പം മികച്ച സാമ്പത്തിക ഭദ്രത നേടാൻ ഇത് സഹായിക്കുമെന്നും ഇവർ വ്യക്തമാക്കുന്നു.
വളരെ പെട്ടെന്ന് വൈറലായ ഈ വിഡിയോയോട് സമ്മിശ്ര പ്രതികരണങ്ങളാണ് ആളുകൾ പങ്കുവെക്കുന്നത്. ഒരു വിഭാഗം ആളുകൾ ഈ ആശയത്തെ പൂർണമായി പിന്തുണയ്ക്കുകയും വിദേശത്തേക്ക് കുടിയേറാനുള്ള പ്രായോഗിക വഴികളെക്കുറിച്ച് അന്വേഷിക്കുകയും ചെയ്യുമ്പോൾ, വലിയൊരു വിഭാഗം ഇതിനെതിരെ രംഗത്തെത്തിയിട്ടുണ്ട്.
സ്വന്തം നാട്ടിൽ തന്നെ കഠിനാധ്വാനം ചെയ്താൽ മികച്ച വിജയവും സാമ്പത്തിക വളർച്ചയും കൈവരിക്കാനാകുമെന്നും അതിനായി രാജ്യം വിടേണ്ടതില്ലെന്നുമാണ് ഇവരുടെ വാദം. കൂടാതെ വിദേശത്ത് നേരിടേണ്ടി വരുന്ന വംശീയ വിവേചനങ്ങളെക്കുറിച്ചുള്ള ആശങ്കകളും പലരും കമന്റുകളിലൂടെ പങ്കുവെക്കുന്നുണ്ട്.
Tags : MovingAbroad ViralVideo InstagramDebate LifeAbroad NRI