കോട്ടയം: കോട്ടയം പാർലമെന്‍റ് മണ്ഡലത്തിൽ യുഡിഎഫ് സ്ഥാനാർഥി കെ. ഫ്രാൻസിസ് ജോർജ് അറുപതിനായിരത്തിനും എൺപതിനായിരത്തിനും ഇടയ്ക്കുള്ള ഭൂരിപക്ഷത്തിൽ വിജയിക്കുമെന്ന് യുഡിഎഫ് കോട്ടയം പാർലമെന്‍റ് മണ്ഡലം കേന്ദ്ര ഇലക്‌ഷൻ കമ്മിറ്റി.
പുതുപ്പള്ളി,കോട്ടയം, കടുത്തുരുത്തി, പാലാ, പിറവം, ഏറ്റുമാനൂർ മണ്ഡലങ്ങളിൽ ഫ്രാൻസിസ് ജോർജ് ഭൂരിപക്ഷം കരസ്ഥമാക്കും. വൈക്കം മണ്ഡലത്തിൽ എൽഡിഎഫ് നേരിയ ഭൂരിപക്ഷം നേടും. സംസ്ഥാന സർക്കാരിനെതിരേ അതിശക്തമായ പ്രതിഷേധം രേഖപ്പെടുത്താൻ ജനങ്ങൾ ഒറ്റക്കെട്ടായി മുന്നോട്ടു വന്ന സ്ഥിതിവിശേഷമാണ് തെരഞ്ഞെടുപ്പിൽ ഉണ്ടായതെന്നും യോഗം വിലയിരുത്തി.
യോഗത്തിൽ ഇലക്‌ഷൻ കമ്മിറ്റി ചെയർമാൻ തിരുവഞ്ചൂർ രാധാകൃഷ്ണൻ എംഎൽഎ അധ്യക്ഷത വഹിച്ചു. കേരള കോൺഗ്രസ് ചെയർമാൻ പി. ജെ. ജോസഫ്, ജനറൽ കൺവീനർ മോൻസ് ജോസഫ് എംഎൽഎ, കെ. സി. ജോസഫ്, മാണി സി കാപ്പൻ എംഎൽഎ, റോയി കെ. പൗലോസ്, ജോയി ഏബ്രഹാം, ടോമി കല്ലാനി, ഇ. ജെ. ആഗസ്തി, നാട്ടകം സുരേഷ്, ഫിൽസൺ മാത്യൂസ്, അസീസ് ബഡായി, ജയ്സൺ ജോസഫ്, കെ. ഫ്രാൻസിസ് ജോർജ് തുടങ്ങിയവർ പങ്കെടുത്തു.