എന്നാല്, ഇവരില് ഒമ്പത് പ്രതികള്ക്ക് ഇനി പത്തു വര്ഷം പരോള് പോലുമില്ലാതെ ജയിലില് തുടരേണ്ടിവരും. പുതുതായി ശിക്ഷിക്കപ്പെട്ട കെ.കെ. കൃഷ്ണനും ജ്യോതി ബാബുവും ഇപ്പോള് മുതല് ജീവപര്യന്തം ശിക്ഷ അനുഭവിക്കണം.
നിയമവിരുദ്ധമായി സംഘംചേരല്, ആയുധങ്ങളുമായി കലാപമുണ്ടാക്കല്, സ്ഫോടക നിയമം തുടങ്ങിയ മറ്റു കുറ്റങ്ങള്ക്ക് കുറഞ്ഞ ശിക്ഷ വിധിച്ചെങ്കിലും ശിക്ഷ ഒന്നിച്ചനുഭവിച്ചാല് മതിയെന്നും വ്യക്തമാക്കിയിരുന്നു.
എന്നാല്, അപ്പീല് പരിഗണിച്ച ഹൈക്കോടതി ഡിവിഷന് ബെഞ്ച്, കൊലപാതകക്കുറ്റമടക്കം മറ്റ് കുറ്റകൃത്യങ്ങള്ക്കു പുറമേ ഗൂഢാലോചനക്കേസിലും ആറു പേര് പ്രതികളാണെന്ന് കണ്ടെത്തിയിരുന്നു. ഇതേത്തുടര്ന്നാണ് ഒരു ജീവപര്യന്തം തടവുശിക്ഷകൂടി ഇവര്ക്കു വിധിച്ചത്. തടവിനു പുറമേ പ്രതികള്ക്കു പിഴശിക്ഷയുമുണ്ട്.
പിഴത്തുകയായ പന്ത്രണ്ടര ലക്ഷം രൂപയില്നിന്ന് ഏഴ് ലക്ഷം ടി.പി. ചന്ദ്രശേഖരന്റെ ഭാര്യയും അപ്പീല് ഹര്ജിക്കാരിയുമായ കെ.കെ. രമയ്ക്കും അഞ്ച് ലക്ഷം മകന് അഭിനന്ദിനും നഷ്ടപരിഹാരമായി നല്കാനാണ് നിര്ദേശം.
ശിക്ഷാ വിധിക്കുശേഷം, മരണപ്പെട്ട 13-ാം പ്രതി കുഞ്ഞനന്തനുവേണ്ടി ഭാര്യ വി.പി. ശാന്തയാണ് അപ്പീല് നല്കിയിരുന്നത്. കുഞ്ഞനന്തന് ചുമത്തിയ പിഴ സംഖ്യ ഇവരില്നിന്ന് ഈടാക്കാമെന്നും ഉത്തരവില് വ്യക്തമാക്കിയിട്ടുണ്ട്.