Deepika
ADVERTISEMENT
ഏഷ്യൻ റബർ അവധി വ്യാപാര
ഏഷ്യൻ റബർ അവധി വ്യാപാരകേന്ദ്രങ്ങളിൽ ഉത്പന്ന വില തിളച്ചുമറിഞ്ഞു. ഊഹക്കച്ചവടക്കാർ സൃഷ്ടിച്ച കുതിപ്പിൽ റബർ പതിനഞ്ച് വർഷത്തെ ഉയർന്ന നിലവാരം ദർശിച്ചു. ഭക്ഷ്യഎണ്ണ ഇറക്കുമതി തീരുവയിൽ വരുത്തിയ ഇളവ് നാളികേര മേഖലയിൽ ആശങ്ക പടർത്തി. ഉത്സവ സീസണിലെ അമിത വിലക്കയറ്റം തടയാൻ പാം ഓയിൽ, സൂര്യകാന്തി എണ്ണകളുടെ ഇറക്കുമതി കൂടുതൽ സുഗമമാക്കി. കുരുമുളക് പുതിയ ദിശ തേടുന്നു. കാലാവസ്ഥാ വ്യതിയാനത്തിൽ ശൈത്യകാലത്തിന്റെ വരവ് വൈകുമോ? ചുക്ക് വിലക്കയറ്റത്തെ സ്റ്റോക്കിസ്റ്റുകൾ ഉറ്റുനോക്കുന്നു.
അന്താരാഷ്ട്ര റബർ മാർക്കറ്റിൽ അതിശക്തമായ മുന്നേറ്റം. ജപ്പാനിലെ ഒസാക്ക എക്സ്ചേഞ്ചിൽ റബർ അവധി വില 15 വർഷത്തെ ഉയർന്ന തലത്തിലേക്ക് സഞ്ചരിച്ചു. വെള്ളിയാഴ്ച ഫെബ്രുവരി അവധി വില കിലോയ്ക്ക് 450 യെന്നായി. ഒക്ടോബർ അവധി 468 യെൻ വരെയും കയറി.
സാങ്കേതികമായി ഒസാക്കയിൽ റബർ ബുള്ളിഷ് ട്രെൻഡിലാണ്. ഫെബ്രുവരി അവധിക്ക് 444 യെന്നിൽ സപ്പോർട്ടുണ്ട്. ഈ താങ്ങ് നിലനിർത്തിയാൽ 455-460 യെന്നിലേക്കും, അടുത്ത ചുവടിൽ 478 യെന്നിനെ ലക്ഷ്യമാക്കാം. കഴിഞ്ഞ വാരം ആറര ശതമാനം വില ഉയർന്നു, അതായത് 27 യെൻ. ഇത്ര ശക്തമായ റാലിയിൽ ഫണ്ടുകൾ ലാഭമെടുപ്പ് നടത്തിയിട്ടില്ല. അവർ അതിന് നീക്കം നടത്തിയാൽ 443 യെന്നിലേക്കും തുടർന്ന് 438 യെന്നിലേക്കും തിരുത്തലിനു സാധ്യത.
പരക്കംപാഞ്ഞ് ഊഹക്കച്ചവടക്കാർ
സെപ്റ്റംബർ 18ന് അവസാനിച്ച വാരം അവധി വ്യാപാരത്തിൽ ഓപ്പറേറ്റർമാർ ഏകദേശം നാല് ലക്ഷം ടണ്ണിന് മുകളിൽ പൊസിഷനുകൾ പെട്ടെന്ന് ഒഴിവാക്കി. ഒറ്റ ആഴ്ചയിൽ ഇത്തരം ഒരു പ്രതിഭാസം അപൂർവമാണ്. ഇതിനിടെ മഴ വീണ്ടും ശക്തമാകുമെന്ന തായ് കാലാവസ്ഥാ റിപ്പോർട്ട് നിക്ഷേപകരെ പുതിയ വാങ്ങലുകൾക്ക് തിങ്കളാഴ്ച മുതൽ പ്രേരിപ്പിച്ചു. ബുധനാഴ്ച വരെ ജപ്പാൻ ദേശീയ അവധിയായിരുന്നെങ്കിലും ഈ മൂന്ന് ദിവസങ്ങളിൽ ഇടപാടുകൾക്ക് എക്സ്ചേഞ്ച് അവസരം നൽകിയതും ശ്രദ്ധേയം.
ചൈനയിൽ ആയിരുന്നെങ്കിൽ ഇത്തരം സന്ദർഭങ്ങളിൽ കൃത്രിമങ്ങൾ അരങ്ങേറും, എന്നാൽ ജപ്പാനിൽ അതിനുള്ള സാധ്യത ഒരു ശതമാനം പോലുമുണ്ടാവില്ല. അപ്രതീക്ഷിത വാങ്ങൽ താത്പര്യം കണ്ട് ഷോർട്ട് കവറിംഗിനായി ഒരു വിഭാഗം ഊഹക്കച്ചവടക്കാർ പരക്കം പാഞ്ഞു.
2011 ഫെബ്രുവരിയിൽ രേഖപ്പെടുത്തിയ 535 യെൻ ആണ് റബറിന്റെ റിക്കോർഡ് വില. നിലവിലെ ബുൾ റാലിയിൽ റെക്കോർഡ് മറികടക്കുമോയെന്ന് ഇപ്പോൾ വിലയിരുത്താൻ സമയമായിട്ടില്ല. ഹ്രസ്വകാലയളവിലേക്ക് വീക്ഷിച്ചാൽ 478 യെൻ വരെ മുന്നേറാം. അതായത് ഫെബ്രുവരിയിലെ ഉയർന്ന വിലയായ 378 യെന്നിൽ നിന്ന് 100 യെന്നിന്റെ കുതിപ്പ്. 500 യെന്നിൽ വിപണിക്ക് മനഃശാസ്ത്രപരമായ പ്രതിരോധം നേരിടാം.
ചൈനയിൽ ഷാങ്ഹായ് എക്സ്ചേഞ്ചിൽ ജനുവരി അവധി 19,600 യുവാനിലേക്കു കയറി. ആഗോള റബർ വിപണിയിലെ വാങ്ങൽ താത്പര്യം ശക്തമാകുന്നതിന്റെ സൂചനയായി ഇതിനെ വിലയിരുത്താം. സിംഗപ്പുർ എക്സ്ചേഞ്ചിലും റബർ വില ഉയർന്നു. തായ്ലൻഡിലെ കാലാവസ്ഥാ സാഹചര്യം, തെക്കുകിഴക്കൻ ഏഷ്യയിലെ ഉത്പാദന ലഭ്യത, ചൈനീസ് ഡിമാൻഡ്, ജാപ്പനീസ് യെന്നിന്റെ ചാഞ്ചാട്ടം എന്നിവ ഈ വാരം വിപണിയുടെ ദിശ നിർണയിക്കും. തായ്ലൻഡിൽ കനത്ത മഴയും വെള്ളപ്പൊക്കവും ഉണ്ടാകുമെന്ന കാലാവസ്ഥാ സൂചനയുണ്ട്. ബാങ്കോക്കിൽ റബർ കിലോയ്ക്ക് 268 രൂപയിൽനിന്ന് 271 രൂപയായി.
സംസ്ഥാനത്ത് അനുകൂല കാലാവസ്ഥയിൽ മരങ്ങളിൽ നിന്നുള്ള യീൽഡ് ഉയരാം. നിലവിൽ ലാറ്റക്സ് കിലോയ്ക്ക് 193 രൂപയിലും നാലാം ഗ്രേഡ് 277 രൂപയിലുമാണ്. ദീപാവലിക്ക് മുന്നേ പരമാവധി റബർ ശേഖരിക്കാൻ ഉത്തരേന്ത്യൻ വ്യവസായികൾ ശ്രമിക്കാം.
ഭക്ഷ്യഎണ്ണ: തീരുവയിൽ ഇടപെട്ട് കേന്ദ്രം
ഉത്സവ സീസണായതിനാൽ ഭക്ഷ്യഎണ്ണ വിപണിയിലെ അനിയന്ത്രിതമായ വിലക്കയറ്റം നിയന്ത്രിക്കാൻ സോയാബീൻ, പാം ഓയിൽ, സൂര്യകാന്തി എണ്ണ എന്നിവയുടെ ഇറക്കുമതി ഡ്യൂട്ടി കേന്ദ്രം വെട്ടിക്കുറച്ചു. ശുദ്ധീകരിച്ച സൺഫ്ലവർ ഓയിലിന്റെ ഇറക്കുമതി തീരുവ 32.5 ശതമാനത്തിൽനിന്ന് 22.5 ശതമാനമാക്കി. അതേസമയം, ക്രൂഡ് സോയാബീൻ ഓയിൽ, ക്രൂഡ് പാം ഓയിൽ തീരുവ 10ൽ നിന്ന് 5 ശതമാനമാക്കി.
ദീപാവലി വരെയുള്ള കാലയളവിലെ വിലസ്ഥിരത മുന്നിൽ കണ്ടുള്ള നീക്കം ആഭ്യന്തര ഭക്ഷ്യഎണ്ണയുടെ ലഭ്യത ഉയർത്താം. ഒപ്പം വിലക്കയറ്റം പിടിച്ചുനിർത്താനും ഉപകരിക്കും. കൂടുതൽ ഇറക്കുമതികൾക്ക് വ്യവസായികളെ ഇത് പ്രോത്സാഹിപ്പിക്കാം.
പാം ഓയിലും സൂര്യകാന്തി എണ്ണയും കേരളത്തിലെ ഉപഭോക്താക്കൾക്കിടയിൽ വ്യാപകമായി ഉപയോഗിക്കുന്നുണ്ട്. വ്യവസായികൾ വെളിച്ചെണ്ണ വില അമിതമായി ഉയർത്തുന്ന ഘട്ടങ്ങളിൽ കുടുംബ ബജറ്റിന് ആശ്വാസം നൽകുന്നതിലും ഇറക്കുമതി പാചക എണ്ണകൾക്ക് വലിയ പങ്കുണ്ട്. എന്നാൽ മറ്റ് എണ്ണകളുടെ ഡ്യൂട്ടി ഇളവ് വെളിച്ചെണ്ണയിൽ സമ്മർദം ഉളവാക്കാം. കൊച്ചിയിൽ വെളിച്ചെണ്ണ ക്വിന്റലിന് 100 രൂപ കുറഞ്ഞ് 25,300 രൂപയിലും കാങ്കയത്ത് 175 രൂപ താഴ്ന്ന് 21,675 രൂപയിലും നിലകൊണ്ടു. മുൻവാരംതന്നെ സൂചന നൽകിയതാണ് വിദേശ ഭക്ഷ്യഎണ്ണകൾക്ക് മുന്നിൽ വെളിച്ചെണ്ണ വഴുതുമെന്ന്. പുതിയ സാഹചര്യത്തിൽ നാളികേര ഉത്പന്നങ്ങൾ അൽപം പിരിമുറുക്കത്തിലാവാം.
കുരുമുളകിൽ പിടിമുറുക്കി കർഷകർ
ഇന്ത്യൻ കുരുമുളക് പുതിയ ദിശ തേടുന്നു. ഉത്പന്ന ക്ഷാമം രൂക്ഷമായി തുടരുമ്പോഴും നിരക്ക് ഇടിക്കാനുള്ള എല്ലാ ശ്രമങ്ങളും ഉത്തരേന്ത്യൻ വ്യവസായികൾ തുടരുന്നു. ദീപാവലി വരെയുള്ള കാലയളവിലേക്ക് വൻതോതിൽ ചരക്ക് കറിമസാല വ്യവസായികൾക്ക് ആവശ്യമുണ്ട്. ഇതിനിടെ കാലാവസ്ഥാ വ്യതിയാനത്തിൽ അടുത്ത സീസണിൽ വിളവ് ചുരുങ്ങുമെന്ന ആശങ്കയിൽ സ്റ്റോക്കിസ്റ്റുകളും കർഷകരും മുളകിൽ പിടിമുറുക്കി.
കയറ്റുമതി വിപണിയിൽ ഇന്ത്യ സജീവമല്ല. എന്നാൽ ചുരുക്കം ചില യൂറോപ്യൻ രാജ്യങ്ങളിൽ നിന്നുള്ള ഓർഡറുകൾക്ക് ആവശ്യമായ മലബാർ മുളക് അവർ ശേഖരിക്കുന്നുണ്ട്. വിദേശ ഓർഡറുകളെക്കുറിച്ചുള്ള വിവരങ്ങൾ കയറ്റുമതി ലോബി അതീവ രഹസ്യമാക്കുകയാണ്.
കൊച്ചി ഗാർബിൾഡ് കുരുമുളക് ക്വിന്റലിന് 71,900 രൂപയിലാണ്. ഇന്ത്യൻ ആഭ്യന്തര വില ടണ്ണിന് 7625 ഡോളറാണ്. ഇത് ഇന്തോനേഷ്യൻ കുരുമുളകിനേക്കാൾ ഏകദേശം 780 ഡോളറും, വിയറ്റ്നാമിനേക്കാൾ 1530 ഡോളറും ബ്രസീലിനേക്കാൾ ഏകദേശം 1760 ഡോളറും കൂടുതലാണ്. അതേസമയം, നമ്മുടെ വിലയേക്കാൾ 1400 ഡോളർ ഉയർത്തി 9250 ഡോളറാണ് മലേഷ്യൻ മുളക് വില. വില കൂടുതലെങ്കിലും അതിന് വിദേശ ബയർമാരുണ്ടെന്നത് ശ്രദ്ധേയം.
ചുക്കിന് ഉത്സാഹമില്ല
എൽ നിനോ പ്രതിഭാസത്തിനിടയിൽ രാജ്യത്ത് ശൈത്യകാലത്തിന്റെ വരവിന് കാലതാമസം സംഭവിക്കുമോയെന്ന ആശങ്കയിലാണ് ചുക്ക് ഉത്പാദകർ. തണുപ്പ് മുന്നിൽ കണ്ട് ചുക്ക് സംഭരണത്തിന് അന്തർസംസ്ഥാന വ്യാപാരികൾ ഇനിയും ഉത്സാഹം കാണിച്ചിട്ടില്ല. വൻ ഓർഡറുകൾ ഉത്തരേന്ത്യയിൽനിന്നും ശൈത്യകാലത്ത് എത്താറുണ്ട്. വിവിധയിനം ചുക്ക് ക്വിന്റലിന് 34,000-36,000 രൂപയിലാണ്.
ലേലകേന്ദ്രങ്ങൾ സജീവമാക്കി ഏലക്ക
ഏലക്ക പ്രവാഹം ആഭ്യന്തര വ്യാപാരികളെയും കയറ്റുമതിക്കാരെയും ലേല കേന്ദ്രങ്ങളിൽ സജീവമാക്കി. പിന്നിട്ട വാരം ഏകദേശം 9.40 ലക്ഷം കിലോ ഏലക്ക വിൽപനയ്ക്ക് ഇറങ്ങി. ഇതിൽ 8.9 ലക്ഷം കിലോ ചരക്കും വിറ്റഴിഞ്ഞു. ഇത്ര കനത്ത അളവിൽ ചരക്ക് വരവിനിടയിലും കേവലം 56,977 കിലോ മാത്രമാണ് ബാക്കി വന്നത്. അതായത് ലേലത്തിന് ഇറങ്ങിയ ചരക്കിൽ ഏകദേശം 94 ശതമാനവും വിറ്റു. ശക്തമായ ഡിമാൻഡ് ആകർഷകമായ വിലയ്ക്ക് അവസരം ഒരുക്കി. ശരാശരി ഇനങ്ങൾ ഏകദേശം 3200 രൂപ ഉറപ്പുവരുത്തി. കഴിഞ്ഞ വർഷം ഇതേ സന്ദർഭത്തിൽ ലഭിച്ച വില കിലോയ്ക്ക് 2540 രൂപയാണ്. അതായത് ഒരു വർഷത്തിനിടെ ഏലക്ക വിലയിൽ ഏകദേശം 26 ശതമാനം വർധന.
Tags : Business Entrepreneur Startup Market High-quality rubber
ADVERTISEMENT
ADVERTISEMENT
ADVERTISEMENT
ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN
Email
Facebook
Whatsapp
Linked In
Telegram