മാനന്തവാടി : പട്ടിക വര്ഗ വിഭാഗത്തിലെ കുട്ടികള്ക്ക് ജനന സര്ട്ടിഫിക്കറ്റ് ജില്ലയില് ആദ്യമായി സ്പെഷല് ഡ്രൈവ് സംഘടിപ്പിച്ച് മാനന്തവാടി നഗരസഭ. തദ്ദേശ സ്വയംഭരണ വകുപ്പ് ജോയിന്റ് ഡയറക്ടറുടെ നിര്ദേശത്തെത്തുടര്ന്നാണ് അടിയന്തര അദാലത്ത് നടത്തിയത്. അദാലത്തില് 100 ഓളം പേര്ക്ക് സര്ട്ടിഫിക്കറ്റുകള് കൈമാറി.
പട്ടിക വര്ഗ വിഭാഗത്തില്പ്പെടുന്ന കുട്ടികളെ എണ്ണം തികയ്ക്കുന്നതിനായി സ്കൂളില് ചേര്ത്തിട്ടുണ്ടെങ്കിലും ഇവരില് ഭൂരിഭാഗം പേര്ക്കും ശരിയായ രീതിയില് ജനന സര്ട്ടിഫിക്കറ്റ് ഇല്ലെന്ന വ്യാപക പരാതികള് ഉയര്ന്നിരുന്നു. ഇത് കുട്ടികളുടെ ഉപരിപഠനമുള്പ്പെടെയുള്ള കാര്യങ്ങളില് വളരെയേറെ ബുദ്ധിമുട്ടുകള് സൃഷ്ടിച്ചിരുന്നു. ഈയൊരു സാഹചര്യത്തിലാണ് ലഘുവായ നടപടി ക്രമങ്ങളിലൂടെ രേഖകള് പരിശോധിച്ച് തത്സമയം ജനന സര്ട്ടിഫിക്കറ്റുകള് കൈമാറിയത്.
ആവശ്യമായവര്ക്ക് വരും ദിവങ്ങളിലും രേഖകള് കൈമാറുമെന്ന് അധികൃതര് അറിയിച്ചു. നഗരസഭ ഹാളില് നടത്തിയ സ്പെഷല് ഡ്രൈവ് ചെയര്പേഴ്സന് ജേക്കബ് സെബാസ്റ്റ്യന് ഉദ്ഘാടനം ചെയ്തു.
നഗരസഭ ജനന മരണ വിഭാഗം രജിസ്ട്രാര് എസ്. ഷൈജു, സബ് രജിസ്ട്രാര് എ. തുഷാര, അശ്വതി രാജന്, രഞ്ജുഷ, കെ.വി. അശ്വതി, ഡോമിനിക് ലോബോ, പി.എസ്. വിപിന് എന്നിവര് അദാലത്തിന് നേതൃത്വം നല്കി.
Tags : Local News Nattuvishesham Wayanad